Sporti Shkodran ( Vllaznia )

[genci]

Re: Sporti Shkodran ( Vllaznia )

Numri një i Bashkisë premton zgjidhje

Rusi: Vllazni, prit deri të dielën!
Skuadra shkodrane duket se shpejt do të ketë presidentin e saj. Një premtim i tillë i është bërë nga vetë bashkiaku i Shkodrës, Ormir Rusi. Ky i fundit ka qenë i pranishëm në takimin e djeshëm, që drejtuesit e skuadrës kanë zhvilluar me futbollistët kuqeblu. Në të vërtetë, kanë qenë vetë lojtarët e Vllaznisë ata që e patën kërkuar këtë takim, me qëllim për të sqaruar të ardhmen e tyre. Për rrjedhojë, ashtu siç ishte lënë, të gjithë pjesëtarët e skuadrës, futbollistë dhe trajnerë, në orën 17.15, kanë qenë para drejtuesve të klubit, sekretarit Medja dhe drejtorit teknik Mustafaraj. Ka rënë në sy prania e vetë numrit 1 të qytetit, kryebashkiakut Rusi, i cili me shqetësimin e tij qytetar, në radhë të parë, dhe pastaj atë institucional, ka kërkuar të ndajë shqetësimin e tij me skuadrën për gjendjen e krijuar kohët e fundit. "Kam mësuar se ditët e fundit disa prej "jabanxhinjve", nisur nga vetë situata e krijuar, nuk janë paraqitur në stërvitje. Me këtë veprim ata mendoj se kanë gabuar, sepse nuk duhen të jenë kaq të nxituar. Duhet pak durim, pasi ende nuk kemi thënë që Vllaznia është shkatërruar. Duhet të dini që bashkia është në bisedime me disa biznesmenë të njohur dhe brenda kësaj jave besoj se gjërat do të marrin një zgjidhje përfundimtare,"- mësohet t'u jetë drejtuar Rusi lojtarëve të Vllaznisë. Këta të fundit kanë shprehur shqetësimin e tyre për gjendjen e krijuar, duke kërkuar nga drejtuesit e klubit dhe kryebashkiaku një mendim më të qartë se çfarë do të bëhet me ta. Pas sqarimit të z. Rusi, mësohet se ka folur edhe trajneri Zhega, i cili duke iu referuar premtimeve të marra, ka kërkuar edhe njëherë nga skuadra korrektësi në pjesëmarrjen në stërvitje dhe disiplinë në të. Bashkëbisedimi mes dy palëve ka zgjatur diçka më tepër se një orë dhe më pas skuadra, nën drejtimin e Zhegës, ka vijuar me stërvitjen. Ka rënë në sy prania në stërvitjen e djeshme e dy "jabanxhinjve" të rikthyer, kongolezit Bokatola dhe kuçovarit Klodian Asllani. Ata kanë qenë edhe në mbledhjen e zhvilluar para stërvitjes, duke dëgjuar me veshët e tyre premtimin për zgjidhjen e situatës shumë shpejt. Sot pritet që numri i lojtarëve në stërvitje të jetë më i madh, pasi pritet të rikthehen edhe disa nga "jabanxhinjtë" e tjerë. Një premtim të tillë të paktën e ka bërë Bejzade, i cili ka theksuar se do të jetë i pranishëm në stërvitje për të parë sesi do rrjedhin ngjarjet te Vllaznia. "Deri më 5 korrik mendoj se problemi i sponsorit do të jetë i zgjidhur. Siç e thashë, jemi në bisedime me disa biznesmenë, emrat e të cilëve, gjithsesi, nuk mund t'i bëjmë të ditur për efekt të bisedimeve që po bëjmë,"- ka qenë pohimi i djeshëm i bërë nga kryebashkiaku i Shkodrës, z. Ormir Rusi, për gazetarët pas mbledhjes së zhvilluar me skuadrën. Kësisoj, gjërat kanë filluar të lëvizin për mirë te Vllaznia dhe duket se shumë shpejt ato do të marrin një zgjidhje. Vetë premtimi i Lutfi Nurit për mbështetje fillimisht dhe tashmë edhe fjalët e ngrohta të numrit një të Shkodrës, i kanë ngrohur futbollistët, të cilët, megjithatë, janë në pritje të zgjidhjes përfundimtare të këtij problemi. Nga ana tjetër, entuziast për situatën e krijuar është shfaqur edhe sekretari i klubit, Agim Medja, i cili ka thënë: "Besoj se gjërat tashmë kanë hyrë në një rrugë të mbarë. Vetë premtimi i kryetarit të bashkisë mendoj se duhet të rikthejë besimin te lojtarët, prandaj ata duhet të stërviten me dëshirë dhe përkushtim."
Gjergj KOLA

Vizituan qytetin
Skocezët e Dandit: Na pëlqeu Shkodra
Kanë mbetur të kënaqur nga vizita e tyre në Shkodër përfaqësuesit e ekipit të Dandit, kundërshtarit të Vllaznisë në Kupën UEFA. Ashtu siç kishin paralajmëruar, skocezët kanë mbërritur të hënën në Tiranë, ku janë interesuar për problemin e tyre të udhëtimit drejt Shqipërisë, linjat ajrore e të tjera probleme të këtij lloji. Tre përfaqësuesit e FC Dandit, të udhëhequr nga menaxheri i përgjithshëm i klubit, Xhim Tompson, ndërkohë dje kanë udhëtuar drejt Shkodrës, qyteti ku ata do të zbresin në mesin e gushtit. Sipas sekretarit të klubit të futbollit "Vllaznia", Agim Medja, skocezët fillimisht kanë kërkuar të shohin nga afër kushtet e akomodimit në dy hotelet kryesore të qytetit, "Koloseu" dhe "Meteor". Merret vesh që ata kanë mbetur të kënaqur nga kushtet e afruara nga këto dy hotele, ndërkohë që edhe kapaciteti i tyre është i mjaftueshëm për të përballuar numrin e pjesëtarëve të ekipit skocez, që pritet të zbarkojë në Shkodër. Sipas menaxherit Tompson, delegacioni i tyre pritet të jetë 29-30 veta. Ende nuk dihet nëse me ekipin do të udhëtojnë edhe tifozë nga Skocia, megjithatë, sipas Tompsonit, për ta nuk ekziston ndonjë problem sistemimi, pasi mund të qëndrojnë edhe në kryeqytet.
I pyetur për pretendimet e para pak kohëve, në lidhje me ardhjen e tyre në Shqipëri, Tompsoni është përgjigjur: "Vërtet ne ndoshta e kemi pasur atë frikën tonë, fillimisht ngaqë nuk e njohim këtë vend, por tani që e shkelëm dhe e pamë vetë situatën këtu, mendoj se nuk ekziston asnjë problem. E rëndësishme për ne është që fusha ku do të luajmë është e mrekullueshme, kaq besoj se mjafton për skuadrën e futbollit." Ata kanë premtuar që brenda pak ditësh do të dërgojnë kasetën filmike të ndeshjes finale të Kupës së Skocisë, atë mes skuadrës së tyre FC Dandi dhe Gllazgou Rejnxhërsit. Ka qenë pikërisht ky takim, ndonëse i humbur, ai që i dha të drejtën Dandit të merrte pjesë në Kupën UEFA, ku më 14 dhe 28 gusht do të ndeshen me Vllazninë e Shkodrës. Ata kanë kërkuar nga shkodranët që edhe këta të dërgojnë në zyrat e klubit skocez një kasetë filmike të ndonjë prej ndeshjeve të fundit të Vllaznisë.
Gjergj KOLA


Bejzade: Sot jam në Shkodër
Do të bashkohet në stërvitje me ekipin e Vllaznisë sot edhe njëri prej emrave më të njohur të saj, pikërisht sulmuesi Skerdi Bejzade. Ky i fundit është shprehur dje se nuk ka pse bëhet kaq shumë bujë për mungesën e tij në stërvitje dy ditë. "Nuk e di pse duhet bërë kaq shumë problem mungesa ime në stërvitje. Siç e dini, unë e kam mbaruar kontratën me Vllazninë e, megjithatë, ende nuk kam thënë që do ta braktis. Thjesht mungova dy ditë duke pushuar pranë familjes dhe kaq. Nesër (sot) do të jem prapë në Shkodër në stërvitje, por mendoj se dikush duhet të na japë një përgjigje për të ardhmen. Biem dakord apo s'biem, kjo është punë tjetër pastaj,"- ka thënë vetë futbollisti në deklarimin e tij për "Sportin shqiptar".
Gj. KOLA

sportishqipar.com.al

 

[genci]

Re: Sporti Shkodran ( Vllaznia )

Vllaznia, enigma e pasardhësit të Çelës

Deri tani duket se peshën më të madhe për ecurinë e ekipit po e mban klubi dhe bashkia

Situata që po kalon ekipi shkodran është vërtet shqetësuese. Të gjendur tashmë pa president dhe pa sponsor, ata kanë filluar të ëndërrojnë periudhën kur në krye të Vllaznisë ishte Myftar Çela. Gjatë shtatë viteve të presidencës së tij, askush në klub nuk deshi t'ia dinte për merkaton e skuadrës, për fazën përgatitore, bazën materiale, kushtet e stërvitjes apo çdo gjë tjetër që kishte të bënte me ekipin. Gjërat ishin të gjitha të zgjidhura siç duhet, ndërkohë që vdekja e tij i ka prishur të gjitha gjërat. Aq më tepër që edhe familja Çela u tërhoq nga vazhdimësia për të qenë në krye të Vllaznisë. Në këtë situatë pritet çdo ditë që të ketë zhvillime të reja në Shkodër, megjithatë shpresat janë të pakta që pranë skuadrës të afrohet ndonjë biznesmen serioz për ta sponsorizuar atë. Kohë më parë është folur shpesh për shoqëri aksionere a diçka të tillë, por në kushtet aktuale të mbetjes pa president, askush nuk është dëgjuar. Duket gati krejt e sigurt që në qytetin verior të Shqipërisë të ketë ndonjë biznesmen tjetër që të shpenzojë aq lekë sa hodhi Myftar Çela. Pastaj, edhe nëse ka ndonjë të tillë, vështirë që të jetë tifoz, siç ishte presidenti i deritanishëm. Në këto pozita, për Vllazninë, në të vërtetë, nuk priten ditë të mira, megjithëse duhet shpresuar. Në lojë, pas shumë e shumë vitesh, ka hyrë edhe bashkia e këtij qyteti. Numri 1 i saj, duke e pasur të qartë se duhet të jetë institucioni që drejton ai që duhet të afrojë ndonjë zgjidhje, ka filluar të mendojë diçka. Pikësëpari, bashkia duket se do të jetë pranë skuadrës me disa financime të vogla, që do të mundësojnë pagesën e hotelit ku janë të sistemuar të gjithë "jabanxhinjtë", të paktën për dy muajt e ardhshëm. Po ashtu, bashkiakët do të shohin edhe mundësinë e gjetjes së ndonjë fondi tjetër për të bërë të mundur zhvillimin e një minifaze përgatitore, para se të luhen ndeshjet e Kupës UEFA. Drejtuesit e bashkisë dhe ato të klubit "Vllaznia", ndonëse janë gjendur të papërgatitur nga humbja e presidentit Çela, sërish e kanë një të mirë të vogël përpara. Pikërisht atë që skuadra ekziston deri në fund të gushtit dhe, për këtë periudhë, kërkesat financiare mund të jenë minimale. Ato mund të përballohen edhe nga financat e pakta të bashkisë. Puna është që të gjendet një zgjidhje edhe për sezonin e ri futbollistik që është në prag. Ai nuk mbyllet me "thërrime" normalisht, por në kushtet e reja të krijuara në futbollin shqiptar, ku çmimet e lojtarëve kanë rënë shumë, ata që mund të vijnë në krye të Vllaznisë, duke i bërë mirë llogaritë, mund edhe të mos shpenzojnë shumë. Natyrisht, duke menaxhuar mirë paratë e biletave të stadiumit, përfitimet nga pjesëmarrja në Kupën UEFA apo edhe nga e drejta televizive, shpenzimet nuk duhet të jenë aq të mëdha. Të mendosh për të ardhmen e Vllaznisë, të duket një punë shumë e vështirë, ngaqë dhe dilemat janë të mëdha. Po ashtu, edhe shpresat për gjetjen e një sponsori të fuqishëm janë të pakta, ndaj, në këto pozita, vetëm duhet pritur. Mbase për Vllazninë do të mendojë dikush, pasi ajo nuk e meriton braktisjen.
Gjergj Kola

Arbri: Kuqeblu deri në fund të gushtit
Sulmuesi beratas, Klodian Arbri, ka konfirmuar dje qëndrimin e tij ende në radhët e Vllaznisë. Në këtë mënyrë, ai ka hedhur poshtë lajmin e publikuar këto ditë në shtypin sportiv, që thotë se ai tashmë është pjesë përbërëse e skuadrës së qytetit të tij, Tomorit të Beratit. "Mund të them se deri në këto momente, unë nuk kam pasur asnjë kontakt me drejtues të Tomorit apo të ndonjë skuadre tjetër. Kjo sepse unë jam ende pjesëtar i Vllaznisë deri në fund të gushtit. Duke qenë kështu, këto ditë do t'i bashkohem kësaj skuadre në stërvitje për të zbatuar kontratën që kam,"- ka thënë "Loku", siç e thërrasin ndryshe futbollistin e talentuar. Aktivizimi i Arbrit me kuqeblutë gjatë sezonit të kaluar nuk ka qenë aq shumë i suksesshëm, si pasojë e dëmtimeve të njëpasnjëshme që e kanë shoqëruar. Megjithatë, në ato pak ndeshje që ka luajtur, sulmuesi beratas ka arritur të jetë deciziv me 4 golat e tij. Ndërkohë, ai ka një periudhë të gjatë që është larg fushave të blerta, periudhë që i ka shërbyer edhe për riaftësimin e plotë. Për Arbrin, gjërat tani duket se po shkojnë mirë dhe brenda kësaj jave ai pritet të jetë në Shkodër për t'u vënë në dispozicion të trajnerit Zhega. "Aktualisht jam duke pushuar në Durrës, teksa jam duke i bërë dhe shërbimet e fundit këmbës së dëmtuar. Mendoj se gjërat tani po shkojnë mirë për mua dhe problemet e sezonit të kaluar kanë mbetur prapa. Kam humbur edhe kilogramët e tepërt që kam pasur në trup dhe jam gati për të filluar stërvitjen. Nga fundi i kësaj jave mendoj se do të jem në Shkodër për të qenë pranë ekipit dhe për t'u bërë gati për ndeshjet e Kupës UEFA,"- ka vijuar më tej rrëfimin e tij sulmuesi i Vllaznisë, Klodian Arbri.
Kuqeblutë, në këtë mënyrë, për dy ndeshjet e kompeticionit evropian do të kenë edhe një futbollist cilësor më tepër në radhët e tyre. Megjithatë, edhe për 24-vjeçarin beratas, e ardhmja e tij tek ekipi shkodran, ashtu si për të gjithë të tjerët, është pikërisht në një pikëpyetje të madhe. "Unë e thashë edhe më lart, deri në fund të gushtit jam pjesë e Vllaznisë, me të cilën do të luaj edhe në Kupën UEFA. Më pas nuk e di sesi do të rrjedhin ngjarjet, aq më tepër që tani nuk është më as presidenti Çela. E ardhmja është disi e paqartë, por për të do të mendoj në fund të gushtit, kur të jem futbollist i lirë."


Ky Artikull u publikua më 26 Jun 2003. Autor Gjergj Kola - Sporti Shqiptar

 

[genci]

Re: Sporti Shkodran ( Vllaznia )

Vllaznia: Na duhen 600 milionë për sezonin

Zgjidhja duket në rrugë të mbarë. Sot "raundi" për presidentin

Nuk ka dhënë thuajse asgjë të re takimi i mbrëmshëm i zhvilluar në zyrën e kryebashkiakut Rusi, për të ardhmen e presidencës së Vllaznisë. Ndonëse është diskutuar gjatë prej tij, nuk ka dalë asnjë zgjidhje dhe, si rrjedhojë, është lënë një tjetër takim sonte, në të njëjtën orë (19.00), dhe në të njëjtin vend. Duket se sonte mund të ketë një zgjidhje, teksa gjatë paradites do të organizohen të tjera kontakte me njerëz të biznesit, të cilët mund të afrojnë ndihmën e tyre për të shpëtuar Vllazninë nga gjendja aktualë ku ndodhet. I shumëprituri takimi i mbrëmshëm, në të vërtetë në fillim ka qenë zhgënjyes. Në orën 19.00, kur ishte lënë për të filluar bashkbisedimi, në zyrën e kryetarit të Bashkisë së Shkodrës, zotit Ormir Rusi, përveç tij dhe disa anëtarëve të këshillit bashkiak, drejtuesve të klubit "Vllaznia", kanë qenë vetëm tre biznesmenë shkodranë, pikërisht Seit Fishta, Ardjan Kimça dhe Ylvi Mashi. Pikërisht kjo mosprani e biznesmenëve shkodranë i ka zhgënjyer disi organizatorët e këtij takimi, të cilët kishin shpërndarë 50 ftesa të tilla. Në fillim të takimit, zoti Rusi, pasi ka falënderuar ata që kishin ardhur, ka kërkuar edhe sensibilizimin maksimal të biznesit në Shkodër për të afruar ndihmën e tij në favor të Vllaznisë në këto momente. Më pas ka qenë sekretari i klubit "Vllaznia", Agim Medja, ai që ka bërë përpara biznesmenëve një pasqyrë të zgjeruar të shpenzimeve që Vllaznia ka planifikuar përafërsisht për sezonin e ri futbollistik. Pikërisht nga këto të dhëna është bërë i njohur fakti që për të kaluar ndeshjet e Kupës UEFA me Dandin, duhet shifra e 100 milionë lekëve të vjetra, ku përfshihen faza përgatitore, organizimi i ndeshjes në Shkodër, grumbullimi pas ndeshjes së parë dhe vajtja në Skoci. Më pas është dhënë dhe shifra që duhet për përballimin e ndeshjes së kampionatit dhe të kupës. Në këto detaje përfshiheshin lëvizjet nëpër rrethe, pagesa e fushës së stërvitjes, gjobat e FSHF së, të mirëmbajtjes dhe akomodimit të futbollistëve jabanxhinj. Kjo shifër luhatet te 111 milionë lekë të vjetra. Në fund është dhënë nga ana e sekretarit Medja edhe një shifër e përafërt, që kishte të bënte me kontratat e futbollistëve. Madje, kanë qenë tri shifra të dhëna që kishin të bënin me nivelin minimal mesatar dhe maksimal të kontratave. Kështu, preventivi i dhënë për shifrat minimale të kontratave (ku përfshiheshin 25 lojtarë dhe stafi drejtues) ishte 230 milionë lekë. Në nivelin mesatar, kontratat e planifikuara kapnin shifrën 330 milionë lekë të vjetra, ndërkohë që vlera e 400 milionë lekëve konsiderohej e mirë për të krijuar një skuadër pretendente për titullin kampion. Në këtë mënyrë, me 600 milionë lekë të vjetra të hedhura është menduar që Vllaznia të jetë sërish një ekip elite për futbollin shqiptar, ndërkohë që, në fund, sekretari Medja u ka kujtuar biznesmenëve se, përveç lekëve të hedhura, Vllaznia kishte mundësi edhe të kishte të ardhura të konsiderueshme. Në to përfshiheshin lekët nga biletat e ndeshjeve ndërkombëtare me Dandin, nga biletat e ndeshjeve të kampionatit, shitjet e lojtarëve, reklamat etj. Pas kësaj pasqyre të hollësishme, takimi ka vijuar pa praninë e gazetarëve, ndërkohë që njerëzit e pranishëm në zyrën e kryebashkiakut kanë dalë prej andej në orën 21.10. I vetmi që ka folur diçka pas takimit ka qenë kryetari i bashkisë, i cili ka thënë shkurt: "Do të krijojmë një Vllazni të fortë, madje për këtë të jenë të bindur të gjithë. Sonte (mbrëmë) nuk pati ndonjë zgjidhje të veçantë, por e kemi lënë të mblidhemi sërish nesër (sot) për të detajuar më tepër zgjidhjen." Ndërkohë, më pas, në emër të klubit "Vllaznia" ka dhënë disa detaje për mbledhjen e zhvilluar edhe sekretari Medja, i cili ka shtuar: "Gjërat duket se po shkojnë mirë. Do të tentojmë sërish të mblidhemi edhe një herë nesër (sot), ku do t'u bëjmë thirrje të gjithë atyre biznesmenëve shkodranë, që i ftuam edhe herën e parë, të jenë të pranishëm në këtë takim të dytë. Njëkohësisht, së bashku me kryetarin e bashkisë do të tentojmë të afrojmë edhe ndonjë biznesmen nga Tirana në takimin që do të zhvillojmë. Biznesmenët që ishin në këtë takim, ndonëse të pakët, kanë afruar gatishmërinë e tyre për të hedhur fillimisht nga një kuotë financiare, ndoshta kjo e vogël, por pozitive për të treguar që gjërat kanë fillaur të lëvizin, ndaj besoj se edhe futbollistët tashëm do të jenë të qetë për të ardhmen e tyre." Por surpriza e takimit të mbrëmshëm ka qenë propozimi i ardhur nga një i pranishëm në këtë takim, i cili, siç ka bërë të ditur, kishte ardhur për të përfaqësuar presidentin e firmës "Eurodrini", zotin Shyqyri Duraku, i cili ka shprehur gatishmërinë e tij për t'u vënë në krye të Vllaznisë. Një propozim i tillë, gjithnjë sipas burimeve tona, është mirëpritur nga të gjithë të pranishmit, ndërkohë që është lënë detyrë që të merret një kontakt personal me këtë njeri të fuqishëm në fushën e biznesit të karburantit, qendra e të cilit është në Tiranë. Për këtë qëllim, mësohet se sot do të udhëtojë drejt kryeqytetit vetë kryebashkiaku i Shkodrës, zoti Ormir Rusi, së bashku me sekretarin e klubit, Agim Medja, të cilët në axhendën e tyre, si takim kryesor, do të kenë takimin me biznesmenin Duraku. Prej këtij takimi ndoshta mund të mësohet edhe fati i ardhshëm i Vllaznisë. Megjithatë, çdo gjë do të vendoset në takimin që është lënë për t'u zhvilluar sërish sonte, në orën 19.00 në zyrat e bashkisë. E rëndësishme mbetet deklarata e mbrëmshme e zoti Rusi, i cili ka thënë: "Do të bëjmë një Vllazni të fortë, madje më të fortë nga ajo që kemi pasur deri tani."


Ky Artikull u publikua më 08 Jul 2003. Autor Gjergj Kola - Sporti Shqiptar

 

[djal]

Re: Sporti Shkodran ( Vllaznia )

Presidenti Duka takoi përfaqësuesit e klubit shkodran
FSHF: Asnjë largim nga Vllaznia para Kupës UEFA
Federata Shqiptare e Futbollit ka marrë një vendim për të mos lejuar asnjë futbollist të Vllaznisë që të largohet nga kjo skuadër para përfundimit të ndeshjeve për Kupën UEFA. Një fakt i tillë ka dalë dje nga goja e vetë presidentit të FSHF-së, Armando Duka, i cili është shprehur se po e ndjek me shumë vëmendje situatën në kampin kuqeblu, pas vdekjes tragjike të ish-presidentit Myftar Çela. "Kam marrë vesh se disa futbollistë të Vllaznisë janë ndier të bezdisur nga moskonkludimi përfundimtar dhe në një kohë të shpejtë të emrit të presidentit të ri të skuadrës. Madje, duke lexuar shtypin, kam mësuar se ndonjëri prej tyre kërkon edhe të largohet në drejtim të ndonjë skuadre tjetër. Gjithsesi, të gjitha këto plane personale të futbollistëve kuqeblu, që e mendojnë një gjë të tillë, nuk do të pinë ujë fare, pasi Federata Shqiptare e Futbollit nuk do t'i lejojë të tilla lëvizje. Sot (dje) u takova edhe me dy përfaqësues të klubit shkodran të futbollit, të cilët më kërkuan që futbollistët e tyre të mos lejohen të lëvizin në asnjë skuadër tjetër, pa përfunduar misioni evropian i Vllaznisë. Natyrisht, unë e përkraha këtë kërkesë të tyre dhe kam urdhëruar zyrtarët përkatës të sektorit të garave që të tregohen të rreptë në këtë drejtim. Përfundimisht, duhet ta dinë mirë të gjithë futbollistët e Vllaznisë se asnjëri prej tyre, përjashto këtu ndonjë kuqeblu, që do të lejohet të lëvizë vetëm me miratimin e drejtuesve të klubit shkodran, nuk do të lejohet të ikë nga Vllaznia, pa zhvilluar edhe ndeshjet e Kupës UEFA me këtë skuadër. Më pas, problemet e brendshme të Vllaznisë do të zgjidhen prej vetë futbollistëve, drejtuesve të klubit, pushtetit vendor dhe atij që do të afrohet si president i kësaj skuadre."
Sikurse shihet, Federata Shqiptare e Futbollit e ka marrë një vendim të tillë për t'i paraprirë ndonjë "eksodi" që mund të ndodhë te Vllaznia, në prag të ndeshjes me FC Dandin e Skocisë, e vlefshme për turin paraeliminator të Kupës UEFA. Rregulli i "ngujimit" te Vllaznia i kuqebluve, i cili bazohet te ky vendim i FSHF-së, do të qëndrojë në fuqi deri në përfundimin e përfaqësimit të skuadrës veriore në këtë veprimtari evropiane.
A. LLESHI

FSHF: Fushat do ta kenë gati tapetin para drenazhimeve
Duka: Garantoj pjesën tonë të investimit
Federata Shqiptare e Futbollit do ta mbajë premtimin e dhënë për të investuar edhe ajo në rimëkëmbjen e terreneve sportive të skuadrave të kategorisë së parë. Ka qenë vetë presidenti i institucionit qendror të futbollit, Armando Duka, ai që i ka garantuar klubet për mbështetje në këtë drejtim. Dje në mesditë, kreu i futbollit shqiptar, Duka, i pyetur në lidhje me gjeografinë e pakët të fushave ku mund të luhet futboll sezonin e ri, ka pohuar: "Jam plotësisht në dijeni të situatës dhe po i ndjek me shumë vëmendje zhvillimet respektive. Jo më kot kam kërkuar një takim edhe me komisionin e terreneve dhe të investimeve pranë FSHF-së, për t'u familjarizuar sa më saktë me situatën dhe për t'i përshpejtuar punët në këtë drejtim. Ç'është e vërteta, mjaft fusha, sidomos të grupit A2, nuk i plotësojnë kushtet e vëna nga ana jonë për të zhvilluar në to një ndeshje futbolli. Mirëpo ka edhe nga ato fusha të grupit A1 që paraqesin probleme. Madje, në disa prej tyre kanë filluar punimet, ku po bëhen drenazhimet kulluese dhe pritet të vishen me tapet të ri. Konkretisht, fusha e Ballshit dhe ajo e Kavajës, edhe pse ka kohë që e kanë filluar ristrukturimin e tyre, nuk janë ende të gatshme për sezonin e ri. Po kështu, Lushnja, Erzeni dhe Apolonia po investojnë në fushat e tyre, duke e shtuar numrin e skuadrave që mund të shtegtojnë sezonin e ri për të zhvilluar garën. Gjithsesi, unë pres një përshpejtim të ritmit të punimeve në ato fusha ku po punohet, sikurse pres një vullnet më të mirë të përfaqësuesve të klubeve të tjera, shto këtu edhe pushtetin vendor, që të ndërhyjnë në infrastrukturën e tyre sportive. Në këtë pikë, unë dua t'i siguroj të gjitha ato klube futbolli që kanë filluar investimet në fushat e tyre, por edhe të tjerët, që nuk e kanë bërë ende një gjë të tillë, se Federata Shqiptare e Futbollit do t'ua dërgojë në vend tapetin e blertë përpara përfundimit të drenazhimeve."
A. LLESHI

Presidenti, llogari vartësve për terrenet
Dje, në orën 18.00, presidenti i Federatës Shqiptare të Futbollit, Armando Duka, ka zhvilluar një takim me specialistët dhe përfaqësuesit e komisionit të terreneve dhe të investimeve pranë FSHF-së. Qëllimi i kësaj mbledhjeje pune ka qenë njohja e situatës infrastrukturore të fushave të kategorisë së parë, në prag të fillimit të sezonit të ri. Sipas informacioneve të marra nga persona pjesëmarrës në këtë takim, bëhet e ditur se presidenti Duka u ka kërkuar vartësve të tij, të ngarkuar me këtë punë, informacion të saktë në lidhje me infrastrukturën e stadiumeve dhe të fushave të grupit A1 dhe A2.
A. LL

Komiteti, mbledhje për sezonin e ri
Ndonëse nuk është fiksuar ende një datë se kur do të mblidhet komiteti ekzekutiv i Federatës Shqiptare të Futbollit, burime pranë këtij institucioni bëjnë të ditur se një gjë e tillë do të bëhet shumë shpejt. Midis pikave të shumta të rendit të ditës të kësaj mbledhjeje, pritet të diskutohen e të miratohen shumë vendime të rëndësishme në lidhje me sezonin e ri futbollistik. Konkretisht, komiteti ekzekutiv duhet të emërojë pasuesin e Sulejman Memës në postin e shefit të sektorit të garave, sikurse duhet të kthejë në vendime disa propozime të bëra nga sektori në fjalë. Bëhet fjalë për disa ndryshime në rregulloret e aktivitetit dhe shtimi në to i disa neneve të reja. Gjithashtu, në këtë mbledhje të radhës së komitetit do të merren në shqyrtim edhe kandidaturat për trajnerë të ekipeve kombëtare nga U-15 deri tek U-21. Ndërkohë, në lidhje me emrin e ri të shefit të garave në FSHF, presidenti Armando Duka ka pohuar: "Do të jetë njëri nga zyrtarët aktualë të Federatës. Kaq mund të them për momentin në këtë drejtim, pasi do të jetë komiteti ekzekutiv organi që do të konkludojë në emra të përveçëm."
A. LL

 

[genci]

Re: Sporti Shkodran ( Vllaznia )

16 Korrik 2003


Pas takimit që bëri me kandidatin për president, trajneri Zhega po tregohet më kërkues
Vllaznia, shpresat mbeten gjallë


Asgjë të re nuk ka pasur në kampin shkodran as ditën e djeshme. Situata ka vazhduar të jetë e njëjtë me ato të ditëve të kaluara, teksa të gjithë kanë mbetur me sytë nga rruga, në pritje të njeriut të përfolur për t'u bërë president i kësaj skuadre apo edhe të përfaqësuesve të tij. Megjithatë, edhe dje, askush nga "EURODRINI" nuk ka mbërritur në Shkodër. Shpresat vazhdojnë të jenë të shumta, pasi tashmë kjo firmë shihet e vetmja mundësi për t'i mbajtur gjërat ashtu siç duhet dhe siç i kërkon Vllaznia, për të qenë në elitën e futbollit shqiptar. Në radhët e lojtarëve, përveç mosbesimit, ekziston edhe siguria se një ditë të mirë dikush do të kujtohet për ta. Pjesëmarrja në stërvitje ka qenë mjaft e kënaqshme, kur në çdo seancë janë mbi 30 lojtarë. Ndoshta shumë prej tyre janë të rinj, megjithatë për t'u vlerësuar është deklarata e Zhegës: "E rëndësishme është të vijë presidenti, se lojtarë pastaj gjejmë plot." Pranë skuadrës dje, përveç stafit të saj, ka qenë edhe sekretari i klubit, Agim Medja, me idenë për t'u qëndruar pranë futbollistëve në këto momente të vështira që po kalojnë. Optimizmi është i madh se diçka do të bëhet. Kjo duket edhe në radhët e tifozerisë shkodrane, teksa vëren çdo pasdite me qindra tifozë, të cilët ndjekin stërvitjen e kuqebluve. Ajo ka vijuar normalisht, duke u zhvilluar në fushën e stërvitjes, ku tashmë edhe ajo është në gjendje të mirë pas korrjes së barit dhe vaditjes. Në këtë mënyrë, ndërsa ditët kalojnë dhe nga ndeshja me Dandin kanë mbetur diçka më pak se një muaj, në radhët e kuqebluve ka optimizëm. Optimizëm që bazohet te premtimi i Shyqyri Durakut për t'u bërë president i këtij ekipi. Ai ende nuk ka thënë "jo", që do të thotë se po kërkon t'i bëjë gjërat mirë. Ndoshta kohë nuk ka vërtet, megjithatë e rëndësishme është, sipas njerëzve që qëndrojnë pas tij, se ai po kërkon të ndërtojë një klub me të vërtetë profesionist dhe mbi këtë bazë ndoshta gjërat po vonojnë disi. Shpresat e ringritjes së Vllaznisë i mbajnë gjallë të gjithë. Në këtë situatë ka vijuar edhe puna, ku vetë Zhega, pas atij momenti të humbjes së besimit javën e kaluar, pas takimit që ka pasur me vetë Durakun të hënën, duket më optimist teksa ka kërkuar zbatimin rigoroz të stërvitjes nga e gjithë skuadra. Gjithsesi, kjo javë duket mjaft vendimtare për të ardhmen e Vllaznisë, kur merret vesh se deri në fund të saj gjërat do të jenë të sqaruara përfundimisht.
Gjergj Kola


Mungesat, gjëra të zakonshme për kuqeblutë
Janë kthyer në gjëra të zakonshme për kuqeblutë mungesat e lojtarëve. Të përgjithshme janë ato të "jabanxhinjve", të cilët praninë e tyre në stërvitje duket se e kanë nga e mërkura deri të premten. Në këtë mënyrë ka rastisur edhe këtë javë, kur as të hënën dhe as dje Zhega nuk ka pasur në dispozicion Bejzaden, Asllanin, Devollin dhe Ishkën. I vetmi që ka prishur "rregullin" e mungesave ka qenë lezhjani Alcani, i cili ishte kujtuar se është ende pjesëtar i Vllaznisë dhe ka udhëtuar drejt Shkodrës për të qenë në stërvitje me shokët e tjerë të ekipit. Ka munguar ndërkohë në stërvitjen e djeshme edhe portieri Armir Grima, që gjithsesi tregon se mungesat për Zhegën vazhdojnë të jenë prezente, çka e ka bërë atë jo shumë të kënaqur me mungesën e këtyre lojtarëve në stërvitje, sepse, sipas tij, këto mungesa mund të japin pastaj edhe mangësi në përgatitjen fizike. Gjithsesi, janë mungesa të justifikuara nga situata në të cilën ndodhet skuadra shkodrane.
Gjergj Kola


sportishqiptar.com.al

 

[genci]

Re: Sporti Shkodran ( Vllaznia )

Vllaznia, sot pritja e fundit për Durakun

Deri tani, kandidati për president nuk ka thënë "jo"

Shkodranët nuk do ta presin më shumë se deri sot vendimin e kompanisë "EURODRINI" dhe të presidentit të saj. Kështu janë shprehur dje përfaqësues të klubit "Vllaznia", të cilëve dukej qartë që u kishte sosur durimi i pritjes, ashtu si dhe vetë lojtarëve. Në Shkodër kanë pritur më kot edhe gjatë gjithë ditës së djeshme, prandaj do të bëhet e njëjta gjë edhe sot. Më pas ka shumë të ngjarë të fillojnë të tjera përçapje, të tjera lëvizje, pasi koha nuk pret më. Kupa UEFA është në prag dhe duhen filluar përgatitjet për të. Fundi i muajit korrik përkon me mbylljen e afatit të federimeve të pjesëmarrjes në këtë kompeticion dhe, kësisoj, edhe skuadra duhet të jetë e plotë. Nuk përjashtohet mundësia që klubi të thërrasë të gjithë ata lojtarë që kohët e fundit kanë shfaqur pretendime për t'u larguar dhe t'u japë në dorë lejekalimet. Megjithatë, edhe sot Vllaznia do të presë përgjigjen e "EURODRINIT", si për të thënë se i ka dalë plotësisht borxhit. E vërteta është se z. Duraku, pas shfaqjes së dëshirës për të marrë përsipër sponsorizimin e Vllaznisë, nuk është bërë prezent më. Ka pranuar të takohet dhe të flasë me kryetarin e bashkisë, Rusi, sekretarin e klubit, Medja, dhe trajnerin Zhega, dhe vetëm kaq. Nuk ka dërguar në Shkodër as ekspertë, as ekonomistë apo juristë për të parë më nga afër bilancet, letrat apo dokumentet që ky klub disponon në zyrat e tij. Megjithatë, shpresohet që ai do të vijë. Përderisa ende nuk ka thënë "jo" (kur fare mirë e fare lehtë mund ta thoshte), "po"-ja mbetet në fuqi, bashkë me fjalët për "studim të mirëfilltë të gjendjes". Në këto kushtet, mbetet për t'u besuar ndoshta fjalëve që po qarkullojnë ditët e fundit, sipas të cilave Duraku do të vijë në Shkodër me stafin e tij të gatshëm. Emrat e Bejkush Birçes, Neptun Bajkos apo edhe Astrit Hafizit thuhet të jenë njerëzit e tij të besuar dhe ata me të cilët ai do të punojë. Normalisht, mund të jetë e drejtë e tij të vendosë, pasi të bëhet president i Vllaznisë nga asambleja e këtij klubi, por fakti është që deri tani Shyqyri Duraku mbetet vetëm një njeri i nderuar në fushën e biznesit dhe të politikës, por jo në futboll, sepse ende nuk ka hedhur asnjë hap në këtë fushë të panjohur për të. Për të gjitha këto, në Shkodër, sot, për të fundit herë, ndoshta presin vendimin e tij. Sepse nuk rrihet më me sytë nga rruga për të parë në erdhi apo jo Shyqyri Duraku. Skuadra nuk mund të presë më gjatë, po ashtu edhe koha, e cila kalon pa pyetur fare nëse Vllaznia e gjeti apo jo sponsorin. Ky është vetëm një problem i saj dhe i njerëzve që e duan me shpirt këtë klub të madh të futbollit shqiptar.


Ky Artikull u publikua më 18 Jul 2003. Autor Gjergj Kola - Sporti Shqiptar

 

[genci]

Re: Sporti Shkodran ( Vllaznia )

Duraku: Ja pse i thashë "jo" drejtimit te Vllaznisë

Kandidati për president tregon shkaqet e refuzimit
Shyqyri Duraku, numri 1 i kompanisë së fuqishme "Eurodrini" ka dhënë më në fund edhe përgjigjen negative për sa i përket marrjes së presidencës së Vllaznisë. Një pohim të tillë ai e ka bërë dje për "Sportin shqiptar". Ndërkohë, Duraku ka thënë se një përgjigje të tillë ia ka dhënë para disa ditësh edhe kryebashkiakut të Shkodrës, Ormir Rusi. Por prej këtij të fundit, çuditërisht, nuk ka dalë asnjë fjalë, duke e lënë skuadrën dhe gjithë sportdashësit shkodranë ende në shpresë të një diçkaje të mirë. Duraku, nga ana e tij, duke shpjeguar se pse i ka thënë "jo" Vllaznisë, ka bërë të ditur se në kushtet që ndodhet aktualisht ky ekip është e pamundur që një njeri i vetëm ta sponsorizojë dhe ta drejtojë atë. Në deklarimin e tij të parë publik për çështjen "Vllaznia", biznesmeni Shyqyri Duraku, ekskluzivisht për "Sportin shqiptar", ka thënë gjithçka ka menduar dhe bërë për këtë problem.
- Në Shkodër po e presin me padurim përgjigjen tuaj për marrjen apo jo të presidencës së Vllaznisë. A mund ta thoni tani?
- Unë e kam dhënë një përgjigje dhe jam i çuditur pse nuk e paskeni marrë vesh.
- Dhe cila është kjo përgjigje?
- Në fundin e javës së kaluar kam pasur një takim me kryetarin e Bashkisë së Shkodrës, z. Rusi, dhe prefektin, z. Leqejza, të cilëve u shpjegova dhe arsyet që më detyruan t'i them "jo" Vllaznisë. Unë do të thosha se është një rast unikal që një njeri i vetëm të marrë përsipër të drejtojë një klub futbolli në kushtet aktuale ku ndodhet Vllaznia, sepse kjo është një detyrë shumë e vështirë për vetë shoqëritë tona tregtare, në këto kushte ku ndodhemi. Kjo pamundësi vjen jo nga aspekti financiar, por nga mënyra sesi janë të ndërtuara klubet tona të futbollit, si p.sh. legjislacioni.
- Kaq të vështirë e mendoni drejtimin e një klubi futbolli, për më tepër kur bëhet fjalë për një emër siç është Vllaznia?
- Mos harroni se ky klub ka pasur në krye jo thjesht një president, siç ishte Myftar Çela, por ai ka qenë mbi të gjitha një investitor serioz. Në këto kushte, kur aty është bërë një investim kaq i madh, nuk është e lehtë të pretendohet për t'i zënë vendin. Ndryshe do ishte puna në një klub tjetër, privat po themi, ku ulesh në tavolinë me presidentin që kërkon të largohet, bën kontratën dhe kaq. Këtu gjërat janë më ndryshe dhe unë personalisht kam nxjerrë disa konkluzione, në bazë të të cilave ka ardhur dhe përgjigjja ime negative.
- Atëherë si shpjegohet fakti që fillimisht shfaqët interesim të madh për të marrë këtë ekip, ndërkohë që tani tërhiqeni shpejt nga kjo iniciativë?
- Është e vërtetë që në fillim mendova ta marr i vetëm përsipër drejtimin e Vllaznisë, pasi e kam parim pune që nuk bëj gjë me të tjerët, por më pas, siç ju thashë, duke i studiuar mirë gjërat, arrita në konkluzionin tjetër. Duke qenë kështu, mendimi im është se Vllazninë, në kushtet aktuale ku ndodhet ajo, duhet ta mbajnë vendësit. Pushteti lokal, biznesmenët e këtij qyteti nuk duhet ta lënë këtë skuadër me emër kaq të madh në mes të katër rrugëve. Duke financuar nga pak të gjithë, ata mund të bëjnë të mundur që ky ekip të jetë sërish në nivele të larta. Sa për veten time, e deklaroj publikisht se do të isha edhe unë sponsor, duke kontribuar me gjithë shpirt për të. Natyrisht, aq sa të jetë kuota që mund të caktohet për të hedhur.
- Kjo është zgjidhja më e përshtatshme, sipas jush?
- Po, për një vit apo të paktën 6 muaj, Vllaznia duhet të mbahet nga bashkia dhe vetë shkodranët. Më pas duhet të ndërmerren iniciativa të tjera.
- Gjatë këtyre ditëve është folur shumë në Shkodër se në adresën tuaj ka pasur presione, nëse mund t'i quajmë kështu, për të mos e marrë këtë ekip. Sa të vërteta janë ato?
- Këtu nuk bëhet fjalë për presione, por, natyrisht, unë ka pasur raste kur nuk më kanë folur mirë për disa gjëra. Megjithatë, edhe unë vetë jam çuditur kur kam dëgjuar se gjoja më kanë bërë presion vëllezërit e Myftarit për të mos e marrë Vllaznisë. E vërteta është se unë kam folur me ta, por vëllezërit e Myftarit nuk më kanë kërkuar asnjëherë pjesë nga lekët që ai kishte investuar në këtë klub. Ata nuk i kërkojnë gjë "Eurodrinit". Kërkesa e tyre e vetme, dhe që është shumë e drejtë, ka qenë që investimi që ka bërë Myftar Çela në këtë klub të njihet, në mënyrë që nëse një ditë ky klub privatizohet, ky kontribut i tij të vlerësohet dhe vetëm kaq. Prandaj është e mira që njerëzit të mos shpikin gjëra të paqena.
- Nga ana tjetër, thuhet se lëkundja juaj ka ardhur ngaqë flitet se klubi "Vllaznia" ka shumë borxhe. Cili është mendimi juaj?
- Pavarësisht se nuk kam dërguar njeri në Shkodër, unë i kam marrë të gjitha të dhënat që i takojnë atij. Nga to më rezulton se ka disa borxhe, por të gjitha ato janë të shlyeshme dhe, si rrjedhojë, nuk mund të bëhet fjalë për "trembje" nga to. E përmenda disa herë, që tërheqja ime ka të bëjë me gjëra të tjera.
- Së fundi, z. Duraku do të kishit diçka për të shtuar në fund të kësaj "telenovele", që përfundoi keq për Vllazninë?
- Do t'i bëja thirrje pushtetit lokal të Shkodrës, biznesmenëve të këtij qyteti, të bëjnë diçka për këtë skuadër, e cila nuk përfaqëson vetëm Shkodrën, por është edhe nderi i Veriut. Sa për veten time, e përsëris do të isha i gatshëm të jepja edhe unë një kontribut vetëm e vetëm që Vllaznia të mos shkatërrohej.

Ky Artikull u publikua më 26 Jul 2003. Autor Gjergj KOLA- Sporti Shqiptar

 

[djal]

Re: Sporti Shkodran ( Vllaznia )

Institucionet vendore i japin ngjyra politike problemit
Vllaznia, sherr në aksin bashki prefekturë
Takimi i biznesmenëve shkodranë, zhvilluar dy ditë më parë në prefekturë për problemin e sponsorizimit të Vllaznisë, ka shkaktuar "zili" te bashkia e qytetit. Ky institucion, përmes kryetarit të saj, Ormir Rusi, i cili ka dalë në një konferencë shtypi dje paradite, ka bërë të ditur se çdo zgjidhje e problemit të ekipit të futbollit duhet të kalojë përmes bashkisë, si i vetmi institucion që e ka në varësi Vllazninë. Madje ai ka paralajmëruar se Vllaznia nuk duhet të përdoret nga askush për fushatë elektorale, pasi kjo mund të shoqërohet me pasoja të tjera. Kryebashkiaku Rusi, ndër të tjera, ka shpjeguar për gazetarët të gjithë punën dhe përpjekjet e bëra nga institucioni që drejton për të sjellë në krye të Vllaznisë një president të fuqishëm. Megjithatë, numri 1 i Shkodrës e ka përkrahur iniciativën e biznesmenëve të këtij qyteti për shpëtimin e Vllaznisë. "Unë nuk kam si të mos e përkrah një iniciativë të tillë për shpëtimin e Vllaznisë, megjithëse kam qenë gjithnjë kundër bashkimit të një grupi kaq të madh biznesmenësh. Një shoqëri me dy apo tre veta do të ishte ideale, megjithëse edhe kështu duhet pranuar. Veçse nuk mund të lejojmë që të tilla takime të organizohen në prefekturë apo diku tjetër, pasi është bashkia institucioni që e ka në varësi klubin "Vllaznia". Me shumicën e atyre biznesmenëve kemi biseduar për këtë problem dhe ata janë shprehur të gatshëm për ta ndihmuar ekipin. Për rrjedhojë, shumë shpejt do t'i ftojmë sërish ata në bashki, për ta vijuar këtë iniciativë që kanë marrë. Njëkohësisht ftoj edhe zotin Leqejza, jo si prefekt apo kandidat për kryetar bashkie, por si biznesmen, për të qenë i pranishëm në këtë takim."
Pas deklaratës së kryebashkiakut të Shkodrës, Ormir Rusi, ka reaguar menjëherë edhe prefekti Gjergj Leqejza, i cili ka ripohuar dëshirën e tij për të ndihmuar Vllazninë. "Unë do të jem kudo që të bëhen takime për të mirën e Vllaznisë. Gjithsesi, dua të them se nuk duhet fajësuar prefektura se përse e mori këtë iniciativë për të mbledhur biznesmenët. Këtë veprim e kemi bërë sepse askush nuk po e vinte ujin në zjarr për të kaluar krizën financiare që ka mbërthyer Vllazninë. Personalisht, unë e kam thënë edhe më parë, që zgjidhja e problemit të Vllaznisë të mos përzihet me fushatën elektorale," - ka thënë Leqejza.
Në të vërtetë, sikurse kuptohet, këtu nuk ka konflikt interesash, por më tepër zili mes institucioneve, që në realitet u takojnë dy forcave politike kundërshtare. Megjithatë, në Shkodër, kur bëhet fjalë për futbollin, askush nuk do t'ia dijë nëse ky apo ai kandidat për president të Vllaznisë është i majtë apo i djathtë. "Partia" e vetme për ta është Vllaznia dhe, si e tillë, për të ia vlen të shuhet çdo mosmarrëveshje apo konflikt, sepse nuk ka kuptim që për hatër të tyre të vuajë skuadra.
Gjergj KOLA


Trajneri i kuqebluve replikon me ish-sulmuesin e Vllaznisë
Zhega: Bejzade gaboi sërish
Pas deklaratave akuzuese të futbollistit të Vllaznisë, Skerdi Bejzade, në adresë të trajnerit të kësaj skuadre, Medin Zhega, është ky i fundit që ka dashur të hedhë poshtë gjithçka ka thënë kryeqytetasi: "Në radhë të parë, për të shpjeguar se kush është mosmirënjohës, lojtari apo trajneri, nuk ia vlen vetëm një deklarim në shtyp. Gjithsesi, përmes gazetave, kam mësuar se Bejzade më ka konsideruar mosmirënjohës, vetëm sepse unë, si trajner, kam deklaruar se po nuk u stërvit rregullisht, nuk do të jetë në planet e mia për ndeshjen me Dandin. Nga kjo del se mosmirënjohja mbetet në anën e Bejzades dhe jo në anën e trajnerit," - ka thënë në fillim ish-tekniku i kombëtares shqiptare. Më pas, Zhega ka dhënë edhe arsyet se përse ka vendosur të mos e pranojë sulmuesin për dy ndeshjet e Kupës UEFA. Në këtë pikë, trajneri ka sqaruar: "Bejzade ka munguar në pjesën më të madhe të seancave stërvitore që po zhvillon skuadra. Në këto kushte, si mund të jetë i gatshëm ky lojtar, me kaq pak përgatitje, për të luajtur në një ndeshje ndërkombëtare ndaj një kundërshtari si Dandi? Në fakt, në Shkodër ka filluar të qarkullojë një barcaletë: sot është e mërkurë, na vjen Bejzade; sot është e premte, ikën ai. Bejzade bënte 3 seanca stërvitore në javë (të tjerët 8 apo 10 të tilla) dhe javën e pestë, kur të tjerët stërviteshin, ai shkoi me pushime në Sarandë, ndërsa në javën e gjashtë u largua pa leje, gjoja për t'u provuar a për të nënshkruar ndonjë kontratë në Qipro. Siç mësohet, edhe në Qipro nuk kishin nevojë për lojtarë të papërgatitur," - shton Zhega. Nga ana tjetër, trajneri i kuqebluve, i akuzuar nga sulmuesi Bejzade edhe për mosmirënjohje ndaj ish presidentit Çela, ka pohuar: "Mosmirënjohës është vetë lojtari. Bejzade donte të luante ndaj Dantit, se gjoja kështu respektonte të ndjerin Myftar Çela, por në të vërtetë kjo më duket mosmirënjohje nga ana e tij, për atë çfarë ka bërë zoti Çela për të (30.000+5000 euro ka qenë kontrata e tij 6-mujore). Dua t'i kujtoj këtij zotërie se respekti ndaj ish-presidentit të Vllaznisë vjen me punë dhe jo me fjalë. Bejzade duhej të stërvitej që ta respektonte atë. Futbolli është lojë që bazohet te stërvitja dhe jo te mosstërvitja, prandaj nuk mendoj se jam unë mosmirënjohësi ndaj ish-presidentit Çela."
Konflikti mes të dyve, Bejzades dhe Zhegës, ka nisur nga fakti që sulmuesi i kuqebluve nuk është planifikuar të bëjë pjesë në skuadrën që do të ndeshet me skocezët e Dandit. Bejzade e ka quajtur këtë veprim përjashtim të tij nga Vllaznia, në një kohë që Zhega ka sqaruar se nuk bëhet fjalë për një gjë të tillë. Madje në fjalët e tij është treguar i sinqertë, kur thotë se nuk i mban mëri askujt: "Mësuesi asnjëherë nuk mban mëri me nxënësit. Vllaznia e mirëpret Bejzaden të stërvitet, të përgatitet, sepse nga ana ime rrugët i ka të hapura. Por, momentalisht, jo për ndeshjen me Dandin, sepse me kaq pak stërvitje që ka bërë ai është e pamundur që të luajë. Më tej, ai le të japë prova sesa i përgatitur është dhe kështu do të jetë i mirëpritur. Vllaznia e ka respektuar dhe do ta respektojë atë," ka thënë në fund të replikës së tij trajneri shkodran, Zhega.
Gjergj KOLA

Caktohen çmimet e biletave
Klubi i futbollit "Vllaznia", në përgatitjet e tij për ndeshjen e 14 gushtit, për Kupën UEFA, mes skuadrës së tij dhe asaj skoceze të Dandit, është marrë edhe me problemin e biletave të ndeshjes. Kjo, për të parandaluar atë konfuzion të madh që u shfaq në takimin Shqipëri-Rusi, të luajtur në "Loro Boriçi". Këto ditë është hartuar formati i biletës dhe dërgimi i saj në shtypshkronjë për t'u bërë gati për shitje më pas. Drejtuesit e klubit kanë përcaktuar edhe çmimet e biletave, të cilat nuk do të jenë fikse, por do të variojnë sipas tribunave përkatëse. Kështu, në tribunën qendrore, çmimi do të jetë 8000 lekë të vjetra, në atë përkarshi 5000 lekë dhe në atë anësore 3000 lekë. Shitja e tyre është menduar që të bëhet një ditë para ndeshjes dhe ditën e zhvillimit të saj, për t'u dhënë mundësi tifozëve shkodranë që t'i kenë në kohën e duhur në duar. Ndonëse situata te Vllaznia kohët e fundit nuk ka qenë shumë entuziaste, gjithsesi, ky takim ndaj Dandit po pritet me mjaft interes në Shkodër edhe për faktin se është takimi i parë që Vllaznia luan ndaj një kundërshtari evropian në "Loro Boriçi", pas 13 vjetësh.
Gj. KOLA

 

[genci]

Re: Sporti Shkodran ( Vllaznia )

Delijorgji: Sinani, çështje ditësh

Sulmuesi shkodran është pranë kalimit te Dinamo

Presidenti i Dinamos, Mihal Delijorgji, ka bërë një vizitë të shkurtër dje në ambientet e hotel "Dajtit", ku Dinamoja është grumbulluar qysh ditën e premte për takimin me Lokerenin. Presidenti i bluve, pas miqësores me Korfuzin, kishte deklaruar se ende nuk ishte i kënaqur nga gjendja e skuadrës. Më pas, ai pohoi se do të sjellë në skuadër përforcime të tjera, ku objektivi kryesor ishte një sulmues goli, një mesfushor dhe një mbrojtës. Dje, ai ka deklaruar se Dinamoja është shumë pranë blerjes së sulmuesit shkodran Vioresin Sinani. "Synimi ynë kryesor, për sa i përket merkatos, është sulmuesi i Vllaznisë Sinani. Kemi biseduar me futbollistin dhe mendoj se deri në fund të javës do të ketë përfunduar gjithçka. Sapo të frimoset kontrata Sinani do të bashkohet me ekipin dhe do të jetë i gatshëm për stafin teknik. Mund të ketë edhe lojtarë të tjerë që mund të vijnë në ekip, por pasi të jetë mbyllur blerja e Sinanit." Këto kanë qenë edhe fjalët e presidentit të Dinamos.
Në repartin e sulmit janë shfaqur më shumë probleme edhe pas dëmtimit të Tikos, i cili nuk luajti në dy miqësoret me Vllazninë dhe Korfuzin. Kështu, u pa e domosdoshme ardhja në skuadër e një sulmuesi cilësor para fillimit të kampionatit. Alternativa më e mirë për këtë vend u pa Sinani, i cili në vitet e fundit ka qenë një nga sulmuesit më të mirë në kampionatin shqiptar. Presidenti Delijorgji ka përmenduar dje edhe emrin e sulmuesit elbasanas Dorian Bylykbashi, si një kandidat të mundshëm për të veshur fanellën e Dinamos. Por, me këtë futbollist bisedimet mund të fillojnë pas blerjes së Sinanit.


Ky Artikull u publikua më 12 Aug 2003. Autor Fatjon RUPI - Sporti Sh

 

[genci]

Re: Sporti Shkodran ( Vllaznia )

Myftar Çela më kishte propozuar postin e trajnerit-lojtar në klubin e Vllaznisë. Një njeri i tillë është e vështirë t’u vijë me kuqebluve ”. Rudi Vata, futbollisti i mirënjohur shqiptar ka analizuar për gazetën më të madhe angleze, “The Sun”, humbjen e presidentit Çela.

Shtypi britanik ka qenë i interesuar për ngjarjen, sidomos pas faktit që Vllaznia do të luajë kundër FK Dandit në Kupën UEFA.
Vlera e tij ishte e paimagjinueshme për futbollin shkodran. Me humbjen e Myftar Çelës, te Vllaznia nuk është më një pjesë e ndritur e historisë së klubit”.
Kështu Rudi Vata, ish-kapiteni i ekipit kombëtar të Shqipërisë, është shprehur për të përditshmen më të madhe të Anglisë “the sun”. Në një intervistë nga Japonia e largët ku luan për skuadrën e Jokahomës, Vata ka treguar lidhjet e tij me presidentin që u nda nga jeta 10 ditë më parë.

“Vetëm para pak kohësh, më kishte ofruar postin e trajnerit-lojtar në ekip. Jam menduar gjatë, por hëpërhë vendosa të luaj në Japoni. Në të ardhmen edhe mund të isha i gatshëm ta pranoja këtë ofertë. Vllaznia ka qenë ekipi im i parë, Shkodra është vendlindja ime”,- ka thënë për tabloidin prestigjoz lojtari që mban rekordin e ndeshjeve të luajtura për kombëtaren.

The Sun, ashtu si shumë gazeta angleze kanë qenë të interesuara për kundërshtarin e skocezëve të FK Dandit. Duke qenë se Rudi Vata është i vetmi lojtar që ka luajtur në skoci telefoni i mbrojtësit nuk ka pushuar ditët e fundit. “Vllaznia do ta ketë të vështirë pa Myftar Çelën.

Ai ishte shumë ambicjoz. Ekipi zuri vendin e dytë në kampionat këtë vit, pozicion me të cilin presidenti nuk pajtohej. Ai vuri në krye të Vllaznisë, ish-trajnerin e kombëtares, Medin Zhega me synimin për të ndërtuar një ekip të madh. Evropa ishte një nga synimet e presidentit, por tani pa të, Vllaznia do ta ketë shumë të vështirë
[telesport]

 

[genci]

Re: Sporti Shkodran ( Vllaznia )

Vllaznia, tashmë fare pranë shpërbërjes

Pjesa më e madhe e biznesmenëve i përgjigjen negativisht asamblesë

Ka dështuar ndoshta në mënyrë të turpshme iniciativa e biznesmenëve shkodranë për të sponsorizuar Vllazninë. Mbrëmë, asambleja e planifikuar për t'u zhvilluar, nuk është mbajtur e, çka është më e çuditshmja, grupi i biznesmenëve, i planifikuar për të qenë të pranishëm në këtë takim, nuk është paraqitur fare në ambientet e rektoratit. Në zyrën e prefektit Leqejza kanë qenë vetëm 6 prej tyre. Madje, edhe ata që i janë përgjigjur pozitivisht ftesës së prefektit, siç merret vesh, nuk kanë gjetur konsensusin e duhur me njëri-tjetrin. Duke shpikur mënyra nga më të ndryshmet, që kishin të bënin me funksionimin e kësaj asambleje, njerëzit e biznesit kanë dërguar me 50 minuta vonesë, në sallën kur prisnin të tjerët, sekretarin e klubit Agim Medja, për t'u dhënë lajmin jo të mirë. Sipas këtij të fundit, zhvillimi i punimeve të kësaj asambleje do të shtyhet për një datë tjetër. Shkak për këtë është bërë pjesëmarrja e vogël e biznesmenëve, vetëm 6, në takimin e mbrëmshëm, ndërkohë që kanë qenë të ftuar edhe 20 të tjerë. Në takimin e djeshëm kanë marrë pjesë vetëm prefekti-biznesmen Gjergj Leqejza, Agron Çela, Xhevdet Amuli, Paulin Radovani, Seit Fishta e Flamur Hoxha. Të tjerët kanë munguar, pa ndonjë lajmërim apo justifikim. Të mbledhur që në orën 19.00, ashtu siç ishte planifikuar, veteranët e futbollit shkodran, drejtues dhe ish- drejtues të klubit, e gjithë skuadra, futbollistët bashkë me trajnerët, kanë pritur më kot shfaqjen pranë ambienteve të rektoratit të universitetit "Luigj Gurakuqi" të grupit të biznesmenëve. Në orën 19.50 është shfaqur vetëm sekretari Medja, i cili, i zënë në faj për vonesën, ka dalë me një deklaratë përballë gazetarëve dhe të pranishmëve: "Ju kërkoj ndjesë të gjithëve për vonesën, njëkohësisht edhe për shtyrjen e zhvillimit të punimeve të kësaj asambleje. Vetë ngutja në zhvillimin e saj, nisur nga situata emergjente që po kalonte skuadra, bëri që në takimin paraprak me grupin e biznesmenëve të mos ishin të gjithë. Për rrjedhojë, zhvillimet e punimeve të kësaj asambleje dështuan. Gjithsesi, grupi i biznesmenëve prej 6 vetësh është duke studiuar ende mënyrën e menaxhimit të skuadrës në të ardhmen. Një apo dy prej tyre, pretenduan që në këtë asamble duhej të ishte e pranishme edhe kryesia e vjetër, ndërkohë që nga ana ime erdhi sqarimi se mandati i asaj kryesie tashmë ka përfunduar. Kësisoj, kryesia e vjetër e klubit është e shkrirë. Megjithatë, u ra dakord që në mbledhjen e ardhshme të asamblesë, e cila do të zhvillohet në ditët e ardhshme, të ftohen edhe anëtarët e kryesisë së vjetër, që në fakt nuk ka ekzistuar kurrë. Në këto momente, mund të them se situata është bërë edhe më kritike, sepse, siç dihet, sot ishte afati i fundit i kontratës së sportistëve. Për rrjedhojë, në këto kushte, duke filluar që nesër, secili futbollist ka të drejtë të largohet nga Vllaznia, çka e çon këtë skuadër ndoshta drejt shkrirjes."
Ndërkohë, disa pyetjeve të gazetarëve në lidhje me të ardhmen e Vllaznisë, Medja u ka kthyer të tilla përgjigje: "Unë e thashë që, duke filluar nga dita e nesërme, secili prej lojtarëve ka të drejtë të vijë e të kërkojë lejekalimet. Megjithatë, besoj se do të arrijmë të krijojmë një grup lojtarësh, ndoshta me ata që nuk kanë kërkesa maksimale dhe me elementin e ri. Pra, do të marrim pjesë në kampionat. Po ashtu, nuk mendoj se është në rrezik ndeshja e kthimit me Dandin, sepse atë do ta zhvillojmë". Më tej, sekretari Medja, duke iu përgjigjur pyetjes se mos vallë duhet kërkuar ndonjë alternativë tjetër, pas dështimit të kësaj iniciative të biznesmenëve shkodranë, ka shtuar: "Nuk mendoj se mund të quhet e dështuar kjo nismë që kanë marrë biznesmenët. Nëse do të ishte kështu, ata vetë fare mirë mund të thoshin që sonte se çdo gjë ka mbaruar. Nuk është aspak kështu, sepse ata janë të vendosur për ta çuar deri në fund këtë iniciativë".
Sidoqoftë, pavarësisht nga këto fjalë të Medjes, të gjithë të pranishmit në takimin e mbrëmshëm kanë dalë të zhgënjyer nga përgjigja e biznesmenëve. Madje, te secili prej tyre shihej qartë dyshimi për të ardhmen.


Ky Artikull u publikua më 21 Aug 2003. Autor Gjergj Kola - Sporti Shqiptar

 

[ana-b]

Re: Sporti Shkodran ( Vllaznia )

Prap ai shkodrani kishte dal' kampjon europet n peshngritje!
Bravo Shkodra n'ngritje! :thumbsup:

 

[genci]

Re: Sporti Shkodran ( Vllaznia )

8 Shtator 2003

Presidenti Çela: "Vllaznia, merkato me lojtarë cilësorë"

Presidenti i klubit të futbollit të Vllaznisë, Agron Çela, ka deklaruar se së shpejti tek ekipi kuqeblu do të afrohen disa futbollistë cilësorë, të cilët do të ndikojnë ndjeshëm në rritjen e lojës. Nfa prononcimi i tij i djeshëm është mësuar se mund të vishet kuqeblu mesfushori Klodian Duro, i cili edhe dy vjet më parë ka luajtur me ekipin e Vllaznisë dhe më pas u aktivizua në kampionatin turk, me Gallatasarajit, Samsungsporin dhe Malatiasporin. Ardhja e tij pritet me mjaft interes edhe nga sportdashësit shkodrane, pasi me lojën e tij ai kishte fituar simpatinë e tyre. Ndërkohë, mesohet se në ditët e para të javës se ardhshme do të testohen me kuqeblute edhe tre futbollistë brazilianë nga trajneri malazez Haxhiosmanoviç. Pak ditë më parë, me skuadrën shkodranë është bashkuar edhe futbollisti malazez, Perishiç, i cili luan në rolin e mesfushorit. Siç bëhet e ditur, 26-vjeçari nga Mali i Zi ka fituar besimin e teknikut të shkodranëve dhe së shpjeti do të jetë në formacionin e ekipit. Të gjitha këto lëvizje të drejuesve të skuadrës së Vllaznisë vijnë pikërisht pas abandinimit që i’u bë kësaj skuadre në momentet e krizës në këtë verë. Skuadra simpatike e kryeqendrës së veriut, ka bërë një parqitje jo të mirë në dy ndeshjet e para të kampionatit shqiptar, ku ka koleksionuar dy humbje rradhazi, (me Partizanin në stadiumin “Qemal Stafa” dhe me Teutën në stadiumin “Loro Boriçi”).


shekulli.com.al

 

[genci]

Re: Sporti Shkodran ( Vllaznia )

Shkruan "Vllaznia, kthimi në "shtëpi" Kthimi i tij sërish te Vllaznia, skuadra e zemrës, nuk është se i ka bërë ndonjë përshtypje të madhe mjeshtrit të portës, Paulin Ndojës. Sepse, siç thotë dhe vetë, "është një kthim në shtëpinë time". Ka nisur menjëherë nga puna, sepse portierët duhen bërë gati për të mbrojtur me dinjitet portën e skuadrës kuqeblu.

Nga ana tjetër, mjeshtri Ndoja shprehet se ky rikthim i tij ka qenë i pritshëm, pasi asnjëherë nuk e ka parë veten larg Vllaznisë. Ja si shprehet ai në intervistën për "Sportin shqiptar: Ndoja, si do ta konsideroni këtë rikthim tuajin te Vllaznia? Një kthim në shtëpinë time. Aty ku kam kaluar gjithë jetën time sportive, aty ku kam derdhur gjithë djersën time që në moshën 14-vjeçare. Si i tillë, e prita me kënaqësi rikthimin në stafin drejtues të skuadrës, përkrah malazezit Haxhiosmanoviç, me të cilin pata punuar pak kohë para largimit të fundit nga Vllaznia. Ky rikthim i tanishëm nuk pati asnjë të veçantë për ju? E përmenda edhe më lart, se në këtë mjedis jam rritur dhe kam kaluar gjithë vitet e jetës sime sportive. Por rikthimi më bën më entuziast për të punuar siç duhet në detyrën time, atë të përgatitësit të portierëve, detyrë për të cilën besoj se kam dhënë prova që di ta bëj mirë. Mos harroni që këtë zanat e ushtroj që në vitin 1985, kur trajneri i atëhershëm i Vllaznisë, Astrit Hafizi, më afroi në stafin e tij për të stërvitur portierët. Kështu që u bëra i pari trajner portierësh në futbollin shqiptar, duke futur kështu një përvojë të re që bota kishte kohë që e aplikonte. Shkëputja prej dy kampionatesh nga Vllaznia nuk ishte asgjë tjetër veçse një periudhë pushimi, pasi gjithnjë tek unë ekzistonte mendimi se këtu do të kthehesha përsëri. Dhe ja tek jam sërish. Si e gjetët tani skuadrën? Dihen problemet që ajo ka kaluar, por besoj se presidenti dhe stafi i tij kanë filluar një punë të mirë për ta çuar këtë skuadër në vendin që i takon. Ata janë të azhornuar me ekipin dhe, duke e plotësuar atë me ndonjë element të mirë nga merkatoja, jam i sigurt se Vllaznia ka për të bërë gjëra të mira. Së fundi, duke iu rikthyer "zanatit" tuaj, premtoni sigurinë e portës kuqeblu? Porta shkodrane gjithnjë ka qenë e siguruar. Unë kam mendimet e mia se për tri javë duhet punuar intensivisht me portierët aktualë të ekipit, ku në përgjithësi duhet tentuar në një rifreskim të formës së tyre. Njëkohësisht, duhet siguruar edhe një koordinim më i mirë mes portës dhe mbrojtjes. Këto dy reparte duhet të tregojnë qëndrueshmëri në lojën e tyre. "

 

[genci]

Re: Sporti Shkodran ( Vllaznia )

Boks, shkodranët fitojnë ndaj grekëve

Bilanci i miqësores me “Iraklios”: 5 fitore, 2 humbje dhe një barazim


Boksi shkodran triumfon mbi atë helen. Në pallatin e sportit "Qazim Dervishi" të qytetit të Shkodrës, të mërkurën në mbrëmje u zhvillua takimi miqësor ndërkombëtar mes boksierëve të Vllaznisë dhe ekipit grek Iraklios, organizuar nga klubi sportiv "Vllaznia" dhe kompania "Lori Caffe". Boksierët shkodranë u treguan më të përgatitur, duke fituar ndaj kundërshtarëve 5-2, ndërkohë që një takim doli në barazim. Paraqitja e boksierëve tanë në këtëo ndeshje ka qenë e një niveli të mirë. Gjatë gjithë aktivitetit boksierët shkodranë janë mbështetur edhe nga boksdashësit e këtij qyteti, të cilët kanë qenë të pranishëm në shkallët e pallatit të sportit. Trajneri i Vllaznisë, Zef Gjoni, u shpreh i kënaqur për rezultatet e boksierëve te tij, duke theksuar se në takimet e ardhshme, ata do të synojnë gjithnjë cilësinë sportive dhe trofetë në takimet kombëtare e ndërkombëtare. Në përgjithësi, boksierët e klubit sportiv “Vllaznia”, kanë arritur rezultate të mira brenda dhe jashtë vendit. Në kampionatet e fundit kombëtare të zhvilluar në Shqipëri, Vllaznia ka qenë një dominues i ringut shqiptar. Gjithsesi, paraqitja në ndeshjet e fundit, tregon përmirësimin e boksierëve shkodranë, ambicjet e të cilëve janë të mëdha. Ndërkohë sikurse është mësuar nga burime brenda kulbit shkodran, një tjetër turne miqësor i pret boksierët e këtij klubi. Pas disa javësh, ata do të zhvillojnë takime miqësore me boksierët e “Klajd Klub”.


Fituesit e turneut
60 kg: Zhega (Vllaznia)
64 kg: Xhokas (Greqi)
69 kg: Dashi (Vllaznia)-Garlis (Greqi) barazim
75 kg: Kraja (Vllaznia)
78 kg: Hoti (Vllaznia)
81 kg; Kasapio (Greqi)
91 kg: Buliqi (Vllaznia)
+ 91 kg; Hysa (Vllaznia)


Ky Artikull u publikua më 19 Sep 2003. Autor Shekulli

 

[genci]

Re: Sporti Shkodran ( Vllaznia )

Vllaznia, nisin përgatitjet anti-Tirana

Shqetësim mbetet dëmtimi i Sinanit, Martinit dhe Belishës, të cilët janë në dyshim për të shtunën

Ka nisur java e përgatitjeve për ndeshjen e së shtunës, me Tiranën, për Vllazninë. Në fakt, kjo javë stërvitore ka nisur me probleme, sepse tre lojtarë të formacionit bazë të kuqebluve janë të dëmtuar. Madje ende nuk dihet nëse Sinani, Martini e Belisha do të jenë të gatshëm për të shtunën. Një dileme të tillë i shtohet edhe mungesa e Telit, të dënuar me karton të kuq në ndeshjen e fundit ndaj Elbasanit. "Gropa" e hapur në formacionin kuqeblu, kësisoj, duhet mbushur. Nëse Sinani e Martini nuk bëhen gati për ndeshjen e së shtunës, trajneri Haxhiosmanoviç nuk ka lojtarë të tjerë për t'i vendosur në vijën e parë. Por, duke mos e menduar të keqen, shkodranët kanë filluar të bëhen gati për sfidën me bardheblutë. Fitorja e fundit me Elbasanin, përveç rikthimit të qetësisë në kampin shkodran, ka "shpëtuar" edhe rrogat e futbollistëve, të cilat mund të shkonin gjobë, nëse Vllaznia nuk do të merrte tri pikët. Këtu nuk bëhet fjalë për rroga dosido, por për shuma që variojnë nga 600 mijë deri në 1 milion lekë të vjetra për çdo futbollist. Por, më tepër sesa për të shpëtuar rrogat, kuqeblutë kanë luajtur për të mbrojtur dinjitetin e skuadrës që përfaqësojnë, atë që do të kërkojnë ta bëjnë edhe këtë radhë, ndaj skuadrës "së pathyeshme" të El Sajedit. Përgatitjet për këtë gjë tashmë kanë filluar dhe skuadra po punon e qetë. Njëkohësisht, gjatë këtyre ditëve është duke u vazhduar puna edhe për testimin e futbollistëve të rinj që kanë ardhur në skuadër. Dëshira e të gjithëve është që t'i tregohet mbarë opinionit sportdashës shqiptar se Vllaznia nuk ka "vdekur", se mbetet ajo skuadër që gjithnjë ka dhuruar spektakël dhe emocione në ndeshjet që ka luajtur. Dhe e tillë ajo premton të tregohet edhe brenda në "Qemal Stafa", këtë fundjavë.


Ky Artikull u publikua më 24 Sep 2003. Autor Gjergj Kola - Sporti Shqiptar

 

[genci]

Re: Sporti Shkodran ( Vllaznia )

5 Tetor 2003


Vllaznia: Salihi, emri i suksesit

Kuqeblutë kanë mundur 3-1 Flamurtarin dhe ngjiten në renditje


Vllaznia ka fituar dje 3-1 ndaj Flamurtarit në "Loro Boriçi". Megjithatë, loja e saj nuk është ngjitur në lartësinë e duhur. Pjesa e parë ka qenë përgjithësisht e një niveli të dobët. Vlonjatët kishin ardhur për t'u mbrojtur dhe këtë e tregon më së miri fakti që për 10 minuta rresht nuk e kanë kaluar mesin e fushës. Nga ana tjetër, Vllaznia tregoi se nuk ishte në një ditë të mirë. Lojtarët e saj, ndonëse ushtronin presion, asnjëherë nuk arritën ta rrezikojnë seriozisht portën e Dines. Përpjekjet e tajnerit Haxhiosmanoviç për të dërguar shumë lojtarë në zonën vlonjate rezultuan të padobishme. Madje Vllaznia prej kësaj e pësoi. Flamurtari në të parën kundërzbritje ka arritur të shënojë me anë të Vitos. Ky gol pritej t'u shtonte "oreksin" miqve, por në të vërtetë ata vetëm janë mbrojtur. Vllaznia nuk është në gjendje të rrezikojë portën e Dines, derisa do të vinte minuta e 43-të, kur janë vetë vlonjatët që i dhurojnë një top kapitenit Sinani, që nuk heziton të barazojë. Kaq do të mjaftonte që në pjesën e dytë vendësit të jenë zotër të fushës. Në 45 minutat e saj në fushë është vetëm Vllaznia, e cila do të sigurojë qetësinë me dy golat e të talentuarit Salihi. Tashmë Flamurtari nuk ka më forcë të bëjë asgjë.

Thanë pas ndeshjes:
Esat Rakiqi, zëvendëstrajner i Vllaznisë:
"Kjo fitore tregoi se skuadra jonë është në progres. Megjithatë, me lojën e zhvilluar ndaj Flamurtarit, nuk jam edhe aq shumë i kënaqur. Jo se pësuam gol të parët, por sepse nuk ditëm të shfrytëzojmë siç duhet ato raste që na u krijuan. Megjithatë, e përsëris, na gëzon mbi të gjitha fitorja, e cila vërteton që jemi në rrugë të mbarë."
Ardi Bozhani, trajner i Flamurtarit:
"Nuk e prisja një rezultat të tillë të ndeshjes. Vllaznia ndoshta e meritoi fitoren, por Flamurtari u ndëshkua nga gjyqtari. Gjatë 90 minutave të lojës, vetëm 4 faulla mund të ketë dhënë për ne, çka është e çuditshme. Nuk e di ende se ku i gjen federata këta gjyqtarë. Sot (dje), neve na ndodhi si me Elbasanin. Për mendimin tim, skuadra jonë duhej të kishte dalë me tjetër rezultat nga kjo ndeshje."

Të veçanta
- Ulja e çmimit të biletave për tribunën anësore bëri që gjysma e tifozëve të pranishëm në ndeshjen e djeshme të vendoseshin pikërisht atje. Pavarësisht nga kjo, shumë tifozë kanë mbetur jashtë stadiumit sepse niveli i jetesës së tyre është tepër i ulët, aq sa nuk kanë mundësi të blejnë edhe një biletë.
- Loja tepër e dobët e Vllaznisë në pjesën e parë i ka detyruar pjesëtarët e stafit presidencial të saj të zbresin në dhomat e zhveshjes dhe t'u flasin me tone të ashpra futbollistëve.

Kuqeblutë, acarohen marrëdhëniet skuadër-president
Në vend që t'i gëzoheshin fitores së djeshme ndaj Flamurtarit, në kampin shkodran kanë nisur polemikat. Siç bëjnë të ditur burime brenda skuadrës, polemikat kanë nisur pas fjalëve të rënda që pjesëtarë të presidencës së klubit kanë lëshuar në adresë të futbollistëve në pushim të dy pjesëve. Ata e ndiejnë veten të fyer nga veprime të tilla dhe, për rrjedhojë, siç shprehen edhe vetë, përpara stërvitjes së sotme, që do të nisë në orën 15.00, do të dalin me një qëndrim të ri për vazhdimin e mëtejshëm. Çdo gjë ka nisur pas pjesës së parë të ndeshjes me Flamurtarin. Bëhet e ditur se në dhomat e zhveshjes ka zbritur një nga drejtuesit e lartë të klubit, i cili ka lëshuar fjalë të rënda në adresë të lojtarëve për lojën e dobët që kanë zhvilluar në 45 minutat e para. Madje ai ka kërcënuar se, nëse nuk fitohej ndeshja, futbollistët nuk do të merrnin lekë kontratash. Ndërkohë, në fund të ndeshjes, të cilën Vllaznia e ka fituar 3-1, futbollistët kuqeblu janë mbyllur të gjithë në dhomat e zhveshjes. Në vend që t'u gëzoheshin 3 pikëve të marra, janë shfaqur tepër të fyer dhe të zhgënjyer nga qëndrimi i drejtuesve të tyre. Ata kanë biseduar edhe me drejtuesit e skuadrës, të cilët mësohet t'i kenë mbështetur ata. Ndërkohë, më pas është vendosur që përpara stërvijtes së sotme të bisedohet më qartë edhe në mënyrë më të detajuar se çfarë do të bëjnë. Ata pritet të protestojnë, madje edhe mund ta bojkotojnë stërvitjen.

 

[artur]

Re: Sporti Shkodran ( Vllaznia )

Rezultatet

Aug 23, 2003 Partizani - Vllaznia 4 - 1
Teuta - Shkumbini 2 - 0
Dinamo - Besa 2 - 0
Elbasani - Flamurtari 2 - 1
Lushnja - Tirana 0 - 6
-------------------------------------------------------

Aug 30, 2003 Partizani - Lushnja 1 - 0
Flamurtari - Tirana 0 - 3
Besa - Elbasani 1 - 1
Aug 31, 2003 Shkumbini - Dinamo 1 - 4
-------------------------------------------------------

Sep 12, 2003 Tirana - Besa 7 - 1
Sep 13, 2003 Teuta - Partizani 1 - 1
Dinamo - Vllaznia 3 - 0
Elbasani - Shkumbini 5 - 0
Lushnja - Flamurtari 1 - 0
-------------------------------------------------------
Sep 20, 2003 Teuta - Lushnja 2 - 0
Partizani - Dinamo 2 - 1
Vllaznia - Elbasani 1 - 0
Shkumbini - Tirana 1 - 3
Besa - Flamurtari 0 - 0
-------------------------------------------------------

Sep 26, 2003 Dinamo - Teuta 1 - 1
Sep 27, 2003 Elbasani - Partizani 0 - 0
Tirana - Vllaznia 3 - 2
Flamurtari - Shkumbini 3 - 0
Lushnja - Besa 0 - 1
-------------------------------------------------------
Oct 3, 2003 Dinamo - Lushnja 0 - 0
Oct 4, 2003 Teuta - Elbasani 3 - 1
Partizani - Tirana 3 - 1
Vllaznia - Flamurtari 3 - 1
Shkumbini - Besa 1 - 2
-------------------------------------------------------
Oct 8, 2003 Tirana - Teuta 1 - 3
Elbasani - Dinamo 0 - 1
Flamurtari - Partizani 0 - 3
Besa - Vllaznia 0 - 2
Lushnja - Shkumbini 0 - 0
-------------------------------------------------------
Oct 17, 2003 Partizani - Besa 3 - 1
Oct 18, 2003 Elbasani - Lushnja 4 - 0
Dinamo - Tirana 0 - 0
Teuta - Flamurtari 2 - 0
Vllaznia - Shkumbini 4 - 0
-------------------------------------------------------


--------------------------------------------------------------------------------

Renditja


R Skuadra N F B H Gola P
-------------------------------------------------------
1. Partizani 8 6 2 0 17 - 5 20
2. Teuta 8 6 2 0 15 - 4 20
3. Tirana 8 5 1 2 24 - 10 16
4. Dinamo 8 4 3 1 12 - 4 15
5. Vllaznia 8 4 0 4 13 - 13 12
6. Elbasani 8 3 2 3 13 - 7 11
7. Besa 8 2 2 4 6 - 16 8
8. Lushnja 8 1 2 5 1 - 14 5
9. Flamurtari 8 1 1 6 5 - 14 4
-------------------------------------------------------
10. Shkumbini 8 0 1 7 3 - 22 1

 

[genci]

Re: Sporti Shkodran ( Vllaznia )

Bokatola i lirë, firmos për Vllazninë

Gjykata e ka liruar me kusht kongolezin, i cili muaj më parë aksidentoi me vdekje dy persona

Futbollisti kongolez i Vllaznisë, Riçard Bokatola, më në fund ka rifituar lirinë. Pas plot 114 ditësh nën masën e arrestit, pas aksidentit të shkaktuar pak muaj më parë, si pasojë e të cilit gjetën vdekjen dy shtetas, Bokatola, me vendim të Gjykatës së Rrethit të Shkodrës, ka lënë dje qelinë e burgut. Vendimi i mësipërm, i bazuar në nenin 53 të Kodit të Procedurës Penale, i ka dhënë kongolezit lirinë me kusht për 5 vjet. Ndërkohë, ai nuk do të ketë mundësi të drejtojë asnjë mjet motorik për 3 vjet. Ky ka qenë konkluzioni i seancës së djeshme, zhvilluar në ngarkim të futbollistit të Vllaznisë. Çdo gjë ka ndodhur në orën 9.30 të paradrekes së djeshme, në një sallë të mbushur plot e përplot me familjarë të viktimave të aksidentit, pjesëtarë të klubit "Vllaznia", tifozë të këtij ekipi dhe gazetarë të shumtë. Pika që ka sjellë kthesën e shumëpritur në këtë seancë, pas kërkesës së prokurorit për dënimin e tij me 6 vjet burg, ka qenë paraqitja nga ana e avokatit mbrojtës, Bujar Hoti, të një dokumenti, pikërisht të aktmarrëveshjes për faljen e tij nga familja e viktimave Prel dhe Katerina Shkreli. Për pasojë, pas këtij momenti, trupi gjykues, me kryetar Tonin Sterkajn, është tërhequr për marrjen e atij vendimi, që solli lirimin nga salla e gjyqit të futbollistit 25-vjeçar. Por ajo që ka bërë përshtypje ka qenë mosreagimi i kongolezit, pasi fitoi sërish të drejtën për të jetuar i lirë. Ajo çfarë ka ngjarë më 7 korrik të këtij viti vazhdon ta brejë ndërgjegjen e tij, pasi ka marrë jetën e dy njerëzve të pafajshëm. Megjithtë, Bokatola ka shtrënguar duart me pjesëtarët e familjes Shkreli, sapo ka lënë sallën e gjyqit. Madje u ka premtuar se shpejt do të bëjë një vizitë kortezie në familjen e tyre, që do të thotë se ka ndër mend të qëndrojë gjatë në Shkodër. Burime pranë klubit "Vllaznia", por edhe pranë futbollistit në fjalë, bëjnë të ditur se dy palët kanë rënë dakord për firmosjen e një kontrate të re. Madje, sipas vetë futbollistit, bëhet e ditur se kjo kontratë do të jetë dyvjeçare, ndërkohë që nuk bëhen të ditura asnjë prej kushteve të saj. Bokatola e ka quajtur krejtësisht të nevojshëm qëndrimin më tej në Shkodër, në këtë qytet ku të gjithë banorët e tij u solidarizuan me fatkeqësinë që i ndodhi.


Ky Artikull u publikua më 30 Oct 2003

 

[genci]

Re: Sporti Shkodran ( Vllaznia )

Sinani: Partizan, humbjen prite në Shkodër!

Kapiteni ndez sfidën kryesore të kësaj jave të "Loro Boriçit", duke u hedhur "dorashkën" të kuqve

Kapiteni i skuadrës shkodrane, Vioresin Sinani, ka shumë besim se Partizani, këtë javë, do ta regjistrojë humbjen e parë të këtij kampionati pikërisht Shkodër. Ballafaqimi i të kuqve kryeqytetas me Vllazninë po pritet me interes të madh nga të gjithë sportdashësit shkodranë, po ashtu edhe nga vetë futbollistët kuqeblu. "Një ndeshje e tillë të motivon vetvetiu," - thotë sulmuesi kryesor i shkodranëve, Sinani. Ai është autor i tre golave dhe i shumë shtyllave të goditura në këtë kampionat. Por, për momentin, atij nuk i interesojnë shifrat. "Për momentin, e rëndësishme për ne mbetet mbyllja me sukses e ndeshjes me Partizanin," - shprehet Sinani në një intervistë për "Sportin shqiptar":
- Viori, më duket se e harruat tashmë humbjen me Lushnjën, apo jo?
- Normalisht që e kemi harruar, pasi jemi në kampionat dhe duhet të mendojmë për ndeshjen e radhës. Aq më tepër që kjo e radhës, me Partizanin, është shumë e rëndësishme. Humbja me Lushnjën tani nuk kthehet më, megjithëse ato tri pikë të lëna do të ishin shumë të rëndësishme për ne.
- Përballja me një skuadër si Partizani, a ju motivon më tepër këtë radhë?
- Kjo as që diskutohet. Në pamje të parë, çdo ndeshje ka vlerën e tri pikëve, por kjo e radhës, ndaj të kuqve, natyrisht ka edhe të veçantat e saj. Në ndeshje të tilla, vetvetiu je më i motivuar për të dhënë maksimumin në fushë.
- Besoj e dini që Partizani nuk e ka provuar ende shijen e humbjes në këtë kampionat...
- Po, e di. Pikërisht, edhe ky fakt është një arsye më tepër për Vllazninë që t'i shkaktojë humbjen e parë këtij ekipi. Shpresat janë të mëdha që një gjë e tillë të ndodhë pikërisht në "Loro Boriçi". Besoj se do t'ia arrijmë.
- A mendoni se Vllaznia ka forca për ta përballuar një ekip të kompletuar me lojtarë cilësorë, siç është Partizani?
- Po t'u referohesh kualiteteteve të të dy ekipeve, vërtet mund të jemi pak më poshtë se Partizani, mirëpo në anën tonë është më e madhe ambicia për të treguar sesa vlejmë në të vërtetë. Me ne do të jenë edhe tifozët e shumtë shkodranë, që pritet të mbushin "Loro Boriçin" ditën e shtunë. Për të gjitha këto, besoj se do të jemi dinjitozë dhe fitimtarë në këtë ndeshje.
- Kundër jush, këtë herë do të luajë edhe Klodian Duro me Bejzaden, që tifozeria shkodrane do të donte t'i kishte të veshur kuqeblu. Ju, personalisht, a i trembeni këtij "dueti" tashmë të kuq?
- Si Duro, ashtu edhe Bejzade, janë vërtet lojtarë të mirë, por kjo nuk përbën asnjë lloj ndrojtjeje apo stepjeje për ne. Pastaj, Partizani, në tërësi, ka lojtarë të mirë në gjirin e tij. Kjo do të thotë se pikësynimi ynë nuk do të jetë vetëm bllokimi i këtyre dy lojtarëve, sepse mund të na krijojnë probleme edhe të tjerët.
- Së fundi, a e konsideroni tepër të rëndësishme sfidën me të kuqtë, për sa i takon ecurisë së mëtejshme të Vllaznisë në këtë kampionat?
- Them se po. Një fitore në këtë takim do të na ndihmonte shumë për të ardhmen, aq më tepër që na pret një short i vështirë në javët e ardhshme. Megjithatë, ne do të bëjmë të gjitha përpjekjet për të marrë maksimumin në to.


Ky Artikull u publikua më 30 Oct 2003