Re: A eshte Hashim Thaqi nji kriminel?
Mesazhi i kryetarit të PDK-së, Hashim Thaçi
Qyetarë të nderuar,
Festa tradicionale e Vitit të Ri përmbyll një vit përpjekjesh, rezultatesh, gëzimesh dhe shqetësimesh si në rrafshin individual ashtu edhe në atë shoqëror, dhe na sjell vitin tjetër, atë të shpresës dhe vullnetit të ri.
Viti që po lëmë pas, për Kosovën ishte vit i rezultateve, por edhe i problemeve të ndryshme, që kërkojnë zgjidhje të drejtë për ta lehtësuar jetën e qytetarëve.
Në bashkëpunim me Bashkësinë Ndërkombëtare u shënuan rezultate në zhvillimin e proceseve demokratike. Subjektet politike treguan vlera solide politike, shkallë të duhur të emancipimit demokratik, ndërsa qytetarët më tepër pjekuri, përgjegjësi dhe kulturë politike.
Viti që vjen Kosovës do t’i hap perspektiva të reja dhe thellim të më tutjeshëm të demokratizimit të jetës politike, qytetare e ndëretnike, zhvillim ekonomik, vende të reja të punës, thellim të reformave në të gjitha fushat e jetës, sipas standardeve perëndimore.
Investimi i madh moral, ekonomik, politik dhe ushtarak i Perëndimit, vetë shoqëria kosovare, institucionet dhe vullneti i qytetarëve në mënyrë të natyrshme duhet të shkojnë në drejtim të integrimit sa më shpejt të Kosovës në strukturat ndërkombëtare.
Përfaqësuesve të UNMIK-ut, KFOR-it, OSBE-së, pëfaqësuesve diplomatik, të shoqatave joqeveritare, ua uroj Vitin e Ri, duke i falënderuar për punën dhe angazhimin e palodhshëm për ta bërë jetën sa më të sigurt, më të lumtur dhe më të pasur në Kosovë.
Vitin e Ri ua uroj familjeve të dëshmorëve, invalidëve të luftës, mërgimtarëve, pjesëtarëve të TMK-së dhe SHPK-së, me dëshirë që ky vit të jetë më i suksesshëm.
Një urim të veçantë ua drejtoj të rinjve, pensionistëve dhe familjeve me gjendje të dobët sociale me besimin, se institucionet tona do të bëjnë gjithçka, që ata ta gëzojnë një jetë më të mirë.
Me dëshirën, që viti 2003 të jetë vit i realizimit të synimeve tona të përbashkëta, i pavarësisë dhe demokratizimit të Kosovës, edhe njëherë të gjithëve Gëzuar dhe me fat Vitin e Ri.
