Re: Me Ali Ahmetin apo Arber Xhaferrin???
Une e kam kuptuar ndryshe ceshtjen e referendumit dhe qendrimet qe mbajne partite shqiptare ndaj tij! Per me teper, lexo artikullin e meposhtem:
REFERENDUMI, PASOJAT MUND TË JENË KATASTROFALE
Ylber LILI
1- Maqedonisë si shtet iu dha mundësia reale që t’i japë fund qëndrimit diskriminues ndaj shqiptarëve brenda shtetit. Nënshkrimi i Marrëveshjes së Ohrit u konsiderua si një shkallare prej ku shteti i vogël ballkanik, por me shumë probleme, të shohë nga e ardhmja e prosperimit të saj. Nga ana tjetër ndërkombëtarët i dhanë mundësinë e përsosur këtij shteti të hedhë në koshin e plehrave të gjitha direktivat antishqiptare të ardhura nga Beogradi dhe Moska si dhe të kthjellohen nga nacionalizmi i tyre i sëmurë. Por më 7 nëntor do të mbahet referendumi, pro tij votuan dy partitë qeveritare, Lidhja Social Demokrate e Maqedonisë (LSDM), Bashkimi Demokratik për Integrim (BDI), si dhe opozita maqedonase, ndërsa deputetët e Partisë Demokratike Shqiptare (PDSH) braktisën mbledhjen kurse ata të Prosperitetit Demokratik (PPD) nuk morën pjesë fare në mbledhje. Shpresonim që referendumi të mos aprovohej në Parlament të paktën nga maxhoranca shqiptare, por edhe në këtë rast u zhgënjyem. Dikush mund të pyesë pse partia e Ahmetit u detyrua që të japë OK ndaj referendumit maqedonas?
LSDM-ja si gjithnjë ka shfrytëzuar pushtetin ekzekutiv për të bindur Ali Ahmetin të votojë pro referendumit, me pretekstin që të ruajnë të paprekur kolltuqet qeveritare gjoja “nga ndonjë tërmet i hatashëm që mund të shkaktojnë referendumistët”, apo me preteksin se “referendumi nuk është kundër interesave të shqiptarëve, por kundër maxhorancës qeverisëse”. Nuk duhet të harrojmë se mekanizmat shtetërore maqedonase gjithnjë gjatë kësaj periudhe gjoja negociuese me partnerin shqiptar kanë përdorur vazhdimisht kërcënimin e humbjes së pushtetit. Kryeministri maqedonas Harri Kostov në çdo etapë negociuese me partnerin shqiptar përdorte karten e dorëheqjes, duke e detyruar Ahmetin të pranojë kompromise të njëanshme. Në këtë rast nuk duhet lënë pa përmendur edhe figura qendrore e gjithë këtij lëmshi, kreu i shtetit Branko Cervenkovski. Ai ndryshe nga vitet ‘90-‘98 që shfaqej hapur në publik si antishqiptar, tani një gjë të tillë e aplikon përmes mashave të tij. Për të ardhur deri në këtë fazë, e cila duket se një ditë do të pëlcasë keqaz, Cervenkovski përdori me shumë djallëzi “shkopin magjik” për të vendosur kufijtë ndarës brenda politikës shqiptare. Ahmeti, partneri i tij qeverisës, duke mos e nuhatur dhe njohur si duhet strategjinë e Cervenkovskit, humbi kontaktet e bashkëpunimit dhe bashkëveprimit me bllokun opozitar shqiptar, kur është fjala për çështje madhore siç ishte ndarja e re territoriale, një nga bazamentet e Marrëveshjes së Ohrit. Falë këtij konformizmi të Ahmetit, Cervenkovskit arriti të “armiqësojë” bllokun politik shqiptar. Të bëhemi më të qartë, realitetet politike në Maqedoni burojnë nga kahja që do t’i japë procesit lidershipi shtetëror. Një nga synimet kardinale të Branko Cervenkovskit që në momentin kur fitoi legjitimitetin e elektoratit ka qenë se në çfarë mënyre të krijojë “armiqësira” mes bllokut shqiptar. Dhe tre ditë më parë në Parlamentin e Maqedonisë, pjesa e deputetëve të kryesuar nga Ahmeti përkrahën idenë e referendumit maqedonas, ndërsa parlamentarëve të Xhaferit iu mbyllën mikrofonat, ku në shenjë revolte braktisën seancën.
2-Referendumi “i suksesshëm”, nënkupton dështim për Maqedoninë. Si duket maqedonasit me çdo kusht dëshirojnë ashpërsimin e kontradiktave mes etniteteve. Mbajtja e referendumit, në këto rrethana, mbase është aventura më e madhe e maqedonasve. Ata nuk bëjnë aspak hesape se shteti mund të vijë deri te shpërbërja, nëse maqedonasit përmes referendumit përcaktohen kundër ligjeve për ndarjen territoriale. Nëse do të flasim se çfarë përmban në të vërtetë ligji për ndarjen e re territoriale të propozuar nga qeveria aktuale, dhe pse maqedonasit kanë gjetur rrugën e referendumit për të kundërshtuar këtë ligj, do të konstatojmë se kemi të bëjmë me një nismë që në esencë është në funksion të polarizimit etnik maqedonas. Duhet theksuar se ky ligj, jo vetëm që është në raport të zhdrejtë me kërkesat e shqiptarëve, por shohim qartë se është bërë një prerje e cunguar për shqiptarët. Në të gjitha pjesët ku shqiptarët dominojnë numerikisht, janë ngritur enklava maqedonase, ndërkaq gjuha shqipe mbetet ende enigmë se në çfarë mënyre do të aplikohet zyrtarisht. Kjo tendencë e hapur antishqiptare nuk ka kaluar pa u vënë re as nga ndërkombëtarët që vëzhgojnë situatën nga brenda. Autoritetet e NATO -s dhe të BE-së në Shkup para dy ditësh kanë dhënë shenja shqetësuese për të ardhmen e shtetit si pasojë e referendumit njëetnik maqedonas. “Implikimet nga referendumi do të jenë të shumta, është e domosdoshme që qytetarët e Maqedonisë, tërësisht t’i kuptojnë implikimet që do të dalin nga referendumi, për organizimin territorial”, -është shprehur në konferencë për shtyp, zëdhënësja e Bashkimit Evropian në Maqedoni, Shina Tompson. Sipas saj, implikimet nga referendumi i ardhshëm do të jenë të shumta, mes të cilëve anulimi i zgjedhjeve vendore, tërheqja e vëmendjes nga proceset e reformave, sidomos në ekonomi, si dhe anulimi i zbatimit të paketës së ligjeve për decentralizim. Tomson ka shtuar se “Decentralizimi është reformë e rëndësishme dhe e domosdoshme, veçanërisht për ekonominë, ndërsa që të arrihet qëllimi për shoqërinë shumetnike që do të funksiononte në mënyrë të shkëlqyer është e domosdoshme që ky proces të vazhdojë edhe më tej, kurse punët të mos kthehen në druajtjet dhe në ndarjet e vjetra në bazë të linjave etnike”. Qëndrimin e BE-së, e ka mbështetur edhe OSBE-ja. Sipas zëdhënësit të kësaj organizate, Maksim Filandrof, decentralizimi është i domosdoshëm për stabilitetin e vendit, e jo vetëm për integrimet euroatlantike.
Përfundimisht referendumi, që ndryshe mund të përkthehet lëvizja etnonacionaliste maqedonase, sipas të gjitha gjasave do të arrihet, sepse ata nxorën jashtë loje rregullën e Badinterit. Një shenjë e cila ka nisur të gjëmojë ndryshe nga sa pritej. Maqedonasit e kanë topin në këmbët e tyre, një goditje e gabuar do t’i kushtojë shtrenjtë vetë atyre.
09/09/2004
