Re: shantazh i ulet dhe idiot ndaj presidentit
Albatros”, Gazmend Dibra para gjykatës
Prokuroria: Faktuam se Dibra iu kërkoi nipave të Moisiut që të ndikonin për shkarkimin e Sollakut
Flamur Vezaj
TIRANË- Prokurorisë së Tiranës i kanë mjaftuar 60 ditë për të “kopsitur” dosjen e ish-drejtorit të Aviacionit Civil, Gazmend Dibra e për ta dërguar atë para gjykatës. Burime zyrtare nga organi i akuzës bëjnë me dije se mbi ish-kreun e Aviacionit Civil ka fakte dhe prova që vërtetojnë se Dibra ka konsumuar veprat penale të “shpërdorimit të detyrës” dhe “korrupsionit pasiv nga ana e personave që ushtrojnë funksione publike”. “Pas hetimeve intensive është faktuar se ish-drejtori i Përgjithshëm i Aviacionit Civil, Gazmend Dibra, nëpërmjet takimeve që ka zhvilluar me administratorin dhe aksionerët e shoqërisë “Albatros Airways”, vëllezërit Aleksandër dhe Valeri Hoxha u ka kërkuar atyre të ndikojnë si pjesëtarë të familjes së Presidentit, në vendimin e tij për të pranuar shkarkimin e kryeprokurorit Theodori Sollaku”-thuhet në kërkesën për gjykim, të dorëzuar dje në gjykatë.
Dosja
Akuza e shpërdorimit të detyrës është argumentuar nga përfaqësuesit e Prokurorisë së Tiranës me pezullimin e fluturimeve të kësaj kompanie ajrore pa zbatuar procedurat e përcaktuara qartë si lajmërimi i shoqërisë, afatet për shlyerjen e borxhit dhe sanksionimin në rast mosshlyerje. “Njoftimi i pezullimit të veprimtarisë së shoqërisë me telefon, vetëm disa orë para si dhe mungesa e një akti të shkruar ku të pasqyrohej shpjegimi i fakteve që janë bërë shkas për nxjerrjen e këtij urdhri pezullimi si dhe dëmi i shkaktuar ndaj shoqërisë nga këto veprime provon se i pandehuri Gazmend Dibra ka konsumuar elementët e veprës penale të “shpërdorimit të detyrës”-thuhet në kërkesën për gjykim të prokurorisë. Nga hetimet e zhvilluara ka rezultuar se shoqëria e fluturimeve “Albatros Airways” sh.p.k, është regjistruar si person juridik me vendim të Gjykatës së Rrethit Gjyqësor Tiranë dhe ka filluar aktivitetin e saj në muajin dhjetor të vitit 2004, në drejtim të transportit të njerëzve dhe mallrave me shtetin fqinj, Italinë. Sipas akuzës, rezulton se deri në muajin prill të vitit 2005, “Albatros” kishte krijuar ndaj “Albtransportit” një borxh prej 54.001.146 lekësh. Sa i përket borxheve, “Albatros” renditet pas “Albanian Airlines”, e cila i detyrohej “Albtransportit” 199.521.335 lekë dhe para “Ada Air”, me borxh 48.256.146 lekë.
Përgjimet
Sipas kërkesës për gjykim, i pandehuri Dibra është takuar me administratorin e kompanisë së fluturimeve, duke i kërkuar shlyerjen e borxhit, ndërkohë që më pas, biseda ka marrë kah tjetër. Gjatë bisedës, i pandehurit Dibra i ka kërkuar administratorit Aleksandër Hoxha të ndërhyjë pranë Presidentit të Republikës, i cili është daja i tij për të dekretuar shkarkimin e Sollakut, në këmbim të krijimit të lehtësirave për shoqërinë “Albatros” dhe shtyrjes së pagimit të borxhit. “Duke qenë se nga ana e vëllezërve Hoxha nuk janë ndërmarrë veprime konkrete lidhur me plotësimin e kërkesës së bërë nga i pandehuri Dibra, ky i fundit ka thirrur në zyrën e tij Valeri Hoxhën, me të cilin ka biseduar përsëri për çështjen e borxhit të shoqërisë dhe i ka bërë presion”. Sipas prokurorisë, me datën 30 gusht, i pandehuri Gazmend Dibra është larguar drejt Polonisë dhe me datë 31 gusht i pandehuri Dibra ka urdhëruar nëpërmjet telefonit zëvendësin e tij, Ernest Vrioni që të pezullonte veprimtarinë e kompanisë ajrore. Po në të njëjtën ditë, i pandehuri Dibra ka lajmëruar me telefon administratorin Aleksandër Hoxha se duke filluar nga 1 shtatori do t’i pezullohej aktiviteti, ndërkohë që nuk ishte marrë asnjë vendim për këtë çështje nga Drejtoria e Aviacionit Civil.
Provat e akuzës
Deklarimet e shtetasve Aleksandër dhe Valer Hoxha, Albens Vokopola, Ernest Vrioni, Luan Jaupaj dhe Rudina Fortuzi;
Dy kaseta filmike si dhe procesverbalet e transkriptimit të përmbajtjes së tyre;
Autorizim për operim ajror nr. 4549, dt. 10.05.2006, shkresë me nr.469 prot., dt.10.05.2006 për rinovim të COA-së
Shkresë nr.1091/1 prot., dt. 17.08.2006 e drejtorit Dibra, drejtuar Lulzim Bashës
Autorizim i Ministrit nr. 4549/3, dt.18.08.2006
Dokumentacioni i sekuestruar me procesverbalin e datës 22.09.2006 pranë D.P.A.C-së, gjithsej pesëdhjetë e tre dokumente si dhe dokumentacioni i sekuestruar me procesverbalin e datës 22.09.2006, gjithsej nëntë dokumente.
Disqet e përgjimeve telefonike për numrin 0682044001 së bashku me procesverbalet e transkriptimit të bisedave të përgjuara;
Tabulatet e thirrjeve telefonike hyrëse – dalëse për numrat e telefonit 0682044001 dhe 0692065557;
Në tërësi aktet e procedimit penal nr. 3092, viti 2006
