PROJEKTI I QENDRES SE SHKODRES ASHT I KOHES
GAZETA E SHKODRES
Maj 12, 2006
TAKIMI NE BASHKI/ Rudolf Rasha: Punimet do të nisin shpejt dhe njëherazi
400 milionë lekë për unazën e qytetit
Bashkiakët: Do të zbatojmë projektin e vitit 2002
--------------------------------------------------------------------------------
Brikena Shllaku
rrethet@gazetashqiptare.com
SHKODER
Pas premtimeve elektorale që nisën që nga fillimi i viteve ’90, më në fund Shkodra do të ketë unazën e qytetit. Qeveria Shqiptare ka akorduar një fond prej 400 milionë lekësh për zbatimin e projektit që u hartua në vitin 2002 dhe që pritet të zgjidhë një nga problemet më të mprehta të këtij qyteti. Lajmi është bërë publik nga nënkryetari i Bashkisë së Shkodrës, Rudolf Rasha. Paraditen e djeshme, në këtë bashki është bërë një takim i zgjeruar me speciaslistë dhe drejtues të institucioneve që lidhen me këtë investim. Qëllimi i këtij takimi ishte kordinimi i veprimeve për zbatimin e projektit dhe nisja sa më shpejt nga puna. Sipas Rashës, gjatë realizimit të këtij investimi të madh do të ketë dhe ndryshime të vogla të projektit të hartuar katër vite më parë. “Firma projektuese dhe Drejtoria e Përgjithshme e Rrugëve, e cila është edhe në rolin e investitorit do ta shohin situatën konkretisht”, është shprehur numri dy i Bashkisë së kryeqendrës së veriut. Ndërkohë, specialistët sqarojnë se unaza e qytetit është 3.5 kilometra e gjatë dhe do të përfshijë hyrjen e qytetit të Shkodrës; ish-Zdrukth Kashtën; Kirasin, ish-shkollën Mekanike Bujqësore si dhe ish-Zooteknikën. Nënkryetari i Bashkisë, Rasha pohon se që punimet të bëhen shpejt dhe me cilësi, është vendosur që ndërhyrjet të bëhen të gjitha njëherazi. Konkretisht do të kordinojnë veprimet në një kohë, Ndërmarrja e Ujësjellësit, KESH-i, ndërmarrja e Kanalizimeve, Telekomi, Zyra e Regjistrimit të Pasurive të Palutshme etj. Punimet do të nisin menjëherë pas ndryshimeve që do të bëhen në projektin e vitit 2002 për unazën e qytetetit. Krahas fondit për ndërtimin e unazës, qeveria ka planifikuar edhe fondin për shpronësimet që do të bëhen konform ligjit. Qeveria Shqiptare e dha fondin prej 400 milionë lekësh, pasi qeveria italiane e cila kishte premtuar se do e bënte ajo këtë investim është tërhequr. Specialistët e vendit fqinjë pas një sërë kërkesash dhe takimesh me krerët lokalë të Shkodrës kishin rënë dakort që të bënin unazën e qytetit, duke e quajtur “by-pass”, që do të lidhte autostradën Shkodër-Lezhë me rrugën Shkodër-Hani i Hotit. Nuk dihet se pse pala italiane u tërhoq nga zbatimi i këtij projekti.
Zonat
Në projektin e hartuar në vitin 2002 është parashikuar që unaza e qytetit të Shkodrës të përfshijë këto zona:
Hyrjen e qytetit
Ish-Zdrukth Kashtën
Kirasin
Ish-shkollën Mekanike Bujqësore
Ish-Zooteknikën
Fondi i dhënë nga qeveria është 400 milionë lekë
Unaza kap një gjatësi prej 3.5 kilometrash
