Masa të rrepta për mbarëvajtjen e ndeshjes ShqipëriSerbi në “Ebasan Arena”. Në kuadër të planifikimit të masave, kreu i Policisë Haki Çako ka zhvilluar sot një takim me Presidentin e Federatës Shqiptare të Futbollit Armando Duka.
Për rreth një orë ata kanë diskutuar për marrjen e masave të përbashkëta për zhvillimin sa më normal të ndeshjes, si dhe për të garantuar rendin e sigurinë në çdo hap, që nga mbërritja e lojtarëve, të tifozëve, të miqve nga Serbia, para, gjatë dhe pas mbarimit të ndeshjes.
“Policia e Shtetit do të marrë të gjitha masat, duke angazhuar të gjitha kapacitetet më të mira të saj , qoftë në burime njerëzore ashtu dhe në logjistikë” ka thënë Cako. Ai ka theksuar se ndeshja me Portugalinë ishte një test për këtë ndeshje dhe ka garantuar se policia do të forcojë akoma më shumë masat me qëllim që të parandalohet çfarëdo lloj incidenti i mundshëm.
Nga ana e tij, Duka ka theksuar se do të vendosë në dispozicion të Policisë së Shtetit, listën me emrat e të gjithë tifozëve që kanë blerë biletë, me qëllim që Policia të këtë mundësi të kryej verifikimet e nevojshme.
Ai vlerësoi masat që policia kishte marrë në ndeshjen me Portugalinë duke shprehur dakordësinë për forcimin e mëtejshëm të këtyre masave , gjithmonë në funksion të mbarëvajtjes së ndeshjes . Në takim u vendos që një grup nga Polica e Shtetit dhe një grup nga Federata Shqiptare e Futbollit të bëjnë riguanicionin e stadiumit dhe të ambienteve përreth duke përcaktuar në vend edhe masat konkrete për gjithë pikat e paraqitura në planin e masave.
