Re: Plazh XXI
Policia detyron të vishet vajzën nga Maqedonia, që po bënte banjë pa reçipeta
Sensacioni i ditëve të verës nuk ka vonuar të vijë. Në një nga plazhet më publikë të qytetit të Sarandës, i preferuar edhe nga fëmijët për shkak të thellësisë më të kufizuar, janë shfaqur sërish vajzat në topless. Një vajzë e re, duke pasur të dashurin e saj në krah, e ka çuar zhveshjen në publik deri në heqjen e pjesës së sipërme të kostumit të saj të plazhit. Megjithëse ka qenë e vetme në mënyrën e saj të zhveshjes, vajza e re nuk është shqetësuar, edhe se ka parë që e ndiqnin qindra sy kureshtarë. Pas disa orësh ekspozimi në sytë e të gjithëve dhe në diell, një telefonatë në numrin 129 ka bërë që në Plazhin e Ri, në vendin ku ishte shtrirë dhe merrte rreze pa u shqetësuar çifti i ri, të mbërrijë patrulla e policisë. Megjithë vështirësinë e komunikimit në gjuhë të huaj, policët e shërbimit ia kanë dalë të bëjnë të ditur për çiftin se nuk ishte vendi i lejuar për të bërë plazh nudo ose gjysmë nudo, sikurse ishte vajza, që kishte tërhequr mbi vete sytë kureshtarë. Tek ata që e vëzhgonin pamjen e saj, ajo kishte ngjallur ndjenjë turpi, sikur të ishin ata që ishin zhveshur. Resmi Qoku, një nga policët e patrullës së shërbimit, tha për "Shqip" se ishte një çift të huajsh nga Shkupi i Maqedonisë, të cilët u mirëkuptuan pas komunikimit me uniformat blu. Sipas Qokut, ata kanë kërkuar ndjesë për veprimin e pamenduar, që binte ndesh me një rregull shqiptar dhe janë treguar reagues. Pas kësaj vajza e re ka kompletuar në trupin e saj kostumin e plazhit dhe bashkë me të dashurin kanë vazhduar marrjen e rrezeve.
Dje është përsëritur episodi i verës së kaluar, kur një grup vajzash suedeze qëndruan për pak minuta pa pjesën e sipërme të kostumit të banjës në rërën e plazhit publik "Rinia" të qytetit të Sarandës.
Në atë kohë, lajmi i suedezeve gjysmë të zhveshura bëri xhiron e botës. Të gjitha agjencitë ndërkombëtare të lajmeve, përfshirë agjencinë "Reuters" i kushtuan vëmendje lajmit të çuditshëm nga Shqipëria. Çudia nuk ishte në faktin se disa turiste nordike u zhveshën në një plazh, por në faktin që zhveshja e tyre bëri që të ndërhynte edhe policia. Faqja zyrtare e grupit "Mediaset" në Itali, TGCOM, shkruante më 28 korrik të vitit të shkuar se "... çudia qëndron në faktin që suedezet kanë shkuar për plazh në Shqipëri".
Episodi i suedezeve u pasua vetëm dy javë më pas, me zhveshjen e një grupi vajzash nga Maqedonia, por kësaj radhe lajmi nuk pati bujën e të parit, ndërkohë që autoritetet lokale në Sarandë filluan të vrisnin mendjen për të gjetur një zgjidhje të mesme mes dëshirës së turistëve perëndimorë për të qenë të lirë dhe respektimit të rregullave të shoqërisë shqiptare.
Duke reaguar ndaj asaj që ndodhi, bashkia e Sarandës u kujdes që në vende të dukshme pranë plazheve brenda në qytet të vendoste afishet "Public beach no nudists" (Plazh publik, jo nudistë), përmes të cilave u bëhej e ditur turistëve të huaj se në plazhe publikë ndalohet larja lakuriq. U vendosën disa të tilla vetëm atje ku ndodhi shmangja nga rregulli, në plazhin "Rinia" (ish-centrali). Por me ardhjen e sezonit të ri askush nuk u kujtua t‘i paraprijë përsëritjes së dukurisë "topless" dhe ja ku është përsëritur ai. Janë zhdukur tabelat informuese e ndaluese nga plazhet e Sarandës dhe topless janë rishfaqur.
Një vit më parë në bashki thanë se qenë duke studiuar mundësinë që të përcaktoheshin një apo dy sektorë të veçuar nga plazhet publikë, ku të mundësohej larja nudo për ata që dëshirojnë, vendas apo të huaj qofshin. Mendimi ishte për t‘i dhënë një destinacion të tillë Plazhit të Pasqyrave, i gjendur përgjatë bregdetit Sarandë-Ksamil. Por kjo është harruar, pasi fenomeni është konsideruar i kapërcyer. Dje bashkiakët janë rivënë para të njëjtës sfidë si një vit më parë, para së cilës janë dorëzuar.
Marre, nga gazeta Shqip
