Kampione i Shqiperise 2003-2004 ? ??

[Alesio]

Re: Kampione i Shqiperise 2003-2004 ? ??

BESA :

Drejtori i stadiumit, Xhevat Hylviu, flet për rikonstruksionin e ambienteve të brendshme

Hylviu: Stadiumi "Besa", gati brenda 15 tetorit

Krahas pamjes së fushës, stadiumi "Besa" do të ndryshojë edhe pamjen e ambienteve të brendshme. Dhomat e dusheve me suva të rënë, mure që s'u njihet ngjyra, kaldajë me dru, tualete që vetëm emrin kanë të tillë, kjo ishte pamja e para dy javëve në stadiumin "Besa", kur hyje në ambientet e brendshme. Kishte 28 vjet pa u hedhur asnjë qindarkë në përmirësimin e tyre. Në këto kushte u akordua një fond prej 4 milionë lekësh të reja për të kryer rikonstruksionin e tyre. Drejtori i stadiumit "Besa", Xhevat Hylviu, sqaron për punën e deritanishme dhe çfarë do të bëhet në të ardhmen: "Kemi mbi dy javë që punojmë për të hequr gjithë këtë "llum". Kemi gërryer edhe muret, pasi suvatimi kishte rënë pjesë-pjesë. Kemi pastruar gjithçka në dhomat e dusheve dhe mund të them se tani na mbetet të fillojmë nga rindërtimi." Puna vazhdon me ritme të shpejta, ndërsa presidenti kavajas Bizhdili ka nënshkruar një kontratë 1-mujore me kompleksin privat "Aliaj" për të shfrytëzuar dushet dhe sallën e tyre të forcës me mjete bashkëkohore.
Realizimi i këtij rikonstruksioni pritet t'u ndryshojë pamjen ambienteve të brendshme të stadiumit. Për herë të parë do të shfrytëzohen edhe dhomat poshtë tribunës, që janë lënë në pluhur e pisllëk për 28 vjet me radhë. Tashmë, stadiumi "Besa" ngjan me një kantier ndërtimi, ku, nga njëra anë, punohet në fushë me hedhjen e shtresës së shtufit, nga ana tjetër, hidraulikë, elektriçistë, marangozë e ustallarë të ndryshëm punojnë në ambientet e brendshme, dhomat e zhveshjes, dushe, korridore, kaldajë etj. "Gjithçka, - përfundon Hylviu, - dëshirojmë të jetë gati brenda 15 tetorit, si brenda, ashtu edhe në shtrimin e tapetit."

 

[Alesio]

Re: Kampione i Shqiperise 2003-2004 ? ??

BESA :

Guma, e ardhmja e portës së Besës

Më në fund, presidenti i Besës së Kavajës, Bizhdili, ka vendosur të afrojë pranë ekipit të tij portierin e ri e të talentuar kavajas, Guma. Ky portier, edhe pse ishte anëtar i ekipit kombëtar U-18, që arriti një sukses të madh vjet në përfaqësimet evropiane, deri dje nuk bënte pjesë në radhët e ekipit verdhezi. Për herë të parë në historinë 79-vjeçare të Besës, porta kavajase, pas largimit të Arkaxhiut, mbrohej nga dy "jabanxhinj", Kokuri dhe Osmani. Arkaxhiu u largua nga ekipi, duke mos pranuar t'i bashkohej më Besës që në fazën përgatitore, për shkak të mosaktivizimit, edhe pse qëndroi mbi tre vjet rezervë. Afrimi i Gumës, edhe pse me vonesë, është një premisë e mirë se diçka do të ndryshojë në punën me portierët te Besa. Nisur nga talenti që zotëron 18-vjeçari Guma, nëse përkrahet dhe stërvitet me profesionalizëm nga stafi teknik i skuadrës, premton të jetë e ardhmja e portës kavajase.

 

[Alesio]

Re: Kampione i Shqiperise 2003-2004 ? ??

Kuriozitete, shifra dhe fakte nga java e 3-tw e Grupit A1 dhe java e parë e Grupit A2

Tirana, më shumë se 5 gola për ndeshje

- Katër fitore (të gjitha shtëpiake), një barazim, 19 gola të shënuar (shifra më e lartë deri tani), prej të cilëve 17 të shënuar nga vendësit dhe vetëm dy prej miqve, 3 kartonë të kuq dhe dy penallti. Këto shifra na serviri "sofra" e javës së 3-të të Kampionatit të 65-të Kombëtar të Futbollit.
- Së bashku me 30 golat e dy javëve të para, numri i përgjithshëm i tyre arriti në 49, që do të thotë 2 gola më shumë se vjet, të shënuara në 6 takime më pak se në kampionatin e kaluar.
- Pas fitores së javës së parë (6-0) ndaj Lushnjës, kampionët bardheblu realizuan një tjetër fitore me shifra të thella (7-1) ndaj Besës. Fitoren e tretë më të thellë në këto javë e ka arritur Elbasani, që ka mposhtur 5-0 fqinjin e tij, Shkumbinin.
- Tirana, kjo "makinë" e vërtetë golash, ka shënuar deri tani aq sa kanë shënuar 7 skuadrat e vendeve 4-10, të marra së bashku. Ndërkohë, dinamoviti Qorri, që kryeson listën e golashënuesve, ka shënuar më shumë se Lushnja, Flamurtari, Vllaznia e Shkumbini së bashku (ato kanë realizuar vetëm 4 gola).
- Ziambo i Dinamos dhe Memelli i Elbasanit kanë shënuar më shumë se një gol këtë javë. Kështu, në këto 3 javë të para të kampionatit, janë regjistruar 5 dygolësha, ndërkohë që Qorri i Dinamos ka firmosur 4-golëshin e vetëm deri tani.
- Nga të gjithë golashënuesit e deritanishëm, vetëm tiranasi Fortuzi ka mundur të shënojë gola në të trija ndeshjet e zhvilluara. Ai tani renditet në vendin e dytë, me 4 gola të realizuar.
- Të dyja penalltitë e kësaj jave, të transformuara nga Mancaku (Teuta) dhe Kornea (Lushnja) në gola, kanë realizuar decizive. Të gjitha penalltitë e dhëna në këto 3 javë (5) janë kthyer në gola.
- Mbas dy javëve të para të kampionatit, gjyqtarët tanë kanë ndëshkuar me kartonë të kuq 3 futbollistë. Dy futbollistë kanë qenë kontigjent i skuadrave mike, që edhe kanë humbur (Sheta-Besa dhe Luka-Vllaznia). Për hesap të lushnjarëve është dhënë një penallti, një karton i kuq dhe një fitore 3-pikëshe.
- Barazimi i vetëm i javës u fiksua në stadiumin "Niko Dovana", në ballafaqimin Teuta-Partizani. Katër nga pesë takimet e fundit, të zhvilluar mes këtyre dy skuadrave, kanë përfunduar në barazim. Tri prej këtyre ndeshjeve kanë përfunduar me të njëjtin rezultat, 1-1, dy në Durrës dhe një në Tiranë.
- Dinamoja ka regjistruar fitoren e tretë radhazi, duke i shkaktuar Vllaznisë humbjen e tretë në këtë kampionat. Me 3 gola diferencë ndaj shkodranëve në kryeqytet, blutë nuk fitonin qysh nga 26 shkurti i vitit 1995, kur fiksonin shifrat 4-1. Fitorja 3-0 mes kuqebluve dhe dinamovitëve regjistrohet për herë të tretë, duke nisur qysh nga viti 1950, kur kanë filluar duelet ndërmjet tyre.
- Që nga sezoni '98-'99, fitoret e Tiranës kundër Besës kanë njohur vetëm progres. Nga 2-0 në 3-0, 5-0 dhe tani së fundi 7-1. Ky është rezultati më i thellë në historinë e fitoreve të bardhebluve ndaj verdhezinjve. Kështu, kampionët kanë marrë hak për atë humbje "poshtëruese", pësuar në Kavajë në sezonin '92-'93, po 1-7. Për "statistikë", Fortuzi ka firmosur golin e 180-të, që tiranasit kanë shënuar në portën e kavajasve.
- Edhe elbasanasit kanë sigluar fitoren më të thellë kundër peqinasve. Në 13 takimet e para, portokallinjtë kishin shënuar vetëm 7 gola në portën e Shkumbinit, ndërkohë që vetëm në takimin e së shtunës, ata shënuan plot 5 gola. Interesant është fakti se të gjithë golat Shkumbini i ka pësuar në stadiumin e Elbasanit.
- Ashtu si Vllaznia e Shkumbini, edhe Flamurtari është përballur me humbjen e tretë radhazi. Këtë humbje ia ka shkaktuar skuadra myzeqare e Lushnjës, falë një goli të vetëm realizuar me 11-metërsh. Kështu, lushnjarët kanë sigluar fitoren e 20-të përpara tifozëve të tyre, ndërkohë që kanë realizuar golin e parë në këtë kampionat.
Erzeni vizitoi Kuçovën pas 55 vjetësh
- Të shtunën ka nisur edhe kampionati i Grupit A2, me ndeshjet e para të tij. Si në Grupin A1, edhe këtu u fiksuan 4 fitore (vetëm njëra shtëpiake) dhe 1 barazim. Plot 21 herë është tundur rrjeta në këto 5 takime, me mesataren e lartë 4 gola për çdo ndeshje.
- D. Bubeqi (Bylis), Braho (Luftëtari) dhe Rodi (Naftëtari) kanë firmosur dygolëshat e parë të këtij grupi.
- Të dyja penalltitë e ekzekutuara i kanë përshëndetur rrjetat, po pa efekte decizive.
- Muzha i Apolonisë dhe Lala i Erzenit kanë qenë të vetmit që janë përcaktuar persona "non grata", duke koleksionuar kartonët e parë të kuq.
- Veleçiku i Koplikut dhe Egnatia e Rrogozhinës kanë hedhur hapat e para të brishta në Ligën e Parë. Të dyja skuadrat janë "tradhtuar" nga emocionet dhe eksperienca në kësi lloj ndeshjesh, duke mos e menaxhuar si duhet rezultatin e arritur përkohësisht. Kështu, rrogozhinasit, epërsinë prej dy golash, nuk kanë mundur ta ruajnë dot, duke iu kënaqur vetëm pikës së parë, ndërkohë që vetëm për 25 minutat e fundit, kënaqësia e pikës së parë i është hequr skuadrës së Veleçikut.
- Derbi i zonës, Apolonia-Bylis, ka përfunduar, si edhe vjet, me fitoren e miqve, por me përmasa më të mëdha, nga 1-2 në 1-4.
- Për herë të fundit, para se të ndesheshin të shtunën, Laçi e ka vizituar Lezhën në sezonin '95-'96, ku dhe kishte merituar fitoren e parë atje. Ndërsa të shtunën, laçianët kanë dubluar fitoret ndaj vendësve. Tani balanca e fiksuar në dekadën e fundit është prishur, duke anuar nga ana e Laçit, me 1 fitore dhe 1 gol më shumë.
- Plot 55 vjet më parë, Erzeni luante ndeshjen e fundit në Kuçovë, ndaj vendësve. Atëherë skuadrat përvijonin çiftin Spartak-8 Nëntori. Në atë kampionat, shijakasit i fitonin të dy takimet, 4-2 në Kuçovë dhe 3-1 në Shijak. Por të shtunën kuçovarët kanë fituar thellë, 4-1, duke iu gëzuar fitores së parë ndaj Erzenit. Vetëm 1 gol më shumë kishte shënuar deri të shtunën Naftëtari në 4 takimet e zhvilluara me Erzenin.

Bashkim Biraçi 'SPORTI SHQIPTAR'

 

[Alesio]

Re: Kampione i Shqiperise 2003-2004 ? ??

Dinamovitët dhe fierakët përballen për 30 minuta në kompleksin sportiv "Dinamo"

Blutë, ndeshje kontrolli me Apoloninë

Ndërsa Dinamoja luante ndeshjen e kupës në Pogradec, pjesa e lojtarëve të mbetur në Tiranë ka zhvilluar dje në fushën stërvitore të kompleksit një ndeshje kontrolli me skuadrën e Apolonisë së Fierit. Prej disa javësh, skuadra fierake është sistemuar në kompleksin "Dinamo", ku do të stërvitet gjatë gjithë vitit, ndërsa ndeshjet e kampionatit do t'i luajë në stadiumin "Selman Stërmasi". Të dyja skuadrat kanë testuar dje veten para takimeve të radhës në kampionat, të cilat do të luhen ditën e shtunë. Ndeshja e kontrollit është fituar nga formacioni dinamovit, ndërsa çdo pjesë loje ka zgjatur nga 30 minuta. Ndihmëstrajneri i Dinamos, Eduard Zhupa, ka aktivizuar të gjithë lojtarët që ka pasur në dispozicion, përveç portierit Ilion Lika. Kështu, kanë luajtur të gjithë titullarët, si kapiteni Pisha, Xhafa, Bakalli, Deliallisi, Qosa, Dalipi, Qorri, Ahmataj si dhe dy nga lojtarët e rinj që stërviten aktualisht me blutë. Ndërkohë, trajneri i Apolonisë, Vangjel Capo, vetëm në pjesën e parë ka aktivizuar formacionin që mendon të hedhë në fushën e lojës të shtunën, ndaj Naftëtarit. Në pjesën e dytë, ai ka bërë shumë zëvendësime, duke u dhënë mundësi për të luajtur të gjithë lojtarëve. Blutë, nga ana e tyre, me këtë ndeshje kanë synuar më shumë ruajtjen e formës sportive për derbin e së shtunës me Partizanin. Zëvendëstrajneri Zhupa ka mbetur i kënaqur nga paraqitja e futbollistëve dhe mendon se ekipi është plotësisht i gatshëm nga të gjithë komponentët për sfidën e radhës. Skuadra do të jetë e plotë në seancën e sotme stërvitore, ku do të vazhdojë përgatitjet.
Për blutë nuk janë ende të gatshëm sulmuesi Ligor Tiko dhe mbrojtësi Enkel Alikaj. Tiko është kthyer dje në stërvitje, pas vizitës mjekësore që ka kryer në Greqi. Atij i është rekomanduar të vazhdojë edhe dhjetë ditë stërvitje në mënyrë individuale dhe pastaj do të kalojë në ushtrimet me topin. Ndërsa Alikaj është në pritje të përgjigjes të rezonancës magnetike, të cilën në mënyrë private e ka çuar për ta parë jashtë shtetit.

Fatjon RUPI 'SPORTI SHQIPTAR'

 

[Alesio]

Re: Kampione i Shqiperise 2003-2004 ? ??

FSHF-ja, "po" turneut të Portugalisë

Federata Shqiptare e Futbollit është e gatshme të marrë pjesë në turneun e Portugalisë, i cili do të zhvillohet në janarin e vitit tjetër. Lajmi ka dalë nga goja e presidentit të FSHF-së, Armand Duka, i cili në një takim me gazetarët e ka pohuar një gjë të tillë. Edhe burime të tjera brenda Federatës shprehen se pala shqiptare është e gatshme të marrë pjesë në këtë turne. ku marrin pjesë katër skuadra. Por jo gjithçka varet nga FSHF-ja, sepse nga pala portugeze, organizuesja e turneut, duhet vijë konfirmimi për për pjesëmarrjen e palës shqiptare. Ky turne zhvillohet nga 19-23 janari i 2004-s në Portugali dhe, nëse Shqipëria do të marrë pjesë, do të luajë me skuadrën olimpike, çka do të thotë kombëtarja B, e cila ende nuk është formuar. Kështu, do t'i takojë ekipit Shpresa, plus tre futbollistë, të cilët mund të jenë me një moshë të pacaktuar, që të luajnë në këtë turne. Gjithsesi, fjala përfundimtare do të merret vetëm kur kuqezinjtë e Brigelit të udhëtojnë drejt Portugalisë, për të zhvilluar miqësoren e 11 tetorit, me skuadrën e drejtuar nga Felipe Skolari.

 

[Alesio]

Re: Kampione i Shqiperise 2003-2004 ? ??

Tre futbollistë dënohen nga 4 javë, ndërkohë që Magani gjobitet për lojë të rëndë

Disiplina me "dorë të fortë"

Ndryshe nga ç'pritej, dje komisioni i disiplinës ka marrë masa shumë të ashpra për futbollistët që kanë fyer gjyqtarët në javën e tretë dhe të parë të grupeve A1 dhe A2. Pasi janë mbledhur dje, si gjithmonë, në orën 12.00, anëtarët e komisionit, kanë shqyrtuar të gjithë dokumentacionin që sektori i garave u kishte vënë në dispozicion për këtë mbledhje në lidhje me ngjarjet e javës, për ndeshjet e Grupit A1 dhe A2. Edhe pse gjatë javës që sapo përfundoi nuk ka pasur probleme serioze, komisioni është treguar i ashpër kundrejt atyre që kanë fyer gjyqtarët. Relacionet e mbërritura në Federatë kanë treguar se tre prej futbollistëve mes Grupit A1 dhe A2 kanë fyer gjyqtarët. Komisioni, pasi u konsultua edhe me rregulloret e aktivitetit, vendosi që tre futbollistët të dënohen respektivisht me katër javë pezullim. Kështu, Edlir Gega i Lushnjës dënohet të qëndrojë jashtë fushave të futbollit 4 javë, pasi ka fyer gjyqtarin e ndeshjes Lushnja-Flamurtari, Pajtim Lapi. Me të njëjtin motivacion është dënuar edhe Bledar Lala, por këtë radhë në ndeshjen Naftëtari-Erzeni, ku kryesor ka qenë Pashaj. Edhe futbollisti i Apolonisë Leandro Muzhai nuk i ka shpëtuar disiplinorit, pasi duhet të qëndrojë larg ndeshjeve 4 javë. Duket se komisioni i disiplinës ka filluar paksa si rëndë me vendimet, duke mos toleruar asnjë futbollist, kushdo qoftë. Disiplinori nuk ka harruar të marrë një masë me gjobë edhe për lojën e rrezikshme që është parë në ndeshjen Elbasani-Shkumbini. Për një ndërhyrje të rrezikshme, që mund të kishte sjellë pasoja të rënda për futbollistin e "portokallinjve" Memelli, kapiteni i peqinasve, Gugash Magani, gjobitet me 15.000 mijë lekë të reja.

 

[Alesio]

Re: Kampione i Shqiperise 2003-2004 ? ??

Përfundon kompleksi i Kamzës dhe tashmë pritet vetëm përurimi

Kombëtarja bëhet me "shtëpi"

Më 15 tetor, 2 firmat kontraktore do t'i dorëzojnë FSHF-së kompleksin e ekipeve kombëtare, që financohet nga projekti "Goal" i FIFA-s. Ka qenë vetë sekretari i përgjithshëm i FSHF-së, Sulejman Starova, që e ka pohuar një fakt të tillë. Sipas tij, të dyja firmat që po punojnë për përfundimin e këtij projekti janë gati në finalizimin e të gjitha ambienteve në këtë kompleks, i cili do të shërbejë për stërvitjen e ekipeve kombëtare shqiptare. "Mund t'ju konfirmoj që kompleksi i ekipeve kombëtare, i cili po ndërtohet në Kamëz, do të dorëzohet i përfunduar nga firmat FSHF-së më 15 tetor. Kjo datë është përfundimtare. Të gjitha punimet pothuajse kanë përfunduar dhe këtu përfshihen dhe shtesat që u bënë në projekt nga Federata në muajt e fundit,"- është shprehur për këtë temë Starova. Projekti në fjalë ka kushtuar mbi një milion dollarë dhe për përfundimin e tij po punohet prej shumë kohësh nga dy firma. Në këtë projekt përfshihen tri fusha futbolli, dy prej të cilave me bar sintetik dhe një me bar natyror. Gjithashtu, projekti përfshin një godinë dykatëshe, ku do të jenë ambientet për futbollistët e kombëtareve, lavanteria dhe shumë ambiente të tjera funksionale për një kompleks sportiv modern. Ndërtimi i këtij kompleksi financohet nga FIFA me të ashtuquajturin projekti "Goal". Ky kompleks sportiv do të jetë qendra e kombëtareve të Shqipërisë. Sipas projektit, kombëtarja e madhe dhe ekipet përfaqësuese nuk do të "bredhin" më lart e poshtë për të bërë stërvitje, por do të sistemohen në këtë objekt, i cili për nga kushtet i afrohet një kompleksi sportiv modern. Në fakt, projekti "Goal" ka filluar me iniciativë të palës shqiptare dhe FIFA-s, që është financuesja. Për të inaguruar projektin, që në fillim ishte menduar të ndërtohej te Qyteti "Studenti" më 7 nëntor të vitin 2001, mbërriti në Shqipëri edhe presidenti i FIFA-s, Joseb Blater, dhe anëtari i komitetit ekzekutiv, Mishel Platini. Të dy drejtuesit e lartë të organizmit të futbollit botëror e pëlqyen vendin ku do të realizohej projekti "Goal". Por më pas, punët morën tatëpjetën, pasi rektori i asaj kohe i Universitetit të Tiranës, Maringlen Spiro, vuri veton që kompleksi i ekipeve kombëtare të mos ndërtohej te fushat sportive të Qytetit "Studenti". Federata, pas shumë kohësh, arriti të siguronte një terren në Kamëz, ku të ngrihej ky kompleks, pasi fondet gati sa nuk po digjeshin. Tashmë projekti ka marrë formën e tij dhe pritet vetëm inagurimi nga Federata. Për këtë fazë, në FSHF të bëjnë të ditur se nuk është vendosur ende një datë përfundimtare për prerjen e shiritit. Me këtë rast, në Shqipëri do të vijë sërish Blateri dhe Platinia për të marrë pjesë në inagurimin e projektit "Goal", i cili tashmë ka përfunduar plotësisht. Me këtë rast, FSHF-ja do të ftojë të gjithë krerët e shtetit shqiptar për të marrë pjesë në përfundimin e kompleksit për ekipet kombëtare shqiptare, të cilat tashmë janë bërë me "shtëpi" të re.

 

[Alesio]

Re: Kampione i Shqiperise 2003-2004 ? ??

Gjyqtarët dhe ndeshjet për kampionatin e grupit A1 dhe A2

Grupi A1
Java e 4-t:
Teuta - Lushnja
G.Duraj (Memaliaj)
Partizani - Dinamo
B.Pashaj (Tiranë)
Vllaznia - Elbasani
K.Meta (Tiranë)
Shkumbini - Tirana
L.Guzja(Tiranë)
Besa - Flamurtari
I.Gashi (Durrës)

Grupi A2
Java e 2-të:
Apolonia - Naftëtari
M.Metohia (Lezhë)
Bylis - Veleçiku
A.Nase (Tiranë)
Tomori - Besëlidhja
S.Çekaj (Laç)
Laçi - Egnatia
A.Janku (Tiranë)
Luftëtari - Erzeni
P.Lapi (Shkodër)

 

[Alesio]

Re: Kampione i Shqiperise 2003-2004 ? ??

FLAMURTARI :

Titullarët e skuadrës vlonjate nuk kanë udhëtuar dje drejt Patosit, për të luajtur me Albpetrolin vendës

Rebelohet Flamurtari, bojkot kupës

Lojtarët e Flamurtarit, ditën e ndeshjes së parë të turit të dytë Kupën e Shqipërisë, janë ndarë në dy grupe. Skuadra vlonjate, e improvizuar me lojtarë të rinj, është nisur drejt Patosit për të zhvilluar takimin me Albpetrolin, ndërsa "garda e vjetër", ku përfshihen lojtarët e formacionit, si Xhafa, Dine, Idrizi, Veizi, Sakaj, Resuli, Daiu dhe Çerçizi, kanë vazhduar stërvitjen në stadiumin e Flamurtarit. Grupi i lojtarëve me eksperiencë, siç dihet, deri tani është në shërbim të skuadrës vetëm mbi baza vullnetare, sepse, që prej përfundimit të sezonit të shkuar e në vazhdim, atyre u janë mohuar tërësisht të drejtat financiare. Në vazhdimësi, mbarë opinioni sportdashës vlonjat është informuar përmes "Sportit shqiptar" se lojtarëve të Flamurtarit, deri tani, për fajin e drejtuesve të futbollit të këtij qyteti, u janë mohuar pagat, trajtimi ushqimor etj. Madje, edhe pse kanë një president, kuqezinjtë nuk kanë arritur të nënshkruajnë asnjëherë kontrata financiare. Eshtë vërtet e dhimbshme një situatë e tillë, sepse ka edhe nga ata lojtarë, që janë kryefamiljarë dhe duhet të mbajnë familjet me bukë. "Nuk mund të duronim më shumë, sepse kemi fëmijë për të mbajtur. Është i pakuptimtë qëndrimi i drejtuesve të klubit, të cilët na mohojnë djersën dhe mundin, duke mos na shpërblyer. Në këto kushte, vendosëm bashkë me shokët e tjerë të mos shkonim të luanim ndeshjen e kupës në Patos," - shprehet mesfushori Sherif Idrizi. Duke i ndjekur hap pas hapi zhvillimet e fundit te Flamurtari, mësuam edhe nëpërmjet lojtarëve se bisedimet me presidentin Selami kanë dështuar disa herë. Portieri Erion Dine, duke folur në këtë pikë, shprehet: "Nuk është fjala për kundërshtimin e presidentit Selami për shumën që kemi kërkuar, por ai nuk na ka dhënë asnjë lek." Nga ana e tij, mesfushori Sakaj shton rreth këtij problemi: "Selami, që nga data 10 shtator e deri më sot, vetëm sa ka shtyrë afatet e nënshkrimit të kontratave financiare, sepse gjë tjetër nuk ka bërë. Shpeshherë na ka thënë që do të na i japë lekët, por, realisht, deri tani nuk na ka dhënë asgjë. Madje, personalisht, më ka prishur shumë punë, sepse nuk më dha lejen e kalimit." Ndërkohë, dje, të gjithë futbollistët e skuadrës vlonjate janë grumbulluar rreth orës 10.00 të paradites për të pritur presidentin Selami, me shpresën se do të merrnin ndonjë "kacidhe" prej tij për të ushqyer familjet e tyre. Mirëpo Selami ka njoftuar nëpërmjet celularit të trajnerit Bozhani se nuk vjen. Menjëherë pas bisedës me Selamin, trajneri Bozhani u shpreh: "Presidenti Selami më tha që nuk do të vinte në takimin me lojtarët. Natyrisht, reagimi i këtyre të fundit qe i menjëhershëm, ata bojkotuan ndeshjen e kupës me Albpetrolin e Patosit." Edhe sulmuesi i talentuar, Daniel Xhafa, mjaft i mërzitur, ka shfryrë dufin e tij: "Kush e mendonte se do të rridhnin ngjarjet kështu? Megjithatë, edhe pse e bojkotuam ndeshjen e kupës, nuk kemi vendosur ende se çfarë hapash do të hedhim më tej, do të shkojmë në bashki, në prefekturë apo në FSHF.

 

[Alesio]

Re: Kampione i Shqiperise 2003-2004 ? ??

TEUTA :

Kapiteni i skuadrës durrsake shprehet optimist për takimin e radhës në kampionat

Begeja: Vlerësim maksimal Lushnjës

Kapiteni i Teutës, Gentian Begeja, e konsideron sfidën e radhës në kampionat, me ekipin e Lushnjës, provë të qëndrueshmërisë së skuadrës së tij. Në një deklarim për "Sportin shqiptar", Begeja do të shprehej:
- Si e pret Begeja sfidën me Lushnjën, pas atij barazimi dramatik të një jave më parë me Partizanin?
- Parashikoj një ndeshje mjaft të vështirë. Lushnja ka bërë përmirësime këtë kampionat, prandaj e konsideroj një kundërshtare të vështirë. Gjithsesi, synimet tona janë të qarta: duhet të fitojmë patjetër për të ruajtur hapin e kryesuesve. Vijmë nga një barazimi jo pak i vyer me Partizanin, i cili nuk do të ketë asnjë ndikim në ndeshjen me Lushnjën. Jam i bindur se nuk do të ketë më hap fals për Teutën.
- Si e vlerësoni këtë fillimkampionati për Teutën?
- Mendoj se është një fillim i mirë. Kemi fituar dy ndeshje dhe kemi barazuar një, duke grumbulluar 7 pikë, që na renditin në vendet e kreut. Nuk mund të them se jemi në kulmin e formës sportive, sepse kemi ende shumë për të bërë në këtë drejtim. Konkretisht, duhet të bëjmë më shumë për rritjen e nivelit të lojës dhe finalizimit të aksioneve.
- Sipas jush, cila është pika më e fortë dhe më e dobët e Teutës në këtë sezon?
- Për mua, pika më e fortë e Teutës është grupi kompakt dhe futbollistët cilësorë. Për pikat e dobëta nuk më takon mua të flas, pasi ato i di më mirë trajneri.
- Sa shqetësues është problemi i finalizimit të aksioneve te Teuta?
- Kemi shënuar 4 gola në tri ndeshje, çka nuk është shumë për një skuadër me pretendime si Teuta. Megjithatë, nuk mendoj se është problem vetëm finalizimi i aksioneve në skuadrën tonë. Sigurisht, edhe në këtë drejtim duhet të bëjmë më shumë.
- Si futbollist me eksperiencë në kampionatin shqiptar, si po ju duket ky fillimsezoni i ri?
- Shumë i fortë dhe i ngarkuar me ndeshje. Në plan të parë duket se Tirana është superiore, por në të vërtetë nuk do të rezultojë kështu. Kampionët në fuqi nuk janë ndeshuar ende me skuadrat rivale, siç janë Dinamo, Teuta apo dhe Partizani, prandaj kanë këtë ecuri në tri javët e para të kampionatit. Takimet mes këtyre ekipeve do të zbulojnë shumë gjëra për vazhdimësinë e luftës së kreut në këtë kampionat.
- Tirana e ka mundur thellësisht Lushnjën. A mendoni se edhe Teuta ka forca ta bëjë këtë?
- Ndoshta. Pavarësisht se Tirana e ka mundur thellë Lushnjën në fushën e saj, unë mendoj se ky ekip duhet vlerësuar maksimalisht.

 

[Alesio]

Re: Kampione i Shqiperise 2003-2004 ? ??

ELBASANI :

Afrikani 20-vjeçar, i ardhur këtë sezon tek Elbasani, kërkon më shumë hapësirë aktivizimi

Lasisi: Po më torturon qëndrimi në stol

Sulmi i skuadrës së Elbasanit këtë edicion futbollistik është fuqizuar edhe me një lojtar afrikan. Ai është 20-vjeçari Majkëll Lasisi, i ardhur në Shqipëri nga Nigeria. Konkurrenca për të zënë një vend në formacionin bazë të Elbasanit, midis sulmuesve portokallinj, në këtë kampionat është mjaft e fortë. Nigerianit Lasisi i duhet të punojë së tepërmi për ta merituar përfshirjen në formacionin bazë gjatë ndeshjeve zyrtare, sepse nuk e ka arritur ende formën e duhur sportive. Drejtuesit e ekipit e vlerësojnë futbollistin nigerian për nivelin e lartë teknik që zotëron dhe e shikojnë si të ardhmen e afërt të sulmit të Elbasanit. Aktualisht, vetëm njëri nga dy lojtarët me ngjyrë, që luajnë në radhët e portokallinjve, Seth Ablade, ka luajtur titullar në dy ndeshjet e para zyrtare. Madje, ganezi Ablade, në takimin e së shtunës që kaloi, kundër Shkumbinit, luajti që nga fillimi i lojës dhe shënoi golin e parë me fanellën e Elbasanit. Nga ana tjetër, "patrioti" i tij, Lasisi, nuk e ka shijuar ende aktivizimin në një ndeshje zyrtare. Ky i fundit u shpreh për "Sportin shqiptar" se qëndrimi në stol tek Elbasani po e torturon. Lasisi shton se mezi pret të luajë që nga fillimi i një ndeshjeje, duke premtuar përfaqësim dinjitoz. Afrikani Lasisi i vlerëson kolegët e tij të sulmit tek Elbasani, veçanërisht mikun më të ngushtë te ky ekip, kapitenin Gentian Stojku, me të cilin në ndonjë rast kalon edhe kohën e lirë. "Lojtarët e sulmit të Elbasanit janë mjaft të mirë, - shprehet Lasisi. - Kjo ma vështirëson disi punën për të zënë një vend në formacionin e parë portokalli. Rëndësi ka fakti që tek Elbasani ndihemi mjaft mirë, së bashku me Abladen. Ndonëse jemi të huaj dhe kemi vetëm dy muaj që kemi ardhur në Shqipëri, jemi ambientuar më së miri në skuadrën e re dhe në qytetin ku po jetojmë. Do të më pëlqente shumë që të bëja pjesë në formacionin e parë të skuadrës, nga fillimi e deri në fund të ndeshjeve, por e kam të qartë se kjo kërkon punë. Në formacion duhet të luajë ai që e meriton. Për pak kohë, edhe unë do ta meritoj një gjë të tillë. Për këtë ju premtoj."

 

[Alesio]

Re: Kampione i Shqiperise 2003-2004 ? ??

Duro, historia 120-mije USD e Partizanit

Klodiani ka vendosur te hedhe firmen per te kuqte e Xhanit dhe Spahiut, pasi refuzoi oferten e Tiranes. Si u be e mundur te kthehet nje nga lojtaret me te mire te kombetares, ne kampionatin shqiptar dhe cilat jane te fshehtat e kontrates 1-vjecare qe mesfushori pranoi te nenshkruaje per Albert Xhanin. Klodi mund te luaje ne derbi ndaj Dinamos. A u rihap kampionati?

Bledar KUKA

TIRANE - Klodian Duro eshte tashme lojtar i Partizanit. Ndonese firma ne kontrate nuk eshte hedhur, mesfushori i kombetares shqiptare ka pranuar te veshe fanellen e 15-here kampioneve per nje pagese prej 120 mije dollaresh ne vit. Kete e bejne te ditur burime prane lojtarit. "Duro mori oferte nga Tirana dhe Partizani, - thone keto burime, - por ajo qe ofroi presidenti i Partizanit, Albert Xhani, ishte me e madhe. Behet fjale per diferenca 2 me 1, pra Tirana i ofroi dy here me pak se te kuqte". Vete Duro nuk ka deshire te komentoje anen financiare, por deshiron te thote se "me kete kontrate une kam te drejte te largohem ne cdo moment nga Partizanit nese do te kem nje oferte te mire nga jashte vendit". Mendohet qe Klodi do te vihet qe sot nen urdherat e trajnerit Ilir Spahiu dhe shpresohet qe ai te luaje kete jave ndaj Dinamos, ne derbin e kryeqytetit. Rikthim me i mire nuk do te ishte menduar.

Vete trajneri Spahiu thote: "Kush nuk e do nje lojtar te tille. Eshte nje levizje e goditur e presidentit Xhani dhe Partizani eshte perforcuar mjaft, si ne aspektin teknik ashtu edhe ne ate te pervojes. Duro gezon nje forme te mire sepse ka bere faze pergatitore te Tirana dhe ka luajtur ne ekipin kombetar".

Klodi: Kalvari i veshtire i veres se 2003

Per Duron kjo vere ishte nder me te veshtirat, sepse pas prishjes me ekipin turk te Malatyasporit, mesfushori shqiptar pati nje prove te Eolfsburg ne kategorine e pare gjermane. Me 25 qershor, ai nisi nje prove disa ditore ne klubin e "ujqerve", por ne vend te tij gjermanet moren talentin e madhe argjentinas, Andres D'Alessandro, per nje shume rekord prej 9 milione eurosh. Kjo beri qe Duro te kthehej ne Shqiperi ne pritje te nje oferte te vlefshme. Gjate gjysmes se dyte te korrikut dhe gjate gushtit ai u stervit me Tiranen, nen drejtimin e Sulejman Memes, dhe pati disa biseda me presidentin El Sayed. Por, oferta e marre nga egjiptiani duket se nuk e kenaqi futbollistin qe e zvarriti dhenien e pergjigjes. Ndersa persa i perket nje oferte nga Vllaznia e Shkodres, burime prane lojtarit bejne te ditur se kjo nuk ka qene reale dhe se me te nuk ka folur askush. Ne fund te fundit, Duro do te zgjidhte kryeqytetin thjesht edhe per kushtet qe i ofron per jetesen, jashte futbollit. Gjate veres ai ishte ne bisedime edhe me klube ne Turqi apo ne Bullgari (CSKA ose Levski e Sofjes, Klodiani nuk ka pasur shume deshire te komentoje), por ne perfundim nuk u arrit asgje.

Federimi i lojtarit ne FSHF mund te behet qe sot, dhe neser ai te veshe per here te pare fanellen e Partizanit, pasi luajti me pare per Elbasanin, Tiranen e Vllaznine. Me keto dy te fundit, ai eshte shpallur edhe kampion i vendit ne vitet 1999 dhe 2001. Madje me Tiranen fitoi edhe Kupen e Shqiperise, ndersa me Vllaznine, Superkupen.

Skeda e futbollistit

Ditelindja: 21.12.1977. Vendlindja: Tirane. Shtatlartesia: 1.77 m. Pesha: 71 kg. Roli: Mesfushor sulmues. Klube te meparshem: Elbasani, Tirana, Vllaznia, Samsunspor (dhene borxh nga Galatasaray), Galatasaray (dhene borxh te Malatyaspor). Kemba e preferuar: E djathta. Fundi i kontrates: shtator 2003. Lojtari me i mire per assist i Malatyaspor me 6 te tille.

Shenoi dy gola ne dy ndeshje per Vllaznine, ne Ligen e Kampioneve 2001-2002 (turi i pare paraeliminator), ndaj Rejkjavik te Islandes duke i dhene kualifikimin ekipit (1-2, 1-0). Shenoi ndaj Rusise ne eliminatoret e Euro 2004, ne Vollgograd.

 

[Alesio]

Re: Kampione i Shqiperise 2003-2004 ? ??

PARTIZANI :

Partizani: Marcelo Bracchini mberrin ne Tirane

Qendermbrojtesi brazilian, Marcelo Bracchini, ka mberritur dje ne Tirane, duke u rikthyer pas me shume se pese muajsh ne rradhet e skuadres se Partizanit. Keshtu, bisedimet e zgjatura per rikthimin e brazilianit ne skuadren kryeqytetase, kane mbaruar sot ne mesdite kur Bracchini ka mberritur ne aeroportin e Rinasit "Nene Tereza" dhe eshte drejtuar per ne klubin Partizani. Sekretari per marredheniet me jashte, Dashnor Frasheri, tha per ATSH-ne se, "Bracchini ka pasur nje problem me bileten dhe per kete arsye ka mberritur nje dite me vonese dhe do te vihet ne dispozicion te trajnerit Spahiu per seancen stervitore te pasdites". Ardhja e Bracchinit do t'i jape eksperiencen e duhur mbrojtjes se Partizanit dhe do ta fuqizoje me teper repartin difensiv, duke pare edhe kembenguljen me te cilen Spahiu kerkonte nje perforcim per kete repart. Bracchini u largua nga klubi Partizani per sjellje te perseritur antisportive, sidomos pas derbit te humbur 3-1 me Tiranen, ku braziliani u ndeshkua me karton te kuq.

KORRIERI

 

[Alesio]

Re: Kampione i Shqiperise 2003-2004 ? ??

Teuta: Hasan Lika trajner, Bici, drejtor teknik

Teuta e Durresit ka bere nje ndryshim trajneresh pikerisht dje. Ish-trajneri i saj dhe ai i Shpresave, Hasan Lika eshte ulur ne stol, ndersa ish-zv.trajneri i kombetare, Vasil Bici do te vazhdoje te jete drejtor teknik i klubit. Vete Lika pohoi se kishte pranuar me kenaqesi te punonte serish me Teuten. "Ishte nje marreveshje e klubit durrsak me FSHF qe beri te mundur qe une te behesha trajner i Teutes, - tha ai, - do te punoj me skuadren qe ka lene Bici, i cili do te jete drejtori teknik". Zyrtarisht nuk thuhet asgje per arsyet e largimit te Bicit, por duket se nuk ka qene nje shkarkim nga ana e presidentit Hasanbelliu. "Bici eshte larguar per arsye personale, - bejne te ditur burime ne klubin durrsak.

 

[Alesio]

Re: Kampione i Shqiperise 2003-2004 ? ??

Partizani


Partizani pritet të verifikojë realisht forcën dhe synimet që ajo ka në këtë edicion në derbin e së shtunës kundër Dinamos. Takimi që në memorien e të gjithë sportdashësve tanë përbën një nga kulmet e futbollit tonë me siguri do të fitojë dimemsione të reja në sfidën e tyre më të afërt. Pavarsisht se nuk mund ta kuptojë realisht rëndësinë e këtij derbi, braziliani shqipfolës Abilio është i bindur se do të jetë një sfidë emocionuese dhe e vështirë.

 

[Alesio]

Re: Kampione i Shqiperise 2003-2004 ? ??

Elbasani


Elbasanasit përgatiten për vijuar serinë e rezultateve positive në kampionat.

7 pikët e grumbulluara në tre javët e para të këtij edicioni janë një rezultat i mirë për portokallinjtë, por forca e vërtetë e portokallinjve sipas ndihmës tarjnerit Gjergji Poloska do të duket në sfidat me ekipet më cilësore të kampionatit, pasi deri në këtë moment janë përballur me skuadra që kanë shfaqur realisht probleme .

Një test mjaft i rëndësishëm për portokallinjtë do të jetë sfida e së shtunës në “Loro Boriçi” kundër vendasve të Vllaznisë.

Një sfidë të tillë Poloska e konsideron të vështirë dhe shprehet se po punohet më shumë për të krijuar në ekip mentalitetin e fituesit

 

[Alesio]

Re: Kampione i Shqiperise 2003-2004 ? ??

FLAMURTARI :

Pas ndeshjes së kupës me Albpetrolin, titullarët kuqezinj nuk pranojnë të luajnë as me kavajasit

Flamurtari, bojkot edhe ndaj Besës

Para 3-4 ditësh, 8 lojtarë të formacionit bazë të Flamurtarit bojkotuan ndeshjen e parë të turit të dytë të Kupës së Shqipërisë, luajtur ndaj Albpetrolit. Mirëpo, për habinë e të gjithëve, si të lojtarëve, por edhe të opinionit sportdashës vlonjat, asnjë reagim pozitiv nuk ka pasur nga presidenti Selami dhe nga pushteti vendor për këtë veprim. Nënkryetari i Bashkisë së Vlorës, Maksim Hekurani, në lidhje me bojkotimin e ndeshjeve zyrtare të disa titullarëve kuqezinj, është shprehur: "Më vjen shumë keq që lojtarët kryesorë të Flamurtarit e bojkotuan ndeshjen e parë të turit të dytë të kupës. Dua të sqaroj se ata nuk kanë asnjë keqkuptim me bashkinë, pasi detyrimet financiare, për të cilat këmbëngulin, duhet t'ua plotësojë presidenti Selami, përmes shlyerjes së kësteve të kontratave." Presidenti Selami nuk ka ndërmarrë ndonjë takim direkt me lojtarët, por është mjaftuar me një telefonatë që i ka bërë trajnerit Bozhani, të cilit i ka kërkuar të përpilojë një listë me emrat e lojtarëve që firmosin për t'i marrë "kesh" në dorë lekët e trajtimit ushqimor. Mirëpo, siç dihet, kjo është detyrë e përfaqësuesit të bashkisë dhe sekretarit Hasanaj, sepse fondi i trajtimit ushqimor është dhënë nga bashkia e jo nga xhepi i presidentit. Në këto rrethana indiferentizmi, lojtarët kanë vendosur përsëri të bojkotojnë ndeshjen zyrtare, kësaj here atë të javës së katërt të kampionatit, ndaj Besës. "Të gjithë, si lojtarë titullarë të skuadrës, kemi vendosur të mos shkojmë të ndeshemi me Besën. Unë dhe shokët e mi do të presim deri ditën e hënë dhe, nëse Selami nuk na jep lekët që do të përfitonim nga nënshkrimi i kontratave financiare, do të shkojmë në FSHF për t'u federuar me një nga skuadrat që na kanë bërë oferta,"- është shprehur sulmuesi Daniel Xhafa. Ndërsa mesfushori Dritan Sakaj shton: "Për mua, problemi është më i vështirë. Në muajin dhjetor, kur mbush 23 vjeç, sipas rregullores së FSHF-së, duhet të bëj lëvizje nga skuadra. Gjithsesi, kjo s'do të thotë që unë të luaj falas për qejfin e Selamit. Do të pres deri ditën e hënë, me shpresën se presidenti do t'u përgjigjet pozitivisht kërkesave tona, përndryshe do të ulem me sportdashësit në tribunë."
Të të njëjtit mendim janë edhe futbollistët e tjerë kuqezinj, si Idrizi, Veizi, Resuli, Çerçizi, Daiu etj.

 

[Alesio]

Re: Kampione i Shqiperise 2003-2004 ? ??

Gjyqtari Bogdani, "i kryqëzuari" i tekniko-gjykuesit

Gjyqtari i takimit Elbasani-Shkumbini, Servet Bogdani, dënohet dy muaj, pasi nuk nxori karton për futbollistin peqinas Magani për lojë të rrezikshme. Lajmi është konfirmuar dje nga përgjegjësi i gjyqtarëve në FSHF, Uvil Zajmi. Sipas këtij të fundit, komisioni tekniko-gjykues, i mbledhur të martën për ndeshjet e kampionatit të Grupit A1 dhe A2, ka marrë disa vendime të rëndësishme. Komisioni tekniko-gjykues, pasi shqyrtoi të gjitha provat filmike dhe protokollet e gjyqtarëve dhe vëzhguesve, vendosi që disa nga bluzat e zeza t'i dënojë me gjobë, ose pezullim nga aktiviteti. "Vendimi më i rëndë ka qenë pezullimi për dy muaj nga ndeshjet e kategorisë së parë të gjyqtarit të ndeshjes Elbasani-Shkumbini, Servet Bogdani. Ky gjyqtar nuk është treguar i vendosur në një situatë, që mund të kishte sjellë shumë pasoja për një futbollist të Elbasanit. Bogdani duhet ta kishte ndëshkuar medoemos futbollistin Magani me karton, pasi ndërhurja e tij e mbetur në tentativë kundrejt futbollistit Memelli mund të kishte sjellë shumë pasoja për këtë të fundit," - është shprehur Zajmi. Sipas tij, gjyqtari në fjalë gjatë këtyre dy muajve do të gjykojë vetëm në kategoritë inferiore, ndërkohë që në kategorinë e parë nuk mund ta bëjë një gjë të tillë, derisa të shlyejë dënimin e komisionit tekniko-gjykues. Gjithashtu, komisioni në fjalë nuk ka lënë pa ndëshkuar as disa nga gjyqtarët e kategorisë së parë, të cilët nuk janë në rregull me problemet administrative. "Disa nga gjyqtarët, mes të cilëve edhe emra shumë të njohur, janë gjobitur nga komisioni tekniko-gjykues, pasi në protokollet e ndeshjeve ku kanë gjykuar ka shumë mangësi. Duke parë këtë neglizhencë të këtyre gjyqtarëve, komisioni vendosi t'i gjobisë të parregulltit," - ka përfunduar Zajmi.

 

[Alesio]

Re: Kampione i Shqiperise 2003-2004 ? ??

Disiplina, shumë zhurmë për asgjë

Komisioni i disiplinës nuk ka mundur të marrë masa të rënda për të padisiplinuarit e ndeshjeve të Kupës së Shqipërisë, pasi shumica e protokolleve nuk kanë qenë teknikisht të plota. Kështu, disiplinori, pasi është mbledhur me urgjencë nga sektori i garave, ka shqyrtuar të gjitha ngjarjet e ndeshjeve të turit të dytë të Kupës së Shqipërisë. Në përfundim të mbledhjes është marrë vesh se vetëm një futbolllist është dënuar. Bledar Rustami ka qenë futbollisti i vetëm që është dënuar nga disiplina me 4 javë pezullim, pasi në ndeshjen Tomori-Çlirimi ka fyer gjyqtarin e ndeshjes. Për dënimet e tjera të mundshme, komisioni nuk ka bërë dot asgjë më tepër sesa kartonët e kuq t'i kthejë në pezullime të zakonshme. Shefi i sektorit të garave, Hito Hitaj, ka pohuar se problemi kryesor që komisioni i disiplinës nuk ka marrë vendime janë gjyqtarët e ndeshjeve të kupës. "Ata gjyqtarë që kanë gjykuar, kartonët e kuq nuk i kanë argumentuar në protokoll me termat e sakta që përmban rregullorja. Kështu, komisioni e ka shumë të vështirë të marrë vendime për raste që nuk gjenden kurrkund në rregulloret e aktivitetit," - ka përfunduar Hitaj.

 

[Alesio]

Re: Kampione i Shqiperise 2003-2004 ? ??

Spahiu: Partizani, si Reali i Madridit

Trajneri i të kuqve thekson se që sot, ndaj Dinamos, ekipi i tij do t'i argëtojë tifozët në fushë

Sot, në orën 16.00, do të luhen ndeshjet e javës së 4-t të kampionatit kombëtar të futbollit, ndërkohë që vëmendja e opinionit sportiv është përqendruar në stadiumin "Qemal Stafa", ku do të luhet takimi më i rëndësishëm i javës, Partizani-Dinamo. Derbi i madh i kryeqytetit pritet të jetë kryefjala e së shtunës, pasi të dy ekipet, si skuadra e Spahiut, ashtu edhe blutë, kanë kohë që mendojnë për këtë sfidë interesante. Partizani dhe Dinamoja, gjatë pesë dekadave të fundit, i kanë dhënë tonin kampionatit tonë, pasi të dyja së bashku e kanë fituar plot 30 herë titullin kampion. Pas zbehjes që patën dekadën e fundit, "big"-ët e kampionatit shqiptar dalëngadalë po i kthehen traditës dhe në këtë sezon, sipas synimeve që kanë shpalosur të dyja skuadrat, pretendojnë të fitojnë titullin. Partizani, i fuqizuar fillimisht me disa emra të njohur të kampionatit tonë, dy ditët e fundit ka marrë futbollistin e kombëtares Klodian Duron dhe mbrojtësin brazilian Brakini. Në një intervistë për "Sportin shqiptar", trajneri i Partizanit shprehet se derbi, në radhë të parë, duhet të dhurojë spektakël, por në fund ekipi më i fortë, që, sipas tij, në rastin konkret është Partizani, duhet të marrë tripikëshin:

- Si është gjendja e skuadrës para sfidës me Dinamon?
- Shumë e mirë. Nuk kemi asnjë lojtar të dëmtuar, por as të skualifikur. Të gjithë futbollistët gëzojnë formë të mirë dhe sot besoj se do të jenë gati për të përballuar me sukses një ndeshje të fortë, duke qenë se përballë kemi Dinamon, rivalen direkte për titull.
- Priten ndryshime sot ndaj Dinamos?
- Po. Duke filluar që sot, do të bëjmë ndryshime, pasi me ato që bëmë në Durrës, patëm sukses në lojë, pavarësisht se nuk e fituam ndeshjen. Ndryshimet pritet të bëhen në mënyrë graduale, deri sa të arrihet loja e dëshiruar nga ne dhe tifozët tanë.
- Duro është tashmë "pronë" e Partizanit. A do të luajë sot ndaj Dinamos?
- Nëse federohet, do të aktivizohet menjëherë, megjithëse nuk ka bërë asnjë seancë stërvitore me Partizanin. Gjithsesi, Duro është futbollist i kombëtares, ndaj nuk është e nevojshme të shihet në stërvitje.
- Po Brakini a është në gjendje të luajë sot ndaj bluve?
- Po. Brazilianin e pashë në stërvitjen e paradites. Duke qenë se ishte në formë të mirë, do të aktivizohet ndaj Dinamos, pasi nuk ka probleme me federimin. Megjithatë, do të flasim me drejtuesit e federatës për të marrë vesh nëse është i dënuar që nga sezoni i kaluar.
- Atëherë, kush do të qëndrojë në stol?
- Mendoj se në ndeshjet e radhës mund të bëj edhe ndonjë lëvizje tjetër, por gjithsesi emrat e atyre që do të qëndrojnë në stol nuk kam dëshirë t'i bëj publikë.
- A do të ishit i kënaqur sot me një rezultat tjetër, përveç fitores?
- Ne do të synojmë fitoren me çdo kusht. Por për t'ia arritur qëllimit besoj se duhet të dërsijmë shumë përballë Dinamos. Futbolli në përgjithësi ecën me moton: mbrojtja më e mirë është sulmi, por Partizani do të luajë me tjetrën: të sulmojmë duke u mbrojtur. Partizani tani ka shumë emra të njohur, prandaj, duke filluar që sot, do të luajë me të gjithë titullarët e mundshëm.
- Nuk do të qëndrojë asnjë prej tyre në stol, edhe nëse nuk janë në formë?
- Besoj se me të ardhurit e fundit shumë shpejt do të formohet 11-shi bazë i ekipit. Me katër mbrojtës në vijë të drejtë dhe Brakinin pak më të avancuar, si dhe me pesë të tjerët përpara, që duhet të sulmojnë, Partizani do të luajë siç luan në Spanjë Reali i Madridit. Këtë do ta bëj për arsyen e vetme, se nuk kam ndër mend të lë në stol asnjë prej emrave të njohur të skuadrës.