Re: Ku jeni Tifozat e Vllaznise. Shkodra - Djepi i Futbollit Shqiptare
Vllaznia, e treta. Më mirë s'mund të bëhej
Ata që e kanë çuar ndër mend një pozicionim të tillë të skuadrës shkodrane në fillim të sezonit, mund të kenë qenë të paktë. Thënë më mirë, askush. Vllaznia nuk mund të renditej e treta. Gjërat për kuqeblutë patën një rrjedhë aspak të këndshme në atë pragsezoni. Vdekja e ish?presidentit Çela kishte shkatërruar çdo gjë. Dilema për zgjedhjen e pasuesit të tij ishte e madhe. Në radhë të parë, se nuk kishte njerëz që kishin para të tepërta për t'i hedhur te futbolli. Në radhë të dytë, se mes institucioneve të pushtetit lokal të Shkodrës lindi polemika e ngjyrimit partiak edhe të lojës që quhet futboll. Megjithatë, Vllaznia, edhe ashtu e pastërvitur mirë, u mbajt, derisa në krye të saj erdhën Agron Çela & Co. Por ishte shumë vonë, kjo nuk duhej harruar. Kontratat me lojtarët, presidenca e re e klubit i ka firmosur të premten pasdite të datës 22 gusht. Pak orë më vonë, ekipi do të nisej për në trasfertën me Partizanin, të cilën e humbi thellësisht 4?1. Dukej qartë që skuadra do të kishte probleme. Trajneri i atëhershëm, Medin Zhega, do të shprehej në shtyp se nuk bëhej kiameti me këtë humbje të pësuar. Kjo së bashku me eliminimin nga Kupa UEFA do t'i kushtonin atij largimin nga drejtimi i skuadrës. Haxhiosmanoviç, ai që shpresoi te ringritja Zëvendësuesi ishte gjetur tashmë, një njohje e vjetër për shkodranët, Dervish Haxhiosmanoviç. Që në momentin e parë, ai deklaron se Vllaznia do të luftonte për titullin kampion. Por duket qartë që ngutet, ndoshta ngaqë nuk i di mirë problemet që ka pasur skuadra. Për pasojë vijnë humbjet radhazi me Teutën e Dinamon. Në 5 ndeshjet e para të kampionatit, kuqeblutë kanë arritur të grumbullojnë vetëm 3 pikë. Por humbja 3?2, pas një loje të shkëlqyer kundër bardhebluve të Tiranës, jep shpresat e një ringjalljeje të shpejtë. Rezultatet fillojnë të vijnë, derisa fitorja kundër Partizanit në javën e parë të fazës së dytë e detyron presidentin Çela të deklarojë se Vllaznia tani do të luftonte për titullin kampion. Por në "Loro Boriçi" do të vijnë dy tronditje radhazi: 1?3 me Tiranën dhe 1?4 me Dinamon, të cilat mjaftuan për të kuptuar se kjo skuadër ishte shumë larg pretendimeve të tilla. Ekipi vazhdon të luajë thuajse me të njëjtin formacion nga mungesa e lojtarëve të stolit. E sikur të mos mjaftonte kjo, është edhe lodhja e madhe nga dendësia e ndeshjeve që i shoqëron. Pa harruar edhe "gjëmat" në ekip nga mosmarrëveshjet e disa prej lojtarëve me trajnerin Haxhiosmanoviç. Vllaznia, megjithatë, nga faza në fazë tregon rritje në lojën e saj. Faza e fundit, "trampolina" e vendit të 3-të Faza e fundit është fantastike, të cilën e mbyll si asnjë ekip tjetër, pa asnjë humbje. Kuqeblutë kanë lënë pas fillimisht Teutën dhe më pas Partizanin, në një kohë që gati arritën edhe Dinamon. Prej kësaj të fundit prisnin një "dhuratë" në finalen e kupës, për të mundur Partizanin, por kjo nuk ndodhi. Si pasojë, Vllaznia ka fituar vetëm Intertoton. Po ashtu, edhe "Këpucën e artë" për kapitenin e saj, Vioresin Sinani, merita e të cilit nuk përfshihet vetëm te 36 golat e shënuar, por edhe te udhëheqja që i ka bërë shokëve të ekipit. Ashtu siç meriton lavde edhe malazezi Haxhiosmanoviç, i cili ka meritën e krijimit të një ansambli shumë simpatik, ndonëse pa shumë "brumë" në radhët e tij. Në mbyllje, ajo që mund të shërbente si kartolinë për kuqeblutë është urimi për sezonin që mbyllën, duke vërtetuar edhe njëherë se Shkodra mbetet "violinë" e parë në futbollin shqiptar. "Deda", strategu i kuqebluve Malazezi i stolit shkodran duket më tepër se kurrë i vlerësuar në Shkodër. Të paktën nga drejtuesit e klubit "Vllaznia", të cilët janë "verbuar" tërësisht nga aftësitë drejtuese të "Dedës". Ky i fundit, në momente të ndryshme të sezonit që sapo u mbyll, ka pasur kontradikta shumë të mëdha me disa prej titullarëve të skuadrës, aq sa ata kanë arritur deri atje, sa kanë kërkuar largimin nga Vllaznia, nëse trajner i saj do të vazhdonte të ishte sërish malazezi. Megjithatë, para këtij presioni, presidenca e klubit nuk është lëkundur, teksa herë pas here ka deklaruar se Haxhiosmanoviçi është i paprekshëm. Ky fakt i ka bërë përshtypje edhe vetë njeriut të ardhur nga Podgorica për të punuar në Shkodër. Ai nuk e ka pritur kurrë që të ketë një mbështetje të tillë nga presidenca e klubit. Madje këtë gjë, në mënyrë konfidenciale, ia ka shprehur edhe presidentit Çela në mbrëmjen e mbylljes së sezonit. Pikërisht, kjo gjë i shton gjasat që malazezi të vazhdojë të jetë sërish në drejtimin e kuqebluve edhe sezonin tjetër.
