Re: Charles do martohet me Camilla
Më në fund oborri mbretëror pranon kurorëzimin e lidhjes së gjatë të Çarls me të dashurën e tij
Princi Çarls vendos të martohet me Kamilën
Shekulli
Pas një dashurie 30-vjeçare, mbreti i ardhshëm i Anglisë do të martohet, edhe pse Kamila nuk mund të bëhet mbretëreshë
Më në fund princi Çarls do të martohet me të dashurën e tij prej shumë kohësh Kamila Parker Bouls, pikërisht me gruan që është fajësuar edhe si ajo që shkatërroi martesën përrallore të princeshës Diana. Gati tetë vjet pas vdekjes së princeshës Diana në një aksident automobilistik, edhe Mbretëresha Elisabeth ka pranuar që Kamila të bëhet gruaja e dytë e mbretit të ardhshëm të Anglisë. Madje edhe dy djemtë e Princit Çarls me princeshën Diana, William dhe Harry, i kanë uruar çiftit të ri shumë fat në të ardhmen. Po kështu edhe kryeministri Toni Bler e konsideroi lajmin për martesën e Çarls dhe Kamila si një lajm shumë të gëzuar.
Çifti ka vendosur të martohet më 8 prill në kështjellën “Windsor” në perëndim të Londrës. Ata do të martohen në një ceremoni të qetë krejt në kontrast me martesën madhështore të princit me Dianën, e cila u kurorëzua në Katedralen e Shën Paulit në Londër. Kamila 57 -vjeçare, e divorcuar dhe nënë e dy fëmijëve, nuk mund të bëhet mbretëreshë në kohën kur princi Çarls, 56 vjeç, do të bëhet mbret. Kjo për shkak të disa pengesave kushtetucionale që kanë të bëjnë me martesa të tilla. Pas martesës ajo do të marrë titullin Dukesha më e lartë mbretërore e Cornwall-it. Sapo Çarls të bëhet mbret, gruaja e tij do të quhet Princesha bashkëshorte, në mënyrë që të shmanget çdo keqinterpretim kushtetucional. “Ajo mund të marrë statusin e mbretëreshës vetëm nëse miratohet një ligj për këtë çështje. Duhet që të kalohet një akt special në Parlament”, -thotë eksperti kushtetucional David Starkey për “Rojterin”. Këshilltarët mbretërorë kanë thënë se nuk ka nevojë për ndonjë ligj të ri pasi është e drejtë që ajo ta marrë titullin e mbretëreshës në krahë të mbretit të ardhshëm Çarls. Por ndoshta këtë pengesë çifti mund ta kalojë pas disa kohësh. Gjithë hapat që kanë hedhur dy të dashuruarit janë shumë të kujdesshme. Kamila prej shumë kohësh ka qenë më e urryera në publikun anglez, pasi është akuzuar si personi që prishi martesën e princeshës Diana që në fillimet e saj. Kamila u martua gati dhjetë vjet para Çarls dhe u divorcua një vit para tij (1995). Ndërsa Çarls u divorcua nga princesha Diana më 1996, edhe pse ai e kishte pranuar lidhjen e tij jashtëmartesore kohë më parë. Çifti duket se zgjodhi kohën e duhur për t’u martuar, gati 8 vjet pas vdekjes së Dianës. Gjatë vitit 2004, Çarls është parë shpesh në publik në krahë të Kamila -s. Tashmë nuk mbetej gjë tjetër veçse të kurorëzonin këtë dashuri të madhe që u ka kushtuar shumë thashetheme e intriga oborrit mbretëror. Edhe publiku dalëngadalë po krijon respekt për Kamila -n, dhe duket se po e pranon martesën e tyre, pas gati 30 vite dashurie.
Çarls & Kamila- historia e dashurisë
Kamila Shand, kështu është emri i fëmijërisë i gruas së ardhshme të princit Çarls. Çifti u takua për herë të parë në një ndeshje polo në vitin 1970. Një vit më vonë, Kamila i thotë: Stërgjyshja ime ka qenë e dashura e stër-stërgjyshit tënd, atëherë si thua?” Por Çarlsi atëherë vendosi që të përqëndrohej te karriera detare, kështu që Kamila u martua me admiruesin e saj të përhershëm majorin Endrju Parker Boulls në vitin 1973. Por ajo mbeti në kontakt me princin Çarls dhe ata u bënë miq sërish në fund të viteve ‘70. Kamila u bë edhe shoqëruesja zyrtare e Princit gjatë festimeve të pavarësisë në Zimbabve në 1980. Në vitin 1981 Çarlsi u martua me Diana Spenser, një bashkim që u nxit edhe nga Kamila, pasi thuhet se Çarlsi i propozoi Dianës në kopshtin e shtëpisë së familjes Boulls. Por martesa nuk e shuajti pasionin e tyre dhe dy vite pas lindjes së princit Herri në 1984, marrëdhënia e tyre u rindez. Diana xheloze, në një intervistë të famshme të atyre viteve u shpreh se “ne jemi tre në martesën tonë, kështu që është pak si shumë e populluar”. Në vitin 1992 doli në dritë një incizim i “Kamila gate”, një bisedë telefonike mes dy të dashuruarve. Në incizim, princi Çarls i thotë asaj “të dua” të tjera gjëra personale. Ndërsa zonja Parker heshti, por në vitin 1994 princi e pranoi në një dokumentar televiziv se ai kishte kryer një tradhti bashkëshortore. Kamila u bë kështu figura më e urryer e kombit- gratë e godisnin me ç’të mundin nëpër supermarkete. Në 1995 ajo dhe i shoqi, Andrew Parker Bowles u divorcuan dhe ajo u bë e ftuar e zakonshme në shtëpinë e Princit. Në gusht 1997 Diana vdiq në një aksident me makinë në Paris dhe Kamila u detyrua të rrinte disi në hije. Kjo pasi publiku nuk mund ta duronte dot një zëvendësim të Dianës. Sidoqoftë në 1999 ajo u takua me dy djemtë e Çarls-it, me princin William dhe Harry. Pastaj ajo u ftua në 50 -vjetorin e ditëlindjes së princit Çarls dhe në 2000 u takua me mbretëreshën. Në qershor 2004, ajo u shfaq për herë të parë në vizita zyrtare të Princit- një shenjë se roli i saj si e dashura e mbretit të ardhshëm më në fund u pranua, jo vetëm nga mbretëresha, por edhe nga publiku anglez.
Aferat mes dy familjeve
Kur familjet e princit të Uellsit dhe të fejuarës së tij aktuale Kamila Parker Bowles u takuan së bashku nuk kishin shumë nevojë për prezantime. Ata të dy e njihnin mjaft mirë njëri -tjetrin, edhe para se të martoheshin secili me persona të tjerë. Në fakt stërgjyshja e Kamilës ishte e dashura e stër-stërgjyshit të Çarlsit. Por edhe pjesëtarët e tjerë të familjeve të zgjeruara të secilit prej tyre kanë patur ca tërheqje dhe afera të fshehta. Mbreti i Anglisë në fillim të shekullit të 20-të, Eduardi VII ishte i dashuruar me Alice Keppel, që ishte stërgjyshja e Kamilës që ishte e martuar. Këtë lloj fakti, diku e dikur ia ka përmendur edhe Kamila Çarlsit: “Stërgjyshja ime ishte dashnorja e stër stërgjyshit tënd, atëherë çfarë?”. Ndërkohë treçerek shekulli më vonë, Çarlsi zë miqësi me një kalorës dhe një lojtar polo që quhej Endrju Parker Boulls. I ati i Endrju, Derek Parker Boulls, ka qenë një mik shumë i ngushtë i nënës mbretëreshë- gjyshes së Çarlsit. Ajo u bë kumbara e Endrjut. Endrju Parker Boulls dikur shoqërohej me motrën e Çarlsit, princeshën Anne, ndërkohë që Çarlsi dhe Kamlia ishin lidhur. Një brez më vonë djali i Kamilës dhe Endrjut, Tomi pati si kumbar princin Charls, që tashmë do të bëhet dhe bashkëshorti i nënës së tij. Kamila ka edhe një vajzë përveç Tomit, që quhet Laura.
11/02/2005
