Re: Kryqet ne Bushat!
E Enjte, 12 Janar 2006
KRYQI, SIMBOL I URTESISE E PAQES DHE JO I SHERRIT
Ajo cka ndodhi diten e Kurban Bajramit ne Bushat te Shkodres eshte nje shenje se ka forca apo grupime qe duan ndarje dhe sherr nderfetar, pasi nuk u ka mjaftuar sherri politik tash 15 vite. Ata dashakeqinj dhe shpirtzinj, me anen e sharrimit te kryqit, donin te sharronin edhe rrenjet e historise sone dymijevjecare te krishterimit, por dhe te minonin ate cka edhe turku nuk arriti ta bente per afro 500 vite pushtim. Nese ka patur e vazhdon te kete harmoni, e vetmja e tille e paprekur eshte ajo nderfetare, kryesisht per merite te popullit dhe natyrisht edhe te drejtuesve fetare. Nese, vitet e fundit, ndonje segment fetar i ardhur shekuj pas krishterimit donte te fuste urat e zjarrit mbi kryqin e shenjte, ka deshtuar fale mencurise popullore. Kryqi nuk eshte thjesht nje kolone hekuri qe pardje eshte rrezuar ne Bushat nga disa duar e zemra te liga e keqdashese. Kryqi eshte krejt kultura tash mbi dymijevjecare qe drejton Europen dhe krejt Perendimin, eshte filozofia e tij qe ka sjelle paqen e kultivuar, kulturen, bashkepunimin, urtesine dhe ndjenjen e solidaritetit. Por te ngrihesh mbi kultin eshte vrastare. Ky veprim kerkon pervec penalizimit, edhe ngritjen e ndergjegjes popullore qe te mos prekin simbolet e njeri-tjetrit. Kryqi eshte atje ne Bushat dhe kudo ne Bushate te tjere dhe nuk duhet te guxoje njeri te vere dore, ashtu sikurse nuk duhet hedhur veshtrim keqdashes nga minarete e xhamive qe jane kudo e ngado. Drejtuesit fetare nuk duhet t'i hedhin benzine zjarrit qe eshte ndezur nga duar te keqija, ashtu sikurse tha mbreme ne nje televizion nje drejtues fetar qe tha se "kryqi duhet te hiqet, ose te mos ishte vene prape". Pra, as me pak e as me shume deshires se tij, qofte te mire, dikush ne popull qe nuk kupton dhe aq mire nga punet e Perendise dhe te politikes i pergjigjet me sharrim tjeter te kryqit ne nje dite tjeter. Qe do te thote sharrim dhe rivenie, sharrim dhe sherr, sherr dhe kufinj te ndare qe nuk i deshiron asnje paqedashes ne kete vend.
Nuk ka perse kryqi te shqetesoje asnjeri ne kete vend, pasi nese i referohemi historise tone shqiptare, ishte kryqi, pastaj erdhi xhamia, ishte kryqi dhe me pas u kultivua minareja, duke i hapur vend nga toka e krishtere. Ishte kryqi dhe me pas erdhi minareja ne saje te tolerances se te parit. Dhe me pas ishin te dyja qe percuan fjalen e Zotit tek besimtaret e tyre te mire. Kishat dhe xhamiat jetuan nder shekuj perballe dhe prane njera-tjetres ne paqe e dashuri duke respektuar besimin e njera-tjetres. Ndaj, nuk prish pune dielli qe perhap kryqi ne Bushat apo ne Bushat te tjere ne Shqiperi, ashtu sic nuk prish aspak pune xhamia ne mes te Tiranes, bash ne zemren e saj. Ato vetem ndricojne edhe kur dritat e KESH-it nuk punojne. Ato kane driten e Zotit dhe nuk ka perse te futet sharra tek rrenjet e tyre, pasi gabimisht duke kerkuar sharrimin e rrenjes, del se ne kete toke ka qene kryqi para minarese!
Alban Mati
*****
Në grupin special të ngritur bëjnë pjesë edhe ekspertë të antiterrorit, mbërritur nga Ministria e Brendshme dhe Drejtoria e Përgjithshme e Policisë, në Tiranë.
Ngrihet kryqi i rrëzuar, Antiterrori në kërkim të autorëve
Anila Dushi
SHKODËR-Kryqi i rrëzuar dy ditë më parë në kodrën e Zefjanës, në fshatin Rranxa Bushat në Shkodër, është rivendosur përsëri nga banorët e krishterë të tij. Ata kanë punuar edhe natën e së martës për të salduar kryqin aty ku ka qenë, ndërsa dje e kanë lyer atë me bojë të bardhë. Ndërkaq, drejtoria e policisë së Shkodrës tha dje për gazetën se ishte ngritur një grup i posaçëm për të gjetur personat që sharruan kryqin. Në këtë grup bëjnë pjesë edhe specialistë të antiterrorit, të mbërritur nga Ministria e Brendshme dhe Drejtoria e Përgjithshme e Policisë, në Tiranë.
***
Ngjarja e sharrimit dhe hedhjes përtokë e kryqit të hekurt nuk ka kaluar pa ngjallur shqetësim tek banorët, si ata katolikë që janë më të shumtë në këtë fshat, ashtu dhe tek muslimanët. Aktin e kryer, që u zbulua të martën, e kanë dënuar të gjithë. Ndonëse gjatë bisedave, disa prej banorëve janë akoma të nervozuar, në përgjithësi ata mendojnë se ky veprim nuk do t’i prishë marrëdhëniet e mira mes besimtarëve të dy komuniteteve fetare që jetojnë në të njëjtin fshat. Ata kërkojnë nga shteti që të identifikohen e të vihen para përgjegjësisë autorët. Në qendër të fshatit Rranxa këto ditë mblidhen shumë banorë që diskutojnë për këtë çështje e cila është kryesorja mes bisedave të tyre. Gjatë paradites, në majë të kodrës, shihen ata që kanë shkuar për të lyer me të bardhë dhe për të ngritur në këmbë kryqin e rrëzuar dy ditë më parë.
Tonin Nika, njëri prej banorëve të fshatit tregon se ishte duke punuar në një objekt të kishës, kur pa se kryqi në Zefjanë po binte, me sa dukej, duke u tërhequr. Ai shton se ky veprim duhet të dënohet dhe se organet kompetente duhet të gjejnë fajtorët. Ndërsa Marash Shpati, një banor i moshuar i Rranxës, shprehet se “katolikët e myslimanët kanë shkuar gjithmonë mirë mes tyre dhe se asnjëherë nuk kanë patur probleme. Këto kryqe janë vendosur që prej katër vjetësh dhe askush nuk ka thënë gjë. Mendoj se ai që e ka bërë aktin e shëmtuar, në radhë të parë nuk është njeri pasi një njeri i vërtetë nuk luan me ndjenjat fetare të të tjerëve. Ai duhet të jetë nisur nga motive të tjera. Për mua, kjo që ka ndodhur duhet të kalojë pa asnjë mëri dhe problem pasi ne e dime se me myslimanët kemi marrëdhënie të mira e respekt dhe kjo të vazhdojë. Veprime që bëhen nga dy a tre individë, të cilët duhet t’i gjejë shteti, nuk duhet t’i ndryshojnë marrëdhëniet e mira mes dy komuniteteve fetare këtu. Mendoj se kjo gjë as që ka për të ndodhur”.
Të njëjtën gjë mendon edhe Ndoc Shaba, drejtor shkolle në Barbullush. “Shkova dje vizitë për të uruar Bajramin tek një miku im mysliman. Atje morëm vesh rrëzimin e kryqit. Ndonëse nuk dihet se kush e ka bërë , u ndjemë keq, si unë ashtu dhe miku im mysliman. Këto veprime të shkëputura, ndonëse të rënda për momentin, kurrsesi nuk duhet të ndikojnë në prishjen e marrëdhënieve të mira mes dy komuniteteve të zonës, edhe pse këtu ka një shumicë dërmuese katolike. Ne gjithmonë kemi shkuar shumë mirë mes njëri- tjetrit , kemi respektuar njëri- tjetrin dhe kjo që ndodhi uroj të mos e prishë këtë harmoni”.
***
Lidhur me këtë ngjarje kanë reaguar dhe drejtues të lartë të komuniteteve fetare në Shkodër. Zëvendësmyftiu Arben Halluni, në një deklaratë për shtyp, tha se “institucioni i Myftinisë shpreh keqardhjen dhe dënon veprimin e shëmtuar joislam të rrëzimit të kryqit në kodrën e Zefjanës në Bushat, pasi veprime të tilla nuk i shërbejnë paqes, harmonisë fetare dhe tolerancës ndërfetare që e trashëgojmë në shekuj.Institucioni ynë, si gjithmonë ka qenë dhe është kundër çdo lloj veprimi të dhunshëm qoftë ky veprim edhe ndaj çdo lloj simboli fetar, i kujtdo qoftë ai”. Halluni shtoi se i takon shtetit të gjejë autorët e sharrimit të kryqit dhe që të zgjidhë çështjen institucionalisht. “I kërkojmë shtetit që të gjejë autorët e kësaj ngjarjeje dhe t’i nxjerrë para drejtësisë”,- përfundon deklarata e myftinisë së Shkodrës.
Arqipeshkvi metropolitan i Shkodrës, dhe njëkohësisht kryetar i konferencës ipeshkvnore të Shqipërisë, Angjelo Masafra, në deklaratën e tij ka theksuar se është indinjuar shumë nga prerja e kryqit. “Pavarësisht se kush e ka bërë një vepër të tillë, ne mendojmë se individët e përfshirë në këtë akt nuk duhet të na cënojnë dhe të na prishin marrëdhëniet tona ndërfetare të cilat janë ruajtur me shekuj. Jemi të ndërgjegjshëm se personat që kanë rrëzuar kryqin nuk janë nxitur nga titullarët e komunitetit mysliman të Shkodrës. Atë që ndodhi e quajmë një akt të veçuar. I bëjmë thirrje të gjithë besimtarëve të çfarëdo besimi qofshin, e në mënyrë të veçantë atyre katolikë, të cilët ndihen të prekur e të irrituar, që ta ruajnë gjakftohtësinë. I bëj thirrje autoriteteve vendore e qendrore, që me seriozitet e impenjim të vazhdueshëm , të izolojnë dhe të vënë para përgjegjësisë së ligjit të gjithë ato që cënojnë harmoninë fetare. I sigurojmë autoritetet e mësipërme se nga ana e jonë nuk do të ketë asnjë tentativë për të bërë vetëgjyqësi, por duam të besojmë se në Shqipëri funksionon shteti me forcën e ligjit”,- deklaroi Masafra.
Policia
Ekspertë antiterrori, për të gjetur autorët e sharrimit të kryqit
Sipas drejtorisë së policisë së Shkodrës është ngritur nj grup pune i posaçëm në përbërje të të cilit janë dhe ekspertë të antiterrorit të ardhur nga Drejtoria e Përgjithshme e Policisë dhe Ministria e Brendshme në Tiranë. Ky grup po punon për identifikimin e autorëve që kanë rrëzuar kryqin, por deri tani nuk ka asnjë të ndaluar për këtë.
Dom Marçelo: Kryqi i rrëzuar nuk do të prishë harmoninë fetare
Zëvendësfamulltari i zonës, Dom Marçelo Lakoseljac, një prift kroat që punon prej disa muajsh në këtë zonë, shprehet se “njerëzit mbrëmë (të martën) kanë qenë të shqetësuar nga ajo që kishte ndodhur. Ne i kemi këshilluar që ta marrin shtruar punën, me ngadalë, pasi është qeveria e policia ajo që duhet të gjejë autorët”. Dom Marçelo shton se komunitetet fetare shkojnë mirë në këtë zonë të Shkodrës dhe se ka bindjen që marrëdhëniet e tyre nuk do të prishen nga ajo që ka ndodhur. “I bëj thirrje gjithë besimtarëve të zonës, veçanërisht atyre katolikë që kjo që ndodhi të mos ndikojë negativisht në marrëdhëniet me besimtarët e tjerë. Mirësia duhet të shtohet e të rritet , pasi ky nuk është një konflikt mes feve, por tjetër gjë. Të gjitha fetë janë të pastra dhe kur gjithçka është e pastër dhe e sinqertë, punët shkojnë mire”,-thotë Dom Marçelo.
Kreu i Komunitetit Mysliman
Selim Muça
“Nuk u gëzova që u rrëzua kryqi, por as nuk u gëzova që ai u ngrit përsëri. Nuk jam kundër kryqit, por mendoj se simbolet fetare duhet të vendosen nëpër institucionet e tyre dhe jo nëpër kodra e male, gjë që po shtohet tani së shumti”,-tha dje kreu i Komunitetit Musliman Shqiptar, Selim Muça.
“E dënojmë aktin vandalist që ndodhi në Shkodër. Dëmtimi i kryqit është bërë nga persona të veçantë e jo të urdhëuar të cilët dëshirojnë të shkatërrojnë tolerancën fetare që sundon në Shqipëri”,-theksoi ai i pyetur për atë që ndodhi në Bushat të Shkodrës.
Ai shtoi se ka komunikuar me Myftininë e Shkodrës dhe se ka kërkuar uljen e gjakrave. “Në lidhje me këtë çështje do të takohem me monsinjor at Rrok Mirdita, pasi jemi miq të mirë”.
Kisha katolike
monsinjor at Rrok Mirdita
“Ngjarja e së martës përbën një akt të veçuar dhe nuk përfaqëson në asnjë mënyrë frymën e marrëdhënieve të mira fetare”,-deklaroi dje për median monsinjor at Rrok Mirdita. Në një konferencë për shtyp ai kërkoi “ mosinfiltrimin e elementëve ekstremistë që duan të destabilizojnë këtë frymë bashkëpunimi. “Bëjmë thirrje që askush të mos bjerë pre e kësaj fryme ekstremiste që çon drejt përçarjeve dhe armiqësive”. Monsinjor At Rrok Mirdita tha se asnjë i dyshuar nuk është ndaluar deri tani për këtë akt. “Por nuk duhet të paragjykohet më kot asnjë nga anëtarët e komuniteteve fetare. Kjo është puna e hetuesve dhe neve nuk na lejohet të vëmë gishtin mbi asnjë njeri”,-përfundoi ai.
12/01/2006
KATEGORIA: Kronike nga rrethet
))