Kupa E Shqipërisë, Ja Oraret E Ndeshjeve Çerekfinale

[Agjenti_007]

Federata Shqiptare e Futbollit ka zyrtarizuar oraret e sfidave çerekfinale për trofeun e dytë për nga rëndësia në sportin më popullor në vendin tonë.

Sektori i garave në FSHF ka bërë të ditur oraret e sfidave të kthimit të Kupës së Shqipërisë që do të zhvillohen të mërkurën më 17 shkurt. Pas këtij turi do të luhen edhe sfidat gjysmëfinale. Ato do të përcaktohen me short të lirë dhe do të luhen më 6 prill sfidat e para dhe më 20 prill ndeshjet e kthimit.

Teuta do të mbrojë në Kukës një avantazh të brishtë 1-0 në duelin e parë që mori në stadiumin “Niko Dovana”, por këtë radhë durrsakët do të kenë fushën kundërshtare si një minus të madh.

Vllaznia udhëton drejt Korçës ndërsa vendasit kërkojnë fitoren për t’u kualifikuar pas barazimit 0-0 që i lë llogaritë krejtësisht të hapura.

Edhe Tirana është më pranë kualifikimit me suksesin e parë 0-1 në Vlorë ndaj Flamurtarit, ndërsa sfida e fundit që mbyll fazën çerekfinale është ajo mes Partizanit dhe Laçit. Kryeqytetasit kërkojnë të zhvlerësojnë fitoren 1-0 të kurbinasve në një ndeshje që nis të mërkurën në orën 17:00.

Sfidat çerekfinale
Kukësi - Teuta 13:30
Skënderbeu - Vllaznia 13:30
Tirana - Flamurtari 13:30
Partizani - Laçi 17:00

 

[Agjenti_007]

Flamurtari, Skënderbeu e Kukësi në gjysmëfinale të Kupës

Tirana-Flamurtari ishte ndoshta ndeshja më emocionuese në çerekfinalet e kthimit të Kupës së Shqipërisë në futboll dhe jo pak surprizoi kualifikimi i vlonjatëve për më tej.

Bregdetarët që nisën çdo llogari nga disfata 0-1 në sfidën e parë i përmbysën kuotat e bluve duke iu imponuar 1-2 në “Selman Stërmasi”. Lojë e qetë dhe pak raste në startin e çerekfinales, por kjo ndryshoi shpejt me Telushin që i dha avantazhin ekipit mik.

Japonezi Fukui barazoi për Tiranën dhe ky rezultat i kualifikonte vendasit në gjysmëfinale. Por, Lushtaku shkërmoqi ëndrrat e kryeqyteasve për të fituar Kupën e Shqipërisë. Për të përmbyllur paraqitjen e dobët të Tiranës duhet të përmenden edhe dy kartonë të kuq të dhënë nga arbitri kryesor.

Skënderbeu nuk ishte në formën optimale kundër Vllaznisë, por pavarësisht impenjimit për t’u kritikuar sidomos në fundin e ndeshjes në Korçë, ia doli të kalojë në katër më të mirët e turneut.

Në sfidën e parë gjithçka u mbyll me shifrat 0-0, por në ndeshjen e kthimit “ujqërit” triumfuan 2-1. Renatinjo dhe Xhejms ishin autorët e golave për Skënderbeun, dy lojtarë të huaj që ishin të mjaftueshëm për të mos cënuar kualifikimin nga rrjeta e vonë e shkodranëve me autor Markun.

Kualifikim dhe festë për Kukësin në shtëpi pasi Kloadian Duro shpëton pankinën, ndërsa verilindorët mbesin në garë për Kupën. Stadiumi falas ishte vetëm njëri nga motivet e mbushjes së impiantit pasi në diskutim ishte kualifikimi i cili u arrit me fitoren e pastër 2-0 kundër Teutës.

Në rrjedhimet e një goditje këndi Shameti zhbllokoi rezultatin, ndërsa Malota firmosi suskesin e merituar kur duheshin vetëm tre minuta nga fundi i lojës.

 

[Agjenti_007]

Kupa, Laçi kalon në gjysmëfinale

Laçi i bashkohet Flamurtarit, Kukësit dhe Skënderbeut në mesin e katër skuadrave më të mira të cilat vazhdojnë luftën për trofeun e Kupës së Shqipërisë.

Partizani nuk arriti të përmbysë humbjen 2-0 që pësoi në ndeshjen e parë, duke bërë që fitorja në “Qemal Stafa” 1-0 të mos vlejë asgjë dhe t’i japë të drejtë kurbinasve të vazhdojnë më tej.

Skuadra kryeqytetase dominoi në fushën e lojës duke rrezikuar në shumë raste portën e Laçit, por rrjetën arritën ta gjenin vetëm një herë dhe atë me Xhevahir Sukajn.

Eliminimi nga Kupa mund të lërë Partizanin me zero trofe këtë sezon, pasi edhe në kampionat Skënderbeu ka fillur shkëputjen.

Ndërkohë, ditët e ardhshme shorti do të vendosë dhe gjysëmfinalet e këtij kompeticioni, ndeshjet e të cilës do të luhen me 6 dhe 20 prill.