Re: Kenget ne mp3 dhe formate te tjera!
Ata VIP-at e sotëm të muzikës shqiptare dhe pirateria si "nxitëse" i përparimit e kanë katandisur muzikën shqiptare të sotme pothuaj në një grumbull plehrash. Pse kemi turp ta themi me zë të lartë këtë?
Ç'domethënë që botuesit ligjorë të muzikës nuk shpërndajnë dot muzikë në Shqipëri? Nuk vijnë dot kolitë me CD në Shqipëri? U mbaruan dyqanet për t'u dhënë me qera në Shqipëri? Nuk ka njerëz që do t'u pëlqente të shisnin muzikë, CD, DVD, si profesion?
Ky nuk është as moral, as dashuri për Madonën apo Elton John-in. Është rrjedha normale ku duhet të venë gjërat, në një shoqëri normale. Nëse justifikohet pirateria e këtij lloji, pse të mos justifikohet hajnia e rrugës e çfarëdo lloji? Si gurisht që do hidhesh përpjetë sepse nuk je ti ai që humb. Janë artistët që nuk nxjerrin dot jetesën, apo e nxjerrin jo më me art po me të tjera gjëra të rëndomta që mund ti bëjnë të rëndomtit. Kjo është krizë e shoqërisë dhe e artit bashkë: të rëndomtit "kujdesen" për artin dhe artistët merren me gjëra të rëndomta.
Dhe pastaj zotrote endesh rrugëve të Francës, dhe çdo lloj palloshi frëng të tregon me gisht si specie e një vendi pa kulturë e pa art. Dhe po njësoj unë në Greqi. Tregoju po deshe përralla. Ose shko tregojua atyre të huajve që punojnë në Tiranë.
Pa asnjë dyshim që bëhet fjalë për muzikë, art të vjedhur. TË VJEDHUR!!! Zog, a ke lexuar ndonjëherë se çfarë shkruan një CD i shitur ligjërisht për të drejtat e autorit, dhe se çfarë realisht të shitet ty? (UNAUTHORIZED HIRING, LENDING, PUBLIC PERFORMANCE, BROADCASTING, AND COPYING OF THIS RECORD PROHIBITED.)
MARRJA DHE DHËNIA ME QERA, LUAJTJA PUBLIKE, TRANSMETIMI, DHE KOPJIMI I KËTIJ REGJISTRIMI, TË PAUTORIZUAR, NDALOHEN.
Këto janë të drejtat që të njihen ty në çastin e shitjes-blerjes.
Pjesa që vjen erë në këtë histori, ajo e lidhur me praktikat e shtëpive botuese është e vërtetë. Por pirateria nuk bën dallim midis krijimtarisë që vjen nga artistë nën ombrellën e shtëpive botuese dhe asaj që vjen nga artistë të pavarur.
Nuk ke frikë, se pasionet si të verbër që janë, do të të çojnë te rruga më e thjeshtë, shkarkimi i mp3 nga interneti dhe nga atje ku nuk paguhet?
Zog, ti e di shumë mirë, që pirateria, tradicionalisht është murtaja e zhvillimit, ngaqë në themel ka sigurim vlerash pa punuar dhe mbi kurrizin e tjetrit. Mundësia e sigurimit të një patente nga e cila mund të nxjerrësh para, ka qenë nxitësi kryesor i zhvillimit. Kudo dhe kurdo që ligjin e bëjnë piratët, nuk sheh gjë tjetër veç flamurit të zi me atë gjënë e bukur të bardhë në mes.
Po të jesh muzikant, meqë e kishim fjalën te mp3-at, apo të kesh miq muzikantë, që fitojnë më pak se ai që u shet muzikën e vjedhur rrugëve të Tiranës, fillon e mendon ndryshe.
Për të mos u hedhur më pas te cilësia, kur krahasohet një CD me mp3-at e përftuar prej tij. Në shumicën e rasteve kur bëhet fjalë për pirateri, na falni po mp3 janë poshtë CD-së.
Vimar, ajo që thua se ata që duan muzikë jemi ne që jemi jashtë, mundet të jetë e vërtetë. Dhe kjo e bën më të lehtë, krijimin e një tregu muzike normal. 10 apo 15 Euro për një CD normal, serioz, në të gjitha pikëpamjet, nuk mund të qahet kush se nuk blihet. Tejkalohet kushedi sa herë nga paratë e harxhuara për birra lumë apo kafera në kafehane moderne brenda një muaji.
