Re: Eshte Edi Rama nje idealist apo nje sharlatan?
Brojka, nuk kam frikë nga komisioni hetimor
Ish-kryetari i Bashkisë së Tiranës, gjatë periudhës 1996-2000, Albert Brojka e ka konsideruar ngritjen e komisionit hetimor për aktivitetin e bashkisë nga viti ‘92-’03, si një iniciativë të ligjshme dhe mjaft pozitive, e cila është një mundësi mjaft e mirë për t’i treguar elektoratit të vërtetat e tre qeverisjeve të kryeqytetit. “Nëse ky komision do të hetojë aktivitetin tim si ish-kryetar bashkie, jam i sigurt se nuk kanë për të gjetur asnjë shkelje apo shpërdorim me fondet publike. Ka një ndryshim midis meje dhe Ramës, për kohën e qeverisjes, pasi gjatë kohës që unë kam qenë në krye të Bashkisë së Tiranës, aktiviteti im është kontrolluar nga Prefektura e Tiranës, funksionarët e të cilit kanë qenë të Partisë Socialiste, ndërsa Edi Rama është kontrolluar nga të vetët. Unë nuk kam frikë të dal në këtë komision, pasi unë kam qenë një kryetar bashkie fiktiv, me pak kompetenca dhe nuk kam marrë vendime që të masakrojnë Tiranën ”,-u shpreh për gazetën Brojka. Ai e ka konsideruar këtë iniciativë edhe politike nga ana e opozitës në prag të zgjedhjeve lokale, por njëkohësisht ai e ka konsideruar atë si një mundësi shumë të mirë për të bërë transparente punën e tij gjatë kohës që ka drejtuar në postin e kryebashkiakut të Tiranës. “Besoj se ky komision do të nxjerrë mjaft të vërteta në shesh, pasi komisioni ka anëtarë të dy kaheve politike, është një komision që ka brenda maxhorancën dhe opozitën brenda. Opozita e përdor këtë komision edhe për fushatë elektorale, por edhe për qëllime politike, që të godasë kandidaturat e mundshme dhe që nuk është një opozitë që rri si mumje në Parlament, por heton”,-theksoi ai. Deklarata e Brojkës ka ardhur menjëherë pas votimit të dy ditëve më parë me shumicë votash të ngritjes së një komisioni që do të hetojë Bashkinë e Tiranës, duke përfshirë periudhën ‘92-’96, kur ka drejtuar kryebashkiaku i parë, Sali Kelmendi, ‘96-‘00 Albert Brojka dhe periudhën e fundit, që po drejtohet nga Edi Rama. “E kam mirëpritur ngritjen e një komisioni të tillë, që për mua është i ligjshëm, për faktin se dua të heq atë baltë që ka hedhur mbi punën dhe figurën time kryebashkiaku aktual Edi Rama”,-tha ai. Brojka ka kritikuar marrëdhëniet që ka krijuar Rama me opozitën, por njëkohësisht ka vlerësuar në pozicionin e një qytetari të thjeshtë, i cili nuk ka lënë pa përmendur arritjet e kryebashkiakut aktual. Ish-kryetari i bashkisë ka theksuar se gjatë kohës kur ai ka drejtuar Bashkinë e Tiranës, fondet që kanë qarkulluar në Bashki në atë kohë kanë qenë qesharake dhe nga viti ’97 fondet që i janë dhënë institucionit që ai ka drejtuar kanë qenë 15 milionë lekë të rinj investime në rrugë, një vit më pas ky fond ka qenë 5 milionë të rinj dhe pjesa tjetër është menaxhuar nga Ministria e Punëve Publike. Ndërsa në vitin ’99 komplet buxheti i shtetit ka shkuar për krizën kosovare. Albert Brojka ka theksuar se është gati që të dëshmojë në komisionin hetimor që u ngrit nga Parlamenti, duke theksuar se dëshmia e tij do të nxjerrë në shesh mjaft të vërteta, për të vendosur në vend figurën e tij. Brojka nuk ka lënë pa përmendur edhe arritjet gjatë kohës së qeverisjes së tij, në gjelbërim dhe në infrastrukturë.
