Kampione i Shqiperise 2003-2004 ? ??

[Alesio]

Re: Kampione i Shqiperise 2003-2004 ? ??

DINAMO :

Aktualisht, me Dinamon stërviten më shumë se 30 futbollistë

"Mbipopullohet" stërvitja e bluve

Nga dita në ditë shtohen futbollistët e rinj që marrin pjesë në stërvitjen e bluve të kryeqytetit. Kështu, numri i lojtarëve që stërviten aktualisht me Dinamon duket se e ka kaluar 30-n, pa llogaritur këtu edhe katër lojtarët e tjerë që janë angazhuar me kombëtaren dhe ekipin Shpresa, si Lika, Xhafa, Xhihani e Deliallisi. Brenda këtyre javëve, sidomos në ditët e fundit, me blutë janë bashkuar disa lojtarë të ardhur nga ekipi i të rinjve, apo edhe nga qytete të tjera të vendit. Më parë, drejtuesit e skuadrës dinamovite kishin deklaruar se do ta reduktonin numrin e lojtarëve, duke e çuar deri në 25. Dhe kështu ndodhi kur u larguan nga skuadra disa nga futbollistët e rinj që u përzgjodhën nga trajneri rumun, Aurel Cikleanu, në muajin janar të këtij viti. Por tashmë duket se drejtuesit e skuadrës kanë ndryshuar strategjinë, duke afruar shumë lojtarë të rinj, të cilët mund të përfshihen në kontigjentin e Dinamos së ardhshme. Ndërkohë, gjatë këtyre ditëve, futbollistëve të Dinamos u duhet të tregohen shumë të kujdesshëm në stërvitje, për vetë faktin se mungon edhe stafi mjekësor. Mjeku Asllan Kasa është i angazhuar me ekipin kombëtar, ndërsa masazhatori Tomson Gjinali ka marrë lejen e zakonshme. Në mënyrë të diferencuar vazhdojnë të stërviten Tiko, Poçi, Alikaj e Çipi, ndërsa Dhëmbi është bashkuar me grupin.

 

[Alesio]

Re: Kampione i Shqiperise 2003-2004 ? ??

VLLAZNIA :

Kapiteni i Vllaznisë beson tek e ardhmja e ekipit dhe premton gola ndaj Dinamos

Sinani: Shtyllat do të bëhen me mua

Sezoni i ri futbollistik nuk ka nisur mbarë as për kapitenin e Vllaznisë, Vioresin Sinani. I njohur si një nga golashënuesit më të mirë të kampionatit tonë (vjet u rendit i dyti, pas Halilit), ai sivjet e ka filluar vetëm me goditjen e shtyllave, duke mos shënuar as një gol në dy ndeshjet e para. Edhe në ndeshjen e së martës që kaloi, asaj ndaj Teutës, numri 9 i kuqebluve ka qenë fare pranë realizimit të golit, por është penguar nga shtyllat e portës durrsake. Për momentin, shtyllat duket se janë kthyer në një "gangrenë" për njeriun që prej disa sezonesh mban në krah edhe shiritin e kapitenit të Vllaznisë. Brenda pak ditësh, dy shtylla identike ia kanë ngrirë atij buzëqeshjen në buzë. Më parë, në Skoci ndaj Dandit, e më pas edhe ndaj Teutës. Sinani këtë gjë e përfshin me një shprehje të vetme, kur thotë: "Sinqerisht nuk di çfarë emri tjetër t'i vë kësaj, përveç mungesës së fatit. Kanë qenë dy momente gati identike e në të dy rastet topat nuk iu bindën këmbëve të mia, por përfunduan në shtylla. Sidomos më vjen keq për atë të ndeshjes me Dandin në Skoci. Ishte një aksion i gjatë, që nga mesfusha dhe në fund, kur godita topin, e mendova gol të sigurt, por nuk ndodhi ashtu, siç nuk ndodhi as në ndeshjen me Teutën. Mendoj se po më mungon fati, ashtu si edhe Vllaznisë në ndeshjen me durrsakët. Për më tej shpresoj shumë që topat e mi të përfundojnë në rrjetë, për ta ndihmuar edhe Vllazninë të dalë nga kjo situatë."
Nga ana tjetër, sulmuesi kryesor i shkodranëve evidenton faktin se në takimin e fundit, atë me Teutën, ekipi nuk ka luajtur keq e për këtë nuk duhet vënë në qendër të kritikës. "E përmenda pak më lart, se Vllaznisë në atë ndeshje i mungoi edhe fati. Ekipi luajti mjaft mirë, duke pasur parasysh situatën që ka kaluar, por edhe lojtarët që janë aktualisht në skuadër," ka vijuar Sinani. Duke folur më pas për të ardhmen dhe perspektivën e Vllaznisë, kapiteni nuk ka ngurruar të flasë edhe për atë që kanë thënë edhe disa pjesëtarë të tjerë të ekipit, nevojën për përforcime. "Unë për vete besoj te ky ekip. Gjërat filluan pak vonë të rregullohen, por, gradualisht, ato do të shkojnë në vendin e vet. E mira do të ishte që në ekip të vinin edhe 2 3 lojtarë të tjerë. Nëse kjo ndodh, siç kanë premtuar drejtuesit e klubit, atëherë do të ishim vërtet një ekip i fortë. Prandaj edhe ndaj Dinamos do të kërkojmë një rezultat pozitiv për të nisur kthesën tonë," ka theksuar në fund kapiteni Sinani. Në këtë mënyrë, të gjithë presin përforcimin e skuadrës, nëse duan të shohin në fushë një ekip pretendent. Vetë Vioresin Sinani ka premtuar që tani e tutje "kompromisi" me shtyllat do të arrihet dhe staticienët duhet të fillojnë të bëjnë llogaritë për golat që do të shënojnë.

Gjergj KOLA 'Sporti Shqiptar'

 

[Alesio]

Re: Kampione i Shqiperise 2003-2004 ? ??

BESA :

Pas një eksperience jo fort pozitive te Partizani, mesfushori-sulmues kavajas kthehet në origjinë

Kuli: Krenar që do të luaj për Besën

Besa, që nga java e kaluar, ka në gjirin e saj edhe talentin kavajas, Bekim Kulin. Kuli, që u aktivizua dy vite radhazi me Partizanin, i është përgjigjur pozitivisht ftesës së presidentit kavajas, Bizhdili. Lojtari i ekipit Shpresa dhe i Partizanit, Kuli, pritet t'i japë tjetër frymëmarrje mesfushës kavajase. Ai do të ketë në krah të tij edhe ukrainasin Romanishin. Kuli njihet për grintën, luftën e fortë sportive, goditjet në drejtim të portës e, mbi të gjitha, për pasimet për sulmuesit mund të quhet pa frikë "vdekjeprurës" për mbrojtësit dhe portierët kundërshtarë. Pas disa ditë stërvitjeje te verdhezinjtë, Kuli jep intervistën e parë për "Sportin shqiptar" me fanellën e re të Besës.
- A mund të na e sqaroni pse u rikthyet te verdhezinjtë?
- Po ju them se tashmë i përkas ekipit të qytetit tim, Besës. Sesa kohë do të luaj në Kavajë, 6 muaj, 1 vit apo dy vjet, këtë nuk mund t'jua them. Shpresoj që javën tjetër, ndaj Tiranës, të më shihni në fushë me uniformën verdhezi.
- Atëherë përse e latë Partizanin, kur të tjerët kërkojnë të shkojnë atje?
- Ju e dini më mirë se kushdo tjetër sesa luajta me Partizanin. Vërtet, kushtet e stërvitjes dhe infrastruktura e këtij klubi janë të prakrahasueshme me ato këtu, por për mua ka rëndësi të luaj. Kjo mundësi te Partizani nuk m'u dha, ndonëse e meritoja. Shpesh, edhe pse loja ime komplimentohej nga presidenti dhe trajnerët, nuk vlerësohej. Kur vinte ndeshja e radhës, e shihja veten të gozhduar në stol. Unë jam i ri dhe nuk e mohoj që ndihem mirë kur publiku më duartroket. Mirëpo më mirë ndihem kur i meritoj këto duartrokitje. E di se tifozeria e kuqe më ka dashur e më ka përkrahur, por duke i falënderuar ju them se nuk i tradhtova. Duke e parë se nuk e kisha hapësirën e nevojshme të aktivizimit te Partizani, vendosa të kthehem në "shtëpinë" time.
- Para jush, te Besa, janë afruar Sheta dhe Romanishini. Si i vlerësoni këto përforcime të skuadrës suaj të re?
- Ashtu siç e kanë pranuar edhe vetë drejtuesit e Besës, reparti i mesfushës ka qenë pika më e dobët e ekipit. Shpresoj që, me ardhjen e Romanishinit dhe praninë time, gjithçka do të ndryshojë. Por mos harroni që Besa ka edhe mesfushorë të tjerë të talentuar, si Kollçaku, Ypi, Abdulla e Lorja. Nëse për momentin ata s'janë mirë, kjo s'do të thotë se s'do ta kapin kurrë formën. Është vetëm fillimi dhe gjithçka mund të përmirësohet. Një dorë e kujdesshme profesionisti dhe angazhim maksimal e grintë në fushë do ta bënin Besën një skuadër që do të frikësonte këdo.

 

[Alesio]

Re: Kampione i Shqiperise 2003-2004 ? ??

BESA :

Faruk Sejdini, sot stërvitja e parë me kavajasit

Edhe pse gjithçka është vendosur ditën e shtunë, vetëm sot Faruk Sejdini, trajneri i ri i Besës, pritet të zhvillojë seancën e parë stërvitore me skuadrën e re. Vetëm pas dy javësh kampionat, Faruk Sejdini zëvendëson trajnerin durrsak Zalla, i cili dha dorëheqjen dy ditë më parë. Sot, "Xhaxhit" është menduar t'i rezervohet një pritje dashamirëse nga tifozeria vendëse. Ka nga ata që ende kujtojnë se për meritë të "Xhaxhit", në krye të Apolonisë së vjetshme, desh na mori lumi. Janë po ata tifozë, që jo pa humor shprehen: "Tashmë është yni."
Me ardhjen e Faruk Sejdinit në stolin drejtues të Besës, nuk dihet ende dhe pritet të mësohet sot, nëse "Xhaxhi" do të pranojë për ndihmës të tij Arkaxhiun, apo ky i fundit do të kalojë trajner i portierëve. Bashkë me "Xhaxhin", te Besa pritet të vijnë edhe dy lojtarë nga Tirana, emrat e të cilëve nuk bëhen të ditur.
Feriz Ferizaj 'Sporti Shqiptar'

 

[Alesio]

Re: Kampione i Shqiperise 2003-2004 ? ??

ELBASANI :

Mustafa, një garanci më shumë për Elbasanin
Që prej disa ditësh, numri i portierëve të ekipit të Elbasanit ka shkuar në tre. Pas largimit të portierit të shquar Elvis Kotorri te Shkumbini i Peqinit, për të mbrojtur portën e portokallinjve, trajnerit Astrit Sejdini iu desh të zgjidhte midis dyshes Gogunja-Toçi edhe një tjetër portier. Dëshira e trajnerit Sejdini për ta "blinduar" portën u realizua përpara se të zhvillohej java e tretë e kampionatit kombëtar. Në radhët e Elbasanit, tashmë është edhe shkodrani Arion Mustafa, një portier me mjaft përvojë, i cili në ndeshjen miqësore me Besën e Kavajës tregoi se do të jetë një nga pikat më të forta të portokallinjve në këtë sezon futbollistik. Mustafa, si "gardiani" i ri i portës së Elbasanit, pritet të fitojë edhe konkurrencën me dy portierët e tjerë të ekipit portokalli. Drejtuesit e klubit, si dhe specialistët e futbollit, i vlerësojnë aftësitë e Mustafës dhe kanë shprehur besimin se forma e mirë që ai gëzon do të ndikojë në rezultatet pozitive të ekipit. Shtatlartësia dhe siguria në ndërhyrje dhe daljet ajrore të Mustafës i ka bërë shumë optimistë drejtuesit e Elbasanit, që garantojnë se kundërshtarët do ta kenë më të vështirë shënimin e golave.
Takimin e parë zyrtar për ngjyrat e Elbasanit, Mustafa do ta zhvillojë këtë të shtunë përballë Shkumbinit të Peqinit. Kjo ndeshje, për të do të jetë prova e besimit edhe përpara sportdashësve elbasanas, të cilët e presin me kureshtje aktivizimin e tij në formacionin e portokallinjve.

 

[Alesio]

Re: Kampione i Shqiperise 2003-2004 ? ??

BESA :

Bajram Hushi, drejtor teknik i Besës
Krahas prezantimit të trajnerit të mirënjohur Faruk Sejdini në krye të Besës, presidenti kavajas, Bizhdili, ka emëruar edhe specialistin kavajas Bajram Hushi në postin e drejtorit teknik. Lidhur me këtë lëvizje, presidenti sqaron se ekipet zinxhirë te Besa ishin lënë thuajse pa përkrahje. Edhe nëse U-18 ka arritur disa suksese në renditje, kjo vetëm për meritë të trajnerit të tyre, ish-futbollistit të shquar Ilir Duro. "Ka ardhur momenti t'i thuhet "ndal" kësaj mënyre të punuari," - thekson presidenti kavajas. Emërimi i specialistit të mirënjohur kavajas Bujar Hushi në këtë detyrë, do të thotë, sipas presidentit, se do të ketë një riorganizim të përgjithshëm të ekipve zinxhirë te Besa.

 

[Alesio]

Re: Kampione i Shqiperise 2003-2004 ? ??

BESA :

Dje, trajneri i ri i Besës, Faruk Sejdini, është prezantuar para skuadrës
Sejdini: Besa nuk e diskuton A1-shin
Ka sfiduar shiun e dendur, që ra pasdite në Kavajë, grupi i "ultrasve" të Besës për të pritur dhe uruar mirëseardhjen trajnerit të ri të kavajasve, Faruk Sejdini. Në ambientet e stadiumit "Besa", sot (dje) u bë dhe prezantimi i trajnerit të ri para ekipit. Në prani të të gjithë lojtarëve, medias lokale, presidentit dhe stafit, vetë trajneri i sapoemëruar, Sejdini, që në fjalët e para ka ngrohur e rritur besimin te lojtarët. "Ju kam ndjekur në lojërat tuaja dhe kjo më bëri ta pranoj ofertën e presidentit. Ju jo vetëm që nuk duhet ta diskutoni qëndrimin në A1, por, përkundrazi, duhet të synoni ngjitjen e ekipit në vendet e larta të renditjes."
Pas këtyre fjalëve të para, "Xhaxhi" ka renditur një e nga një të gjitha kërkesat e tij ndaj lojtarëve, për të cilat ai e bëri të qartë se nuk do të tolerojë askënd. Kaq ka thënë Sejdini në paraqitjen e tij para skuadrës dhe menjëherë është nisur drejt pishave të buta, në Golem, për të zhvilluar seancën e parë stërvitore me verdhezinjtë. Trajneri, që më shumë se fjalët parapëlqen punën, duket se do të nxitë një metodë të re pune, që si kudo ku ka shkelur ai, i ka sjellë progres. Për më tepër, te Besa, siç e theksoi edhe vetë ai, do të mundohet të lajë borxhin (e kemi fjalën për largimin e tij vetëm pas dy muajsh, kur drejtonte Besën në kategorinë e dytë). Në stërvitjen e djeshme ranë në sy mungesat e disa lojtarëve durrsakë, si dhe e Edmond Kapllanit e Osmanit, të grumbulluar me Shpresën.

 

[Alesio]

Re: Kampione i Shqiperise 2003-2004 ? ??

KOMBETARJA :

Mbrojtësi shkodran i kombëtares kuqezi është optimist për ndeshjen e nesërme ndaj Gjeorgjisë
Beqiri: Ta harrojmë shpejt Tbilisin

Në ndeshjen e parë nuk ka qenë në fushën e lojës, pasi ishte i skualifkuar. Në këtë ndeshje, si edhe ato më përpara, me të gjitha gjasat Elvin Beqiri do të jetë në fushën e lojës që nga minuta e parë. Nuk ka dëshirë të flasë për atë ndeshje të keqe që kombëtarja zhvilloi në Tbilisi, por, nga ana tjetër, shprehet se morali në kombëtare nuk është nga më të mirët, edhe pse po përmirësohet ditë pas dite. Gjithsesi, për ndeshjen e nesërme me Gjeorgjinë, Beqiri është i bindur se ekipi do të reagojë, pasi kjo është e vetmja mënyrë për të shëruar plagën e hapur pak ditë më parë.

- Elvin, nesër do të keni përballë Gjeorgjinë, me të cilën keni humbur të shtunën...
- Nga ajo që kam parë në atë ndeshje, është ekip shumë i fortë. Luajnë shumë mirë. Rastet që u paraqiten i shfrytëzojë në maksimum. Në ndeshjen e parë kanë treguar se janë të fortë, edhe pse skuadra jonë nuk ishte në nivelin e duhur.

- Ç'mendim keni për ndeshjen e Tbilisit?
- Nuk më takon të flas, pasi nuk kam luajtur në ndeshje. Eshtë më mirë ta harrojmë atë disfatë. Jemi mundur thellë dhe nuk do të jetë e lehtë që ekipi ka kalojë pa pasoja atë ngjarje. Kryesore për ndeshjen e së mërkurës është që ekipi të luajë sa më mirë. Duhet të kundërpërgjigjemi, edhe pse nuk do të jetë e lehtë. Duhet të reagojmë duke fituar ndeshjen e fundit zyrtare që do të zhvillojmë. Për të arritur një rezultat pozitiv nuk do të jetë e lehtë. Skuadra duhet të mos bëjë më gabimet që u panë në Tbilisi. E vetmja mënyrë për të dalë nga kjo situatë e keqe, është fitorja, e cila do të na ngjisë më shumë në renditjen e Grupit 10. Për sa i përket skuadrës, them se do të reagojë, pasi të gjithë janë të bindur se ndeshja e parë me Gjeorgjinë nuk ishte kombëtarja e vërtetë.

- Si ju duket morali i ekipit?
- Skuadra nuk gëzon ndonjë moral të lartë pas humbjes në Gjeorgji. Kjo është e pranueshme, pasi kemi marrë një goditje të fortë. Por trajnerët po punojnë që ekipin ta mbajnë nën tension për të mërkurën dhe skuadra të paraqitet me sedër të shëndoshë.

- Në këto momente si paraqitet gjendja fizike e Elvinit?
- Gëzoj një formë shumë të mirë. Pasi u largova nga Shkodra për në Ukrainë, zhvillova një fazë të plotë përgatitore. Jam gati të luaj, nëse trajneri do të më aktivizojë që nga minuta e parë. Gjithsesi, shpresoj, pasi edhe në ndeshjet e tjera jam aktivizuar që nga fillimi.

- Ky cikël ndeshjesh për Euro 2004-n përfundon të mërkurën. A do të ketë kjo kombëtare të ardhme?
- As vihet në dyshim. Edhe pse kemi zhvilluar disa ndeshje të dobëta kohët e fundit, nuk do të thotë se gjithçka përfundon këtu. Djemtë kanë shumë për të dhënë, pasi skuadra ka elementë shumë cilësorë, të cilët luajnë në ekipe të rëndësishme. Jam i bindur se do ta tregojmë veten në ndeshje të tjera.

- Po për ndeshjen e nesërme?
- Duhet të fitojmë. Eshtë rruga e vetme që kemi për t'i mbyllur faqebardhë këto eliminatore.

Olsi AVDIAJ 'Sporti Shqiptar'

 

[Alesio]

Re: Kampione i Shqiperise 2003-2004 ? ??

KOMBETARJA :

Kombëtarja me moral të venitur

Që prej kthimit nga Gjeorgjia, në skuadrën kuqezi mbizotëron heshtja. Një qetësi që duket qartë se është shqetësuese. Asnjë nuk qesh dhe duket se të gjithë kanë ende në mendje Tbilisin. Në stërvitjen e djeshme që trajneri Brigel zhvilloi në "Selman Stërmasi", futbollistët janë dukur jo në moralin e duhur, para një ndeshjeje të rëndësishme, si ajo e së mërkurës. Dhe kjo është diçka normale, pasi goditja ka qenë e madhe. Edhe gjermani nuk është se ka mbetur pas. Ndryshe nga dhjetëra stërvitje të mëparshme, Brigeli nuk dëshiron të flasë për shtypin. Të njëjtën gjë bëjnë edhe futbollistët, disa prej të cilëve me zor të përgjigjen (përjashto ndonjërin). Gjatë stërvitjes së djeshme, të gjithë janë treguar të zymtë, ndoshta edhe pse koha nuk ishte nga më të mirat. Madje, në një nga ushtrimet taktike që kishte organizuar Brigeli gjatë stërvitjes, është parë një luftë e fortë me ndërhyrje të ashpra nga shumë futbollistë, të cilët kanë bërë ç'është e mundur që të tregonin vlerat e tyre para trajnerit. Brigeli ka veçuar skuadrën-tip që ka hedhur në fushë kundër Rusisë dhe Irlandës. Përjashtim bënin vetëm Hasi dhe Cana, që, siç duket, për efekt të numrit janë rreshtuar me ekipin tjetër të rezervave. Ndërkohë, Shkëmbi ka qenë organizatori i ekipit, në vend të Skelës së larguar për në Gjermani. Në fund, i gjithë ekipi është larguar sërish në drejtim të Linzës, ku sot, në ora 14.00, trajneri Hans Peter Brigel do të flasë para shtypit, një ditë para ndeshjes me Gjeorgjinë në "Qemal Stafa".

 

[Alesio]

Re: Kampione i Shqiperise 2003-2004 ? ??

KOMBETARJA :

Kuqezinjtë, 10 minuta në autobus
Nuk është e thënë që kombëtarja ta nisë ndonjëherë stërvitjen pa kaluar ndonjë pengesë. Dje, në orën 17.30, kuqezinjtë kanë mbërritur në stadiumin "Selman Stërmasi" për të zhvilluar stërvitjen e radhës në "Selman Stërmasi". Por Brigeli dhe të gjithë të tjerët kanë qëndruar brenda në autobus më shumë se 10 minuta. Shkak është bërë dera e stadiumit, e cila ka qenë e mbyllur. Drejtuesit e FSHF-së nuk kishin lajmëruar se kombëtarja do të zhvillonte stërvitje në këtë stadium dhe kështu dera ka qenë e mbyllur. Më kot kanë shkuar përpjekjet e disa prej njerëzve të stafit kuqezi. Shpëtimtari i kombëtares ka dalë një nga punonjësit e Federatë së Atletikës, që ka hapur derën anësore të stadiumit "Selman Stërmasi". Më pas është mësuar se drejtuesit e Federatës nuk kishin njoftuar as për stërvitjen e gjeorgjianëve në orën 19.00 në këtë stadium, jo më për kombëtaren e kuqezinjve. Madje sekretari i klubit "Tirana", Shkëlqim Muça, është parë të largohet i nervozuar nga stadiumi, duke thënë se në ditë shiu kjo fushë nuk mund të mbajë dy seanca stërvitore, pasi është e degraduar.

 

[Alesio]

Re: Kampione i Shqiperise 2003-2004 ? ??

KOMBETARJA :

Trajneri i Gjeorgjisë flet pas mbërritjes në Tiranë
Jordania: Duam tri pikët për play-off-in
Kundërshtarja e Shqipërisë në ndeshjen e nesërme, Gjeorgjia, ka mbërritur dje në orën 10.30 në Tiranë dhe është sistemuar në hotel "Sheraton". Ndërsa në orën 19.00 gjeorgjianët kanë bërë edhe një seancë të shkurtër stërvitore në stadiumin "Selman Stërmasi", ku më parë është stërvitur edhe përfaqësuesja jonë. Para se të fillonte seancën, trajneri i Gjeorgjisë, Merab Jordania, është shprehur:
"Kemi ardhur për të fituar në Tiranë, sepse na duhen tri pikët për të dalë në ndeshjet e play-off-it. Kemi shpresa për kualifikim, por e dimë që ndeshja e sotme do të jetë shuumë e vështirë. E dimë që skuadra shqiptare nuk është ajo e Tbilisit, ku u mund 3-0. Kemi parë disa kaseta filmike dhe na është dukur një skuadër shumë më e fortë. Ajo do të kërkojë revanshin në takimin e nesërm, megjithatë ne do të përpiqemi të fitojmë."
Gjeorgjia do të zhvillojë sot një tjetër seancë stërvitore në orën 19.00 në stadiumin "Qemal Stafa", ku do të luhet edhe ndeshja.

 

[Alesio]

Re: Kampione i Shqiperise 2003-2004 ? ??

KOMBETARJA :

"Divorcohet" çifti Starova-Çela
Sekretari i FSHF-së, Sulejman Starova, dhe shefi i sektorit të ekipeve kombëtare, Besnik Çela, kanë shkëmbyer replika mes tyre dje, gjatë stërvitjes së kombëtares. Shkak për këtë zënkë të dy miqve të vjetër është bërë vendi ku do të zhvillonte stërvitjen kombëtarja e Gjeorgjisë. Aty nga mesi i stërvitjes është parë të vijë sekretari Starova. Çela seç i ka thënë shefit të tij, i cili, siç duket, nuk ka qenë në humor dhe i është kthyer ashpër shefit të sektorit të ekipeve kombëtare. Drejtuesit e FSHF-së kanë shkëmbyer pastaj ca fjalë krejt jashtë dialogut të zakonshëm shoqëror, duke i habitur të gjithë të pranishmit në stadiumin "Selman Stërmasi". Ngjarja është mbyllur shpejt, pasi Çela është larguar menjëherë nga stadiumi. Mësohet se shkaku i këtij "sherri" është bërë një mosmarrëveshje me drejtuesit e stadiumit "Selman Stërmasi" për seancat stërvitore që duhet të zhvillonte kombëtarja shqiptare dhe gjeorgjiane. Kështu, duket se ky diskutim i ka dhënë fund "dashurisë së vjetër" mes këtyre dy punonjësve të FSHF-së, që prej kohësh njihen nga të gjithë si shokë të ngushtë.

 

[Alesio]

Re: Kampione i Shqiperise 2003-2004 ? ??

PARTIZANI :

Karioka: Më pëlqen loja, jo goli

Sulmuesi i të kuqve Karioka është braziliani i vetëm që ka ardhur në Shqipëri për të luajtur me Partizanin dhe, ndryshe nga patriotët e tij, nuk është larguar asnjëherë nga vendi ynë. Karioka, ndonëse sezonin e kaluar nuk shënoi aq gola sa priteshin nga një sulmues i mirëfilltë si ai, arriti që me lojën e mirë, sidomos në ndeshjet e fundit, të bindë presidentin Xhani për ta mbajtur të paktën edhe këtë sezon në klubin e kuq. Braziliani nuk e ka nisur aq mirë kampionatin, pasi në dy ndeshjet e para ka shënuar vetë një gol. Në takimin e dytë, Karioka e la lojën shumë shpejt, pasi u dëmtua që në minutat e para. "Më pëlqen të luaj mirë dhe të fitojë skuadra, ndërsa golin, nëse nuk e realizoj unë, le ta shënojë ndonjë tjetër," - shprehet braziliani në një intervistë për "Sportin shqiptar".

 

[Alesio]

Re: Kampione i Shqiperise 2003-2004 ? ??

PARTIZANI :

Të kuqtë, stërvitje me sytë nga Teuta
Dje pasdite, ekipi i Spahiut është grumbulluar dhe ka filluar stërvitjen në përgatitje të ndeshjes së radhës kundër Teutës së Durrësit. Megjithëse me disa mungesa në radhët e formacionit bazë, trajneri Spahiu u shpreh se në vijim do të vazhdojë punën për të eksperimentuar me rolet e disa lojtarëve kryesorë të Partizanit. Sipas trajnerit, loja pati defekte në takimin e fundit kundër Lushnjës, kështu që brenda javës do të ndryshohen rolet e disa lojtarëve, me qëllim që në Durrës ekipi jo vetëm të marrë një rezultat të kënaqshëm, por edhe të luajë mirë.

 

[Alesio]

Re: Kampione i Shqiperise 2003-2004 ? ??

LUSHNJA :

Mesfushori kavajas premton se Lushnja do të jetë krejtësisht ndryshe në javët e ardhshme
Bardhi: Duhet ta gjejmë shpejt golin
Kur ka kaluar një javë nga humbja me Partizanin, ekipi i Lushnjës i ka mbyllur seancat stërvitore të javës së kaluar me një ngarkesë më të lehtë në krahasim me ato paraardhëse. Në përfundim të stërvitjes së fundit ne i morëm një mendim mesfushorit të qendrës të formacionit lushnjar, kavajasit Ervin Bardhi.
"Nga mënyra se si luajtëm ndaj Partizanit, Lushnja nuk duhet të kishte dalë pa pikë nga ajo ndeshje." Kështu është shprehur mesfushori shkatërrues i Lushnjës. Ai pohon se rastet e shumta të humbura në këtë ndeshje ndikuan drejtpërdrejt në rezultatin që u arrit. Në vazhdim të deklaratës së tij Bardhi ka thënë: "Lojën tonë të mirë e konkretizuam me krijimin e shumë rasteve, të cilat fatkeqësisht nuk u shfrytëzuan si duhet".
Ky problem e ka shqetësuar jo pak stafin e skuadrës myzeqare, e cila ka aplikuar për këtë qëllim stërvitje speciale, ku kryesisht është punuar me sulmuesit dhe mesfushorët e ekipit. Këtë shqetësim e shpreh edhe mesfushori potent i Lushnjës kur thotë: "Problemi ynë është se duhet të dalim sa më shpejt te goli. Me sa kam dëgjuar nga lojtarët që kanë luajtur edhe vjet me Lushnjën, problemi i vazhdueshëm i mosfinalizimit ka qenë një nga arsyet që e çoi këtë ekip në ndeshjen e play-off-it me Apoloninë. Por sivjet punët janë ndryshe. Trajneri Cikleanu po bën ndërhyrjet e duhura taktike që ky fenomen të minimizohet maksimalisht. Me Partizanin luajtëm bukur dhe harxhuam shumë energji, duke humbur shumë raste, ndërsa kundërshtari i shfrytëzoi shumë bukur rastet që iu krijuan. Nëse do të vazhdojmë të luajmë mirë dhe të humbasim raste, kjo do të jetë fatale për ne".
Ndërkohë, Bardhi gjen kurajon t'i kërkojë falje publikut të zhgënjyer lushnjar për dy humbjet në këtë fillim të kampionatit. Ai, edhe në emër të lojtarëve të tjerë, u premton atyre se shumë shpejt do të jenë krejt ndryshe. Këtë premtim mesfushori i lagunarëve e argumenton kur thotë: "Mundësitë financiare janë. Baza dhe elementi ekzistojnë dhe në këtë ndërprerje kampionati kemi shansin për të ndryshuar diçka. Duke u bazuar në profesionalizmin drejtues të trajnerëve tanë dhe në mbështetjen e padiskutueshme të presidentit tonë, ne kemi krijuar besimin se brenda një kohe të shkurtër do të përmbysim gjithçka të keqe. Shumë shpejt do të rikthehemi në lojërat tona cilësore të shoqëruara me rezultate pozitive." Kështu e përfundon deklaratën e tij për "Sportin Shqiptar" kavajasi i palodhur i Lushnjës, Ervin Bardhi.

 

[Alesio]

Re: Kampione i Shqiperise 2003-2004 ? ??

VLLAZNIA :

Mesfushori me përvojë i kuqebluve shkodranë beson se skuadra ka gjetur normalitetin e munguar
Cungu: U premtoj tifozëve një Vllazni tjetër

Futbollisti veteran i ekipit shkodran, 30-vjeçari Armando Cungu, ndihet më në formë pas seancave stërvitore të zhvilluara ditët e fundit nën drejtimin e trajnerit malazez Dervish Haxhiosmanoviç. Madje, ai shprehet se një stërvitje e tillë ka qenë më se e domosdoshme, duke lënë kësisoj të kuptojë se malazezi nuk është shikuar me "sy të shtrembër" nga ata si futbollistë, përkundrazi. "Një stërvitje e tillë, në pamje të parë, duket e lodhshme, aq më tepër kur ke parasysh se kemi zhvilluar edhe nga tri seanca në ditë. Por secili prej nesh e ka pranuar pa asnjë kundërshtim këtë lloj stërvitjeje. Në radhë të parë, për të respektuar trajnerin, dhe e dyta, që është dhe më kryesorja, jemi stërvitur për veten tonë. Asnjë futbollist nuk dëshiron që në fushën e lojës të bëjë përshtypje të keqe, duke mos qenë në gjendje as të vrapojë, prandaj jemi stërvitur me dëshirë gjatë këtyre ditëve. Forma jonë duket se po vjen në rritje nga dita në ditë, këtë e pamë edhe në ndeshjen e kontrollit të së shtunës," - ka thënë organizatori i kuqebluve.
Dje paradreke, Vllaznia ka filluar përgatitjet për ndeshjen e javës së tretë të kampionatit, atë që do të luhet në fundjavë me Dinamon në Tiranë. I pyetur se kur do të vijë fitorja e parë për skuadrën e tij në këtë kampionat, Armando Cungu shpreh dëshirën që kjo do të ndodhë që këtë javë, ndaj bluve të Andrea Markos. "Kur do të vijë fitorja e parë? Këtë nuk mund ta them me saktësi, por shpresoj të ndodhë që këtë javë ndaj Dinamos. Një tripikësh në këtë takim do të na ndihmonte shumë për vazhdimin e mëtejshëm të kampionatit," - ka theksuar Cungu. Optimizmi në radhët e shkodranëve ka ardhur çdo ditë në rritje, si pasojë e normalitetit të rikthyer tani në ekip. Ardhjet e lojtarëve të rinj dhe rikthimi në formën e duhur fizike të elementit aktual janë gjëra pozitive, të cilat i kanë ngrohur drejtuesit e ekipit. Edhe vetë futbollistët titullarë të Vllaznisë, njëri prej të cilëve është edhe Cungu, për këtë problem do të shprehej: "Mendoj se tashmë gjërat po shkojnë shumë më mirë. Me lojtarët e rinj që pritet të vijnë, ekipi do të kompletohet, duke qenë i gatshëm për të përballuar si duhet kampionatin. Po ashtu, edhe forma jonë sportive po vjen në rritje. Të gjitha këto na bëjnë entuziastë të themi se shumë shpejt tifozët tanë kanë për të parë një Vllazni krejt tjetër në fushë, atë që ata dëshirojnë."
Deklarata të tilla të bëjnë të mendosh se kuqeblutë vërtet e kanë ndarë mendjen për të bërë kthesën e shumëpritur, duke nisur që të shtunën, ndaj Dinamos.

Gjergj Kola 'Sporti Shqiptar'

 

[Alesio]

Re: Kampione i Shqiperise 2003-2004 ? ??

VLLAZNIA :

Malazezi Perishiç i largohet Vllaznisë, pas dëmtimit serioz në gjurin e djathtë
Braziliani Soza "humbet" rrugën
Braziliani i parë që mendohet të vijë këtë sezon te Vllaznia është pritur dje pasdite në Shkodër, por në të vërtetë ai nuk është dukur askund. Më mirë të themi ka "humbur" rrugën, teksa, sipas shpjegimeve që japin drejtuesit e Vllaznisë, ai nuk ka ardhur fare në Rinas. Sipas numrit 2 të klubit shkodran, Valter Fushaj, braziliani Soza, sipas premtimeve që kishin dhënë menaxherët e tij, pritej që të mbërrinte dje në drekë në Shqipëri. Një gjë e tillë nuk ka ndodhur dhe ende nuk dihet me saktësi kur do të mundësohet ardhja e tij te kuqeblutë. Sipas shpjegimeve që kanë dhënë menaxherët, disa probleme dokumentacionesh të futbollistit 21-vjeçar, të pazgjidhura ende me ekipin ku ka luajtur deri tani, kanë penguar nisjen e tij drejt Shqipërisë. Megjithatë, duke parë që menaxherët nuk janë treguar korrektë, ashtu siç kishin premtuar, zëvendëspresidenti i Vllaznisë, Fushaj, ka deklaruar se tani e tutje nuk do të flasë shumë pa parë me sytë e tij mbërritjen e futbollistëve të kërkuar në Shkodër.
Shpresat për mbërritjen e brazilianit të parë te Vllaznia ditën e djeshme, kishin bërë që pasdreke, në orën 16.30, kur ka nisur edhe seanca e dytë stërvitore e kuqebluve, të ishin një numër i konsiderueshëm sportdashësish shkodranë të pranishëm. Ata janë zhgënjyer që nuk kanë parë as brazilianin, madje as malazezin Perishiç, i cili është stërvitur gjatë gjithë javës së kaluar me kuqeblutë. Dëmtimi i tij ditën e premte në stërvitje duket se ka qenë serioz dhe, si pasojë, ka shumë të ngjarë që ai të mos i bashkohet më Vllaznisë. Riaftësimi i gjurit të tij të dëmtuar kërkon një kohë relativisht të gjatë, ndërkohë që Vllaznia nuk ka shumë kohë për ta pritur. Vetë trajneri malazez i Vllaznisë, Haxhiosmanoviç, i cili e ka sjellë Perishiçin në Shkodër, i pyetur dje për mungesën e tij në stëvitje, ka ngritur supet, një lëvizje që duket se flet vetë. Në këtë mënyrë, në stërvitjen e Vllaznisë, dje nuk ka pasur as brazilian, as malazez, por vetëm 24 shkodranë, të cilët duket se do të jenë ata që do ta përballojnë këtë sezon.

 

[Alesio]

Re: Kampione i Shqiperise 2003-2004 ? ??

VLLAZNIA :

Kaçi: Sot, operacioni në Belgjikë

Pas një periudhe 3-mujore pritjeje, erdhi momenti i dhënies fund të dhimbjeve për futbollistin e talentuar shkodran, Albert Kaçi. Mesfushori 21-vjeçar i Vlaznisë dhe i ekipit tonë kombëtar Shpresa, pikërisht sot, në një nga spitalet e Brukselit në Belgjikë, do t'i nënshtrohet një ndërhyrjeje kirurgjikale në muskujt e barkut. Këta të fundit e kishin shqetësuar së tepërmi mesfushorin-sulmues të kuqebluve që gjatë kampionatit të kaluar, ndërkohë që pas përfundimit të tij ata janë bërë të padurueshëm. Periudha në të cilën gjendej klubi shkodran nuk ia kanë bërë të mundur dërgimin në ndonjë nga klinikat e specializuara jashtë vendit për të kryer ndërhyrjen kirurgjikale, e si pasojë kjo gjë ka zgjatur deri para pak ditësh. Me sigurimin e një vize dhe gjetjen e një mbështetjeje financiare nga një i afërm i tij, Kaçi ka udhëtuar këto ditë drejt Belgjikës, ndërkohë që po dje është shtruar në një nga klinikat e Brukselit. Pikërisht në atë klinikë, ku para pak kohësh është operuar edhe Kreshnik Zhega, djali i ish-trajnerit të Vllaznisë, Medin Zhegës. Ky i fundit i ka sugjeruar futbollistit shkodran vajtjen atje për të kryer këtë ndërhyrje kirurgjikale, që do të bëhet e mundur vetëm sot.

 

[Alesio]

Re: Kampione i Shqiperise 2003-2004 ? ??

TEUTA :

Teuta, dy të huaj në provë para Partizanit
Dy futbollistë të tjerë të huaj janë afruar për t'u provuar në ekipin e Teutës, në prag të sfidës me ekipin e Partizanit, të shtunën në "Niko Dovana". Njëri futbollist është nga Maqedonia dhe ka luajtur me ekipe të ligës së dytë austriake. Sezonin e fundit ka qenë në radhët e një ekipi të kategorisë së parë finlandeze. Futbollisti tjetër është i njohur në Shqipëri, Jahiqi, që ka luajtur me Lushnjën, në kohën kur myzeqarët i drejtonte argjentinasi Mario Kempes, dhe me Vllazninë. Të dy futbollistët po stërviten me Teutën në prag të ndeshjes më Partizanin, për javën e 3-të të Grupit A1. Lojtari maqedonas ka ardhur për t'u provuar te Teuta, ndërsa Jahiqi do të stërvitet derisa të riaftësohet nga dëmtimi dhe të arrijë formën e plotë fizike. Brenda disa ditëve, trajneri Bici duhet të vendosë në lidhje me këta futbollistë, nëse do të bëhen pjesë përbërese e Teutës për javët e ardhshme të kampionatit.
Ndërkohë, në kampin durrsak ka vazhduar intensivisht stërvitja e futbollistëve, me qëllim kalimin me sukses të provës së radhës me Partizanin. Në fushën e lojës, në formacionin e parë, trajneri Bici ka vendosur futbollistët që u aktivizuan edhe në ndeshjen me ekipin e Vllaznisë, në një kohë që Babamusta do të jetë në stolin e rezervave për të bërë ndoshta aktivizimin e parë, pas një periudhe relativisht të gjatë dëmtimi. Nga ana tjetër, Toshkollari ka munguar për arsye objektive në këtë seancë stërvitore dhe mendohet të mos jetë i gatshëm për ndeshjen me Partizanin. Sipas trajnerit Bici: "Në prag të ndeshjes me Partizanin, stërvitja po vazhdon me intensitet dhe i gjithë grupi i futbollistëve do të jetë i gatshëm. Do të synohet patjetër fitorja përballë një ekipi të fortë dhe pretendent për titullin kampion, si Partizani."

Llambi Kallço 'Sporti Shqiptar'

 

[Alesio]

Re: Kampione i Shqiperise 2003-2004 ? ??

KOMBETARJA :

Kemi shumë motive për të synuar fitoren në ndeshjen e të mërkurës për Gjeorgjinë. Tre pikët do të ishin me vlerë për t’ju larguar vendit të fundit në grup, për të marrë revanshin e humbjes së Tbilisit vetëm tre ditë më parë, për të kthyer besimin te sportdashësit shqiptarë, por mbi të gjitha, për të vënë në vend autoritetin e trajnerit Brigel.

Tbilisi, lojë e dobët
I një mendimi të tillë ka qenë edhe Sekretari i Përgjithshëm i FSHF-së, Sulejman Starova, në një prononcim të tij në lidhje me takimin e fundit në grup. “Ndeshja e Tbilisit ishte një paraqitje e dobët e Kombëtares sonë, ka pohuar dje Starova. Një rënie e tillë është vënë re zakonisht në fundin e çdo fushate eliminatoresh. Lojtarët nuk rrezikojnë shumë, pasi mendojnë për ekipet e tyre, dhe kjo mendoj se ka ndikuar shumë në lojë”. Ndërkohë, sekretari i përgjithshëm i FSHF-së, ka theksuar se për ndeshjen e dytë ka vetëm një objektiv, që është fitorja.