Re: A eshte Hashim Thaqi nji kriminel?
Në përvjetorin e Komandant Kumanovës- Ismet Jashari, merrnin pjesë edhe Ali Ahmeti dhe Hysni Shaqiri
"JEMI NË RRUGË TË DREJT REALIZIMIT TË ASPIRATAVE TË POPULLIT SHQIPTAR"
Kumanovë, 26 gusht 2001, 22:20 (Kosova e lirë)
Kështu siç na informuan burime ushtarake të UÇK-së dhe të Shtabit të mbrojtjes civile, të shtënat e armëve të lehta këmbësorike dhe të mitralozave kundërajrorë që kishin filluar në orën 21.00 parmbrëmë, kanë zgjatur deri në orën 06.00 të mëngjesit të ditës së djeshme. Inrtensiteti më i madh i të shtënave të armëve automatike ka përfshirë fshatrat Nakushtak dhe Vishticë. Burimet tona bëjnë të ditur se këto dy fshatra janë sulmuar nga pozicionet e forcave ushtarake-policore maqedonase të vendosura në fshatin Umin Doll dhe nga Mulliri i Ropalcës.
Në fshatrat e komunës së Likovës që janë nën kontrollin e plotë të UÇK-së, janë vërejtur të shtëna sporadike të intensitetit të ulët. Mësohet se gjatë këtyre sulmeve nuk është aktivizuar artileria e rëndë. Gjatë këtyre të shtënave, për fat të mirë, nuk ka pasur të vrarë apo të plagosur në radhët e popullatës civile e as të pjesëtarëve të UÇK-së, thonë burimet tona nga terreni. Gjatë ditës së djeshme përfaqësuesit e OSBE -së dhe të Komitetit Ndërkombëtar të Kryqit të Kuq (KNKK), vëzhguan fshatrat e kësaj komune dhe u njohën me gjendjen e civilëve.
Burimet ushtarake dhe ato civile na njoftuan se të shtunën në Likovë është mbajtur një tubim përkujtimor me rastin e trevjetorit të rënies heroike të komandantit legjendar të Ushtrisë Çlirimtare të Kosovës, Ismet Jasharit- komandant Kumanova.
Tubimin përkujtimor e përshëndeti edhe udhëhësi politik i UÇK-së, Ali Ahmeti, i cili foli me pietet për figurën e komandant Kumanovës. Gjithashtu këtë tubim e kanë përshëndetur edhe komandantët e Brigadës 113 "Ismet Jashari" që operojn në komunën e Likovës. Fjalim përshëndetës në këtë tubim mbajti bashkëluftëtari i Ismet Jasharit, komandant Guri, pastaj dhe njëri nga komandantët më kryesorë të Brigadës 113, komandant Sokoli dhe komandanti i Brigadës 114, gjeneral Nazim Bushi.
Ndërsa deputeti i Parlamentit të Maqedonisë, Hysni Shaqiri, i cili iu bashkëngjit radhëve të UÇK-së, me këtë rast, në këtë tubim ka folur për nënshkrimin dhe implementimin e Marrëveshjes kornizë të nënshkruar në Shkup nga katër liderët e partive politike shqiptare dhe maqedonase. Sipas tij, "nënshkrimi i kësaj marrëveshjeje paraqet vetëm një hap drejt realizimit të aspiratave të popullit shqiptar në Maqedoni, për të ekuilibruar të drejtat e popullit shqiptar me atë maqedonas, që nënkupton barabartësinë e këtyre dy popujve që jetojnë në Maqedoni", citohet të ketë thënë mes tjerash, Hysni Shaqiri në këtë tubim përkujtimor.
Deputeti në Parlamentin e Maqedonisë nga radhët e PDSH-së, Demush Bajrami, në pyetjen tonë rreth personalitetit të Ismet Jasharit-komandant Kumanova na u përgjigj shkurt: "Ata që edhe në këto rrethana të një shtetrrethimi të hekurt nga ana e forcave të sigurimit maqedonas, kanë përkujtuar rënien e Ismetit, kanë përkujtuar madhështinë e një figure që me sakrificat dhe flijimin e tij kishte bërë vepër, e cila tashmë është futur brenda kapakëve të epopesë sonë të lavdishme kombëtare. Të tillët si komandant Kumanova edhe sot ua lehtësojnë dhembjet dhe lartësojnë idealet e qëndresës heroike të atyre që kanë etje të madhe për liri". (KeL/F.S.S)
