Njoftim

enton · 7 Dec 2002

Re: Njoftim

INSTAT bën publike rezultatet e regjistrimit të popullsisë dhe banesave

Në 12 vjet rreth 400 mijë shqiptarë më pak

--------------------------------------------------------------------------------

Jetmira Delia

TIRANE

Emigrimi dhe rënia e lindshmërisë kanë pakësuar numrin e popullsisë në vendin tonë. Ndërsa në vitin 1989 numri i popullsisë në vend ka qenë 3182417, në muajin prill të vitit 2001, ai rezulton të jetë 3069275.

Sipas drejtoreshës së përgjithshme të INSTAT-it, Milva Ekonomi, ky pakësim i popullsisë rezulton të ketë ardhur për shkak të emigracionit, por edhe sepse ka rënë lindshmëria. Ndërkaq, sipas konkluzioneve të regjistrimit të popullsisë, rezulton se në jug dhe në veri të Shqipërisë jeton një numër i vogël banorësh, ndërsa ka një përqendrim të saj në qendër të vendit. Për gati një dekadë vihet re një lëvizje e madhe e demografike e popullsisë, nga zonat periferike të vendit drejt qendrës. Kryesisht këta banorë janë vendosur në qytetet Durrës dhe Tiranë.

Më shumë femra se meshkuj
Kjo është një e dhënë tjetër që vjen nga përfundimi i regjistrimit të popullsisë dhe banesave. Sërish emigrimi jashtë vendit është shkaku që në vendin tonë ka më pak meshkuj sesa në vitin 1989, kur daton regjistrimi i fundit i popullsisë në vendin tonë. Ky numër ka një rënie prej më shumë se katërqind mijë personash. Nëse në vitin 1989 ky raport ka qenë pothuajse në kuota të barabarta, në prill të vitit 2001 ky raport është thelluar së tepërmi. Ndërsa kjo shifër, për sa u përket femrave, qëndron pak a shumë në shifra konstante.

Familja
Numri i familjeve në vendin tonë është rritur. Ndërkaq ajo që vihet re, është fakti se ka variacion në madhësinë e familjes. Ende vazhdon të ruhet familja e përbërë prej më shumë se gjashtë anëtarësh apo, e quajtur ndryshe, familja tradicionale. Sipas të dhënave të INSTAT-it, këto lloj familjesh vihen re më së shumti në fshatra. Ndërsa familja e përbërë prej katër anëtarësh apo më pak, e quajtur ndryshe familje moderne, haset më tepër në qytet. Por vihet re gjithashtu se madhësia e familjes ndryshon edhe nga njëri rajon në tjetrin. Kështu, familjet e mëdha janë tradicionale në veri të vendit, si p.sh. në Kukës apo Has, ndërsa familje te vogla janë tradicionale për zona të tilla, si p.sh në Delvinë. Ndërkaq analfabetizmi ka rënë. Ai vërtitet në shifrën 1.6 për qind për moshën gjashtë vjeç e lart dhe dallimi me bazë gjininë pothuaj nuk ekziston për këtë grupmoshë, por ai është mjaft i ndjeshëm për sa i përket edukimit të mesëm dhe atij universitar. Ndërsa shifra e papunësisë flet për rritje në një masë të konsiderueshme të saj. Nëse në vitin 1989 ka qenë 9.8 për qind, në vitin 2001 ajo është 22.7 për qind. Papunësia vihet re më shumë te të rinjtë dhe femrat dhe më pak te meshkujt. Për sa u përket kushteve të jetesës, ekziston një hendek i madh mes familjeve në fshat dhe atyre në qytet, ndërsa mes familjeve në qytete të ndryshme ky disnivel nuk është shumë i pranishëm. Ndërkohë analiza e disa fenomeneve më të rëndësishme të vrojtuara gjatë regjistrimit do të përbëjë punën për të ardhmen e INSTAT-it.

TE DHENA NGA REGJISTRIMI I FUNDIT I POPULLSISE

3069275 - popullsia në vendin tonë në prill 2001. Në vitin 1989 ishte 3182417
Nga këta 1538832 - janë femra
Ndërsa 1530443 - janë meshkuj
57.8 për qind e popullsisë jeton në fshat
Ndërsa 42.2 për qind e saj jeton në qytet
Numri i familjeve është 726895
Ndërsa i banesave - 785515
Mosha mesatare është 30.7 vjeç
Çdo familje ka mesatarisht 4.2 anëtarë

Njoftim

enton

Primus registratum