Re: KOMBETARJA KUQEZI
Fillimisht postuar nga briiigi:
[qb] kur luhet?!
ishalla fitojne... [/qb]
Me 29 Mars, ne Shkoder.
Ja edhe nje koment marre nga
www.shqiperia.com
Kuqezinjtë, më të mirën në "Loro Boriçi"
Përgatitjet e kombëtares vijojnë pa probleme. Dabulla ka një dëmtim të lehtë, ndërsa Bogdani nuk mund të vijë
Kanë kaluar dy ditë nga fillimi i grumbullimit të kombëtares sonë, në prag të ndeshjes së 29 marsit me Rusinë në Shkodër, dhe gjithçka po shkon mirë. Një gjë të tillë e ka konfirmuar dje, në një konferencë për shtyp, vetë numri 1 i kuqezinjve, Hans Peter Brigel. Sipas gjermanit, situata në kampin që drejton është shumë e mirë dhe po përparon sipas parashikimeve të tij. "Pasi kemi lënë pas seancat e para stërvitore, mund të them se jemi në rrugë të mbarë. Kjo jo vetëm sepse shikoj një angazhim total në seancat e zhvilluara deri tani, por edhe për faktin se nuk kemi ndonjë dëmtim serioz apo problem shëndetësor të futbollistëve që kam në dispozicion. I vetmi problem shqetësues deri në momentin që po flasim është një dëmtim i vogël që ka në njërën dorë Dabulla, për të cilin do të vendosim në ditët në vazhdim, nëse do të luajë apo jo."
Mungesat, diçka që nuk duhen qarë
Sikurse dihet, trajnerit të kombëtares shqiptare, Brigelit, në ndeshjen e parë me Rusinë do t'i mungojnë tre ish-futbollistë titullarë të formacionit bazë në ndeshjet e shkuara: Vata, Fakaj dhe Bushi. Gjithsesi, edhe pse ndien keqardhje për mungesën e tyre, gjermani kuqezi ka lënë të kuptojë se kjo është diçka normale në një ekip kombëtar. "Mungesa e Vatës, Fakajt dhe Bushit, sigurisht që na penalizojnë deri diku. Megjithatë, këto mungesa nuk duhen qarë a vajtuar, por duhen zëvendësuar nga futbollistë të tjerë, të cilët të jenë të denjë të kryejnë rolin që u ngarkohet në fushë. Për mendimin tim, secili futbollist që është i pranishëm në këtë grumbullim, i ka mundësitë për t'i mbushur këto boshllëqe." Në këtë pikë, për trajnerin Brigel, më i rëndësishëm duket se është angazhimi total i atyre futbollistëve që do të hidhen në fushën e lojës përballë rusëve. Madje, sipas programit që ka ndjekur në dy ditët e para përgatitore, gjermani i ka këshilluar futbollistët që të luftojnë fort në dyluftimet me kundërshtarët, duke dhënë secili maksimumin. "Në fushë do të luajnë 11 futbollistë, të cilët do të përzgjidhen nga këta 20 që kam në dispozicion. Natyrisht, përveç zbatimit me rigorozitet të udhëzimeve që do t'u jap të besuarve të mi para ndeshjes, futbollistët e formacionit bazë duhet të hyjnë në fushë me bindjen se do të fitojnë, pra, duhet të japin maksimumin e tyre. Ata nuk kanë se çfarë të humbasin."
Rusia, skuadër e kalibrit botëror
Me aq sa ka lënë të kuptohet dje në konferencën për shtyp, trajneri i kombëtares shqiptare, Hans Peter Brigel, duket se nuk i trembet aspak kundërshtarit të radhës, Rusisë, por nuk harron të shprehë edhe konsiderata për të. "Pozitiv është fakti se i luajmë të dyja ndeshjet në fushën tonë, çka do të thotë se publiku do të jetë një armë më tepër në anën tonë. E dimë që përpara kemi dy kundërshtarë me emër në Evropë, por ne kemi synimet tona. Si Irlanda, ashtu edhe Rusia, janë ekipe që kanë marrë pjesë së fundi edhe në kampionatin botëror, çka tregon qartë forcën reale dhe vlerat e individëve që kanë të dyja këto skuadra. Sidoqoftë, ne do t'ia bëjmë hyzmetin e duhur gjithçkaje, me qëllim që të dalim kryelartë nga ballafaqimi direkt me ta, sigurisht, duke përdorur strategjinë tonë. Gjithsesi, duhet të jemi realistë që në të dyja ndeshjet, si me Rusinë, ashtu edhe me Irlandën, favoritë për të fituar nuk jemi ne. Megjithatë, duke pasur parasysh ligjet e futbollit, do të besojmë deri në minutën e fundit të lojës. Pra, gjithçka është e mundur. Kryesorja për ne është që të mos gabojmë, sepse ky do të ishte ndëshkimi më i madh. Kombëtarja ruse këtë do, sepse, po të përsëritim gabimet e ndeshjes së parë me ta, mund të korrim të njëjtën gjë."
Bogdani, klubi nuk e lejon të vijë
Vetëm 24 orë ka zgjatur ëndrra e trajnerit kuqezi për të pasur nën urdhrat e tij edhe një sulmues tjetër. Por kjo është venitur shumë shpejt, pasi klubi ku aktivizohet futbollisti në fjalë, Rexhina, ka kthyer një përgjigje negative. Drejtuesit e skuadrës kalabreze, përmes një faksi të dërguar dje në mesditë në FSHF, e kanë refuzuar ftesën e trajnerit kuqezi për të lejuar Bogdanin të vijë në grumbullimin e kombëtares shqiptare. Justifikimi i italianëve të Rexhinës ka qenë i lidhur me faktin se futbollisti shqiptar i tyre nuk e ka përfunduar ende ciklin mjekësor të riaftësimit, prandaj nuk mund të vihet nën urdhrat e trajnerit Brigel. Një fakt të tillë e ka konfirmuar edhe vetë gjermani kuqezi, i cili ka shtuar se do të ishte jo e drejtë që Bogdani të vinte dhe të rrezikonte shëndetin e tij, në një kohë që nuk do të ishte në gjendje t'i shërbente maksimalisht ekipit kombëtar. "Unë e dija që Bogdani kishte rreth 6 muaj që është i dëmtuar dhe nuk ka luajtur as me skuadrën e vet. Megjithatë, ne menduam që ta kishim në grumbullim, për të parë mundësinë e aktivizimit të tij në ndonjë sekuencë kohore prej 15 apo 20 minutash. Nga klubi i Rexhinës u njoftuam se futbollisti në fjalë nuk e ka përfunduar ende ciklin e riaftësimit nga dëmtimi, prandaj nuk këmbëngulëm shumë në kërkesën tonë. Shpresoj që Bogdani të jetë i gatshëm sa më parë për skuadrën e tij dhe të gëzojë formë të mirë sportive, sepse do të jetë i pranishëm në miqësoren që kemi me Bullgarinë, më 30 prill."
Ky Artikull u publikua më 27 Mar 2003. Autor A. LLESHI - Sporti Shqiptar
