Re: Kapet Sadam Hussein ne Tikrit.
Botuar: E hënë , 15 dhjetor 2003 - 09:17 CET
Sadami - brutal dhe agresor
Sadam Huseini ishte një udhëheqës, kërkesat e të cilit për besnikëri absolute - personale dhe politike - e çuan atë në ekstremet e sjelljes njerëzore.
Njeriu që përdorte torturat kundër kolegëve të tij më të ngushtë politikë, i dërgonte rregullisht dhurata një portieri i cili ishte treguar i sjellshëm gjatë katër vjet mërgimi të tij në Kairo.
Edhe lëshimet ndaj komunitetit shia të shumicës në Irak në ditët e para, i lanë vendin shtypjes brutale kur ata filluan një kryengritje pas Luftës së Gjirit më 1991.
Kjo nuk ishte hera e parë që ai tregonte kapacitetin e tij për brutalitet. Në vitin 1988 rreth pesë mijë kurdë u vranë vetëm në qytetin Halabja pasi mbështetën një ofensive iraniane në veri të vendit.
Ai përdori pasurinë e krijuar nga shitja e naftës për të ngritur sistemet e shëndetësisë dhe arsimit të vendit gjatë viteve të para të pushtetit para se të bëhej president - për një kohë ato konsideroheshin më të mirat në botën arabe.
Por ambicia e tij kryesore - ndoshta së bashku me mungesën e arsimimit formal - e çuan atë të bënte disa gabime thelbësore në gjykim, veçanërisht në marrëdhëniet me komunitetin ndërkombëtar.
Pushtimi i tij i Kuvajtit në vitin 1990 e çoi në konfrontim të drejtpërdrejtë me forcën ushtarake të udhëhequr nga SHBA, dhe lufta që pasoi dhe sanksionet e Kombeve të Bashkuara shkatërruan një pjesë të madhe të infrastrukturës së vendit.
Përpjekjet për ta përçarë komunitetin ndërkombëtar vazhduan deri në një luftë të dytë me koalicionin e udhëhequr nga SHBA - luftë e cila i dha fund ëndrrës së tij për t'u bërë udhëheqës i arabëve.
Trashëgimia e tij politike në fakt do të jetë - për pjesën më të madhe të botës - brutalitet ndaj popullit dhe agresion ndaj fqinjëve të tij.
http://www.bbc.co.uk/albanian/news/2003/12/031215_irak-sadam_profile.shtml
