Re: Cfare ju ben te ndiheni mire?
WHOLE LOTTA ...
Nga një bllok në tjetrin më humb
një vjershë për ty Lotta
Ti ecën larg, e nuk ndruhesh të kthesh kokën
Për të verifikuar
Supet e mija: ne njihemi
Ne s'flasim: pa fjalë pa duar ti ma tregove
E para
Me shokët mes nesh e kërkuam e s'gjetëm
Argjend i ngrohur me pështymë
Aty ishte përdhe
Unazë gishti nënash që ia dëshiruam sho-shokut
E nuk e dallonim, një nga një kokëqethur larg shtëpisë
Në rrethina një burrë i huaj na përdhunonte
Pa frymë mbi njëri-tjetrin, larg nga shtëpia
Lotta, kështu kjo fëminia
Më vjen, më ikën në ëndrra
Mes dhjetra qelqesh, dialektesh ti Lotta
Me një triumf të hapur në faqe
Me një fustan më vjen, që më çudiste, e qaje
Kur me dhunë ta vishte mami
Gjunjët tanë puqeshin në quka
Në ëndrra është mehalla jonë, filmat
Me shpata druri të menduara
Që na thyheshin: po biçikletën Lotta, biçilkletën
Kur na mësoje biçikletën, e në fakt më mësove dobësinë
(Do sqaruar mosha jote, më madhe se e jona)
Shtëpinë të kesh kundër, edhe rrugën
Fjalëve t'u druhesh, pa bërë dot pa fjalët e përbuzjen
E pastaj në darkë me biçikletën përtokë
Të të shkrythet gjoksi nga një vakësi pa emër
Unë mbaja timonin, ti pedaleve u mëshoje
Bark e kurriz ngjitur si një peshk i vetëm
Fshehtas rrotulloheshim nëpër rrugica
nëpër dy boshte halash prej teli biçiklete
Jashtë asfaltit me vija të bardha, për ty flet mëhalla
Lotta a të kujtohet
Mos humbtë kurrë banja e vjetër e shkollës fillore
Shtangia e mozaikëve të ujit përdhe
Që pëshpërijnë në tavan
Aromë e mirë e jashtëqitjeve të vjetra miturake
E gjitha kjo gardhuar me gjëmime të forta gjoksi
Se aty ishim ne
Në kope, vëzhgonim si rriteshe pasditeve
Si largoheshe ti, nga ne
E nga bluza
Por unë përherë e kisha ditur se ti ishe ndryshe
Të dy e kishim ditur bashkë se ti ishe ndryshe
Ndaj rrija unë larg shokësh
Të gjithë me tallën me hundë, shfytyruar për mirë
Pantallonat e shkurtra që fërgëllonin poshtë nëpër gjunjë
Këto
Këto gjethe të reja në shirita filmi të vjetër
Më flit. Kam dëshirë të jemi aty edhe një herë tjetër
Aty ku fillove
Lotta, ti çun i shëmtuar.
