Bujqësia greke në duart e shqiptarëve
Sipas një studimi, në 70 % të ekonomive bujqësore punojnë emigrantë. Shqiptarët përfaqësojnë 1/10 e fuqisë punëtore në Greqi
Bujqësia greke në duart e shqiptarëve
Qeveria e Athinës: “Pa kontributin e emigrantëve të huaj, bujqësia greke do të kishte vdekur”
Robert Goro/ Athinë
ATHINË - Sipas një studimi, 70% e ekonomive bujqësore greke kanë të punësuar emigrantë, shumica dërrmuese e të cilëve janë shqiptarë. Për një pjesë të madhe të fermerëve vendas, kjo është një zgjidhje e detyruar, teksa, siç pohojnë vetë grekët, nuk pranojnë të punojnë në bujqësi. Specialistët vënë në dukje se kontributi i emigrantëve në ekonominë bujqësore është shumë i rëndësishëm, jo vetëm për jetën ekonomike të zonave rurale, por edhe për mbështetjen demografike dhe shoqërore të popullsisë. Para pesë vjetësh, kur policia greke kishte nisur një nga operacionet e zakonshme për kapjen dhe deportimin e emigrantëve shqiptarë, kryetari i bashkisë i një zone të rëndësishme bujqësore i kishte dërguar një letër ministrit të Rendit, ku kërkonte pezullimin e këtyre operacioneve. Arsyeja që kryebashkiaku kishte marrë mundimin të dërgonte këtë letër përgjëruese, nuk qëndronte ndërkaq në solidaritetin ndaj emigrantëve. Arsyeja shpjegohej në përfundim të letrës, ku ministrit i premtohej se sapo të përfundonte fushata e mbledhjes së asparagusit, fermerët do t'i dorëzonin vetë në polici emigrantët e paligjshëm. Si për t'u plotësuar edhe më shumë paradoksi, drejtues të pushtetit lokal të zonës, i kishin pohuar atëherë BBC-së, se ndërsa papunësia në të gjithë qarkun kapte shifrën 47%, ftesës për të punuar në punët e stinës në bujqësi i ishin përgjigjur vetëm dy të papunë vendas.
Studimi
Është thënë vazhdimisht gjatë këtyre dhjetë vjetëve edhe nga anëtarë të Këshillit të Ministrave, se pa kontributin e emigrantëve të huaj, bujqësia greke do të kishte vdekur me plot kuptimin e fjalës. Ky pohim përfshihet edhe në studimin më të fundit, të zhvilluar nga universitetet greke të Patras e të Janinës, ku shqyrtohet kontributi i emigrantëve në sektorin e bujqësisë. Sipas studimit, 70% e ekonomive bujqësore greke mbijetojnë vetëm në sajë të punësimit të emigrantëve. Shumica e tyre, për saktësi 90%, janë shtetas shqiptarë dhe ky fakt i ka shtyrë gazetarët vendas që me një fjali të vetme të kumtojnë: “Bujqësia greke ndodhet në duart e shqiptarëve”. Gati gjysma e fermerëve grekë e konsiderojnë si tepër pozitiv punësimin e emigrantëve në sektorin bujqësor, ndërsa më shumë se një e treta e të pyeturve thonë se pa aktivizimin e emigrantëve nuk do të mund t'i mbanin ekonomitë e tyre bujqësore. Për sa i përket përzgjedhjes së krahut të huaj të punës, kjo duket se ka qenë një zgjidhje emergjente, teksa 60% e fermerëve deklarojnë se për sektorin në fjalë gjenden vetëm emigrantë, ndërsa 40% pohojnë se nuk mund të bëjnë ndryshe, përderisa grekët nuk pranojnë të punojnë në bujqësi.
Të tjera kontribute
Siç theksojnë autorët e studimit, kontributi i emigrantëve ka qenë i rëndësishëm jo vetëm për jetën ekonomike të zonave rurale, por edhe për mbështetjen demografike dhe shoqërore të popullsisë. Në të vërtetë, një fakt që është vënë në dukje është, për shembull, se shumë prej shkollave nëpër fshatra nuk do të mund të funksiononin po të mos ishin fëmijët e emigrantëve. Madje, autorët e studimit theksuan se prania e emigrantëve përbën një rilindje të vërtetë të zonave bujqësore. Studimi u paraqit në një sesion me temë “Emigracioni në Greqi, fakte, pasoja dhe politika”, ku ndër të tjera u tha se emigrantët e huaj, shumica e të cilëve vijnë nga vendet ballkanike, me të parët shqiptarët që përbëjnë 65% të numrit të përgjithshëm, përfaqësojnë një të dhjetën e fuqisë punëtore të Greqisë.
Sipas një studimi, në 70 % të ekonomive bujqësore punojnë emigrantë. Shqiptarët përfaqësojnë 1/10 e fuqisë punëtore në Greqi
Bujqësia greke në duart e shqiptarëve
Qeveria e Athinës: “Pa kontributin e emigrantëve të huaj, bujqësia greke do të kishte vdekur”
Robert Goro/ Athinë
ATHINË - Sipas një studimi, 70% e ekonomive bujqësore greke kanë të punësuar emigrantë, shumica dërrmuese e të cilëve janë shqiptarë. Për një pjesë të madhe të fermerëve vendas, kjo është një zgjidhje e detyruar, teksa, siç pohojnë vetë grekët, nuk pranojnë të punojnë në bujqësi. Specialistët vënë në dukje se kontributi i emigrantëve në ekonominë bujqësore është shumë i rëndësishëm, jo vetëm për jetën ekonomike të zonave rurale, por edhe për mbështetjen demografike dhe shoqërore të popullsisë. Para pesë vjetësh, kur policia greke kishte nisur një nga operacionet e zakonshme për kapjen dhe deportimin e emigrantëve shqiptarë, kryetari i bashkisë i një zone të rëndësishme bujqësore i kishte dërguar një letër ministrit të Rendit, ku kërkonte pezullimin e këtyre operacioneve. Arsyeja që kryebashkiaku kishte marrë mundimin të dërgonte këtë letër përgjëruese, nuk qëndronte ndërkaq në solidaritetin ndaj emigrantëve. Arsyeja shpjegohej në përfundim të letrës, ku ministrit i premtohej se sapo të përfundonte fushata e mbledhjes së asparagusit, fermerët do t'i dorëzonin vetë në polici emigrantët e paligjshëm. Si për t'u plotësuar edhe më shumë paradoksi, drejtues të pushtetit lokal të zonës, i kishin pohuar atëherë BBC-së, se ndërsa papunësia në të gjithë qarkun kapte shifrën 47%, ftesës për të punuar në punët e stinës në bujqësi i ishin përgjigjur vetëm dy të papunë vendas.
Studimi
Është thënë vazhdimisht gjatë këtyre dhjetë vjetëve edhe nga anëtarë të Këshillit të Ministrave, se pa kontributin e emigrantëve të huaj, bujqësia greke do të kishte vdekur me plot kuptimin e fjalës. Ky pohim përfshihet edhe në studimin më të fundit, të zhvilluar nga universitetet greke të Patras e të Janinës, ku shqyrtohet kontributi i emigrantëve në sektorin e bujqësisë. Sipas studimit, 70% e ekonomive bujqësore greke mbijetojnë vetëm në sajë të punësimit të emigrantëve. Shumica e tyre, për saktësi 90%, janë shtetas shqiptarë dhe ky fakt i ka shtyrë gazetarët vendas që me një fjali të vetme të kumtojnë: “Bujqësia greke ndodhet në duart e shqiptarëve”. Gati gjysma e fermerëve grekë e konsiderojnë si tepër pozitiv punësimin e emigrantëve në sektorin bujqësor, ndërsa më shumë se një e treta e të pyeturve thonë se pa aktivizimin e emigrantëve nuk do të mund t'i mbanin ekonomitë e tyre bujqësore. Për sa i përket përzgjedhjes së krahut të huaj të punës, kjo duket se ka qenë një zgjidhje emergjente, teksa 60% e fermerëve deklarojnë se për sektorin në fjalë gjenden vetëm emigrantë, ndërsa 40% pohojnë se nuk mund të bëjnë ndryshe, përderisa grekët nuk pranojnë të punojnë në bujqësi.
Të tjera kontribute
Siç theksojnë autorët e studimit, kontributi i emigrantëve ka qenë i rëndësishëm jo vetëm për jetën ekonomike të zonave rurale, por edhe për mbështetjen demografike dhe shoqërore të popullsisë. Në të vërtetë, një fakt që është vënë në dukje është, për shembull, se shumë prej shkollave nëpër fshatra nuk do të mund të funksiononin po të mos ishin fëmijët e emigrantëve. Madje, autorët e studimit theksuan se prania e emigrantëve përbën një rilindje të vërtetë të zonave bujqësore. Studimi u paraqit në një sesion me temë “Emigracioni në Greqi, fakte, pasoja dhe politika”, ku ndër të tjera u tha se emigrantët e huaj, shumica e të cilëve vijnë nga vendet ballkanike, me të parët shqiptarët që përbëjnë 65% të numrit të përgjithshëm, përfaqësojnë një të dhjetën e fuqisë punëtore të Greqisë.