Tek "shekulli online" shkruhet:
KALLEZIMI PENAL
OBJEKTI: Kërkohet fillim i Procedimit Penal për Drejtorin e Përgjithshëm të Policisë së Ndërtimit dhe Drejtorin e Policisë së Ndërtimit-Dega Tiranë, në vijim të materialit kallëzues të depozituar më datë 13.01.2006
Prokurorisë së Përgjithshme
Prokurorisë së Rrethit Gjyqësor, Tiranë
I nderuar Zoti Prokuror
Më datë 05.07.2006, rreth orës 22.00, u njoftuam nëpërmjet medias se Policia e Ndërtimit filloi të shkatërrojë objektin publik, nënkalimin në hyrje të Tiranës, (i njohur si nënkalimi i “Zogut të Zi”).
Bashkia e Tiranës, në cilësinë e investitorit dhe pronarit të këtij objekti, nuk kishte asnjë njoftim zyrtar nga Policia e Ndërtimit për këtë çështje, ashtu siç e kërkojnë procedurat e parashikuara në legjislacionin në fuqi.
Siç e dini, kjo çështje është bërë objekt i shqyrtimit gjyqësor, i cili ende nuk ka përfunduar. Gjithashtu, theksoj se Vendimi dhe veprimi i Policisë së Ndërtimit është në kundërshtim flagrant më ligjin:
Së pari, asnjë organ tjetër kompetent sipas ligjit apo më i lartë në hierarkinë administrative (apo gjyqësore) nuk ka vendosur për prishjen e këtij objekti publik, dhe Policia e Ndërtimit është në kapërcim të kompetencave të saj të vendosë dhe veprojë vetë për prishjen e një objekti publik.
Kështu, pretendohet se KRRTRSH, në asnjë akt të sajin nuk ka vendosur për prishjen e këtij objekti publik. Këtë e provon qartë si vetë përmbajtja e Vendimit të KRRTRSH-së ku nuk urdhërohet prishja, por edhe fakti që kur nga Bashkia e Tiranës, për të shmangur pasojat, u kërkua pezullimi i ekzekutimit të këtij Vendimi të KRRTRSH-së nga Gjykata, kjo e fundit, në Vendimin e saj të datës 05.01.2006 u shpreh shprehimisht se: “Me aktin e të paditurit objekt gjykimi është vendosur shfuqizimi i një akti tjetër administrativ, ai i një Vendimi të KRRT-së së Bashkisë së Tiranës dhe nuk është urdhëruar kryerja e ndonjë veprimi, thjesht është shfuqizuar vendimi i një organi tjetër administrativ”. Pra, Vendimi i KRRTRSH-së Nr. 3, dt. 29.12.2005 është një akt me karakter deklarativ dhe që nuk urdhëron prishjen e këtij objekti.
Me këtë Vendim të KRRTRSH-së (deklarativ) është vendosur shfuqizimi i Vendimit të KRRT-së për nënkalimin (që e kemi ankimuar gjyqësisht). Sipas Kodit të Procedurës Administrative neni 121, paragrafi 2, kjo do të thotë se ky Vendim i KRRT-së është vlerësuar kështu nga KRRTRSH-ja si një akt relativisht i pavlefshëm (vetëm këto akte mund të revokohen apo shfuqizohen, sipas nenit 121/2 të Kodit që përcakton shprehimisht se: “Aktet administrative absolutisht të pavlefshëm nuk mund të shfuqizohen apo të revokohen”, sepse po sipas nenit 117 të Kodit aktet absolutisht të pavlefshëm janë nul dhe thjesht shpallen si të tillë nga Gjykata. Nisur nga fakti që ky Vendim i KRRT-së u shfuqizua nga KRRTRSH dhe nuk u deklarua nga Gjykata si absolutisht i pavlefshëm, do të thotë që ky akt nuk është absolutisht i pavlefshëm, por është konsideruar si relativisht i pavlefshëm).
Po ashtu, në lidhje me pasojat e këtij akti (Vendimit Nr. 309 të KRRT-së), sipas nenit 116 dhe 117 të Kodit të Procedurave Administrative, vetëm akti administrativ absolutisht i pavlefshëm nuk prodhon pasoja (pasojat e tij janë nul), ndërsa për aktin relativisht të pavlefshëm, pasojat kanë ardhur deri në momentin e shfuqizimit të tij. Shfuqizimi i Vendimit të KRRT-së së Tiranës, nuk ka fuqi prapavepruese. Kjo do të thotë që punimet e ndërtimit në objekt nuk mund të konsiderohen si pa leje, meqë Vendimi i KRRT-së u shfuqizua nga KRRTRSH. Ky vendim i KRRTRSH-së për shfuqizim ka fuqi juridike nga momenti që është marrë dhe për të ardhmen dhe jo për punime që janë kryer para miratimit të tij. Në këtë kuptim, punimet e ndërtimit që janë kryer në këtë vepër janë kryer sipas Vendimit të KRRT-së, deri në momentin që KRRTRSH e shfuqizoi atë.
Ndaj, Policia e Ndërtimit është në shkelje të ligjit, kur vepron për prishjen e tyre si ndërtim pa leje. Vendimi shfuqizues nuk mund të ketë fuqi prapavepruese, që Policia Ndërtimore të mund ta quajë këtë ndërtim pa leje që në fillimin e ndërtimit të tij e të veprojë për prishjen e tij.
As ndërtimi nuk ka qenë pa leje (po krejt e kundërta, përderisa KRRTRSH e njohu ekzistencën e këtij akti si të tillë, duke e shfuqizuar atë) dhe as ndonjë akt i ndonjë organi tjetër si KRRT ose KRRTRSH nuk ka autorizuar apo urdhëruar Policinë të kryeje këtë veprim prishjeje.
Së dyti, sipas nenit 1 dhe nenit 2 të Ligjit Nr. 8408, dt. 25.09.1998 “Për Policinë e Ndërtimit”, Policia e Ndërtimit ëshë organ ekzekutiv që ekzekuton vendimet e marra nga K.RR.T dhe/ose K.RR.T.R.SH dhe nuk është organ vendimmarrës.
Kështu, sipas nenit 6 të këtij ligji ajo vetëm pezullon aktet e marra nga K.RR.T-ja dhe njofton KRRTRSH-në, ajo nuk vendos vetë për çështje dhe akte që kanë qenë objekt shqyrtimi nga KRRT.
Nëse organi kompetent për lejet e ndërtimit për territorin në juridiksion që është KRRT ka vendosur për një vepër (siç është ndërtimi i nënkalimit), Policia e Ndërtimit nuk është një organ mbi këtë të fundit që, me autoritetin e saj, të vendosë që këto punime të kryera janë pa leje, aq me tepër kur edhe KRRTRSH vetë e ka njohur ekzistencën e aktit të KRRT-së (duke e shfuqizuar atë) dhe nuk ka urdhëruar prishje. Policia e Ndërtimit nuk mund të vendosë e veprojë për çështje që janë në kompetencë të organeve të tjera shtetërore (si KRRT, që në këtë rast ka vendosur për ndërtimin e kësaj vepre publike, apo KRRTRSH, që ka vendosur shfuqizim vendimi, por jo prishje).
Policia e Ndërtimit mund të konstatojë ndërtime pa leje vetëm në rastet kur nuk kanë disponuar me Vendim organet kompetente si KRRT (në këtë rast, me Vendimin Nr. 309, dt. 05.07.2004 të KRRT-së së Bashkisë së Tiranës) apo KRRTRSH (me Vendimin Nr. 3, datë 29.12.2005). Sipas nenit 77 të Ligjit Nr. 8405, dt. 17.09.1998 “Për Urbanistikën” është KRRT ajo që vendos për prishjen e ndërtimit të kundërligjshëm dhe pastaj Policia e Ndërtimit, mbi bazën e Vendimit të KRRT-së mund të urdhërojë prishjen. Për të njëjtën çështje nuk mund të marrin Vendim 2 organe shtetërore: dhe KRRT dhe Policia e Ndërtimit. Dhe në këtë rast ligji ka përcaktuar qartë ndarjen e funksioneve mes këtyre 2 organeve (Ligji Nr. 8405, dt. 17.09.1998 “Për urbanistikën”, neni 16, përcakton se KRRT funksionon si organ vendimmarrës për territorin në juridiksion, ndërsa sipas nenit 1 i ligjit Nr. 8408, dt. 25.09.1998 “Për Policinë e Ndërtimit” përcakton se Policia e Ndërtimit është organ ekzekutiv).
Në këtë kuptim, Policia ka shkelur haptazi kompetencat që i jep ligji, ka kapërcyer kufijtë e veprimtarisë së saj të përcaktuar në ligj, sepse ka vendosur dhe vepruar për një çështje që është në kompetencë të organeve të tjera shtetërore dhe për të cilat këto të fundit kanë disponuar tashmë me vendim (akt administrativ).
Gjë që do të thotë se Policia e Ndërtimit ka vepruar mbi një terren absolutisht të paligjshëm, kur ka filluar prishjen e këtij objekti publik, vlera e të cilit, pa llogaritur fitimin e munguar, është mbi 1 milion dollarë. Theksojmë se ky investim është tërësisht i bërë nga fondet e taksave të qytetarëve të Tiranës.
Policia e Ndërtimit në këtë rast e ka shkelur ligjin me dashje, duke kapërcyer kompetencat e saj dhe duke vendosur me arbitraritet prishjen. Çështja nuk ka qenë në kompetencë të saj vendimmarrëse dhe ajo as nuk ka vepruar si organ ekzekutiv që është, për të ekzekutuar ndonjë vendim të organeve të tjera që urdhërojnë prishjen.
Policia e Ndërtimit ka vepruar me dashje në shkelje të ligjit, pasi ajo ka qenë e informuar si për Vendimin e KRRTRSH-së, Vendimin e KRRT-së (pra që organe të tjera kanë vendosur për këtë çështje dhe çështja tashmë nuk është më në kompetencat e saja), ashtu edhe për Vendimet e Gjykatës etj.
Veprimet e Policisë së Ndërtimit kanë të gjithë elementët e veprave penale të Shpërdorimit të Detyrës dhe të Shkatërrimit të Pronës Publike, vepra penale këto të parashikuara në nenet 248 dhe 150 të Kodit Penal të Republikës së Shqipërisë.
Për këto vepra penale kallëzoj drejtuesit e Policisë Ndërtimore, Drejtorin e Përgjithshëm z. Elez Ahmetaj dhe Drejtorin e Degës Tiranë Z. Hysni Gjoci. Këta persona, për shkak të cilësive të veçanta që kanë, duke qenë në krye të këtij institucioni të Policisë Ndërtimore, kanë urdhëruar, në kundërshtim me përmbushjen e rregullt të detyrës dhe me autoritetin që ju jep ligji, dhe kanë drejtuar veprimet për shkatërrimin e pronës publike.
E paraqesim këtë kallëzim, si bashkëlidhje të materialit kallëzues të mëparshëm, të bërë në datë 13.01.2006 për këtë vepër publike, si për efekt të argumenteve të përdorura atje, ashtu edhe për të theksuar edhe njëherë se këto vepra penale janë kryer në bashkëpunim me të gjithë ata zyrtarë të lartë të shtetit të kallëzuar më parë.
Mbetem ende i bindur se ky material kallëzues do të konsiderohet seriozisht nga ana Juaj, për të mirën e në mbrojtje të interesave të qytetarëve dhe qytetit të Tiranës!
Edi Rama
