Re: Nenkalimi - Prova e Tiranes, prova e Shqiperis
Nuk desha te hap teme te re per kete ceshtje dhe po shtoj ketu artikullin nga Shekulli per lufte ne Berishes per korrupsionin.
Shkarkohet kreu i Sektorit Juridik të Drejtorisë së Përgjithshme të Policisë së Ndërtimit, Edlir Orozi
Morina: Orozi, absolutisht i shkarkuar
Sipas kreut të Ndërtimores, Ibrahim Morina, shkarkimi i Orozit ka si argumentim shpërdorimin e detyrës
Shekulli
Tiranë - Shkarkohet nga detyra shefi i Sektorit Juridik pranë Drejtorisë së Përgjithshme të Policisë së Ndërtimit, Edlir Orozi. Ky është largimi më i fundit nga radhët e administratës shqiptare në emër të luftës kundër korrupsionit. Lajmin e kanë bërë të ditur burimet nga Drejtoria e Përgjithshme e kësaj policie, dhe po të njëjtën gjë e pohoi dje edhe drejtori i përgjithshëm i Policisë së Ndërtimit, Ibrahim Morina. “Orozi është absolutisht i shkarkuar dhe ndaj tij pranë departamentit të personelit është depozituar edhe shkresa që konfirmon shkarkimin e tij”, - tha ai dje për “Shekullin”. Kjo me sa duket ka qenë masa më ekstreme që është marrë ndaj ish-shefit të Sektorit Juridik, Orozi, prej drejtorit të kësaj policie, Morinës. Sipas tij, ky shkarkim, përveç praktikave shkresore administrative të lëna pas dore, sipas drejtorit Morina, lidhet edhe me shpërdorimin e detyrës. Ndërkohë që para pak kohësh veprimtaria e Orozit ishte bërë objekt edhe i mediave elektronike dhe emisionit “Fiks Fare”, ku denoncoheshin nga disa qytetarë shkeljet e tij ligjore. Ndërkohë që në vend të Orozit drejtori Morina ka emëruar ish-juristin e degës së Policisë së Ndërtimit Tiranë, Gentian Nebiaj.
Në fakt, veprimtaria e Policisë Ndërtimore është bërë objekti kryesor i diskutimeve publike te fundit, sidomos për çështjen e nënkalimit të “Zogut të Zi”, e në mënyrë të veçantë, pas vendimit të Gjykatës së Tiranës për “Zogun e Zi”, që la në fuqi aktin administrativ të KRRTRSH-së, që prishte vendimin e KRT-së së Bashkisë së Tiranës për ndërtimin e nënkalimit. Por përveç këtij aksioni shumë të përfolur publikisht që pritet të ndërmarrë javët e ardhshme Policia e Ndërtimit, ky organ është përgjegjës për ligjshmërinë e ndërtimeve në të gjithë Shqipërinë. Ky sektor ka qenë dhe ngelet jo vetëm nga sektorët më fitimprurës të ekonomisë shqiptare, por edhe ai me problematiku në fushën e ligjshmërisë.
Është fakt se në të gjitha rrethet kryesore të vendit janë përfolur problemet në lejet e ndërtimeve të dhëna me vend e pa vend, jo vetëm në zonat turistike, por edhe ato të tjera, urbane dhe rurale. Pikërisht në kuadër të rritjes së ligjshmërisë në këtë sektor, duket se drejtori Morina kërkon të rrisë jo vetëm përgjegjësinë për këto çështje, por edhe të ristrukturojë dhe riorganizojë punën në të gjithë sektorin e kontrollit të ligjshmërisë në fushën e ndërtimit. Kështu kanë siguruar burimet nga Policia e Ndërtimit, të cilat kanë shtuar se në këtë sektor nga drejtori Morina po merren masa emergjente që të rritet jo vetëm përgjegjësia e kontrollit të ligjshmërisë ndaj ndërtimeve, por edhe lidhur me trajtimin e kërkesave dhe ankesave të qytetarëve, të cilët i drejtohen këtij institucioni.
Emërohet Gentian Nebiaj
Në vend të Edlir Orozit, drejtori i përgjithshëm i Policisë së Ndërtimit, Ibrahim Morina, ka emëruar juristin Gentian Nebiaj. Ky i fundit që prej vitit 2004 ka punuar si specialist-jurist në Drejtorinë e Policisë së Ndërtimit, si dhe në degën e Policisë së Ndërtimit të Tiranës. Në këtë sektor Nebiaj ka pasur një performancë rreth 2-vjeçare, dhe me sa duket është vlerësuar si i më i përshtatshmi nga drejtori Morina për pozicionin e shefit juridik në Drejtorinë e Policisë së Ndërtimit të Republikës. Nebiaj prej disa vitesh gëzon edhe titullin e avokatit dhe është duke u masterizuar në Fakultetin e Drejtësisë Tiranë. Vend nga ku pas një performancë 2-vjeçare, kalon së fundi në pozicionin e shefit juridik në Drejtorinë e Policisë së Ndërtimit të Republikës. Ky pozicion pritet të jetë jo me pak probleme dhe aspak i thjeshtë për Nebiajn, sidomos kur gjatë aksionit publik që do të kryhet për prishjen e nënkalimit të “Zogut të Zi”, në krye të saj do të jetë pikërisht Policia e Ndërtimit.
