Re: "ceshtja" Ngjela
vazhdon konflikti
www.shekulli.com.al
Ish-kreu i Komisionit të Ligjeve tha se Beriha është toleruar njëherë dhe nuk mund të lejohet sërish
Ngjela: Shpejt do të dëgjoni skandale të kësaj qeverie për shitje vizash
Shekulli
Deputeti i PD-së, Spartak Ngjela, tha dje në një intervistë për “Njuz 24”, se shumë shpejt do të dëgjohen skandale të qeverisë për shitjen e vizave. Ai akuzoi Berishën se po bëhet shkak për dekadencën e pushtetit të së djathtës. “Ne e kemi marrë pushtetin, megjithëse kemi pasur Berishën. Shumë ndryshe gjykimi sepse nga të gjitha sondazhet që kanë bërë të huajt, ai dilte njeriu më pak i votuar dhe me shumë armiq. Këtë duhet ta dijë shumë mirë ai, sepse është toleruar njëherë dhe nuk mund të lejohet më sërish”, -tha Ngjela
Pas kësaj periudhe, si e konsideroni konfliktin mes jush dhe Berishës, politik, parimor, Çfarë emri do t’i vinit?
Përplasja ime me kryeministrin shqiptar ka qenë tërësisht ligjore, pasi unë nuk kam pasur asnjë problem politik, por nga shkeljet e ligjit të procedurave lindin gjëra të rënda për shoqërinë. Demokraci do të thotë procedurë dhe demokraci liberale do të thotë ligj. Fakti që ligji nisi të nëpërëmbej që në hapat e para të qeverisjes, atëherë natyrisht që do të konfrontohej. Do të isha unë për shkak të parimeve të mia që i kam bërë publike. Pra, përplasja ka qenë, së pari, ligjore dhe pengesë në krahun tjetër që qeverisja të mos ketë në dorë të gjithë Republikën.
Cili është pozicioni juaj tani në grupin parlamentar zoti Ngjela, pasi pati kontradikta.
Jeta juaj parlamentare?
Unë jam në Parlament nga fluksi i votave të së djathtës dhe të forcës politike të cilës unë i përkas. Të gjitha këto janë nonsense, janë një inerci puniste, e cila kërkon të dominojë shoqërinë. Unë jam i pari, por nuk besoj se do të jem i fundit në këtë betejë për të shpëtuar pushtetin e së djathtës në kuptimin normal të së djathtës. Pasi ne kemi parimet tona për ligjin, Kushtetutën, ekonominë e tregut dhe me këto parime nuk bëhet asnjë lloj lëshimi, qoftë ky edhe kryeministri i vendit.
A jeni akoma anëtar i grupi parlamentar të PD-së?
Grupi është një formacion kushtetues në Parlament dhe nuk është fenomen monarkik, është fluks politik dhe unë i përgjigjem gjithçkaje me përjashtim të vullnetit të unit. Ka ikur koha që shteti kontrollohet nga një dorë. Të gjitha të tjerat janë frymë që nuk denjoj t’iu përgjigjem.
Keni folur për shtatë atentate ndaj Kushtetutës, por gjithashtu keni folur edhe për bllokim të shtetit dhe të ekonomisë, madje ju keni kërkuar largimin e kryeministrit, më hollësisht, ju lutem?
Që në momentin që nuk delegohen kompetencat, ekzekutivi do të ketë probleme. Që në momentin që kryeministri nuk bën dot punë duke zbatuar elementet e kushtetutës dhe kërkon t’i shkelë, është e pavlerë që të përmendim gjuhën puniste për të gjithë ata që nuk mund t’i përshtaten rregullave të lojës. Tani jemi në një luftë institucionesh dhe në këtë situatë pyetja që del është: për çfarë arsyeje po zhvillohet kjo luftë? Sot qeveria shqiptare, e cila ka një zë, është në luftë me prokurorin e përgjithshëm, me presidentin, pra këtu nuk ka më se çfarë të mendohet, këtu duhet të shpëtojmë pushtetin e kësaj mazhorance, e cila e ka marrë për të përmirësuar jetesën, për të luftuar krimin e organizuar dhe korrupsionin. Për të frenuar korrupsionin duhet të kemi gjërat më të sakta. Nëse t’i kërkon të dominosh organet e pavarura, të vihet pikëpyetja se pse kërkon të kesh përqendrim pushteti. Shumë shpejt do të dëgjoni skandalet e kësaj qeverie deri në shitje vizash, keni për ta dëgjuar. Po nuk ka kontroll, nuk mund të ketë garanci se nuk ka korrupsion dhe lidhje të zyrtarëve me krimet. Nëse t’i kërkon të ndihmosh zyrtarët në luftën kundër korrupsionit apo krimit, t’i nuk i ndihmon ata duke i akuzuar. Duhet të kuptohet se ajo që po kërkohet të bëhet është që të kapet Republika, nuk do ta lejojmë që të pushtohet Republika. Qeveria ka një segment që është përgjysmë, atë segment nuk e ka të plotë. Qeveria duhet të realizojë atë që ka marrë përsipër, që të nxjerrë vendin nga kriza. Shteti është i bllokuat për shkak të luftës pa sens që po zhvillohet me institucionet dhe tregu është i bllokuar si pasojë e humbjes së besimit të ekonomisë ndaj qeverisë. Ka informalitet që kërkon shumë profesionalizëm për ta nxjerrë nga kjo situatë. Po kalohet 30 për qindëshi i forcës blerëse në treg. Ka rënë sensi i investimeve. Çështja është se ne gjendemi në këtë pikë.
Ditët e fundit ka pasur arrestime dhe një punë kundër krimit, si i vlerësoni?
Natyrisht që ka një vullnet për luftën kundër krimit të organizuar, por unë kam kontakte edhe me institucionet ndërkombëtare të luftës kundër krimit. Për shembull, aksionin për bandën e madhe të Durrësit e ka drejtuar FBI-ja në Shqipëri me përfaqësuesin e saj. Ka pasur edhe lëkundje në këtë goditje. Në disa segmente pra nuk jemi vetëm dhe kjo është një gjë e madhe. Jam angazhuar 30 vjet për krijimin e shtetit demokratik dhe nuk bëj asnjë lëshim në shkeljen e ligjit, nuk pranoj asnjë lëvdatë false. Ajo çka më shqetëson është fakti se ne si fluks politik që na ka nderuar elektorati shqiptar, të mos ndahemi dhe mos paguajmë kostot e veprimeve të gabuara.
Gjatë kohës që keni qenë në strukturat drejtuese të PD-së, a është folur apo ka pasur ndonjë tendencë për heqjen e Sollakut?
Burri i shtetit nuk llap, vepron. Mendoj se ky gjykim shpjegon të gjitha. Ke pjesën tënde të kontrollit dhe duhet të ndihmosh për pavarësinë e tyre, jo për kapjen e tyre. Janë dy gjera të kundërta, pasi ne nuk mund të pranojmë një shtet si ai që kemi pasur në ‘92-’97-ën. Komisioni që kam drejtuar unë konkludoi se PD-ja nuk kishte dorë në firmat piramidale dhe kishte të drejtë në këtë konkluzion, i cili kaloi edhe në filtra ndërkombëtarë, por kriza erdhi si rezultat i mosdelegimit të kompetencave. Pra, një mazhorancë e bindur lejoi të trashen gabimet nga një njeri, i cili nuk drejtoi dot dhe e çoi vendin në kolaps. Por në këto momente ka rrjedhur ndryshe sensi i ngjarjeve në Shqipëri. Kanë qenë të tjerë ata që e kanë dominuar politikisht shtetin. Pra, edhe nga ’97-a deri më tani ka qenë kompromisi Nano-Berisha, pra ishte balancimi i institucioneve. Ai nuk e pranoi që institucionet të jenë të pavarura. Aq më mirë që ti nuk e ke në dorë që të kontrollosh te gjitha. A mundet që të gjitha t’i shtrijmë në një dorë dhe a krijon një rrezik të madh? Po, krijon një rrezik shumë të madh dhe nuk jam zë i vetëm. Unë ju them se jemi aq vota sa të mos e lejomë drejtimin e Republikës nga një dorë e vetme. Sepse ne duam që t’i përkasim demokracisë liberale. Kjo është deviza që kërkon shoqëria shqiptare dhe kthimi të ligji. Unë kam folur për shtatë atentate kundër kushtetutës. Natyrisht unë i kam shprehur se nuk mund të pranohen ligje pa teknikë legjislative, nuk mund të ketë luftë institucionale dhe çdo luftë institucionale të krijon luftë dhe fenomene të dyshimta. Pra ne nuk mund të mbajmë koston e mosqeverisjes. Ne kemi të drejtë të ndërrojmë lidershipet.
Pse ndodh një përplasje kaq e fortë. Për të marrë vetëm pushtet? A ka diçka personale, pasi kjo luftë ka nisur prej kohësh?
Preteksti është lufta kundër krimit. Komunizmi ka ardhur në pushtet me baza morale. Komunizmi erdhi në luftë kundër korrupsionit dhe shfrytëzimit. Këtu është problemi se asnjë luftë kundër keqbërësve nuk duhet bërë pa prova, pa u bazuar në ligje. Asnjë luftë nuk mund të bëhet pa Kushtetutë. Çdo luftë jashtë institucioneve quhet populizën i tipit totalitar. Nuk ka mundësi që të jetë fushatë elektorale lufta kundër pushteteve të pavarura. Pasi edhe ty mund të të dalin pushtetet e pavarura dhe të të bëjnë luftë dhe të godet. Shteti nuk ndërtohet me retorikë. Burri i shtetit nuk llap, ai nxjerr akte në përputhje me ligjin. Aktet ligjore përbëjnë gjykimin dhe gjuhën e shtetit. Megjithatë nëse do t’i drejtohet institucioneve, tu drejtohet pa zhurmë, pa presion e insinuata. Nëse ti i je shmangur delegimit të kompetencave se ke marrë 4 punistë nga kundërshtarët dhe ke ndërmend të marrësh edhe një katërshe tjetër për të marrë prokurorin që të trembësh opozitën dhe të lash duart me shtresën tënde, kështu bëhesh shkak për dekadencën e pushtetit. Ti që nuk i përket shtesës së përvuajtur dhe kërkon që t’ia humbësh pushtetin me veprime te tilla. Çdo njeri duhet ta dijë se ky është sistem që drejton nga e djathta.
Si i gjykoni akuzat e Berishës ndaj Sollakut?
Prokurori i përgjithshëm nuk është kockë e fortë që i duhet vendit, por ka dalë me konsensus dhe që të kesh rezerva ndaj prokurorit duhet t’i tregosh mazhorancës zëvendësuesin dhe duhet ta bisedosh me presidentin. Ti nuk mund ta anashkalosh presidentin, i cili gjithashtu ka dalë më konsensus. Këto janë gjëra normale. Edhe unë mund të kem pasur rezerva ndaj presidentit, por nuk mund të vish në pushtet dhe të ngrish të gjitha funksionet e pushteteve të tjera, sepse krijon një dyshim shumë të madh. Unë ju thashë se një nga gjërat kryesore që ndërmora hapin tim, pashë se ndihej frikë. Ekzekutivi që vjen nga taksat duhet të bëjë ekspansionin e taksave. Por duhet të shpëtohet shoqëria.
Ju kërkoni që Berisha të largohet pse ka një kosto. Por duhet thënë se ai ishte fytyra emblemë e të djathtës, mendoni se ka kapacitete e djathta për një lidership të ri?
Mazhoranca ka 74 deputetë. Partitë që janë në këto momente e kanë nxjerrë produktin e tyre dhe kanë 74 deputetë, pasi punistët nuk janë me ne. Jo, duhet ta dini shumë mirë, e kam deklaruar dhe i qëndroj këtij gjykimi. Ekzistenca e botës mbahet në tre principe. Drejtësia, e vërteta dhe paqja. Minimumi për një burrë shteti duhet të ketë njërin nga këto principe dhe aq më keq kur ai nuk i ka këto principe. E vërteta, ne nuk e kemi marrë pushtetin se kemi shfrytëzuar karizmën e Berishës, ne e kemi marrë pushtetin megjithëse kemi pasur Berishën. Shumë ndryshe gjykimi sepse nga të gjitha sondazhet që kanë bërë të huajt ai dilte njeriu më pak i votuar dhe me shumë armiq. Këtë duhet ta dijë shumë mirë ai sepse është toleruar njëherë dhe nuk mund të lejohet më sërish. Por i gjithë pështjellimi i madh është sepse trajektorja e Berishës është e çrregullt, ka përplasje me katër kolonat: kushtetutshmëria, ekonomia e tregut, zgjedhjet e lira dhe parlamentarizimin. Duhet t’u qëndrojë deri në fund dhe duhet të zbatojë rregullat e lojës dhe kur drejton, ai duhet të ketë inteligjencë.
19/04/2006
KATEGORIA: Politike
