Tema e ditës

Rreth 50 emigrantë janë gjetur të pajetë në një kamion të braktisur në autostradën A4 që lidh Hungarinë me Vjenën në Austri, një zonë e ndodhur ndërmjet lokaliteteve Neusiedl dhe Parndorf. Sipas gazetës vendase “Krone”, refugjatët duhet të jenë mbytur brenda mjetit që ishte parkuar në anë të rrugës prej të paktën dy ditësh. Policia austriake njoftoi se të mërkurën tre trafikantë të qenieve njerëzore ishin arrestuar jo shumë larg vendit ku u gjet kamioni. Njëri prej tyre kishte transportuar me furgon përtej kufirit austriak të paktën 34 emigrantë, të cilët pas kësaj i kanë detyruar të zbresin përgjatë autostradës. Në mesin e tyre kishte edhe 10 fëmijë. Refugjatët i thanë forcave të rendit sesi ishin ngjeshur në furgonin e vogël ku ishte “thuajse e pamundur të merrje frymë”. Ata rrëfejnë se për këtë arsye dhe i kanë kërkuar në mënyrë të vazhdueshme drejtuesit të mjetit që të ndalonte, por ai e ka bërë veshin shurdh e nuk ka ndaluar deri në hyrjen në Austri. Sipas “Krone”, policia austriake ka nisur një operacion të gjerë kërkimi të shoferit të kamionit, ku u gjetën trupat e të vdekurve. / Top Channel

Nëse hidhni plehrat në rrugë atëherë do të paguani 5 mijë deri në 20 mijë lekë të reja gjobë. Nëse ndërtoni pa leje do të paguani 5 mijë euro. Janë këto disa nga masat që ka marrë Bashkia e Tiranës për të mbrojtur hapësirat publike dhe për të ulur nivelin e ndotjes në Tiranë. Burime nga bashkia thonë se policia bashkiake do të paloset me kamera të posaçme për të dokumentuar shkeljet. Kjo do të arrihet falë kamerave që do të kenë patrullat e bashkisë, kur të lëvizin në Kryeqytet. Shkeljet Përveç gjobës prej 5000 euro që do të vendoset kur ndërtoni pa leje, do të paguhet edhe pastrimi që do të bëjnë institucionet e bashkisë si dhe kthimi i saj në identitet. Gjobë do të vendoset edhe për rastet kur dëmtoni pronën publike, kur vidhen kapakët e pusetave apo kur dëmtohet monumentet e kulturës. Ata individë apo biznese të cilat u vënë flakën kazanëve të plehrave do të paguajnë një gjobë prej 400 euro. Bashkia e Tiranës ka parashikuar gjobitjen edhe të personave që urinojnë në ambientet publike. Për urinimin në këto ambiente do të paguhet një gjobë duke filluar nga 5 mijë deri në 20 mijë lekë të reja. Burime nga Bashkia e Tiranës thonë se kjo masë do të zbatohet pasi në Kryeqytet do të vendosen banjo publike. Tashmë janë vendosur në qendër të Tiranës dy banjo publike. Gjoba do të ketë edhe për pronarët e qenve, në rastet kur i lejojnë ata të ndotin ambientin. Paketa e masave të bashkisë ka përcaktuar se do të ketë gjobë edhe kur nuk hidhni në koshat e plehrave bishtat e cigareve apo çamçakëzat. Burime nga bashkia thonë se gjobat në këtë rastet do të jenë më të ulta. Gjobat do të vendosen edhe për kamionët që ndotin qytetin, në rastet kur hedhin mbetje në rrugë. Në të gjitha rastet Bashkia e Tiranës do të publikojë emrat e shkelësve në çdo rast, në mënyrë që të sensibilizohen qytetarët Aksioni Paketa e masave të Bashkisë së Tiranës parashikon se gjobat nuk do të ekzekutohen nga institucionet e bashkisë por nga Përmbarimi. Në këtë aksion do të angazhohen tatimet e Bashkisë së Tiranës, Drejtoria e Konsumatorëve, Policia Bashkiake dhe një sërë institucionesh të tjera. Penalitete janë paralajmëruar ditën e djeshme dhe nga Kryebashkiaku Erion Veliaj. “Duke filluar nga nesër (sot) Bashkia e Tiranës do të botojë një listë me sanksione për të gjithë ndotësit e qytetit. Do të ketë një sistem gjobash për individët dhe bizneset që ndotin, si dhe për të gjithë ata që urinojnë në vende publike apo që ndërtojnë pa leje”, - u shpreh Veliaj gjatë prezantimit të administratorit të Njësisë nr. 10, Arian Hamiti. Penalizimet Patrullat e Policisë Bashkiake do të paisen me kamera të posaçme për të filmuar shkelësit dhe për të dokumentuar të gjithë ngjarjen. Ndërsa për vjeljen e gjobave do angazhohet dhe përmbarimi Urinimi Bashkia e Tiranës ka parashikuar gjobitjen edhe të personave që urinojnë në ambientet publike. Për urinimin do të paguhet një gjobë duke filluar nga 5 mijë deri në 20 mijë lekë të reja Shkeljet Gjoba Kur hidhni plehrat në rrugë 5000-20.000 lekë Dëmtimi i pronës publike, puseta, monumente Veç gjobës edhe vlera e kthimit si ishte Djegia e kazanëve të plehrave 400 euro Ndërtim pa leje 5 mijë euro -Paguan rojen dhe pastrimin -Paguan gjelbërimin dhe kthimin në identitet Urinim në ambjentet publike 5000-20.000 lekë Kamionët që ndotin ambjentin Gjobë Hidhni bishtat e cigareve, çamçakëzin, Gjobë Kur qeni ndot ambientin, Gjobë. Burimi i informacionit , Shqiptarja.com.

Dy gazetarë televizivë amerikanë u qëlluan për vdekje gjatë një raportimi Live në Virxhinia. Lajmi është konfirmuar nga zyrtarët, raportojnë mediat ndërkombëtare. Alison Parker dhe Adam Ward, kameraman, u vranë gjatë një transmetimi Live këtë mëngjes në Moneta, Virginia, sipas stacionit televiziv ku ata punonin, WDBJ-TV. Autori i dyshuar që ka qëlluar raportohet se është larguar menjëherë nga vendngjarja, teksa nuk dihen motivet e këtij sulmi. Një video që po qarkullon në internet tregon se si gazetari merr një plagë nga një armë zjarri dhe kameramanit i bien pajisjet që po filmonte. Rreth 40 policë janë duke kërkuar të dyshuarin. Teksa nuk dihet ende gjendja e gruas që po intervistohej.

Kisha Ortodokse e Shqipërisë ka reaguar zyrtarisht pas prishjes së kishës së ‘Shën Athanasit’, duke e cilësuar atë një veprim të papërgjegjshëm dhe në shkelje flagrante me ligjin. Përmes një njoftimi të postuar në faqen zyrtare, thuhet se ‘veprime të tilla të papërgjegjshme dhe aventureske vënë në rrezik harmoninë fetare në vend, duke krijuar konflikte midis besimeve dhe komuniteteve fetare’. Reagimi i plotë i Kishës Ortodokse Shqiptare Sot, 26 gusht 2015, në orën 4 të mëngjesit, pa zbardhur dita, në mënyrë të fshehtë e tinëzare, për t’iu shmangur ballafaqimit me banorët e Dhërmiut, në Himarë, u shkatërrua nga forca të inspektoratit ndërtimor të ardhura nga zona të tjera të vendit, kisha ortodhokse e Shën Athanasit. Ishin dëshpëruese dhe fyese që në ditët tona të shihje se shkatërrimi varrosi nën gërmadha Ungjillin e shenjtë, ikonat dhe objekte të shenjta, pamje që të kujtonin përdhosjen në Kishën e Shën Marisë në Përmet, ku ato u hodhën në kamionin e plehrave. Ky veprim është në shkelje flagrante të Ligjit nr. 10057, 22.01.2009, “Për ratifikimin e marrëveshjes ndërmjet Këshillit të Ministrave të Republikës së Shqipërisë dhe Kishës Ortodhokse Autoqefale të Shqipërisë”, Neni 21/1,2: “Ndërtesat dhe objektet që shërbejnë për kryerjen e ceremonive fetare konsiderohen të shenjta nga Kisha Ortodokse Autoqefale e Shqipërisë. Ndërhyrja e autoriteteve shtetërore në to është e ndaluar, me përjashtim të rasteve të flagrancës, kur një gjë e tillë kërkohet në zbatim të një urdhri të prokurorisë, të një vendimi gjyqësor ose titulli ekzekutiv, ose në rast të kanosjes së një rreziku të afërm. 2. Paprekshmëria e hapësirës publike garantohet nga Shteti. Shteti mbron objektet dhe vendet e caktuara fetare, në përputhje me Ligjin.” Ndërhyrja u bë pa as një njoftim zyrtar ose informal, si dhe u shpërfillën klerikët tanë, përfaqësuesit arkieratik Protopresviter Atë Pandeli Mitru, Atë Efthim Bixhili, Atë Athanas Qerimi, të cilët kërkuan shpjegime për një ndërhyrje të tillë nga organet vendore. Që në fillim, ata që kishin planifikuar shkatërrimin e këtij vendi të shenjtë ishin kontradiktorë, megalomanë dhe konfuzë në deklarimet, pretendimet dhe veprimet e tyre: Deklaruan se ishte një ndërtim pa leje i bërë së fundmi dhe doli se ishte ngritur nga vetë besimtarët në fillimet e Demokracisë, në të njëjtin vend ku ngrihej kisha e rrafshuar nga komunizmi. Deklaruan që kisha ishte monument kulture dhe doli që nuk ishte e vërtetë. Deklaruan se Kisha nuk ishte pronare dhe u dëshmua me dokumente e kundërta. U deklarua se soleta ishte hedhur mbi muret e vjetra historike dhe pastaj i rrafshuan ato etj. Kjo ngjarje është një shkelje e së drejtës universale të besimit dhe laicitetit të shpallur në Kushtetutë të shtetit, i cili merr përsipër në mënyrë të njëanshme prishjen e një objekti kulti ortodoks dhe në vend të tij të ngrejë një tjetër, duke marrë iniciativa dhe angazhime që nuk i takojnë dhe përbëjnë ndërhyrje në çështjet e brendshme fetare. Veprime të tilla të papërgjegjshme dhe aventureske vënë në rrezik harmoninë fetare në vend, duke krijuar konflikte midis besimeve dhe komuniteteve fetare. Gjithashtu, në një kohë kur Kisha Ortodhokse Autoqefale e Shqipërisë, së bashku me Komunitetin e Sant Egidios dhe Kishën Katolike në Shqipëri, në fillim të muajit shtator, përgatiten për të pritur veprimtarinë e madhe ndërfetare “Paqja është gjithmonë e mundshme”, ku do të marrin pjesë 500 delegatë, nga 30 besime të ndryshme nga e gjithë bota, një ngjarje historike për Shqipërinë, veprime të tilla bien ndesh me frymën që ajo promovon dhe zbeh imazhin e vendit dhe popullit tonë. Shqip

Gazeta gjermane “Frankfurter Allgemeiner Zeitung”, ka rezervuar një hapësirë edhe për situatën në Shqipëri, vendin ku sipas saj, gjallon krimi i organizuar dhe politika nuk vepron pasi është vetë e përfshirë. “Shqipëria, vendi ku lulëzon hashashi”, është titulli i që e përditshmja gjermane i ka vënë reportazhit për Shqipërinë. “Policët që ndjekin banditët rrezikojnë jetën. Në qershor një oficer policie i cili ndaloi makinën e një bosi droge u vra me armë zjarri. Prodhimi dhe kontrabanda janë aq përfitues saqë gangsterët kanë mjaftueshëm para për të lyer rrotën e policëve, prokurorëve e gjykatësve”, shkruan “FAZ”. Në këtë artikull, e përditshmja gjermane shkruan për politikë klienteliste të lidhur dhe financuar ngushtë nga klanet mafioze. “Një anëtar i klanit, i cili hyn në politikë, mbështetet nga fshati apo qyteza, cilado qoftë përkatësia politike e tij. Si kundërshpërblim, ai i shërben klientelës. Kriminaliteti i organizuar synon të jetë pranë pushtetit; paragjykimet politike apo ideologjike janë të huaja për të” Sipas kësaj gazete, një kulm i bashkëpunimit mes politikës dhe kriminalitetit u arrit në vitin 1997, kur fonde investimesh të toleruara politikisht organizuan piramida financiare, që ofronin interesa nga 10 deri në 25%. E këtu, afro dy të tretat e shqiptarëve investuan dhe humbën kursimet e tyre. Gazeta gjermane shkruan dhe se kryeministri Edi Rama, para zgjedhjeve të qershorit shpërfilli kërkesat e ndërkombetarve duke kandiduar individë me rekorde kriminale. “Në zgjedhjet lokale të qershorit, Rama hodhi në kosh paralajmërimet eksplicite të ambasadorit amerikan dhe të disa ambasadorëve të shteteve të Bashkimit Europian dhe kandidoi persona të dyshuar për krime"./Shekulli/

Javët e fundit ka një qëndrim gjithnjë e më të fortë të politikanëve, opinionit dhe mediave perëndimore ndaj situatës së rëndë që lidh politikën me krimin e organizuar në Shqipëri. Media të mëdha dhe serioze po shkruajnë gjithnjë e më shumë për një shqetësim të madh, atë veshjes së krimit me pushtet politik. Kjo ndjeshmëri mediatike është e lidhur ngushtë edhe me ekzilin gjithnjë në rritje të shqiptarëve drejt perëndimit, reportazhe mbi fatin e të cilëve po pushtojnë ekranet dhe gazetat në shumë vende të Europës. Padyshim që ky eksod shihet edhe si një pasojë e qeverisjes së koprruptuar dhe gjendjes së mjeruar ekonomike, pasoja këto të inkriminimit dhe paaftësisë së atyre që qeverisin vendin. Qëndrimeve mediatike europiane i është shtuar sot edhe prestigjiozia Frankfurter Allgemeiner Zeitung, një gazetë që përbën opinion në botën gjermane e më gjerë. Kjo gazetë, e afërt edhe me CDU, pra që mund të konsiderohet edhe si përcjellëse e qëndrimeve zyrtare gjermane në raportet ndërkombëtare, ka shkruar e tone të forta dhe të qarta për sfidën që kryeministri shqiptar Edi Rama u bëri partnerëve perëndimorë duke kandiduar individë me rekorde kriminale. Shkrimi i "Frankfurter" vjen tri ditë para samitit të rëndësishëm të Vjenës për vendet e rajonit dhe mund të lexohet fare hapur si një paralajmërim për kryeministrin Rama se prej tij priten qëndrime të qarta për ndarjen nga bota e krimit dhe korrupsionit. Ky shkrim, që lapsi.al po e boton të plotë më poshtë, pason shumë shkrime të tjera dhe reporazhe të mediave të njohura europiane, që ngrenë të njëjtin shqetësim. Ato janë në sinkron me qëndrimet zyrtare të SHBA dhe BE që ndihen të zhgënjyera nga mosveprimet e Edi Ramës. Veç takimeve zyrtare të nivelit të lartë, ku kryeministrit shqiptar i është bërë i qartë ky qëndrim, Departamenti i Shtetit i SHBA dhe ambasada amerikane në Tiranë shkuan edhe më tej, duke treguar me gisht dhe shkruar e zezë mbi të bardhë, se në grupin parlamentar të Edi Ramës ka të paktën një trafikant të dënuar për favorizim prostitucioni. Më poshtë, shkrimi i gazetarit gjerman Karl-Peter Schwarz: VENDI KU LULËZON HASHASHI Në Shqipëri gjallon kriminaliteti i organizuar Politika jo vetëm nuk bën gjë por madje është vetë e përzierë. Policët që gjurmojnë ndonjë bandë droge rrezikojnë jetën. Nga Karl-Peter Schwarz Tiranë, gusht 2015. Vera në Shqipëri është e nxehtë dhe e thatë dhe lakrat lulëzojne shumë. Policia është e zënë duke lokalizuar ngastrat e marihuanës nëpër male. Sipas të dhënave të saj, në gjashtëmujorin e parë të vitit, rezultojnë 216 000 rrënje kanabis të shkatërruara kundrejt 530 177 në vitin 2014. Marihuana është ndër artikujt më profitabël të eksportit të vendit. Qëkurse njësitë speciale policore, në verë 2014, nisën një ofensivë kundër bastionit të drogës në Lazarat, jo larg qytetit jugor të Gjirokastrës, edhe në krahinën e Dukagjinit, pranë kufirit malazez, fshatarët kanë ndryshuar mënyrë. Ata nuk e mbjellin më hashashin rrëshiror në sipërfaqe të mëdha por në ngastra të vogla, vështirësisht të zbulueshme, nëpër male. Për një kilogram bimë të thatë (gjethe, kërcyell e lule) ata marrin 300 euro. Në Itali, ku eksportohet shumica e të korrave, kilogrami kushton 5000 euro. Policët që ndjekin banditët rrezikojnë jetën. Në qershor një oficer policie i cili ndaloi makinën e një bosi droge u vra me armë zjarri. Prodhimi dhe kontrabanda janë aq profitabël saqë gangsterët kanë mjaftueshëm para për të lyer rrotën e policëve, prokurorëve e gjykatësve. Dhe disa syresh, të përzier në afera kriminale janë madje deputetë në parlamentin shqiptar. Jana Arsovska, sociokriminologe nga SHBA, në një studim të porsapublikuar (Decoding Albanian Organized Crime, University of California Press, 2015) paraqet lidhjet e kriminalitetit të organizuar me partitë politike që në fillimet e viteve '90. Dhuna e korrupsioni, privatizimet mashtruese, ekstorsioni dhe krime të tjera, shoqëruan tranzicionin nga një regjim totalitar në demokraci. Një kulm i bashkëpunimit mes politikës e kriminalitetit u arrit në vitin 1997, kur fonde investimesh të toleruara politikisht organizuan piramida financiare, ofronin interesa nga 10 deri 25%. Afro dy të tretat e shqiptarëve investuan dhe humbën kursimet e tyre. Kolapsi i sistemit kriminal ishe pretekst i një kryengritjeje të nxitur nga ish komunistët e që çoi në rrënimin e rendit publik. Depot e ushtrisë u plaçkitën, më shumë se gjysëm milion armë zjarri dhe 1,6 milion granata e bomba përfunduan në tregun e zi të Europës Lindore e Juglindore. Situatat kaotike në plan afatgjatë veprojnë negativisht edhe për bizneset e kriminaliteti të organizuar. Ato lulëzojnë më mirë pa u dukur në zonën gri midis klientelizmit e demokracisë. Një anëtar i klanit, i cili hyn në politikë, mbështetet nga fshati apo qyteza, ciladoqoftë përkatësia politike e tij. Si kundërshpërblim, ai i shërben klientelës. Kriminaliteti i organzuar synon të jetë pranë pushtetit; paragjykimet politike apo ideologjike janë të huaja për të. Deri në zgjedhjet parlamentare të vitit 2013 në pushtet ishte PD e aleatët e saj; tani janë socialistët dhe aleanca e tyre "Për një Shqipëri europiane". Ashtu si Sali Berisha para tij, edhe Edi Rama, kryeministër socialist dhe shef i partisë premton se do të luftojë korrupsionin e kriminalitetin e organizuar. Por nuk ka ndryshuar gjë. Kurrë më parë nuk ka qenë lidhja mes qeverisë e krimit kaq e ngushtë deklaron kryetari i ri i Partisë Demokratike, Lulzim Basha. Jo më pak se 19 deputetë të koalicionit të majtë vijnë nga bota e krimit ose kanë lidhje me të. Në zgjedhjet lokale të qershorit, Rama hodhi në kosh paralajmërimet eksplicite të ambasadorit amerikan dhe të disa ambasadorëve të shteteve të Bashkimit Europian dhe kandidoi persona të dyshuar për krime. PD tërhoqi një kandidat të dënuar për drogë. PS nuk pyeti për pasojat. Në Krujë e Kavajë, dy qytete të vogla në Shqiperinë e Mesme, kandidatë socialistë të arrestuar më parë për trafik narkotikësh fituan zgjedhjet. Se sa të dobishme mund të jenë kontaktet politike për një gangster, u dëshmua në tetor të vitit të shkuar. Atëhere policia shqiptare, malazeze e italiane bashkëpunuan në operacionin e koduar Laguna Viluni në bregdetin verior shqiptar për të kapur një bandë të specializuar në kontrabandën e drogës drejt Italisë përmes gomoneve. Disa "peshq të vegjël" u kapën, si dhe armë, para e drogë u sekuestruan. Por arrestimi i shefit të bandës, Bardhok Pllanaj, dështoi. Deputeti Mark Frroku i aleancës së majtë të kryeministrit Rama, e futi Pllanajn në veturën e tij dhe refuzoi ndërhyrjen e policisë duke pretenduar imunitet parlamentar. Pasi u konsultua me eprorët, policia e la të ikte bosin e drogës. Mark Frroku u zgjodh deputet nga listat e PS në vitin 2013. Mediat shqiptare raportonin asokohe se ndaj tij kishte një hetim në Belgjikë. Ai dyshohej se tok me tre të tjerë kishte vrarë një person në vijim të një konflikti në aktivitetin e prostitucionit. Në janar të këtij viti, Interpoli përcolli për të një urdhër arresti i cili u fsheh nga drejtori i policisë dhe nga shefi i zyrës shqiptare të interpolit. Skandali plasi dhe të dy oficerët e policisë u larguan. Ndaj shefit të Interpolit filloi ndjekja penale ndërsa drejtori u rregullua si atashe në ambasadën shqiptare në ëashington. Që të dy i kishin marrë postet e tyre pas fitores zgjedhore të Ramës; më parë ata kishin qenë në funksione të Partisë Socialiste. Vetëm në fund të prillit u arrestua më në fund Mark Frroku. Edhe vëllai i tij, i paditur në gjyq për vrasjen e një komisari policie, gëzon proteksion nga lart. Arben Frroku i shtiu me kallashnikov duke e vrarë në një parking para benesës së tij. Pavarësisht nga provat dhe megjithë dëshminë kundra të një dëshmitari okular Frroku u shpall i pafajshëm në gjykatën e faktit. Në pranverë ai u angazhua në fushtën zgjedhore të PS në qytetin verior të Pukës. Pak para se të shprehej Apeli, ai u zhduk jashtë vendit. Në 30 qershor ai u dënua në mungesë për vrasje. Avokati i Frrokut thotë se nuk e di ku ndodhet klienti i tij. Gangsterë si vëllezërit Frroku, si rregull nuk e kanë të domosdoshme të intimidojnë policë, prokurorë e gjykatës, aq më pak të ushtrojnë dhunë. Në qershor u publikua një raport i hartuar me porosi të qeverisë nga ekspertë vendas e ndërkombëtarë për të shërbyer si material pune për reformën në drejtësi. Raporti përshkruan se si kriminelët ia dalin që të blejnë pafajesinë. Kjo fillon me policët, të cilët kundrejt shumave të vogla prishin provat. Prokurorët janë të gatshëm që për 1000 deri në 2000 euro të mosfillojnë çështjen penale. Goxha më shtrenjtë bëhet në gjykatë ku duhen 60 000 deri 80 000 euro për të bindur një gjyqtar për një vendim të favorshëm. Në proceset civile thuhet se gjyqtari mund të arkëtojë nga të dy palët. Ata vetë paguajnë shpesh shuma midis 100 000 deri 300 000 euro për të avancuar në karrierë si p.sh për emërime në gjykata me çështje "të kamura" apo në KLD.

Operacioni i përbashkët i Policisë së Shtetit dhe Operatorit të Shpërndarjes së Energjisë Elektrike (OSHEE) gjatë javës së fundit ka çuar në arrestimin e 24 personave, të akuzuar për vjedhje të energjisë elektrike, ndërsa janë evidentuar 47 lidhje të paligjshme në total. Sipas komunikatës së përjavshme të Policisë së Shtetit mbi këtë aksion, gjatë kësaj jave janë kryer kontrolle të përbashkëta me OSHEE-në në 5109 raste, gjatë të cilave janë ndërprerë 888 lidhje të abonentëve debitorë si dhe janë evidentuar 47 shkelës ligji, si pasojë e lidhjeve të paligjshme. Veç 24 të arrestuarve në flagrancë, janë shpallur në kërkim 8 persona dhe ndiqen penalisht në gjendje të lirë 15 të tjerë. Policia e Shtetit dhe OSHEE, siç kanë njoftuar prej javësh tashmë, janë të vendosur për vazhdimin e këtij aksioni deri në fund, si dhe për të çuar para drejtësisë të gjithë shkelësit e ligjit, qofshin këta individë, përfaqësues biznesesh apo edhe punonjës të OSHEE-së. / Top Channel

Gjurmët e gishtërinjve tregojnë se agresori, i asgjësuar nga pasagjerët e trenit në Francës, është një shtetas maroken i njohur shumë mirë nga autoritetet europiane si një militant i dyshuar islamik, kanë bërë disa burime të “Reuters” gjatë së shtunës. Dy persona mbetën të plagosur gjatë betejës për të mposhtur ekstremistin me kallashnikov në duar në bordin e një treni të shpejtësisë së lartë, që ishte nisur nga Amsterdami me destinacion Parisin, gjatë së premtes. Ministri i Brendshëm francez, Bernard Cazeneuve tha për reporterët se agresori njihet si një 26-vjeçar maroken, i cili është “identifikuar nga autoritetet spanjolle dhe i është raportuar agjentëve të shërbimeve sekrete franceze gjatë shkurtit të vitit 2014, për shkak të lidhjeve të tij me një lëvizje islamike radikale”. Cazeneuve nuk e bëri të ditur emrin e tij, por burime me njohuri mbi çështjen thanë se ai quhet Ayoub el Khazzani, i cili besohet të ketë fluturuar nga Berlini drejt Stambollit më 10 maj të këtij viti. Turqia është një destinacion i preferuar fluturimesh ajrore për shtetas që synojnë t’u bashkohen xhihadistëve në Siri apo edhe Irak. Sipas burimeve të antiterrorizmit në Spanjë, autoritetet spanjolle e kishin nën mbikëqyrje të dyshuarin Khazzani, përpara se ai të largohej nga Spanja drejt Francës në vitin 2014. Më pas, ai u drejtua për në Siri për t’u rikthyer sërish në Paris. Në Spanjë, ai ka jetuar në Madrid nga viti 2007 deri në 2010-n, përpara se të transferohej në qytetin portual jugor të Algecirasit. Ai madje është arrestuar një herë në Spanjë për shkelje ligjore në lidhje me drogën, thanë burime të antiterrorizmit spanjoll. Cazeneuve tha se agresori ka jetuar edhe në Belgjikë, ndërkohë që hetimet “duhet të përcaktojnë saktësisht aktivitetet dhe udhëtimet e këtij terroristi”. Sipas të përditshmes franceze “Le Voix du Nord”, i dyshuari mund të ketë lidhje me një grup të përfshirë një sulm me armë të dyshuar islamik në Belgjikë gjatë muajit janar. Qeveria belge ka konfirmuar hetimet për këtë çështje, por pa dhënë detaje të tjera. Autoritetet franceze ndodhen në gjendje të lartë gatishmërie që prej muajit janar, kur 17 persona humbën jetën gjatë të shtënave të militantëve islamikë në Paris dhe periferi, ku u prek gazeta satirike “Charlie Hebdo”. / Top Channel

Qindra emigrantë kanë kaluar të papenguar kufirin mes Greqisë dhe Maqedonisë gjatë kësaj të diele, pasi hutuan forcat e sigurisë që duken se kanë braktisur detyrën e tyre për të ndalur fluksin e refugjatëve, që përmes Ballkanit synojnë të mbërrijnë në Europë, pas disa ditësh kaosi dhe konfrontimesh. Forcat e ndërhyrjes së shpejtë kanë qëndruar në pozicionet e tyre, por kanë bërë shumë pak për të ndalur kalimin e një rryme të jashtëzakonshme emigrantësh, shumica e të cilëve refugjatë nga lufta e Sirisë dhe konflikteve të tjera të Lindjes së Mesme, bën të ditur një reporter i “Reuters” nga vendngjarja. Maqedonia deklaroi gjendjen e emergjencës gjatë së enjetes dhe mbylli kufirin e saj jugor ndaj emigrantëve që vinin me një “normë” prej 2000 personash në ditë, me synimin për të kaluar tranzit drejt Serbisë e më pas për të siguruar kalimin drejt Hungarisë, si vendi i fundit europian që i hap dyert për në “Schengen”. Fluksi i madh i emigrantëve solli skena të jashtëzakonshme dëshpërimi e vuajtjesh në kufi, ku burra, gra e fëmijë flinin nën qiellin e hapur dhe me shumë pak ndihma ushqimore apo ujë. Me justifikimin se duhej të kufizonin qasjen e emigrantëve në territorin maqedonas, forcat e ndërhyrjes së shpejtë përdorën edhe gazin lotsjellës dhe tymuese për të zmbrapsur turmat, por ditën e shtunë në mbrëmje ata u tejkaluan në numër nga mijëra e mijëra emigrantë, të cilët thyen kordonët e policisë dhe vrapuan drejt fushave të boshatisura. Shteti maqedonas, nga ana e tij, vendosi trena shtesë dhe autobusë nga i gjithë vendi, për t’i marrë emigrantët e për t’i dërguar në veri drejt Serbisë, si hapi tjetër i kalvarit të mundimeve të tyre në një udhëtim tejet të gjatë nga Lindja e Mesme, Afrika apo Azia, deri në kufinjtë e Europës. Grumbulli i emigrantëve i krijuar në Maqedoni, një vend që është përballur edhe me kritika nga agjencitë e ndihmave se nuk ka zgjeruar kapacitetet e saj për të pritur dhe procesuar më tej emigrantët, mbërriti gjatë natës në Serbi, duke mbipopulluar qendrat strehuese të këtij vendi. / Top Channel

Duke i cilësuar si heronj, Presidenti francez, Francois Hollande ka falënderuar tre burrat amerikanë të cilët neutralizuan një të armatosur në një tren, duke shmangur një tragjedi. Përmes një deklarate, edhe kryeministri britanik, David Cameron vlerësoi “kurajon e jashtëzakonshme të pasagjerëve që ndërhynë dhe ndihmuan në çarmatsojen e autorit”. Në një tjetër deklaratë, shefi i Shtëpisë së Bardhë, Barack Obama u shpreh se trimëria e burrave amerikanë ndoshta ka shmangur një tragjedi shumë më të madhe. Në konferencën e së shtunës, ministri i Brendshëm francez, bernard Cazeneuve ka thënë se identiteti i të dyshuarit pritet të konfirmohet, por besohet se ka lidhje me islamistët radikalë. I dyshuari ka jetuar në Spanjë deri në vitin 2014, ndërsa këtë vit ishte shpërngulur në Blegjikë. Autoritetet anti-terror në Paris kanë 96 orë kohë për të marrë në pyetje të dyshuarin. Ndërsa, edhe prokurorët belgë kanë hapur hetime anti-terror mëngjesin e së shtunës. Incidenti ndodhi mbrëmjen e së premtes pranë qytetit francez, Arras, ndërsa i dyshuari si autor i kësaj ngjarje, një shtetas maroken, plagosi 3 persona në një tren të shpejtësisë së lartë, i cili ishte nisur nga Amsterdami dhe kishte si destinacion Parisin, para se të neutralizohej nga dy pasagjerë të tjerë amerikanë.

Publikuar: 7:55 / 21.08.2015 Shqiptarët duket se edhe kur janë në kulmin e tentativës për të ndryshuar fatin e tyre, gjithnjë kalojnë nëpër drama dhe tragjedi. Kështu ngjan me historinë e vajzës 23-vjeçare nga Kukësi, Ela Haziraj, e cila ka humbur jetën tragjikisht në Frankfurt të Gjermanisë. E reja, e cila fatkeqësisht prej pasdites së të mërkurës nuk jeton më, mësohet se kishte marrë rrugën për në Gjermani, bashkë me djalin e ëndrrave të saj, Saimirin, pikërisht për të ndryshuar fatin e jetës. Por ka qenë një tren mallrash që i ka ndarë në mes jetën 23- vjeçares. Është portali lokal që ka publikuar ngjarjen e rëndë, ku një tren në zonën e Neustadt në Frankfurt ka marrë përpara një grup personash, të cilët po prisnin në stacion. Në këtë grup ka qenë edhe çifti i shqiptarëve dhe një shoqe dhome e kampit në të cilin ishin vendosur. Ela ka humbur jetën, ndërsa djali, i fejuari, është plagosur dhe ndodhet në spital. Mediat vendase kanë bërë me dije se dy të rinjtë gjendeshin në Gjermani prej tre muajsh, ku kishin aplikuar për azil, por shteti gjerman kishte vendosur t’i kthente në Shqipëri. Tragjedia Ngjarja e rëndë, ku një tren mallrash ka dalë nga shinat dhe ka marrë përpara një grup njerëzish, të cilët prisnin trenin e udhëtarëve në stacionin e Neustadt, në Frankfurt, mësohet se nuk është raportuar nga asnjë media e madhe gjermane. Pak të dhëna janë transmetuar vetëm në portalin online të Frankfurtit, ndërsa lajmin tragjik për familjen Haziraj e kanë dhënë shqiptarët e tjerë që gjendeshin në të njëjtin kamp me çiftin që fatkeqësisht mori treni përpara. Referuar të dhënave që kanë dhënë shqiptarët që gjenden atje për të njëjtin qëllim, bëhet me dije se nuk është bërë me dije ende nëse është marrë përgjegjësi për aksidentin që i mori jetën shqiptares, ndërsa trupi i saj deri mesditën e djeshme ka qenë në morgun e spitalit të zonës. Referuar të njëjtave të dhëna mësohet se edhe djali ka pësuar dëmtime të rënda, por është jashtë rrezikut për jetën, ndërsa çiftit, që treni i mallrave i mori përpara, mësohet se shteti gjerman iu kishte refuzuar dhënien e azilit. Miqtë e rrjeteve sociale në zi për Elën Asnjë instancë e jona nuk jep sqarime në lidhje me ngjarjen e rëndë që ka ndodhur në Gjermani, ku një vajzë ka mbetur e vdekur dhe i fejuari i saj i plagosur nga një tren mallrash në Frankfurt. Janë vetëm disa të dhëna sporadike që janë publikuar në mediat lokale të Frankfurtit, ndërsa të vetmit që kanë ndarë me njëri-tjetrin dhimbjen për fatin e keq të Ela Hazirajt dhe të familjes së saj, janë miqtë e saj dhe të të fejuarit të saj, Saimir Gjokpalit, në rrjetet sociale. Sipas të dhënave, mësohet se djali është nga Tropoja, ndërsa vajza nga Kukësi. Ata ishin fejuar dy vite më parë, ndërsa fati i keq i tyre i ndau përjetësisht pikërisht në vendin ku kishin vendosur të nisnin ndryshimin e jetës së tyre. /shekulli/

“Kultivuesit e vërtetë të kanabisit ndodhen në zonat urbane, ndërsa punëtorët që prashisin parcelat me kanabis janë nga zona e Dukagjinit”. Kjo është deklarata e drejtorit të Hetimit dhe Parandalimit të Krimit në Policinë e Shtetit, Skënder Kalemi, në përfundim të operacionit të koduar “Brashta”, në zonën e Dukagjinit. Mbi 30 mijë rrënjë kanabis sativa të asgjësuara është rezultati i këtij operacioni në komunat e Shalës dhe Shoshit, gjatë 48 orëve të kaluara. Superaksioni i policisë filloi pas monitorimit të këtyre zonave nga ajri, në bashkëpunim me “InterForcen” italiane, ku u identifikuan parcela me kanabis, që u asgjësuan pas ndërhyrjes së 450 forcave të policisë, të Ndërhyrjes së Shpejtë nga Shkodra e Tirana, si dhe forcave speciale RENEA. / Top Channel

Një shqiptar në Gjermani kërcënoi me vetëvrasje, pasi mori përgjigje negative nga autoritetet gjermane për azil. Në një video të dërguar në Top Channel nga azilkërkuesit e tjerë shqiptarë në Gjermani, duket një person i zhveshur që ka hipur në tarracën e një ndërtese disakatëshe të kampit të refugjatëve dhe kërcënon se do të hidhet. Mësohet se policia gjermane e ka zbritur nga tarraca azilkërkuesin, i cili pritet së shpejti të kthehet nga autoritetet gjermane në fluturimet e radhës, me avionët që po përdoren për shqiptarët që u është refuzuar azili. / Top Channel

Një gjykatë në Kosovë ka dënuar qytetarin Abdullah Thaçi, i cili denoncoi një rast korrupsioni. Thaçi, nga Prizreni, gjatë kohës që punonte në një bankë tregtare, i është qasur pa të drejtë llogarisë së drejtorit të Arsimit Komunal, Nexhat Çoçaj, për të dëshmuar se ai kishte paguar kredinë me paratë publike dhe një pjesë të tyre i kishte transferuar në llogarinë bankare të fëmijëve. Gjykata Themelore në Prizren dënoi këtë të martë Abdullah Thaçin me një gjobë prej 5 mijë eurosh, që ai është i detyruar ta paguajë në 5 këste mujore. I akuzuari për veprën penale “zbulim i fshehtësisë zyrtare” e ka pranuar fajësinë dhe është penduar për veprimin e tij. Sipas aktakuzës, Abdullah Thaçi e kishte futur në një zarf gjendjen e llogarive të dy klientëve, e më pas ia kishte dorëzuar Lëvizjes Vetëvendosje. Para tri vitesh, Vetëvendosja i ka përdorur këto të dhëna për të ushtruar kallëzim penal ndaj zyrtarit komunal. Pikërisht për këtë rast, drejtori i Arsimit në Prizren, Nexhat Çoçaj, akuzohet për “keqpërdorim të detyrës zyrtare”. Vendimi i gjykatës për Thaçin ka nxitur reagimin e njohësve të standardeve të krijuara nga Gjykata Europiane për të Drejtat e Njeriut, e cila mbron të drejtat e informatorëve, apo siç njihen në anglisht “whistleblowers”, për të denoncuar dukuritë negative. / Top Channel

ISIS publikon detajet personale të 1400 amerikanëve, bën thirrje për sulme ndaj tyre Një grup i vetëquajtur “divizioni i hacker”-ave të Shtetit Islamik ka publikuar detajet e 1400 shtetasve, kryesisht ushtarakë amerikanë dhe personel qeveritar, duke nxitur mbështetësit e xhihadistëve t’i sulmojnë të listuarit. Baza e të dhënave, e publikuar online gjatë së mërkurës ekspozonte emrat, adresat e email-eve, numrat e telefonave dhe fjalëkalimet e tyre. Në listë bënin pjesë anëtarë të trupave të Marinës, NASA-s, Departamentit amerikan të Shtetit, Forcave Ajrore dhe FBI-së. Mbështetësit e ISIS në Twitter, duke përfituar nga kjo thyerje e të dhënave personale, kanë postuar detajet personale të ushtarëve dhe stafit qeveritar, duke inkurajuar “ujqërit e vetmuar” të vepronin dhe të vrisnin sa më shumë të mundeshin prej tyre. Një person, që pretendonte se fliste në emër të grupit, tha për “the Guardian” se informacioni ishte siguruar nga bazat e të dhënave të ushtrisë dhe qeverisë, një pretendim që zyrtarë të ushtrisë amerikane e dyshojnë. “Kjo është hera e dytë apo e tretë që xhihadistët pretendojnë diçka të tillë dhe, sa i përket dy herëve të para, mund t’iu them se çfarëdo liste të kenë siguruar ata nuk e kanë marrë nga sulmet kibernetike”, tha shefi i Shtabit të Përgjithshëm, gjeneral Ray Odierno, ditën e mërkurë. “Kjo e tanishmja nuk ka ndonjë ndryshim nga dy herët e para - vijoi ai, - por ne i marrin në konsideratë të tilla pretendime, sepse është e qartë që, çfarëdo që ata të jenë duke planifikuar, ne e quajmë serioze, pavarësisht se unë besoj se ata nuk janë treguar të suksesshëm me planin e tyre”. Pentagoni deklaroi se është ende duke hetuar mbi këtë incident. “Nuk kemi shumë informacion mbi të, sepse shumica e adresave të email-eve duken të jenë tepër të vjetra dhe fjalëkalimet e listuara në Twitter nuk përputhen me kërkesat tona për fjalëkalime të forta dhe të padiktueshme”, tha shefi i Marinës, Jeffrey Pool. Mes të parëve që e publikoi listën e të dhënave ka qenë “hacker”-i Junaid Hussain, i cili raportohet të jetë i treti në listën e CIA-s për t’u eliminuar si pjesëtar i ISIS apo mbështetës i tyre. / Top Channel