Re: Partizani!! Nothing is wrong
Marre nga ato lajmet e lodhura ke PArtizanifk.com
Të kuqtë e kanë fituar ndeshjen e parë të turit të dytë të Kupës së Shqipërisë, ndaj Bylisit, me rezultatin 2-1. Partizani, gjatë pjesës së parë të ndeshjes, ka kaluar i pari në epërsi, por ballshiotët e kanë barazuar rezultatin disa minuta pasi kishte filluar pjesa e dytë. Në fund të takimit, Dhëmbi, me golin e shënuar, do të vuloste përfundimisht rezultatin e ndeshjes, duke i dhënë fitoren dhe njëkohësisht mjaft shanse kualifikimi skuadrës së tij. Ndërkohë, loja për të dy ekipet ka qenë nën nivelin mesatar dhe tepër e dobët, ngaqë ndeshja është zhvilluar në një terren mjaft të rënduar. Me Partizanin, pas largimeve të fundit të disa prej titullarëve, kanë luajtur dy kavajasit, Daiu dhe Kuli. Para ndeshjes, trajneri Bajko pati deklaruar se, pavarësisht nga rezultati, do të ishte i kënaqur me lojën e ekipit të tij, pasi kjo ishte ndeshja e parë zyrtare për këtë vit. Por, pas ndeshjes me mallakastriotët, trajneri i Partizanit, në intervistën e tij për 'Sportin shqiptar', theksoi se nuk pati mundësi ta shohë lojën e ekipit, ndaj nuk e ka idenë sesi luajti Partizani, pasi terreni i Kuçovës ia mohoi privilegjin e një diçkaje të tillë.
- Pasi fituat ndeshjen e parë me Bylisin, a ju bindi ndopak loja e ekipit tuaj?
- Unë, ashtu si edhe shumë të tjerë të pranishëm në ndeshjen e parë të kupës, nuk isha në gjendje t'i dalloja anët pozitive dhe negative të Partizanit. Për 90 minuta, loja nuk u ngjit në nivelin e një ndeshjeje normale futbolli, sepse terreni ishta aq i vëshirë, sa të krijohej përshtypja se në atë fushë nuk po luhej fare futboll. Megjithëse fusha ishte e tillë, ekipi i Partizanit u përpoq shumë, duke krijuar mjaft raste te pastra gjatë gjithë ndeshjes. Mund të kishim fituar edhe më thellë, por balta nuk na lejoi të shënonim në mundësitë e shumta që na u dhanë.
- Sidoqoftë, Partizani ka fituar dhe e ka pothuajse të sigurt kualifikimin. Nuk ju kënaq ky fakt?
- Jo, kalimi i turit është problem tjetër. Kualifikimi është anë tjetër, sepse dihet që do ta kalojë turin ekipi më i mirë, por një ndeshje futbolli kërkon më shumë se kaq. Tifozët kërkojnë nga ekipi lojë dhe, natyrisht, rezultat. Por terrene si ai i Kuçovës, apo shumë fusha të tjera të kategorisë së parë, edhe të ndëshkojnë, sado i fortë të jetë ekipi. Nuk e di, por është e pamundur që një trajner ta ndryshojë lojën e ekipit në një terren të tillë, ku futbolli mungon fare.
- Çfarë do të bëni më konkretisht gjatë këtyre ditëve, për sa i përket përgatitjes së ekipit në ndeshjet e ardhshme?
- Duke qenë se në Kuçovë, siç e përmenda më lart, ekipi nuk kishte mundësi të luante një ndeshje futbolli, madje edhe gjatë takimeve të fundit të kampionatit ka hasur të njëjtat vështirësi, mua më mbetet si detyrë e parë që të punoj me Partizanin në terrene me baltë. Pra, duhet që ekipi, meqenëse po i luan ndeshjet në baltë, edhe stërvitjen ta bëjë në mjedise të tilla. Kjo të bëhet me qëllim që të mësohet t'u përshtatet ndeshjeve zyrtare, të cilat luhen në të tilla fusha.
- Ndërkohë janë aktivizuar për herë të parë disa lojtarë, si Kuli dhe Daiu. A ju kënaqi paraqitja e tyre?
- Këta lojtarë kanë luajtur edhe më parë me ekipin tonë, prandaj nuk është se po luajnë për herë të parë me fanellën e Partizanit. Natyrisht, kthimi i tyre në këto momente ishte mjaft i nevojshëm dhe fakti që nuk kanë më probleme me dokumentet e tyre dhe do të jenë lojtarë të Partizanit në ndeshjet zyrtare, më kënaq shumë.
