Universal
AnonymouS
Kryeministri i Shqipërisë, Edi Rama ka qenë ditën e sotme në qytetin e Shkodrës, ku ka përuruar nisjen e punimeve për ndërtimin e stadiumit të ri të Shkodrës, një stadium ku pritet të zhvillojë ndeshje edhe kombëtarja e Shqipërisë mundësisht duke nisur nga ajo me Serbinë.
Kryeministri ishte i shoqëruar në Shkodër nga ministrja e Arsimit dhe Sportit, Lindita Nikolla, kreu i Federatës Shqiptare të Futbollit, Armand Duka, si dhe përfaqësues të tjerë të politikës qendrore e lokale.
Në fjalën e tij me këtë rast, Rama e vlerësoi ndërtimin e këtij stadiumi si një moment mjaft të rëndësishëm që do t’i japë një zhvillim të ri qytetit, ashtu siç ndodhi me Elbasanin pas ndërtimit të stadiumit, por edhe në respekt të atyre që i dhanë Vllaznisë emrin që ka dhe për t’i kthyer këtij ekipi atë që meriton.
“Në respekt të të gjithë atyre që i kanë dhënë Vllaznisë emrin që ka, ne duhet t’i kthejmë Vllaznisë atë që meriton. Shkodra e meritonte këtë stadium në nderim të emrit që mban stadiumi. Kur deklarova se do të rindërtojmë ‘Loro Boriçin’ në Shkodër, ishte e paimagjinueshme, që pas një jave më çonin nga Shkodra mesazhe të tipit ‘pse rrejte, ku e ke stadiumin’. Projekti ka ardhur në këtë formë pas një pune të madhe dhe një dialogu të vazhdueshëm për të përmbushur edhe parametrat e UEFA-s. Objektivi është që ta realizojmë në kohë që të mirëpresim komshinjtë. Besoj se do ja dalim”, tha Rama.
Në fjalën e saj, ministrja Nikolla vlerësoi projektin e dytë madhor të këtij lloji në Shqipëri, pas atij të stadiumit “Elbasan Arena” në qytetin e Elbasanit, që konsiderohet momentalisht si shtëpia e kombëtares kuqezi dhe u shpreh besimplotë për punën që po bëhet nga qeveria.
g.shqip
