Re: Glupi Blue
Portieri i kombëtares thotë se përvjetorin e lindjes do ta festojë në Shkodër së bashku me fitoren ndaj Rusisë
Edhe pse ngarkesa e kampionatit helen është e madhe, te futbollistët e ekipit tonë kombëtar ndihen qartë shqetësimet e ndeshjes me Rusinë. Strakosha, Murati, Bellaj, Haxhi, Xhumba e Beqaj, duket se takimin e radhës së kombëtares sonë e kanë në qendër të vëmendjes. "Nea Zmirni" nuk është vetëm një vend i bukur, por edhe një "relike" që ruan si gjë të shtrenjtë edhe një pjesë të krenarisë së sportit tonë. Ai u bë strehë në fillim për futbollistët shkodranë, Lulzim Bërsheni e Arvit Hoxha. Këtu janë stërvitur më parë peshëngritësit tanë, të cilët u bënë më vonë kampionë të botës e fitues të medaljeve olimpike. Këtu ka luajtur dikur edhe Sulejman Demollari. Këtu është kthyer në një hero pak vite më parë Foto Strakosha. Këtu ka gjetur formën më të mirë të karrierës së tij, Arjan Bellaj. Kështu, pra, "Nea Zmirni", kjo lagje qytet në qendër të Athinës dhe skuadra e saj, Panionios, ruajnë disa nga vlerat më të mira të krenarisë sonë sportive.
Ndaj sa herë që njeriu shkon te kjo qendër e madhe, gjithnjë i krijohen emocione. Këtu e ndien veten më shqiptar, sepse gjithçka lidhet me emra të mëdhenj, me rezultate të larta, me vlera cilësore, që jo rrallë përdoren si pika referimi edhe për vetë grekët. Pikërisht këto ditë, në një nga ambientet më tërheqës të "Nea Zmirnit", biseda nuk është kampionati vendës, por takimi i ardhshëm i kombëtares sonë me Rusinë. Shqetësimi është i ligjshëm. Kombëtarja ka rëndësinë e vet dhe të bën të mendosh për të, edhe pse je shumë kilometra larg vendit. Shqetësimin e ndien edhe te një njeri si Strakosha, i cili, ndonëse ka një përvojë të madhe, aq sa mund të ketë krijuar imunitet ndaj emocioneve të tilla, mendon shumë për ndeshjen e 29 marsit. Pak ditë më parë, ai ka zhvilluar një ndeshje të shkëlqyer ndaj Jonikosit, duke treguar formën e mirë që gëzon. Ai pranon se arsyeja e mosaktivizimit të tij kohët e fundit nuk ka qenë forma, por diçka tjetër. Buzëqeshja e tij e lehtë e pranon versionin e botuar pak ditë më parë në gazetën "Sporti shqiptar". Foto Strakosha, i cili mbush plot 38 vjeç pikërisht më 29 mars, thotë se ndeshja me Rusinë është shumë e vështirë. Por ka një optimizëm të madh kur thotë se, në qoftë se ekipi ynë do të jetë në një ditë të mirë, mund të fitojë. Portieri shqiptar ka besim tek ekipi dhe nuk lëkundet, edhe pse i kujton humbjen shkatërruese 4 1 në Rusi. "Megjithatë,- thotë Strakosha,- unë kam besim tek ekipi. Ne e kemi provuar veten edhe në ndeshje shumë më të vështira. Kur kemi luajtur, kemi bërë mrekullinë." Por portieri shqiptar ngulmon në atë se nuk ka ndeshje të dobëta, aq më shumë në kompeticione të tilla. "Kur luan kombëtarja, gjithkush kërkon të japë diçka më shumë sesa në ekipin ku luan,- thotë ai.- Kombëtarja është tjetër gjë dhe klubi një gjë tjetër. Veçse përgjegjësia jonë është vërtet e madhe,"- thotë portieri, i cili ka 13 vjet që është larguar nga Shqipëria. "Ne do të luajmë para publikut tonë, i cili gjithnjë na ka qëndruar pranë dhe na ka mbështetur fort." Por njeriu që e ka mbrojtur më shumë se askush portën e kombëtares së Shqipërisë, thotë se zhvillimi i ndeshjes me Rusinë në Shkodër ka diçka të veçantë. "Ndiej mall për të luajtur në Shkodër, sepse ruaj kujtime shumë të bukura nga ai qytet. Do të rikthehem në stadiumin e Shkodrës pas më shumë se 13 vjetësh. Pikërisht në atë stadium, në një ndeshje për Kupën e Republikës, kam pritur 2 penallti, të gjuajtura nga Hysen Zmijani dhe Fatbardh Jera. Ndaj ndiej mall të luaj në Shkodër,- thotë Strakosha.- Më kanë thënë se publiku shkodran ka mbetur i dashur, i zjarrtë e i kulturuar, si gjithmonë. Besoj se edhe në ndeshjen ndaj Rusisë, tifozët shkodranë jo vetëm do të jenë të shumtë, por edhe entuziastë gjatë lojës. I them këto pasi më kanë thënë që vetëm në Shkodër tifozëria është e veçantë dhe stadiumi nuk e ka ndjerë kurrë mungesën e tyre." Kësisoj, portieri ynë, i kthyer tashmë në një legjendë të portës shqiptare, për arsye të rekordeve që ka kapërcyer, siç janë mosha, 55 ndeshjet për ngjyrat e kombëtares, koha me më shumë se 11 vjet si portier i saj, mbi të gjitha niveli që ka treguar, vlerat e mëdha sportive, shoqërore e kombëtare, ka edhe diçka tjetër të veçantë. Pikërisht më 29 mars, kur do të luhet ndeshja me Rusinë, ai ka përvjetorin e 38 të të lindjes. "Do ta festoj në Shkodër këtë përvjetor,"- thotë Strakosha. Këtij gëzimi shpresoj se do t'i shtohet edhe gëzimi i fitores me Rusinë."
pamje nga shkodra
Shatervani
