Re: Bledar Kola positiv al nandrolone
Kola: Nuk e di përse akuzohem
I mërzitur tej mase. I ngarkuar me peshën e madhe të emocioneve. Nuk e di për çfarë akuzohet, sepse nuk ka parë asgjë me sytë e tij. I ndarë nga ekipi i tij pa asnjë motiv, por me besim te Zoti për të dalë e vërteta. Në këtë situatë aspak të këndshme, Bledar Kola tregon për 'Sportin shqiptar' gjithçka çfarë di rreth çështjes së tij, e cila është bërë objekt informacioni i agjencive më të rëndësishme të lajmeve.
- Në këtë fushatë që ka shpërthyer jo vetëm në Greqi për çështjen 'Kola', por edhe jashtë saj, cili është mendimi juaj? Pra, çfarë thotë vetë protagonisti i kësaj ngjarjeje?
- Së pari, dua t'ju falënderoj që m'u gjendet pranë në këto ditë të vështira. Do të thosha se gjërat janë shumë të ndërlikuara për sa i takon përcaktimit të lëndës. Në fillim u tha nandrolon, pastaj hashash. Por sido që të jetë, më çuditi vëmendja e madhe që tregoi shtypi dhe mjetet e tjera të informacionit. Në këtë moment që flasim, gjithçka e ka në dorë gjykata sportive, e cila do të vendosë për masën e dënimit. Nëse do të ketë një masë të tillë, së bashku me avokatin, i kam marrë të gjitha masat për të kërkuar të drejtën që më takon.
- Më falni që po ju pyes, por cila është substanca e përdorur që ju 'akuzon'? Dikush thotë se është nandrolon e dikush tjetër hashash. Më troç, cila është nga këto të dyja?
- Të them të drejtën, as unë që akuzohem nuk e di, nuk kam asnjë informacion për këtë. I vetmi informacion që më ka dhënë është se gjatë analizave të bëra u gjet një sasi mjaft e vogël e një lloj lënde, që ndërlikohet e që ka të bëjë me hashashin. Nuk shkruhej as lënda, as sasia e gjetur. Kjo më ka bërë të dyshoj që në momentet e para. Unë jam ai që akuzohem dhe nuk kam të drejtë të di se për çfarë akuzohem. Cila është substanca që paskam përdorur dhe sa është sasia e saj? Deri tani që po flasim bashkë, nuk di asgjë më tepër. Megjithatë, besoj se çdo gjë do të sqarohet shpejt nga organet përkatëse.
- Si e shikoni largimin nga Kalithea?
- Largimin nga Kalithea e shoh si një veprim të ngutur nga presidenti dhe drejtuesit e klubit. Për këtë dua të shpjegoj se largimi nga ky klub nuk ndodhi as sot dhe as dje, siç shkruhet në shtyp, por katër ditë më parë. Pikërisht ditën e premte, kur kisha për të bërë testin e dytë. Rezultatet e këtij testi u vonuan nuk e di se pse, gjë që më le për të dyshuar. Rezultatet u nxorën ditën e hënë. Kërkova gjithçka, për t'u njohur më mirë me të dhënat e këtij testi, por asnjëherë nuk m'u dhanë të sakta. Ata kishin marrë një vendim dhe unë rashë dakord që të largohem. Por ajo që më ka bërë jashtë mase përshtypje është jehona e madhe që pati kjo çështje jo vetëm në shtypin grek, por edhe në median e madhe botërore. Kjo më ka bërë përshtypje, në një kohë që asnjë veprim imi, as një gjest apo diçka tjetër nuk linte vend për dyshime në përdorimin e substancave të ndaluara.
- Në këtë periudhë, a keni pasur ndonjë ndihmë nga Federata jonë e Futbollit, ndoshta edhe për t'ju pyetur e për të qarë hallin me ju?
- E vetmja ndihmë që kam pasur nga Shqipëria jeni ju, gazetarët. Eshtë fakt se gazetarët shqiptarë më kanë marrë në telefon dhe, në telefonin tim celular, ai ka qenë i vetmi interesim.
- Cila do të jetë e ardhmja e Bledar Kolës?
- E ardhmja e Bledar Kolës? Nuk di çfarë t'ju them. Kjo që më ka ndodhur është një diçka e veçantë. Unë kam synuar gjithnjë tek e mira, tek e drejta. Unë do të luftoj me të gjitha mënyrat për të vënë në vend dinjitetin tim. Për sa i takon futbollit, gjithçka do ta përcaktoj pas marrjes së vendimit nga gjykata sportive.
- Me këto që thamë, nuk besoj se kemi sqaruar gjithçka. Keni gjë tjetër për të thënë?
- Nëpërmjet jush, dua t'u transmetoj një deklaratë të gjithë gazetarëve shqiptarë, që ta mësojnë të vërtetën nga Bledar Kola.
