Patozi: Postet në parti të mos përzihen me ato në ekzekutiv
TIRANË- Nënkryetari i Partisë Demokratike, njëkohësisht kryetar i grupit parlamentar, Astrit Patozi, deklaron se zgjidhja e krizës politike në Shqipëri midis opozitës dhe mazhorancës mund të arrihet vetëm nëpërmjet një konsensusi mes palëve politike, por pa pranuar hapjen e kutive të votimit, pasi sipas tij mazhoranca nuk mund të dalë mbi vendimet e gjykatave.</p>
Në një intervistë për gazetën “Shekulli”, Patozi thekson se mazhoranca e fton opozitën në Kuvend për të trajtuar çdo kërkesë të saj, me përjashtim të hapjes së kutive të votimit të 28 Qershorit.</p>
Lidhur me zhvillimet brenda Partisë Demokratike, Patozi vuri në dukje se formula për zgjedhjen e lidershipit “Një anëtar një votë” nuk do të aplikohet në Kongresin, që do të mbahet më 12 Dhjetor. Ai shtoi gjithashtu se në selinë blu nuk ka grupe klanore.</p>
Z. Patozi, si i komentoni zhvillimet politike në vend kur opozita vazhdon të protestojë dhe bojkotojë Parlamentin, pasi kërkon hapjen e kutive të votimit të zgjedhjeve të 28</p>
Qershorit, ndërsa mazhoranca nga ana tjetër kërkon praninë e opozitës në Kuvend, por pa pranuar hapjen e kutive?</p>
Çështja e hapjes apo e mos-hapjes së kutive, nuk është një çështje mes mazhorancës dhe opozitës, por është një problem i stisur nga Partia Socialiste, për të gjetur një pseudo – argument, që të justifikojë qëndrimet e saj refraktare politike, që pas zgjedhjeve të 28 Qershorit.</p>
Nuk ka një problem midis nesh, kutitë as i hap e as i mbyll Partia Demokratike dhe Sali Berisha, të cilat raportin me kutinë e kanë vetëm ditën e votimit kur votojnë si gjithë qytetarët e tjerë të këtij vendi. Kutitë hapen dhe mbyllen nga institucionet e këtij vendi, dhe institucionet e këtij vendi kanë folur.</p>
Pra, nuk është dëshira apo mosdëshira e Partisë Demokratike nëse i hap apo i mbyll kutitë, por është ligji dhe Kushtetuta e vendit që e ndalon apo e lejon një gjë të tillë. Në këtë rast institucionet kanë folur. Komisioni Qendror i Zgjedhjeve ka folur. Gjykata e Apelit sipas Kodit Elektoral ka folur.</p>
Ne nuk na mbetet gjë tjetër vetëm të respektojmë vendimet, nëse jemi për shtetin ligjor. Ne ndiejmë keqardhje që opozita nuk është në Parlament, por Partia Demokratike nuk mund të marrë rolin e institucioneve të tjera dhe nuk mund të shkelë ligjet dhe Kushtetutën këtij vendi.</p>
Opozita pretendon se kërkesa e saj nuk shkel vendimet e Kolegjit Zgjedhor. Cila është arsyeja që ju pretendoni të kundërtën?</p>
Vendimi i Gjykatës së Apelit dhe vendimet e Gjykatës Kushtetuese që flasin për komisione hetimore dhe për drejtësinë e këtij vendi janë eksplicite, nuk kanë nevojë për interpretim. Pra, nuk është çështja e interpretimit, si e interpreton Partia Demokratike dhe Partia Socialiste.</p>
Ligji është i shkruar e zeza mbi të bardhë, që e pengon një gjë të tillë. Çështja e hapjes apo e mbylljes së kutisë është një problem personal i Edi Ramës, për të gjetur një mënyrë të paligjshme, për të gjetur një instrument të parealizueshëm, që të justifikojë vendimin e vet krejtësisht absurd për të bojkotuar Parlamentin.</p>
Raporti i OSBE-ODIHR-it, thekson se në 1/3 e qendrave të numërimit, numërimi i votave është kryer keq ose shumë keq. Si e komentoni ju një konstatim të tillë dhe a e legjitimon kjo qëndrimin e mazhorancës për mos-hapjen e kutive dhe se zgjedhjet ishin transparente?</p>
Ne respektojmë me shumë konsideratë realizmin e raportit të OSBE-ODIHR-it për zgjedhjet e 28 Qershorit, i cili vlerëson që ishin absolutisht zgjedhjet më të mira, që janë zhvilluar në këtë vend.</p>
Pavarësisht se nuk përdoret termi të lira dhe të ndershme, por ky term nuk përdoret as për vende të tjera, më të zhvilluara sesa Shqipëria. Pra, do të thotë që ne arritëm objektivin tonë, ne arritëm zgjedhje model më 28 Qershor.</p>
Për pjesën e vërejtjeve, ne sigurisht jemi të hapur dhe për këtë, po e ftojmë opozitën që të vijë dhe të marrë rolin udhëheqës për të ndrequr ato vërejtje dhe sugjerime, që jep raporti i OSBE-ODHIR-it. Por, për këtë, ajo duhet të vijë në Parlament.</p>
Opozita thekson se kriza politike mund të zgjidhet, nëse mazhoranca hap kutitë e votimit, si e shihni një ofertë të tillë, a mund të sjellë kjo një zgjidhje të situatës politike?</p>
Unë besoj që në politikë ultimatumet nuk shërbejnë. Politika e ultimatumeve, besoj që është një politikë arkaike, së cilës i ka ikur koha në Shqipëri por edhe kudo gjetkë. Pra, nuk mund të ketë kompromis, nuk mund të ketë konsensus, në rast se ka ultimatume, aq më tepër kur këto ultimatume nuk mbështeten as në arsyetime dhe as në ligjshmëri.</p>
Në këtë rast, unë pres që të shtohet presioni pozitiv mbi lidershipin e opozitës, në mënyrë që të dalë nga ky ngërç, sepse unë konsideroj se, kjo që po ndodh në Partinë Socialiste është pengmarrje, është pengmarrje për shkak të interesave personale të kryetarit të kësaj partie. Unë besoj që në atë parti nuk mungojnë zërat e arsyeshëm, të cilët mund të kërkojnë një rrugëdalje nga kjo krizë e pafund.</p>
Komisioneri për Zgjerimin, Olli Rehn, ka deklaruar se qeveria duhet të zgjidhë krizën politike në vend. A e shikoni ju përgjegjëse qeverinë shqiptare për situatën politike të krijuar pas zgjedhjeve të 28 Qershorit? Cili duhet të jetë veprimi politik i aktorëve të pozitës dhe opozitës për të zgjidhur këtë krizë politike?</p>
Sigurisht që është një përgjegjësi, që ne nuk e mohojmë. Por, duhet të kemi një gjë parasysh që përgjegjësi i kësaj krize është Edi Rama dhe partia e tij, që kanë krijuar këtë situatë absurde, kur partia kryesore e opozitës nuk futet në Parlament pa pasur asnjë argument, pa pasur asnjë evidencë, pa pasur asnjë raport komisionerësh. Kjo ka krijuar një situatë jo të këndshme.</p>
Thirrja e zotit Rehn është që, qeveria në këtë situatë duhet të ndërmarrë të gjitha nismat e saj për zgjidhjen e kësaj krize dhe oferta jonë ka qenë shumë serioze; hajdeni në Parlament, diskutojmë bashkërisht, jo vetëm të bëjmë debatin normal politik në vend, diskutojmë bashkërisht për të gjitha sugjerimet dhe vërejtjet e raportit e OSBE – ODHIR-it dhe shqyrtojmë çdo kërkesë tjetër që mund të ketë opozita duke përfshirë edhe ngritjen e komisioneve parlamentare, por gjithmonë me një kusht të vetëm, që të jenë në përputhje me Kushtetutën dhe ligjet e vendit.</p>
A ka një qëndrim konkret të grupit parlamentar të Partisë Demokratike për marrëveshjen e kufijve detarë me Greqinë dhe nëse jo kur pritet të ketë një vendim të tillë?</p>
Ne kemi bindje se marrëveshja me kufijtë detarë me Greqinë është kryer sipas të gjithave konventave ndërkombëtare, Kushtetutës dhe ligjeve të vendit, pa asnjë cenim të një apo më shumë centimetrash të ujërave tona territorialë.</p>
Por, sigurisht për shkak se ka pasur një betejë agresive politike nga e opozitës, ne po presim me qetësi edhe vendimin e drejtësisë lidhur, me një padi të disa partive opozitare për këtë qëllim. Megjithëse gjykojmë se kërkesa e tyre nuk është kushtetuese. Absolutisht nuk është kushtetuese.</p>
Ndërkohë, unë vërej me keqardhje një çështje, që Partia Socialiste po merret peng nga sharlatanë apo aventurierë politikë ose jo qofshin këta dhe po bën kauza të veta çështje që nuk i përkasin. Në këtë rast, kam vënë re që trillet apo haluçinacionet personale të një njeriu të dëshpëruar e kanë vënë gjithë opozitën në funksion të një qëllimi, i cili që mbi të gjitha nuk është politik dhe mbi të gjitha nuk i shërben interesave të vendit.</p>
Këtu kam parasysh një person të liruar nga detyra me bindje dhe formim Bolsheviko- Enverist, i cili ka tërhequr zvarrë të gjithë makinën politike dhe të gjithë instrumentet, që ka në dispozicion opozita.</p>
A ka një vendim të grupit parlamentar të Partisë Demokratike për këtë çështje?</p>
Grupi parlamentar nuk mund të ketë vendim, për sa kohë që nuk është shprehur Gjykata Kushtetuese, megjithëse kemi bindjen që kjo nuk është një çështje kushtetuese.</p>
Lidhur me ecurinë e analizës që po bëhet në PD mbi zgjedhjet e 28 Qershorit, ka zëra që kryesia e vogël ka përgjegjësinë në humbjen e disa qarqeve kryesore, a është përgjegjëse kryesia e vogël dhe lidershipi i PD-së për rezultate të dobëta në zgjedhjet e Qershorit?</p>
Partia Demokratike është duke bërë një analizë serioze të gjithë strukturave të saj, sidomos për mënyrën sesi kjo parti u soll dhe çfarë arriti në zgjedhjet e 28 Qershorit. Mos harrojmë një gjë, që Partia Demokratike është fituese e këtyre zgjedhjeve. Jo për shkak se fituesi nuk gjykohet, por sepse edhe përgjegjësia duhet kërkuar në raport me rezultatin.</p>
Ne mund të themi që shkojmë drejt një kongresi festiv, për shkak se jemi partia e cila në një farë mënyre përsëriti mandatin e vet edhe për një katërvjeçar tjetër.</p>
Në këtë kontekst, si përgjegjësitë ashtu edhe meritat duhet të konsiderohen njësoj. Pra, në rast se dikush ka përgjegjësi për një rezultat të caktuar, po kështu dikush tjetër mund të ketë një meritë për fitoren e përgjithshme të Partisë Demokratike.</p>
Në rast se ju e ngushtoni fokusin e përgjegjësisë apo të meritës tek kryesia e vogël, sigurisht që në radhë të parë kryetari i partisë, në radhë të dytë kryesia e vogël kanë meritën për fitoren e Partisë Demokratike në të gjithë Shqipërinë.</p>
Megjithatë, përgjegjësia është vënë tek kryesia e vogël. Kongresi, a do të sjellë një ristrukturim të saj?</p>
Ju po kërkoni gjëra, që janë atribute të Kongresit dhe Kongresi do edhe një muaj e gjysmë që të zhvillohet. Do të jetë Kongresi i Partisë Demokratike, ai që do të vendosë se do të ketë apo nuk do të ketë ndryshime në lidershipin e Partisë Demokratike dhe do të ketë apo nuk do të ketë ndryshime në statutin e Partisë Demokratike.</p>
Këto janë atribute të Kongresit. Unë nuk pres ndryshime drastike apo ndryshime rrënjësore, me argumentin se ne jemi një parti fituese dhe zakonisht një ekip fitues e ka vështirë të ketë ndërrime të forta.</p>
A ka një rival të mundshëm deri më tani përballë Berishës?</p>
Unë nuk kam dëgjuar që të ketë ndonjë rival, por kjo nuk e bën aspak jo demokratike zgjedhjen e kryetarit edhe sikur ky rival të mos jetë deri më ditën e fundit, sepse kjo është një normë krejtësisht normale, e zakonshme edhe për parti simotra me histori shumë të vjetër politike dhe parlamentare në vendet më të zhvilluara të Evropës demokratike dhe më gjerë sesa kaq.</p>
Pra, që kryetari mund të votohet pa rival. Do të ishte më e udhës që kryetari i partisë të mos kishte një rival sesa të shpikej një rival kukull, i cili në një farë mënyre do të fyente edhe delegatët, anëtarët e partisë por edhe publikun në përgjithësi, sepse unë besoj që ne nuk kemi nevojë të shpikim një “Lakror” në Partinë Demokratike.</p>
A do të aplikohet formula “Një anëtar një votë” për zgjedhjen e lidershipit të PD-së nga Kongresi?</p>
Kjo është një formulë që nuk do të aplikohet në këtë Kongres dhe arsyeja është shumë e thjeshtë që Partia Demokratike përshtati të gjitha elementët e zgjedhjeve brenda saj në raport me ndryshimet e reja Kushtetuese që sollën ndryshimin e Kodit Zgjedhor dhe sistemit zgjedhor në Shqipëri.</p>
Në këtë Kongres nuk do të aplikohet ky parim, do të aplikohet parimi i delegatëve të Kongresit që do të zgjedhin Kryetarin dhe Këshillin e saj Kombëtar. Unë nuk mund të them sot se cila do të jetë mënyra sesi do të zhvillohen zgjedhjet në të gjithë Partinë Demokratike, por edhe për kryetarin e saj sepse do të jetë Kongresi që do të vendosë për statutin e ri dhe për ndryshimet e reja statuore të Partisë Demokratike.</p>
A jeni ju për ndarjen e posteve ministrore nga ato partiake dhe si duhet të kryhet kjo ndarje?</p>
Unë jam për harmonizimin e të gjitha posteve politike, por jo për një ndarje me thikë të këtyre posteve, sepse sa kohë që Kryetari i Partisë duhet të jetë patjetër Kryeministër, sigurisht që mund të ketë pozicione të tjera, që jo domosdoshmërisht duhet të jenë të ndara nga funksionet politike.</p>
Pra, postet administrative nga postet politike. Por, gjykoj që ka disa pozicione, që do të ishte e udhës që të mos përziheshin me pozicione ekzekutive.</p>
Këtu mund të jenë sekretarë organizativë dhe disa funksionarë të tjerë politikë të partisë e cila do të ishte e udhës që të qëndronin më afër strukturave dhe më afër jetës së brendshme të Partisë Demokratike dhe të mos kishin pengesa ekzekutive në ushtrimin e funksioneve të tyre.</p>
A ekzistojnë grupe klanore në selinë blu?</p>
Partia Demokratike është parti e hapur dhe si çdo derë e madhe ka shumë hyrje dhe dalje. E rëndësishme është që në Partinë Demokratike, nuk mungon debati, nuk mungon mendimi ndryshe, tek e fundit jemi një parti që respektojmë votën dhe institucionet e saj, që do të thotë pavarësisht debatit të brendshëm, Partia Demokratike mbetet një parti që ruan kohezionin, kjo është ëndërr e çdo partie moderne në botë.</p>
Në vendimmarrje, ne funksionojmë me kohezion dhe me bashkëveprim. Në Partinë Demokratike nuk ka klane, mund të ketë individë që mendojnë ndryshe nga njëri- tjetri, mund të ketë flukse të ndryshme si në raport me historinë e kësaj po ashtu edhe me interesat e individëve që përfaqësohen prej tyre.</p>
Por kjo nuk pengon atë që thashë, kohezionin dhe vendimmarrjen e përbashkët. Pra, kush shikon ëndrra me lojë luftërash në Partinë Demokratike, i duhet që të kalojë shumë për t’i parë ato ëndrra për t’i kthyer në realitet. Ne do të vazhdojmë ta ruajmë këtë frymë, debatin e brendshëm, por njëkohësisht kolegjialitetin dhe kohezionin në funksionimin e Partisë Demokratike.(Shekulli)</p>
Ky artikull eshte marre nga: http://www.albaniasite.net/?p=25863. Per me shume artikuj te ngjashem vizitoni: http://www.albaniasite.net/?p=25863