Këngë labe me tekste

[Artin]

Kënga i kushtohet Luftës së Vlorës të vitit 1920, kundër italianëve.

Çobanët mbi gjeneralë

Kush ia thot' në ato hije
Flet me re e flet me yje
Yje thane, degë lisi
Këndoi kënga e një fisi

Këta djem që i than' ndalë
Gjalmëzeza ka bër' djalë
Japin fjalën dhe mbajn' besën
Për atdheun din' dhe vdesën

Kështu thanë dhe i ranë
Gur më gur e stan më stanë
Kush me pushk' kush jataganë
Lufton Sparta me thesarë

Andej vapor' e ballona
Dhe ushtria ish kollona
Këtejë pushkët me gjalmë
Që i mbajn' trimat me famë

Andej krisma, gjyle, topa
Mitralozë edhe bomba
Këtej djemtë si fildishë
Fshinin gjakun me këmishë

Andej forca mbretërore
Hekur, tela në një vijë
Këtej kënga popullore
Lufton një sa për njëmijë

Lufton Sparta me një mbretë
Që kishte mijëra dyzetë
Këtej flamuri me valë
Çobanët mbi gjeneralë

Vlor' e sotme, Spart' e vjetër
Shqipëri dhe s'ka më tjetër
Vlora, Vlora, Vlora,Vlora
Bjeri moj të lumtë dora

Koha e kërkuar erdhi
Çeli toka, ndriti dielli
Pruri ditën më të mirë
Rrofsh moj Shqipëri e lirë

 

[Artin]

Dola në gërxhe, në majë

Dola në gërxhe, në majë
si llojisesh e po qajë

Si llojisesh e po qajë
një maraz do të më hajë

Një maraz do të më hajë
moj marazi yt më hëngri

Moj marazi yt më hëngri
bejk' e derdhura nga vëndi

Bejk' e derdhura nga vëndi
nga balta që del ergjëndi

Nga balta që del floriri
moj më prishe nga fiqiri

 

[Artin]

Ç'është dashuria

Meskëputur, yll karvani
Nga vapa po përvëlohem
N'ata sy si gji limani
Do vij njëher' të freskohem

(refreni)
Në buzë të malit, ku të shkul veriu
Vjen mikja nga stani si bijë valiu
Si bijë valiu vjen mikja nga stani
Kërkon djath' në napë e bij' e çobanit
E ç'tju them o shokë, ç'është dashuria
Ajo është mjaltë, vetë perëndia

Do dal përtejë në bregë
Të loz me hundën qiri
Do zbres te buza që djegë
Të çlodhem pak dhe të rri

T'ia marrim njëherë rëndë
Kumbisur faqe më faqe
Aman të keqen o këngë
Ç'mi kujton ato maraze

 

[Artin]

Buza më është tharë

Buza më ësht’ tharë, më ësht’ përvëluar
Më trego burimin, etjen ku ta shuaj

Vashëzo
Kur më del përpara, çelin dy behare
Se në botën tjetër nuk ka diell fare

Në ç’burim ke pirë ti në këto vënde
Të shkoj edhe unë të gjej puthjen tënde

Çfar’ emri ka lulja që të çel tek gjiri
Aman perëndi se mos ma vret syri

Të gjitha sekretet m’i trego moj zëmër
Se ti jetën time e ktheve në ëndërr

 

[Aleksandra1]

Shume faleminderit per tekstet e bukura, une i shkarkoj si mp3 converter dhe i degjoj dhe ne telefon kur me kap nostalgjia.