Re: SHQIPËRI - VETËVRASJA NË MODË
Dy orë para vetëvarjes, Eriola ishte grindur me vëllanë e saj 12-vjeçar. Brenda 10 ditësh janë vetëvarur 3 të mitura
Rasti i tretë, vetëvaret 13-vjeçarja
Pogradec, 13- vjeçarja Eriola Elezi, nga Velçani, është gjendur e vetëvarur në kasollen e bagëtive
POGRADEC- Vetëflijohet në rrethana misterioze një tjetër e mitur. Në të njëjtën mënyrë si dy bashkëmoshataret e saj, Eriola Elezi, nga fshati Velçan i Pogradecit, i ka dhënë fund jetës në mbrëmjen e djeshme duke u vetëvarur në kasollen e bagëtive. Eriola, nxënëse në klasën e shtatë, është viktima më e fundit e vetëflijimit, ndërkohë që ky fenomen i përhapur gjatë viteve të tranzicionit, kryesisht tek moshat e rritura, tashmë është kthyer në një shqetësim edhe më të madh, pasi vetëm brenda 10 ditëve të fundit janë vetësakrifikuar tre vajza të mitura. Rasti i parë shënohet në qytetin e Fierit, kur 11- vjeçarja Alda Cena u vetëvar në banjon e shtëpisë. Pak ditë më parë, në të njëjtën mënyrë u vetëflijua dhe një bashkëmoshatare e saj, Joana Rajdho, nga Tirana.
Ngjarja
Eriola Tahir Elezi, banuese në fshatin Velçan të Mokrës së Poshtme, i ka dhënë fund jetës në orët e vona të mbrëmjes së djeshme. Lajmin e ka bërë të ditur për gazetën, përmes linjës telefonike, kryetari i komunës, Ramazan Rapçe. Ndërkohë që mësohet se në fshatin e thellë, menjëherë pas marrjes së informacionit, kanë shkuar dhe uniformat blu të komisariatit të Pogradecit. Sipas informacionit të dhënë nga kryekomunari Rapçe, vajza e mitur është gjetur e vetëvarur në kasollen e bagëtive, që ndodhet shumë pranë banesës së parë. Ende nuk dihen rrethanat lidhur me këtë ngjarje tronditëse, por kryetari i komunës Rapçe thotë për gazetën se para se të vetëflijohej vajza 13-vjeçare ishte grindur me vëllanë e saj të mitur, Alketin, 12 vjeç. Gjithsesi kjo nuk mund të konsiderohet një arsye e fortë që të justifikojë veprimin fatal ndaj jetës së adoleshentes. Prindërit e saj, sipas kryekomunarit, kanë mbetur të shtangur kur kanë gjetur vajzën e tyre të vetëvarur. Ata nuk kanë mundur të thonë ndonjë motiv lidhur me këtë tragjedi të ndodhur në familjen e tyre, përveçse kanë treguar grindjen e Eriolës me vëllanë e saj më të vogël. Mësohet se viktima ishte grindur me të vëllanë dy orë përpara se të vetëvarej në kasollen e bagëtive.
Familja
Vetëflijimi i Eriolës ka tronditur banorët e fshatit të thellë dhe të të gjithë zonës, të cilët sapo kanë marrë lajmin tragjik kanë shkuar për të ngushëlluar familjen e Tahir Elezit, baba i katër fëmijëve, dy vajzave dhe dy djemve. Nga kryekomunari i Velçanit, Ramazan Rapçe, mësojmë se Eriola ishte fëmija i parë i bashkëshortëve Elezi. Përmes linjës telefonike, Rapçe, thotë se Eriola, nxënëse në klasën e shtatë të shkollës së fshatit, njihej si një vajzë e urtë dhe e mbyllur në vetvete. Si vajza e madhe e shtëpisë ajo i ndihmonte shumë prindërit për kryerjen e punëve të ndryshme Po nga kryekomunari mësojmë se babai i adoleshentes punon si roje në shkollën e fshatit dhe se familja nuk jetonte në kushte të këqija ekonomike. Gjithsesi shkaku i vërtetë i vetëvarjes së Eriolës në kasollen e bagëtive, dy orë pasi është grindur me të vëllanë 12-vjeçar mbetet mister. Për të afërmit e Eriolës grindja e saj me të vëllanë nuk ishte në atë shkallë sa ajo të humbiste jetën në mënyrën kaq tragjike.
