Re: greket dhe kenget antishqiptare
Konsullata greke e Korçës "njollos" pasaportat shqiptare
4 Maj Ankohen aplikuesit, paralajmërojnë se do t'i drejtohen Strasburgut
Konsullata greke në qytetin e Korçës ka nisur një fushatë "njollosjesh" të tipit zhgarravinë mbi pasaportat e qytetarëve të rajonit Korçë, dokumente shtetërore këto që nuk janë pronë e saj.
Ndërsa qytetarët e këtij rajoni paraqiten pranë kësaj konsullate me aplikimet e tyre për të marrë një vizë për në shtetin grek, punonjësit e Konsullatës nuk bëjnë gjë tjetër, veçse lenë një zhgarravinë në gjuhën greke, ku thuhet se personi ka aplikuar në këtë apo atë datë, ndërsa nuk denjojnë t'i japin asnjë shpjegim personit të interesuar se mbi ç'të drejtë apo bazë ligjore vendoset ai shënim.
Lidhur me këtë "gjetje", burime të Konsullatës greke në Korçë bëjnë të ditur se ky është një lloj penaliteti për pasaportë- mbajtësin.
"Shënimi mbi pasaportë është një lloj penaliteti për personin që i është bërë shënimi, ku për tre muaj me radhë nuk duhet të paraqitet pranë konsullatës për të aplikuar për vizë, pasi nuk ekziston asnjë mundësi për ta marrë atë. E drejta e riaplikimit rifitohet vetëm pas tre muajve, por nuk do të thotë se pajisja me vizë është e garantuar", sqarojnë burime të konsullatës.
Kjo praktikë nuk është ndjekur me persona të veçantë, na shpjeguan të njëjtat burime, por edhe me shumë qytetarë të tjerë.
Ndërsa janë të shumtë qytetarët e Korçës që po ndihen të irrituar ndaj veprimeve të tilla të Konsullatës greke në Korçë. Ka qenë njëri prej tyre, Llazar Bibo, likuidator i minierës së qymyr-gurit në Mborje-Drenovë, që denoncon këtë të paprecedent të Konsullatës greke në Korçë.
Sipas Llazar Bibos, mësohet se ai nuk është personi i vetëm që ka marrë shënimin, "penalitet tremujor", pasi shumë qytetarë të tjerë kanë pasur të njëjtin fat.
Kur aplikuat pranë konsullatës greke për të marrë vizë?
Duke qenë se jam likuidator i minierës së qymyr-gurit në Mborje-Drenovë, iu drejtova konsullatës greke në Korçë me anë të një shkrese zyrtare me nr.21 prot. në datën 11 prill 2007 për të marrë një vizë, pasi atje do të shkoja për arsye pune. Në shkresën drejtuar konsullatës greke, i kam bashkangjitur edhe dokumentet e tjerë zyrtarë, që vërtetonin qenien time në krye të një enti shtetëror, por njëkohësisht dhe arsyet se përse duhej të isha në shtetin fqinj. Pra, paraqita të gjithë dokumentacionin e nevojshëm zyrtar. Pas dorëzimit të dokumentacionit u lajmërova se duhej të paraqitesha pranë konsullatës për t'u intervistuar. Për këtë arsye shkova atje me shpresën se do të merrja vizë dhe për këtë nuk kisha asnjë lloj dyshimi, sepse nuk ekzistonte ndonjë arsye për të kundërtën.
Pas intervistës u pajisët me vizë?
Jo. Pasi më morën në pyetje se përse do të shkoja në shtetin grek, ku unë sqarova edhe njëherë të gjitha arsyet, më kërkuan pasaportën. Kujtova se do të vendosnin vizën dhe pa ndonjë mëdyshje ua dhashë atë. Punonjësi i konsullatës gjatë kohës që po intervistohesha kishte lënë një shënim mbi pasaportën time, që unë nuk e pashë në atë çast. Më dhanë pasaportën kur intervista kishte përfunduar, duke më thënë vetëm kaq: "Nuk mund t'u pajisim me vizë". Mora pasaportën dhe ika. Rastësisht, kur isha në shtëpi vura re shënimin që më kishin bërë në pasaportë. Të them që mbeta i irrituar ishte pak, nëse do ta kisha parë në çastin që më kishin lënë atë shënim, nuk e di se si do të kisha vepruar. Pasaporta është prona ime, është pronë e shtetit shqiptar. Nuk po kuptoja se si kishin guxuar punonjësit e konsullatës greke që kishin lënë shënime mbi pasaportën time. Për më shumë doja të dija se çfarë domethënie kishte ai shënim, përse isha i penalizuar nga konsullata greke, kur unë nuk kam asnjë lloj penaliteti nga shteti shqiptar, por as nga shteti grek, ndërsa jam një njeri i nderuar në profesionin tim dhe për më shumë kur janë në krye të një institucioni shtetëror. Pas interesimeve në rrugë miqësore, mësova se shënimi ishte një penalitet tremujor, çka do të thoshte që për tre muaj me radhë unë nuk duhej të paraqitesha në konsullatën greke në Korçë, por cilat ishin arsyet. Gjithçka ishte absurde.
Nuk iu drejtuat konsullatës në rrugë zyrtare?
Sigurisht që po. Nuk mund të heshtja ndaj një veprimi të tillë. Së pari, doja t'i dilja në mbrojtje personalitet tim, por edhe në mbrojtje të dokumentit tim, me të cilin më ka pajisur shteti shqiptar dhe jo Greqia. I gjendur në këto rrethana me një shkresë zyrtare iu drejtova konsullatës në datën 25 prill 2007, ku midis të tjerash i shkruaja: "Ajo që më shqetëson dhe më indinjon, është fakti që përveç pagesës së pakthyeshme, është vendosja e një shënimi në pasaportë, i cili nënkupton një penalitet tremujor për të mosaplikuar më tej. I nderuar Konsull. Unë jam drejtues i një enti shtetëror, siç është miniera e qymyr-gurit në Mborje-Drenovë, e cila është drejt privatizimit të plotë dhe në këtë kontekst, unë jam nëpunës i shtetit shqiptar, i cili më ka besuar të administroj asetet e kësaj shoqërie. Është tepër cinike dhe diskriminuese që të vendoset njollë në pasaportën personale që i përket Shtetit Tim dhe jo Shtetit Tuaj, kur ndërkohë unë nuk kam shkaktuar asnjë lloj kundërvajtjeje apo vepër penale institucionit Tuaj apo shtetit Tuaj. Si përfundim, kërkoj të më vendoset nderi dhe të më hiqet njolla! Ndërkohë, unë do të bëj problem mediatik si dhe do t'i drejtohem Helsinkit e Strasburgut", shkruaj midis të tjerave në këtë letër.
Cila ishte përgjigjja e konsullatës greke?
Punonjësja e konsullatës me të cilën komunikova, më vuri në dukje se përse i isha drejtuar konsullit me tone aq të ashpra, kur unë mund të kisha përdorur një ton edhe më të qetë. Pra, konsullata nuk arrinte të kuptonte dot irritimin dhe protestën time, ndërsa nuk arrinte të më jepte një arsye se përse kisha marrë një penalitet të tillë. Kjo është më shumë se absurde. Nëse nesër do të më duhet të shkoj, fjala vjen në Itali apo në një shtet tjetër, për arsye pune, si do të mundem unë t'u shpjegoj ambasadorëve përkatës se ky shënim mbi pasaportën time është vënë pa ndonjë arsye?! Nëse do të shprehesha kështu, kush do të më besonte. Për të qenë i besueshëm do të më duhej të dokumentoja një gjë që nuk ekziston. Por a mund të dokumentohet një gjë e tillë? Por edhe nëse do të më besonin, përse duhet të më bëjnë me turp përpara ambasadorëve të huaj, sepse edhe duke më pyetur pa ndonjë paragjykim do të ndihesha keq, kur jam shtetas i rregullt i këtij shteti. Ky është diskriminim i hapur i konsullatës greke që po u bën korçarëve. Për këtë arsye, jam i vendosur t'i drejtohem Helsinkit, por edhe Strasburgut.
Bisedoi Vepror Hasani
Nëpunësja e zyrës së informacionit të Konsullatës greke, nuk është në gjendje të shpjegojë veprimet e veta
"Shënimi mbi pasaportë 'penalitet', por bazën ligjore nuk e kam të qartë"
Lidhur me shqetësimin e shtetasit shqiptar Llazar Bibo, por edhe të qytetarëve të tjerë të rajonit të Korçës, punonjësja e shërbimit në zyrën e informacionit pranë konsullatës greke, bëri të ditur për gazetën "Metropol", në një intervistë telefonike nëpërmjet numrit fiks të konsullatës 08252888, se konsullata greke nuk ishte në gjendje të shpjegonte veprimet që kryheshin nga ana e saj.
Mbi pasaportën e një qytetari nga Korça, i cili ka aplikuar pranë Konsullatës greke, ndërsa nuk e keni pajisur me vizë, keni lënë një shënim, mund të na thoni cila është domethënia e këtij shënimi?
Sigurisht që po. Shënimi mbi pasaportë është një penalitet, ç'ka do të thotë se qytetarit që i bëhet ky shënim, në harkun kohor të tre muajve që nga dita e aplikimit, nuk ka të drejtë të paraqitet pranë konsullatës për të aplikuar për vizë. Nëse ai paraqitet, ne shohim shënimin dhe nuk mund ta pajisim me vizë.
Në cilat raste vendosen penalitete të tilla?
Në ç'raste? Ne, nuk është se këtë shënim e kemi vendosur vetëm mbi pasaportën e personit që i është drejtuar gazetës "Metropol". Këtë shënim e kemi vendosur edhe mbi pasaportat e qytetarëve të tjerë. Ky është një rregull që rrjedh për vizat "Shengen"...
E qartë, por mund të na sqaroni më konkretisht se në cilin paragraf, nen apo ligj thuhet një gjë e tillë?
Këtë nuk e di.
Atëherë kur nuk jeni në gjendje të shpjegoni bazën ligjor, si keni kurajën që lini shënime mbi një pasaportë që është pasuri e shtetit shqiptar?
Nuk e di. Ajo ç'ka mund të them është se kështu kemi vepruar edhe me qytetarë të tjerë. Nuk mund t'u shpjegoj më shumë. Ndoshta duhet gjetur personi, punonjësi i konsullatës që e ka bërë këtë shënim për të mësuar më shumë.
Përse është e nevojshme të gjendet konkretisht punonjësi, kur tashmë dihet që kjo është një praktikë e ndjekur nga konsullata dhe jo nga punonjës të veçantë.
Nuk mund t'ju sqaroj dot më shumë. Ju mund t'i drejtoheni me faks konsullatës për të marrë një përgjigje nga vetë konsulli.
Sigurisht që do të bëjmë edhe këtë. Faleminderit!
artikull i gazetes metropol - 4 maj 2007 -
