Re: ndihmeeeee
EPUBLIKA E SHQIPËRISË
KUVENDI
L I G J
Nr.8776, datë 26.4.2001
PËR DISA SHTESA DHE NDRYSHIME NË LIGJIN NR.7703, DATË 11.5.1993 "PËR SIGURIMET SHOQËRORE NË REPUBLIKËN E SHQIPËRISË, NDRYSHUAR ME LIGJET NR.7932, DATË 17.5.1995, NR.8286, DATË 16.2.1998, NR.8392, DATË 2.9.1998 DHE NR.8575, datë 3.2.2000
Në mbështetje të neneve 78 dhe 83 pika 1 të Kushtetutës, me propozimin e Këshillit të Ministrave,
K UV E N D I
I REPUBLIKËS SË SHQIPËRISË
V E N D O S I :
Në ligjin nr.7703, datë 11.5.1993 "Për Sigurimet Shoqërore në Republikën e Shqipërisë, ndryshuar me ligjet nr.7932, datë 17.5.1995, nr.8286, datë 16.2.1998, nr.8392, datë 2.9.1998 dhe nr.8575, datë 3.2.2000 bëhen këto shtesa dhe ndryshime:
Neni 1
Në titullin e nenit 2, pas fjalës "Sigurimet" shtohet fjala "shoqërore të".
Në paragrafin e parë të nenit 2, pas fjalës "Sigurimi" shtohet fjala "shoqëror".
Neni 2
Në paragrafin e tretë të nenit 4, pas fjalëve "Sigurimi shoqëror" shtohet fjala "suplementar" dhe para fjalisë "bëhet sipas kritereve të caktuara me ligj të veçantë" shtohet fjalia "Për Policinë e Shtetit dhe për Shërbimin Informativ Shtetëror.".
Neni 3
Paragrafi i fundit i nenit 9 ndryshohet si vijon:
"Shteti paguan kontribute në varësi të veprimtarisë ekonomike të zhvilluar më parë për kohën që shtetasi kryen shërbimin e detyrueshëm ushtarak, si dhe për të gjithë kategoritë e personave të përcaktuar me ligje dhe me vendime të Këshillit të Ministrave."
Neni 4
Në paragrafin e tretë të nenit 12, pas fjalisë "mund të sigurohen vullnetarisht" shtohet fjalia ", duke paguar kontribute deri në nivelin maksimal, për të përfituar".
Neni 5
Në pikën 4 të nenit 13, fjala "gjobën" zëvendësohet me fjalën "kamatëvonesën".
Neni 6
Në nenin 15, në fjalinë e dytë të paragrafit të parë, fjalët "afati i derdhjes së tyre" zëvendësohen me fjalët "afati i pagimit të tyre".
Pas paragrafit të dytë të nenit 15 shtohen këta paragrafë:
"Punëdhënësi detyrohet të depozitojë çdo muaj listëpagesat, sipas formatit tip, në agjencinë e sigurimeve shoqërore, pavarësisht nga pagesa e kontributeve.
Punëdhënësi paguan çdo muaj kontributet me urdhërxhirim tip dhe shumat e paguara duhet të përputhen me shumat e listëpagesave.
Pagesa e kontributeve për të vetëpunësuarit, për punëdhënësit privatë dhe për të vetëpunësuarit në bujqësi mund të bëhet gjatë vitit kalendarik një herë në tre muaj. Afati i pagesës së tyre është jo më vonë se dita e fundit e muajit të tretë, brenda çdo tremujori kalendarik."
Në paragrafin e fundit të nenit 15 shtohet fjalia "dhe ekzekutohet nga zyra e përmbarimit".
Neni 7
Neni 16 ndryshohet si vijon
"Sanksionet
1. Kamatëvonesat
Kamatëvonesa për kontributet e paguara jashtë afateve të caktuara do të jetë:
- 0.05 për qind për ditë të shumës së papaguar të kontributeve, duke filluar nga dita kur pagesa duhej të ishte bërë, për rastet kur është bërë regjistrimi në organet e sigurimeve shoqërore.
- 0.1 për qind për ditë të shumës së papaguar të kontributeve, duke filluar nga dita kur pagesa duhej të ishte bërë, për rastet kur nuk është bërë regjistrimi në organet e sigurimeve shoqërore.
Kamatëvonesa për një përcaktim më të vogël të shumës së kontributeve do të jetë 0.1 për qind për ditë të shumës së kontributeve të paguara më pak.
Në mbarim të çdo viti kalendarik, kamatëvonesat e arrira i shtohen shumës së detyrimeve kontributive, në bazë të së cilës është bërë llogaritja e parë.
2. Gjoba
Kur nuk përbëjnë vepër penale, përveç pagesës së kontributit, shkeljet e mëposhtme dënohen me gjobë:
- Për paraqitjen me vonesë për regjistrimin e fillimit të veprimtarisë ekonomike punëdhënësi dënohet me gjobë 100 000 lekë, ndërsa i vetëpunësuari dënohet me gjobë 30 000 lekë.
- Për paraqitjen me vonesë për regjistrimin e vazhdimit të veprimtarisë ekonomike ose për mosdeklarim të ndërprerjes së përkohshme të veprimtarisë ekonomike, punëdhënësi dënohet me gjobë 60 000 lekë, ndërsa i vetëpunësuari dënohet me gjobë 10 000 lekë.
- Për vonesë në dorëzimin e dokumentacionit të kërkuar në sigurimet shoqërore, punëdhënësi dënohet me gjobë 30 000 lekë, ndërsa i vetëpunësuari dënohet me gjobë 10 000 lekë.
- Kur në dokumentacionin e paraqitur në sigurimet shoqërore nga punëdhënësi ka të dhëna të pasakta me qëllim pakësimin e shumës së kontributeve, punëdhënësi dënohet me gjobë 70 000 lekë.
- Kur punëdhënësi ka mbajtur nga paga e të punësuarit kontributin për sigurimet shoqërore, por nuk e paguan brenda afatit të caktuar, masa e gjobës është 50 000 lekë.
- Kur punëdhënësi ka mbajtur nga paga e të punësuarit kontributin për sigurimet shoqërore, por e paguan më vonesë në llogarinë e sigurimeve shoqërore, masa e gjobës është 20 000 lekë."
Neni 8
Në nenin 17, pas fjalëve "kundër vendimeve" shtohen fjalët "të gjobave, të inspektorëve".
Neni 9
Në nenin 18 në fjalinë e parë, fjala "taksat" zëvendësohet me fjalët "detyrimet fiskale".
Në fund të paragrafit të dytë të nenit 18 shtohet fjalia "dhe ekzekutohet nga zyra e përmbarimit".
Neni 10
Në pikën 1 të nenit 31 hiqet fjala "bazë".
Neni 11
Në nenin 33, titulli "Shtesë pensioni për shtyrje të datës së daljes në pension" bëhet: "Shtesë pensioni" dhe përmbajtja e tij ndryshohet si vijon:
"Shtesë pensioni
I siguruari, që ka plotësuar kushtet për pension të plotë pleqërie, sipas neneve 31 dhe 92 të këtij ligji, merr një shtesë prej 4 për qind të pensionit të plotë për çdo vit që shtyhet dalja në pension në rast se:
a) vazhdon të jetë në marrëdhënie pune, paguan kontribute dhe pensionin e kërkon në një datë të mëvonshme nga data e plotësimit të kushteve;
b) ndërpret pensionin dhe vazhdon të punojë, paguan kontribute dhe e kërkon përsëri atë në një datë të mëvonshme.
Pensioni, në çdo rast, nuk mund të jetë më i madh se 80 për qind e pagës neto mesatare të 3 viteve rresht në 10 vitet e fundit të punës.".
Neni 12
Në nenin 41 bëhen këto ndryshime dhe riformulime:
- Shkronja "b" e pikës 1 riformulohet si vijon:
"b) 25 për qind për çdo jetim ose persona të tjerë që përfitojnë."
- Paragrafi i dytë i pikës 1 të nenit 41 riformulohet si vijon:
"Kur nuk merret pensioni i parashikuar nga shkronja "a" e këtij neni, masa e pensionit për jetimin është 50 për qind, kur ai është ose mbetet vetëm pjesëtar në pension. Kur pjesëtarë në pension janë më shumë se një jetim, masa e pensionit familjar për secilin prej tyre është 25 për qind."
Fjalia e dytë e pikës 2 e nenit 41 riformulohet si vijon:
"Në këtë rast masa e pensionit për çdo jetim ose person tjetër që përfiton është 25 për qind e pensionit që i takonte të ndjerit, por jo më tepër se 50 për qind e tij."
Neni 13
Pikat 4 dhe 5 të nenit 52 bëhen pika 4, si më poshtë:
"4. Në rastet kur personi i siguruar vdes nga një aksident në punë ose sëmundje profesionale, masa e pensionit familjar për personat pasjetues, do të jetë ajo e përcaktuar në nenin 41 të këtij ligji."
Neni 14
Titulli i nenit 62 bëhet "E drejta për përfitim".
Neni 15
Në nenin 74 pas shkronjës "e" shtohet shkronja "ë" me këtë përmbajtje:
"ë) Me kërkesë të punëdhënësve vendos për ngrirjen e kamatëvonesave për një periudhë të caktuar kohe dhe për pagimin e tyre në një periudhë të mëvonshme, por jo më shumë se një vit financiar pa të drejtë përsëritjeje, në ato raste kur pagesa e menjëhershme e kamatëvonesave do të bënte të pamundur vazhdimin e veprimtarisë ekonomike që ndodhet në vështirësi financiare."
Neni 16
Neni 79 ndryshohet si vijon:
"Detyrimet e punëdhënësit dhe të vetëpunësuarit"
Punëdhënësi është i detyruar:
- të regjistrojë në regjistrin vjetor të gjithë të punësuarit;
- të njoftojë agjencinë e sigurimeve shoqërore për të gjitha ndryshimet që kanë të bëjnë me të drejtat dhe detyrimet për sigurimin e të punësuarve;
- të bëjë sigurimin nga dita që i punësuari fillon punë;
- të njoftojë zyrtarisht, një ditë para fillimit të punës së të punësuarit, agjencinë e sigurimeve shoqërore, e cila deklaron, në çdo rast, regjistrimin e të punësuarve të rinj.
Për ndërprerjen e punës ose për ditët e munguara në punë, kontributet do të llogariten në bazë të dokumentacionit përkatës, brenda kufijve të pagave me pagë ditore, sipas mënyrës së përcaktuar me vendim të Këshillit të Ministrave.
Personat juridikë, publikë e privatë dhe personat fizikë, çdo rast të ndërprerjes së ushtrimit të veprimtarisë ekonomike, brenda vitit kalendarik, duhet ta vërtetojnë nga organet e tatim-taksave.
Mbyllja e veprimtarisë, në çdo rast, vërtetohet me vendim gjykate."
Neni 17
Neni 81 ndryshohet si vijon:
"Regjistrimi
Personat juridikë, publikë e privatë dhe personat fizikë, për të fituar të drejtën e ushtrimit të veprimtarisë ekonomike nga organet e tatim-taksave, duhet të jenë të regjistruar më parë në organet e sigurimeve shoqërore. Personat juridikë, publikë e privatë, për të fituar të drejtën e vazhdimit të ushtrimit të veprimtarisë ekonomike duhet të marrin paraprakisht, për çdo vit kalendarik, vërtetimin e shlyerjes së detyrimeve të sigurimeve shoqërore të vitit të mëparshëm.
Regjistrimi është një akt administrativ, që nuk tregon detyrim në mbulimin e sigurimit shoqëror."
Neni 18
Në nenin 85 pika 3, fjalët "kompetente lokale" zëvendësohen me fjalën "rajonale".
Neni 19
Në ato nene të ligjit nr.7703, datë 11.5.1993 "Për sigurimet shoqërore në Republikën e Shqipërisë", ku është përdorur termi "të ardhura" për të shprehur fjalën përfitime ose pensione, ky term zëvendësohet me termin "përfitime". Ku është përdorur termi "kontribucione" zëvendësohet me termin "kontribute". Ku është përdorur emërtimi "Ministria e Punës, Emigracionit, Përkrahjes Sociale dhe të të Përndjekurve Politikë" zëvendësohet me emërtimin "Ministria e Punës dhe Çështjeve Sociale".
Neni 20
Ky ligj hyn në fuqi 15 ditë pas botimit në Fletoren Zyrtare.
K R Y E T A R I
Skënder Gjinushi
5
